ژنێکى کورد له‌نێو 35 کۆچبه‌ردا رزگارى ده‌بێت 28 کاتژمێر له‌ئاودا ده‌مێنێته‌وه‌

2018-10-11 11:37:57



هاوڵاتى
میدیاکانى تورکیا ناسنامه‌ى ئه‌و ژنه‌یان ئاشکراکرد که‌ له‌ ڕووداوى نقومبوونى به‌له‌مێکى کۆچبه‌ران له‌ ده‌ریاى ئیجه‌ ڕزگارى بوو.
به‌پێى زانیاریه‌کانى ماڵپه‌ڕی"ئێن سۆن هه‌به‌ر"ى تورکى ژنه‌ کورده‌که‌ ناوى مه‌هاباد ئیسماعیل عه‌لی-ه‌و هاوسه‌ره‌که‌ى و پێنج منداڵى له‌ ئاوه‌که‌دا بێ سه‌روشوێن بوون. 

هه‌روه‌ها ژنه‌ کورده‌که‌ ماوه‌ى ٢٨ کاتژمێر له‌ ئاوه‌که‌دا ماوه‌ته‌وه‌ و به‌هۆى بوونى هێله‌کى فریاکه‌وتن سه‌ر ئاوکه‌وتووه‌ و دواتر له‌لایه‌ن پۆلیسى که‌ناراوه‌کانى شارى ئیزمیر ڕزگارکراوه‌.
ژنه‌که‌ له‌ لێدوانێکدا به‌ میدیاکانى ڕاگه‌یاند:" به‌له‌مه‌که‌ ٣٥ کۆچبه‌رى تێدابووه‌ و به‌شێکى زۆریان هاوڵاتى باشووى کوردستان بوون".
مه‌هابادباسى له‌وه‌شکردووه‌ که‌ "من و منداڵه‌کانم هێله‌کى فریاکه‌وتنمان له‌به‌ردابوو، به‌ڵام مێرده‌که‌م له‌به‌ریدانه‌بوو، له‌ دواى ژێرئاوکه‌وتنى به‌له‌مه‌که‌ ئیدى نازانم منداڵه‌کانم چیان لێهات".
ئه‌وه‌شى رونکردۆته‌وه‌ کاتێک به‌له‌مه‌که‌ ژێرئاوکه‌وتبووه‌، "من و هاوسه‌ره‌که‌م له‌ نزیک یه‌کبووین و به‌ مه‌له‌کردن گه‌ڕاینه‌وه‌ بۆ که‌ناراوه‌که‌، به‌ڵام هاوسه‌ره‌که‌م له‌ شه‌وه‌وه‌ تا نیوه‌ڕۆ به‌رگه‌ى شه‌پۆله‌کانى گرت، ئیدى تواناى نه‌ما و نازانم چى به‌سه‌ر هات".

به‌پێى میدیاکانى تورکیا بێت تا ئیستا گه‌ڕان به‌دواى ته‌رمى کۆچبه‌ره‌کانى دیکه‌ به‌رده‌وامى هه‌یه‌ و ته‌رمى ٨ کۆچبه‌ر له‌لایه‌ن پۆلیسى که‌ناراوه‌کانى تورکیاوه‌ دۆزراونه‌ته‌وه‌، که‌ دوو له‌ ته‌رمه‌کان منداڵه‌ ته‌مه‌ن ٩ ساڵ و ١٢ ساڵه‌که‌ى مه‌هاباد ئیسماعیلن.

بابه‌تی په‌یوه‌ندیدار