مەزڵوم عەبدی: پابەندین بە خێرا تێکەڵکردنەوەی هێزەکانمان لەگەڵ سوپای سوریا

هاوڵاتی لەچاوپێکەوتنێکی تایبەت لەگەڵ رۆژنامەی هاوڵاتیدا زاگرۆس هیوا وتەبێژی پەیوەندییەکانی کەجەکە دەڵێت، سەبارەت بەو دەنگۆیانەی ماوەیەک لەمەوبەر باسی هەڵگیرسانی جەنگ لەنێوان گەریلاکانی پەکەکەو پێشمەرگەکانی پارتی دیموکراتی کوردستان بەیارمەتی تورکیا، ببووە باس و خواسی ناو سۆشیال میدیای کوردی و هەریەک لەلای خۆیەوە بەجۆرێ شیکارو راڤەی بابەتەکەیان دەکرد ،تورکیا ڕێ خۆشدەکات بۆ شەڕی نێوان گەریلا و پێشمەرگە و سەبارەت بەڕێکەوتنی ئەردۆغان و ئیبراهیم رەئیسی،  زاگرۆس هیوا پێی وایە  کاتێک ئەردۆغان لەگەڵ ئێران، سوریا یان عێراقدا کۆدەبێتەوە، هەوڵدەدات مسۆگەری ئەوە وەربگرێت کە لەم سێ وڵاتەدا هیچ هەنگاوێت کە رەنگە لەئێستا و داهاتوودا لەبەرژەوەندی کورددا بشکێتەوە هەڵنەگیرێت و وایان لێبکات کەئەوانیش رێک وەکو تورکیا دژە-کورد بن   هاوڵاتی: راستی رووداوەکانی ئەمدواییەی شەڕی پێسمەرگەو گەریلا چۆن هەڵدەسەنگێنن کە لەهەمان کاتدا ببووە باس و خواسی  گەرمی نێو سۆسیال میدیا؟ زاگرۆس هیوا: «چەند رۆژێک لەمەوپێش لەچاپەمەنی باشوری کوردستاندا بەڵگەیەک بڵاوکرایەوە کەتیایدا فەرمان بەهێزە چەکدارەکانی پەدەکە کرابوو لەهەر شوێنێک گەریلایان بینی بێدوودڵی تەقەیان لێبکەن و شەهیدیان بکەن. بێگومان ئەمە تەنیا فەرمانێکی سەربازی نییە، بۆچوون و هەڵوێست و سیاسەتێکی بەرنامەبۆداڕێژراوە لەلایەن دەوڵەتی داگیرکەری تورکیاو پەدەکەوە گەرچی پەدەکە نکۆڵی لەم بەڵگەیە کرد، بەڵام لەکردەوەدا راستییەکەی بۆ هەموو کەسێک ئاشکرابوو. دوو رۆژ پاش ئاشکرابوونی ئەم بەڵگەیە، چەکدارانی پەدەکە لەشوێنێک کە لەساڵی ١٩٨٢ەوە رێگەی هاتووچووی هەڤاڵانی ئێمەیە، شانبەشانی سەربازانی تورکیا لەگوندی سەرگەڵێ ئامێدی بۆسەیان داناو تەقەیان لەهەڤاڵان کرد. لەم بۆسەیەدا دوو هەڤاڵمان بریندار بوون،هاوکات چەکدارانی پەدەکە ئەحداسیاتی دوو سەیارەی ئێمەیان دا بەسوپای داگیرکەری تورک و لەئەنجامدا بوونە ئامانجی فڕۆکە جەنگییەکانی تورکیاو لەناوچوون. ئەمە نموونەیەکی زۆر ئاشکرای هاوکاری پەدەکەو تورکیایە دژ بەگەریلا. بەگوێرەی وەزارەتی ناوخۆی سەر بە پەدەکە سوپای تورکیا بۆی هەیە بەدەیان کیلۆمەتر بێتە ناوەوەی هەرێمی کوردستان، بەسەدان دەبابەو تۆپ و سەیارەی سەربازی لەدەوروبەری ئامێدی جێگی بکات و ئەمە هیچ‌ مەترسییەک دروست ناکات، بەڵام گەریلا بۆی نییە بەرەنگاری ئەو داگیرکەرانە ببێتەوە. پەدەکە بۆ خۆی رێگا بۆ سوپای داگیرکەر دروستدەکات، ئیمکانیاتی لۆجیستیکییان بۆ دابین دەکات، حەرەسیاتیان دەگرێت، لەسەر شوێن و جوڵەی گەریلا زانیاری و ئیستخباراتیان پێدەدات، بریندارەکانیان تیمار دەکات و دەیانگوازێتەوە. لەهەمانکاتیشدا بۆسە بۆ گەریلای ئازادی کوردستان دادەنێت و هێرشیان دەکاتە سەرو شەهیدو برینداریان دەکات. ئەگەر پەدەکە هێزێکی کوردی بوایە پێویست بوو کارێکی پێچەوانەی ئەمەی کردبایە. بەڵام بەداخەوە بۆتە بەکرێگیراوی دەوڵەتی داگیرکەری تورکیاو ئەجێندای تورکیا پێویستی بەچی بێت ئەوە جێبەجێ دەکات. ئەم سیاسەتەی پەدەکە نەک تەنیا زەرەر لەبەرژەوەندی هەموو کورد دەدات، بەڵکو هەبوونی کوردو نیشتمانی کورد دەخاتە بەردەم مەترسییەکی زۆر جیددیەوەو بانگەوازیمان هەیە بۆ رای گشتی، رۆشنبیران، هونەرمەندان، نووسەران، کەسایەتییە کۆمەڵایەتیی و ئاینییەکان، رێکخراوەکانی کۆمەڵگای مەدەنی و هەموو هێزو لایەنە سیاسییەکانی هەر چوار بەشی کوردستان کە لەدژی ئەم کردەوانەی پەدەکە هەڵوێست وەربگرن».   هاوڵاتی: خوێندنەوەی ئێوە چییە بۆ رێککەوتنی ئەمدواییەی نێوان ئێران و تورکیا؟ زاگرۆس هیوا: « تورکیا ئەوە باش دەزانێت کەئەگەر دەستوری عێراق لەسەر بنەمای داننان بەهەبوون و مافی دەستووری و دیموکراتی گەلی کورد جێبەجێ بکرێت عێراق دەبێتە پێشەنگی رۆژهەڵاتی ناوەڕاست و لەهەموو بوارێکدا پێشدەکەوێت، هەربۆیە بەهاوکاری لەگەڵ پەدەکەدا هەوڵدەدات پێگەی کورد لەدەستوردا نەهێڵێت، کورد لەهەرێمە جێناکۆکەکاندا لەمافی خۆی بێبەش بکات و هەروەها باشوری کوردستان داگیربکات. تورکیا دەیەوێت عێراق و باشوری کوردستان رووی ئارامی و سەقامگیری بەخۆیانەوە نەبینن و هەمیشە و دایم موحتاجی تورکیا بن. بێ تورکیا نان و ئاویان پێ نەخورێت. ئێستا هەموو هەوڵدانی تورکیا ئەوەیە کەناکۆکی و شەڕو ئاژاوە لەنێوان کوردو عەرەب، کوردو تورکمان، کوردو دەوڵەتی عێراقدا دروستبکات. هەڕەشەکردنی تورکیا لەبەغدادو لەسلێمانی هەڕەشەیە لەدەستوورو لەباشور. ئەگەر عێراق بێت و خۆی رادەستی ئەم جۆرە خۆسەپاندنانەی تورکیا بکات، ئەوا سەد ساڵ بەرەو دواوە دەگەڕێتەوە و جارێکی دی کێشەیەک بەناو کێشەی کورد لەعێراقدا سەرهەڵدەدات و ئەمجارە دینامیکی زۆر جیاوازتر دێنە ناو کایەکەوە. تورکیا دەزانێت کە بەتەنیا هێزی خۆی تێر ناکات کەئەمە بەسەر بەغداددا بسەپێنێت، بۆیە پەنا دەباتەبەر ئێران تاکو کاریگەری خۆی لەسەر دەوڵەتی عێراق لەم پێناوەدا بەکاربهێنێت. ئەردۆغان وەکو ئامادەکارییەکی پێشوەختە بۆ سەردانەکەی رەئیسی بۆ ئەنکەرە سەرۆکی دەزگای تیرۆریستی میتی ناردە بەغدا. واتە، ئەردۆغان چاوپێکەوتنەکانی ئیبراهیم کالن و سەردانەکەی ئیبراهیم رەئیسی وەک یەک پاکێج دەگرێتە دەست. ئەگەر ئەم چاوپێکەوتنانە لەکۆنتێکستی دەنگۆیەکانی کشانەوەی ئەمریکا لەعێراق و سوریاو هەروەها کۆبوونەوەی چاوەڕوانکراوی ئاستانا لەنێوان ئێران و تورکیاو روسیادا بگرینەدەست، دەبینین کەتورکیا هەم لەئاستی نێودەوڵەتی و هەم لەئاستی هەرێمی ئامادەکارییەکی بەرفراوانی سیاسی و دیپلۆماسی و ئابووری بۆ هێرشێکی بەرفراوانی داگیرکاری سەربازی لەسەر باشورو رۆژئاوای کوردستان دەکات. زاتەن ئەردۆغان بەڕاشکاوانە ئەمەی هێنایەسەر زمان. بێگومان هێزە هەرێمی و نێودەوڵەتییەکانیش پلانی خۆیانیان بۆ هەرێمەکە هەیەو هەموو شتێک بەگوێرەی پلانی تورکیا ناڕوات، بەڵام وەکو کورد پێویستە گرەو لەسەر سیاسەتی هیچ کام لەم هێزانە نەکەین و بەتێکۆشان و بەگیانی یەکێتی نەتەوەیی بەرەنگاری ئەم هێرشانە ببینەوە. ئەردۆغان بەرلەوەی چاوی بەئیبراهیم رەئیسی بکەوێت، تاتوانی هەڕەشەی لەعێراق و گەلی باشور کردو پاشان سەرۆکی دەزگای سیخوڕی میتی ناردە بەغداد. ئەردۆغان کاریگەری ئێران لەسەر سیاسەتی عێراق دەزانێت و دەزانێت کەئەگەر بیەوێت هەنگاوێک دژ بەکورد لەعێراقدا هەڵبگیرێت، پێویستە هاوکاری ئێرانیشی لەپشت بێت. راستییەکی دی عێراقیش هەیە. عێراق تاکە دەوڵەتە لەڕۆژهەڵاتی ناویندا کەکێشەی کوردی لەبواری دەستوریدا چارەسەر کردووە. بەشێوەیەکی فەرمی دانی بەناسنامەو هەبوونی کورددا ناوەو مافەکانی لەدەستور جێگیرکراوە. ئەوەی ماوە کێشە دیموکراتی بوونە، هەم دیموکراتی بوونی عێراق و هەم دیموکراتیبوونی هەرێمی کوردستان. لەلای تورکیاوە ئەمە هەنگاوێکی زۆر مەترسیدارەو پێویستە ئەم مافە بۆ کورد نەمێنێت. هەربۆیە لەکردەوەدا دان بەدەستووری عێراقدا نانێت و وەک ئەوەی کە لەم دەستورەدا ناوی کوردو کوردستان نەهاتبێت هەڵسوکەوت دەکات. بۆ نموونە، ستاتۆی هەرێمی کوردستان، وەکو ناوو وەکو قەوارە لەدەستوردا چەسپاوەو هەموو دونیا ئیعترافی پێدەکات و تورکیاش لەعورفی دیپلۆماتیدا پێویستە بەباشور بڵێی هەرێمی کوردستان. بەڵام دەست لەعیناد هەڵناگرێت و هەر دەڵێت باکوری عێراق. واتە لەعێراقیش هەمان سیاسەتی دژە-کوردی خۆی پەیڕەو دەکات. ئەمە لەکاتێکدایە کەدەسەڵاتداری سەرەکی باکوری عیراق کە پەدەکەیە هاوکارو بەکرێگیراوی خودی تورکیایە.بەڵام لەگەڵ ئەوەشدا ئامادە نییە بڵێ هەرێمی کوردستان». هەر لەدرێژەی قسەکانیدا بۆ هاوڵاتی وتەبێژی پەیوەندییەکانی کەجەکە وتی، « بەگوێرەی راگەیاندنە فەرمییەکانی هەردوولا فۆکسی ئەم کۆبوونەوەیە ل سەر بابەتە ئابوورییەکان بووە، بەڵام لەگەڵ ئەوەشدا لەسەر زۆر بابەتی سیاسی سەبارەت بەهەرێمی رۆژهەڵاتی ناوەڕاست و بەتایبەت کوردستانیش هەڵوێستیان دەربڕیوە. ئەوە شتێکی روون و ئاشکرایە کە گێجەنگەی (میحوەری) سەرەکی و بابەتی یەکەمی هەموو کۆبوونەوە دیپلۆماسیەکانی ئەردۆغان دژایەتی گەلی کوردە. ئەردۆغان دەیەوێت کۆدی سیاسەتی دەوڵەتی تورکیا بەرامبەر بەکورد - کەهەمان نکۆڵی و جینۆسایدە - بەسەر هەموو لایەنێکدا بسەپێنێت، بەسەر هەموو دەوڵەتان و هێزە جیهانییەکاندا. بەتایبەت کاتێک کەئەردۆغان لەگەڵ ئێران، سوریا یان عێراقدا کۆدەبێتەوە، هەوڵدەدات مسۆگەری ئەوە وەربگرێت کە لەم سێ وڵاتەدا هیچ هەنگاوێت کە رەنگە لەئێستا و داهاتوودا لەبەرژەوەندی کورددا بشکێتەوە هەڵنەگیرێت و وایان لێبکات کەئەوانیش رێک وەکو تورکیا دژە-کورد بن». دەشڵێت، «بەر لەم کۆبوونەوەیە ئەردۆغان لەڕێگای داعشەوە هێرشی کردەسەر ئێران و لەشاری کرمان نزیکەی سەد کەسی کوشت. ئارمانجی ئەم هێرشەی ئەردۆغان ئەوە بوو کەئەم هێرشە بخاتە پاڵ ئیسرائیل و ئێران پەلکێشی شەڕی ئیسرائیل-حەماس بکات و ناچاری ئەوەی بکات کە لەزۆر بابەتدا گوێڕایەڵی تورکیا بێت بەڵام ئێرانیش بەلێدانی هەرێمەکانی ژێر دەسەڵاتی تورکیاو داعش لە ناو خاکی سوریاو عێراقدا وەڵامی ئەم هێرشەی تورکیای دایەوە. واتە، رەئیسی نەیویست کە بەبێ ئەوەی کە تۆڵەی خۆی لەئەردۆغان بکاتەوە، بڕوات دەست لەناو دەستی بنێ. ئێران و تورکیا هەموو ئیمکانیاتی ئابووری خۆیان سەرفی ململانێیەکانی رۆژهەڵاتی ناوەڕاست دەکەن. بەتایبەت هەموو ئابووری تورکیا بۆ شەڕ لەدژی گەلی کورد لەناوخۆی تورکیاو هەروەها داگیرکردنی باشورو رۆژئاوا تەرخان کراوە. هەربۆیە لیرەی تورکی رۆژ لەدوای رۆژ هاڕە دەکات. ئێرانیش لەسەر حیسابی قوتی گەلانی ناو ئێران دارو نەداری خۆی پێشکەشی گروپە پرۆکسیەکانی دەکات، لەیەمەنەوە بگرە تا لوبنان. هەربۆیە ئەم دوو وڵاتە بۆ راستکردنەوەی باری لاری ئابووری و دارایی پێویستییان بەیەکدی هەیە. ئێران پێویستی بەدۆلارەو تورکیاش پێویستی بەبازاڕ.  

هاوڵاتی بەڕێوەبەرایەتیی پۆلیسی سلێمانی دەستگیرکردنی سێ تۆمەتباری ڕاگەیاند کە بازرگانییان بە جەستەی مرۆڤەوە کردووە. ئەمڕۆ چوارشەممە ٣١ی کانونی دووەمی ٢٠٢٤ بەڕێوەبەرایەتیی پۆلیسی پارێزگای سلێمانی ڕایگەیاند "دوای ئەوەی زانیاری گەیشتە دەست هێزەكانی پۆلیس كە سێ‌ تۆمەتبار بازرگانی بە جەستەی مرۆڤەوە دەكەن، هێزەكانی پۆلیس لێكۆڵینەوەو بەدواداچوونەكانیان دەستپێكردوو دوای وەرگرتنی بڕیاری دادوەر، توانرا لەلایەن مەفرەزەكانی بنكەی پۆلیسی ئەزمەڕەوە تۆمەتباران بدۆزرێنەوەو دەستگیربكرێن". پۆلیسی سلیمانی ئاماژەی بەوەشکردووە کە  "لەئێستادا ئەو تۆمەتبارانەى دەستگیر کراون کە دوو پیاو و ژنێکن بە ناوەکانى (ت، م، ج / م، ب، ك / س، ك، ش ).بە ناسنامە عەرەب، بەبڕیاری دادوەرو بەپێی مادەی (٢) لەیاسای نەهێشتنی بازرگانیكردن بە جەستەی مرۆڤەوە ڕاگیراون و لێكۆڵینەوە لەگەڵیان بەردەوامە".

هاوڵاتی لقی‌ سلێمانی‌ سه‌ندیكای‌ كارمه‌ندانی‌ ته‌ندروستی‌ ئاشكرایكرد كه‌ تا سه‌ره‌تای‌ هه‌فته‌ی‌ داهاتوو به‌رده‌وام ده‌بن له‌ کارکردن و گەر شایستە داراییەکانیان دابەشنەکرێت توانای‌ به‌رگه‌گرتنیان نامێنێت و بایكۆت ده‌ستپێده‌كه‌ن. سەندیکای کارمەندانی تەندروستی لقی سلێمانی لە راگەیەنراوێکدا بڵاویان کردەوە، ئاشکرایە قەیرانی دارایی بە گشتی تەنگی بە هەموان هەڵچنیەوە و بە ئەستەم دەتوانرێت بەردەوام ببدرێت بە پێشکەشکردنی خزمەتگوزاری تەندروستی، دواکەوتنی موچە و پێنەدانی سێ مانگی دیکە لە موچەی ساڵی 2023 هێندەی تر ژیان و گوزەرانی کارمەندانی تەندروستی قورستر کردوە. ئەوەشخراوەتەڕو، لە کاتێکدا زۆربەی نەخۆشخانە و سەنتەر و مەڵبەند و بنکە تەندروستییەکان چەند شار و شارۆچکەیەکی دەوروبەر بایکۆتیان کردوە و نەخۆشەکانیان رو لە شاری سلێمانی دەکەن، هێندەی تر ئەرکی سەر شانی کارمەندانی تەندروستی سلێمانی قورستر بوە، زیاتر لە 40 رۆژە زۆربەی پزیشکەکان دەوامیان جێهێشتوە. كارمه‌ندانی‌ ته‌ندروستی‌ ئاماژەبەوەشدەکەن کە هێشتا حکومەتی هەرێم و وەزارەتی تەندروستی هیچ پێزانینێکیان نییە بۆ رۆڵی گرنگی کارمەندانی تەندروستی و فەرمانبەران و چینی و توێژەکانی دیکە ، و وەک خۆیان تاوەکو سەرەتای هەفتەی داهاتو بەردەوام دەبن لە خزمەتی نەخۆش و هاوڵاتیان، لە سەرەتای هەفتەی داهاتوەوە و ناچار دەبن سێکتەری تەندروستی بەجێبهێڵن.

هاوڵاتی  ئەنجومەنی سەرتاسەری مامۆستایانی ناڕازی ئەمڕۆ سێشەممە لە ڕونکردنەوەیەکدا ڕەتیکردەوە کە مامۆستایان، لیستیان بۆ هەڵبژاردنی پەرلەمانی کوردستان هەبێت و ئاماژە بەوە دەکەن کە ئەو دەنگۆیانە  لێدانی ڕاستەوخۆیە لە خەبات و شۆڕشی سپی مامۆستایان. لە ڕونکردنەوەکەی مامۆستایاندا هاتووە کە " بڵاوکردنەوەی دەنگۆی دروستکردنی لیست بۆ هەڵبژاردن بەناوی  لیستی مامۆستایان و فەرمانبەرانەوە  هەواڵێکی چەواشەکارانەو سیناریۆیەکی ناشیرینە دژ بە خەبات و داوا ڕەواکانی مامۆستایان." ئاماژە بەوەشکراوەکە ،هەرکەس و گروپێک بەناوی مامۆستایانەوە لیست بۆ هەڵبژاردن دروست بکەن، ئەوە لێدانی ڕاستەوخۆیە لە خەبات و شۆڕشی سپی مامۆستایان و ئێمە دژی دەوەستینەوە". ڕونکردنەوەکەی ئەنجومەنی مامۆستایانی ناڕازی لە کاتێکدایە کە ، لەم چەند ڕۆژەدا دەنگۆیەک بڵاوکرایەوە کە  مامۆستایان و فەرمانبەرانی ناڕازی لە سنوری پارێزگای سلێمانی، بۆ هەڵبژاردنی پەرلەمانی کوردستان لیستیان دەبێت، بەڵام مامۆستایانی ناڕازی دەڵێن فەرمانبەران و مامۆستا هیچ ئاگاداری ئەم قسانە نین وبە هێرشکردنە سەر خەباتی مەدەنی مووچەخۆران سێریدەکەن.  مامۆستایانی  سنوری سلێمانی و دەوروبەری زیاتر لە چوار مانگە بایکۆتی هۆڵەکانی خوێندنیان کردووەو ڕۆژ بە ڕۆژیش ژمارەی ئە فەرمانگانەی بایکۆتی دەوام دەکەن ڕوولە زیاد بوونە ئەمەشدوای ئەوەی زیاتر لە ٤٧ ڕۆژ بەسەر کۆتا مووچەدا تێپەڕیوە کە وەرگیراوە و وەزارەتی دارایش دەڵێت چاوەڕێی ٦١٨ ملیارەکەین لە لایەن بەغداوە بۆمان بنێردرێت بۆ دابەشکردنی،  جگە لەوەی چارەنوسی مووچەکانی مانگی ١٠ و ١١ و ١٢ ی ساڵی پار بە نادیاری ماوەتەوە و لە لایەن حکومەتی هەرێمی کوردستانەوە بە قەرز لەسەر حکومەتی عێراق هەژمارکراوە.   دەقی ڕونکردنەوەکە:  ڕوونکردنەوەیەکی بەپەلە لە ئەنجومەنی مامۆستایانی ناڕازییەوە سەبارەت بەدەنگۆی دروستکردنی لیست بۆ هەڵبژاردن! مامۆستایان کە ئێستا ڕابەرایەتی ناڕەزایەتییەکانی کۆمەڵگەو شەقامی کوردی دەکەن، خەبات و شۆڕشە سپییەکەیان بووەتە جێگەی تێڕامانی هەموان و هەراسانکردنی دەسەڵات و هەم بوونەتە جێی ئومێدو متمانەی هاووڵاتیانی هەرێمی کوردستان. سەرباری فشارو هەڕەشەی جۆراو جۆر، بۆ کۆتایهێنان بە خەباتی ڕەواو شۆڕشی مامۆستایان بە هۆنینەوەی سیناریۆی جیاواز، دەسەڵاتی کوردی بەردەوام هەوڵیداوە درزو بۆشایی لە نێوان مامۆستایاندا بسازێنێ و ڕیزی مامۆستایان پەرت بکات. دواهەمین سیناریۆی دەسەڵات دژ بە خەباتی مامۆستایان، بڵاوکردنەوەی دەنگۆی دروستکردنی لیستە بۆ هەڵبژاردن بەناوی " لیستی مامۆستایان و فەرمانبەران"نەوە. ئێمە لە ئەنجومەنی سەرتاسەری مامۆستایانی ناڕازی، ئەو دەنگۆ و هەواڵە بەتەواوی ڕەتدەکەینەوەو بە هەموولایەکی ڕادەگەیەنین کە ئەوە هەواڵێکی چەواشەکارانەو سیناریۆیەکی ناشیرینە دژ بە خەبات و داوا ڕەواکانی مامۆستایان. هاوکات، ئەوەش ڕادەگەیەنین کە هەرکەس و گروپێک بەناوی مامۆستایانەوە لیست بۆ هەڵبژاردن دروست بکەن، ئەوە لێدانی ڕاستەوخۆیە لە خەبات و شۆڕشی سپی مامۆستایان و ئێمە دژی دەوەستینەوە. ئەنجومەنی سەرتاسەری مامۆستایانی ناڕازی ۳۰ ــ ۱ ــ ۲۰۲٤

هاوڵاتی وەزارەتی بەرگریی ئەمریکا- پێنتاگۆن و سەرۆکایەتیی هەرێمی کوردستان ئەمڕۆ سێشەممە لە  راگەیێندراوێکی هاوبەشدا باس لە پرۆسەی یەکخستنەوەی پێسمەرگە دەکەن و تێیدا هاتووە، لەسەر چەند خاڵێکی سەرەکی بۆ ساڵی داهاتو رێککەوتن کە پەیوەستە بە چاکسازییەکانی یەکخستنی هێزەکانی پێشمەرگە. راگەیێندراوەکەی نێوان وەزارەتی بەرگریی ئەمریکا- پێنتاگۆن و سەرۆکایەتیی هەرێمی کوردستان  ئەمڕۆ سێشەممە بڵاوکرایەوە دوای ئەوەی  دوێنێ دووشەممە، 29-1-2024 بەرپرسانی باڵا لە حکومەتی ئەمریکا و هەرێمی کوردستان کۆبوونەوەی "لیژنەی جێبەجێکاریی ئاراستەکردنی پێشمەرگە"یان لە سەرۆکایەتی هەرێمی کوردستان لە هەولێر ئەنجامدا. بەگوێرەی راگەیێندراوەکە، لیژنەکە بە مەبەستی هەڵسەنگاندنی پێشکەوتنەکانی تایبەت بە چاکسازییەکانی پێشمەرگە کۆبوونەتەوە، هەروەها  لەسەر خاڵە سەرەکییەکان بۆ ساڵی داهاتو ڕێککەوتون بۆ یەکخستنی هێزی پێشمەرگە لە چوارچێوه‌ى وەزارەتی کاروباری پێشمەرگەى حكوومه‌تى هه‌رێمى كوردستاندا و "بنیاتنانی هێزێکی پیشەیی كه‌ بتوانێت تێکشکاندنی یەکجاره‌كی داعش مسۆگه‌ر بكات."   دەقی راگەیێندراوی هاوبەشی پێنتاگۆن و سەرۆکایەتیی هەرێمی کوردستان: رۆژی 29-1-2024 بەرپرسانی باڵا لە حکومەتی ئەمریکا و هەرێمی کوردستانی عێراق کۆبوونەوەی "لیژنەی جێبەجێکاریی ئاراستەکردنی پێشمەرگە"یان لە سەرۆکایەتیی هەرێمی کوردستان لە هەولێر ئەنجامدا.  لیژنەکە بە مەبەستی هەڵسەنگاندنی پێشکەوتنەکانی تایبەت چاکسازییەکانی پێشمەرگە کۆبوونەوە، هەروەک چۆن لە یاداشتنامەی لێکتێگەیشتنی نێوان وەزارەتی بەرگریی ئەمریکا و وەزارەتی کاروباری پێشمەرگەی حکومەتی هەرێمی کوردستان هاتووە کە لە ئەیلوولی 2022 نوێکرایەوە. لیژنەکە چاوخشاندنەوەی بەو پێشکەوتنانە کرد کە بە ئاراستەی چاکسازیی پێشمەرگە کراون و رێککەوتن لەسەر چەند خاڵێکی گرنگ بۆ ساڵی داهاتوو، ئەوەش وەک بەشێک لە پابەندبوونی هاوبەشی ماوەدرێژ بە مەبەستی یەکخستنەوەی هێزەکانی پێشمەرگە لەژێر چەتری وەزارەتی کاروباری پێشمەرگە بە مەبەستی پێکهێنانی هێزێکی پیشەیی و کاریگەر بۆ دڵنیابوونەوە لە تێکشکاندنی یەکجارەکی داعش. وەزارەتی کاروباری پێشمەرگە پێشکەوتنی باشی لە بوارەکانی ئابووری و رێکخستنی پێکهاتەی هێز ئەنجامداوە و وەزارەتی بەرگریی ئەمریکا و وەزارەتی کاروباری پێشمەرگەش چاویان لە پێشکەوتنی بەردەوامی هەوڵەکانی چاکسازییە وەک ئەوەی لە یاداشتنامەکەی ساڵی 2002ی نێوان وەزارەتی بەرگری و حکومەتی هەرێمی کوردستان هاتووە. ویلایەتە یەکگرتووەکان لەگەڵ خەڵکی عێراق دەبێت، لەوانەش خەڵکی هەرێمی کوردستان، ئەوەش کاتێک خەریکی بنیاتنانی عێراقێکی بەهێز، سەقامگیر و خاوەن سەروەرین.    

هاوڵاتی  ئەنجومەنی فەرمانبەرانی ناڕازیی گەرمیان بایكۆتی گشتی رادەگەیەنن و داواش لەسەرجەم فەرمانبەران و مامۆستایان و مووچەخۆران و هاووڵاتیان و كاسبكاران دەكەن هاودەنگیان بن بۆ ئەوەی بەرەنگاری فشارو ستەمكارییەكانی دەسەڵات ببنەوە. ئەنجوومەنی فەرمانبەرانی ناڕازیی گەرمیان لەبارەی بایكۆتی گشتی راگەیەنراوێكیان بڵاوكردەوەو رایانگەیاند "سبەینێ 31ی كانوونی دووەمی 2024، هەمووان شانبەشانی مامۆستایان لە شەقام دەبین". ئەنجومەنەكە، ئەوەشیان خستوەتەڕوو "لێرەوە مانگرتن و بایكۆتی گشتیی مەدەنی رادەگەیەنین و داواكارین لە تەواوی فەرمانبەران، مامۆستایان، مووچەخۆران، هاووڵاتیان و كاسبكاران، هاودەنگ و هاوڕێگاو پشتیوانمان بن، بۆ ئەوەی بتوانین بەرەنگاری فشارو ستەمكارییەكانی دەسەڵات بوەستینەوە".

هاوڵاتی  شارەزایەكی بواری یاسایی عێراقی رایگەیاند فەرمانگەی پەیوەندییەكانی دەرەوەی حكومەتی هەرێم و ئەو نوێنەرایەتییانەی كە حكومەتی هەرێم هەیەتی لە دەرەوە نادەستوورین. ئەمیر دەعمی شارەزای یاسایی ناسراوی عێراقی، لە لێدوانێكیدا رایگەیاند "فەرمانگەی پەیوەندییەكانی دەرەوە لەحكومەتی هەرێمی كوردستان و ئەو نوێنەرایەتییانەی كە حكومەتی هەرێم هەیەتی لە دەرەوە نادەستوورین". ئەوەشی خستوەتەڕوو "ئەو نوێنەرایەتییانە لەدوای ساڵی 2003ەوە دامەزراون و حكومەتی فیدراڵی چاوپۆشی لێكردووە بەهۆی موجامەلەی سیاسییەوە".   "لە مادەی 121ی دەستووری عێراق، بڕگەی چوارەم، مافی دامەزراندنی نوسینگە دەدات بەهەرێمەكان و پارێزگاكان تەنها لەناو باڵیۆزخانەكانی عێراقدا بۆ ئەوەی تەنها گرنگی بەكاروباری كلتووری بدەن". ئەمیر دەعمی وا دەڵێت. وتیشی "داڕشتنی سیاسەتی دەرەوە بەپێی دەستووری عێراق مافی وەزارەتی دەرەوەی عێراقە، چونكە بوونی نوێنەرایەتی هەرێم لەهەندێك وڵاتدا لەوانەیە لەگەڵ سیاسەتی حكومەتی فیدراڵیدا گونجاو نەبێت، حكومەتی عێراق لەوانەیە پەیوەندی لەگەڵ ئەو وڵاتەدا نەبێت كە نوێنەرایەتی هەرێمی تێدایە". 

هاوڵاتی  پارێزگای كەركوك لەنوسراوێكدا وادەی یەكەم كۆبوونەوەی ئەنجومەنی نوێی پارێزگای دیاریكردو لەڕێگەی ئیدارەی ئەنجومەنەكەشەوە داوای ئاگاداركردنەوەی ئەندامەكانی كردووە ئامادەی یەكەم كۆبوونەوەی ئەنجومەنی پارێزگای كەركووك بن. نوسینگەی پارێزگای كەركوك ئەمڕۆ سێشەممە، نووسراوێكی هاوپێچ لەگەڵ ناوی ئەندامە دەرچووەكانی ئەنجومەنی پارێزگای كەركووك ئاڕاستەی هەر یەك لە نووسینگەی سەرۆك وەزیرانی عێراق، ئەنجومەنی كۆمیسیارانی كۆمیسیۆنی باڵای هەڵبژاردنەكانی عێراق و بەشی كارگێڕی ئەنجومەنی پارێزگای كەركوك كردووە، داوای لە سەرجەم ئەندامە دەرچووەكان كردووە، كاتژمێر 2ی دوای نیوەڕۆی رۆژی پێنجشەممە 1ی شوبات 2024 ئامادەی یەكەم كۆبوونەوەی ئەنجومەنی پارێزگا بن. هاوكات، دوێنێ دووشەممە ئەندامانی ئەنجومەنی پارێزگای كەركووك جگە لە راكان جبوری پارێزگاری بەوەكالەتی كەركوك سوێندی یاساییان خوارد.

هاوڵاتی  رۆژی دوو شەممە 29ی كانوونی دووەمی 2024، چوار زیندانی سیاسی كورد بە ناوەكانی (موحسین مەزڵووم، پژمان فاتیحی، محەمەد فەرامەرزی ، وەفا ئازەربار)، لەلایەن كۆماری ئیسلامییەوە لە زیندانی قزڵحەساری كەرەج لە سێدارە دران، لە سێدارەدانی ئەم لاوانە ناڕەزایەتی ژمارەیەكی زۆر لە رێكخراوەكانی لایەنگری مافی مرۆڤی لە ناوخۆ و دەرەوەی وڵات لێكەوتەوەو هەروەها ژمارەیەك لە وڵاتان ناڕەزایەتییان بەرامبەر بەجێبەجێكردنی سزای لەسێدارەدانی ئەو چوار كەسە دەربڕیوە. ئەمریكا و رێكخراوی لێبوردنی نێونەتەوەیی لە سێدارەدانی ئەم چوار زیندانە سیاسییەیان شەرمەزار كردووە، هاوكات بەپێی ئەو زانیاریانەی دەست هاوڵاتی گەیشتوون "بەرپرسانی حكومەتی ئێران بە بنەماڵەكانیان راگەیاندووە تەرمی كوڕەكانیان پێ نادرێتەوەو خۆیان لە شوێنێك دەینێژن". ئابراهام پیلی، جێگری نوێنەری تایبەتی ئەمریكا بۆ كاروباری ئێران، لە سێدارەدانی ئەم چوار زیندانییە سیاسییەی بەوە ناوبرد كە كۆماری ئیسلامی بە ئاشكرا كەمتەرخەمە بەرامبەر بە مافی مرۆڤ و پێشێلكاری مافی مرۆڤە. ئابراهام پیلی، بەئاماژە بەو راپۆرت و هەواڵانەی دەربارەی ئەشكەنجەو دادگاییكردنی نادادوەرانە لە ئێران بڵاو ئەبێتەوە، لەتۆڕی كۆمەڵایەتی ئێكس بڵاویكردەوە "ئەمریكا بە توندی لەسێدارەدانی ئەم چوار كەسە شەرمەرزار دەكات و بەردەوام سوورە لەسەر ئەوەی ئێران دەبێ وەڵامدەرەوە بێت بەرامبەر بەپێشێلكاری مافی مرۆڤ لەو وڵاتە". پێشتریش وەزارەتی دەرەوەی ئەمریكا سزای لەسێدارەدانی ئەم چوار كەسەی ئیدانە كردبوو، جەختی كردبۆوە كە بەپێی راپۆرتی رێكخراوەكانی پارێزەری مافی مرۆڤ، رەوتی دادگایی كردنی ئەم زیندانیانە "دروستكرا" و  بە پێی " دانپێدانانی زۆرە ملێ بووە لە ژێر ئەشكەنجەدا". سەرەڕای ناڕەزایەتییە بەربڵاوەكان و داواكاری رێكخراوەكانی پارێزەری مافی مرۆڤ بۆ راگرتنی سزای لەسێدارەدانی ئەم كەسانە، سیستەمی دادوەری كۆماری ئیسلامی بەرەبەیانی رۆژی دووشەممە 29ی كانوونی دووەم رایگەیاند "موحسین مەزڵووم، محەمەد فەرامەرزی، وەفا ئازەربار، پژمان فاتێحی) بەتۆمەتی " فساد فی الارچ" و هاوكاری ئیسرائیل و ئەندامبوون لە كۆمەڵە لە سێدارە دراون. رێكخراوی لێبوردنی نێونەتەوەیی، لەسێدارەدانی ئەم كەسانەی بە سەرەڕۆیانەو نادادوەریانە ناوبردو رایگەیاند "ئەم ٤چوار كەسە بەشێوەیەكی نهێنی و نادادوەرانە دادگایی كراون و سزای سێدارەیان بەسەردا سەپاوە". رێكخراوی لێبوردنی نێونەتەوەیی  لە راگەیاندنی خۆیدا نووسیویەتی "ئەم چوار كەسە هەر لە یەكەم ساتەكانی دەستگیركردنیانەوە شوێنەكەیان شاردراوەتەوەو بەشاراوەیی و بێ ئەوەی مافی ئەوەیان هەبێت پارێزەریان ببێت دادگایی كراون. بنەماڵەكانیان ئازار دراون".  ئێگنێس كالامار، سكرتێری رێكخراوی لێبوردنی نێونەتەوەیی ئێوارەی دووشەممە 29ی كانوونی دووەم لە تویتێكدا نووسیویەتی " كۆمەڵگای نێونەتەوەیی دەبێت كوشتن و كەڵك وەرگرتنی بەردەوامی كۆماری ئیسلامی لە سزای لەسێدارەدان وەك كەرەستەیەك بۆ سەركوت شەرمەزار بكات و گوشار بخاتە سەر كۆماری ئیسلامی دەستبەرداری ئەم ئاكارە بێت". تەرمەكان نادرێنەوە بە بنەماڵە بە پێی ئەو زانیاریانەی دەست هاوڵاتی كەوتوون لەلایەن ناوەندە ئەمنییەتییەكانەوە بە بنەماڵەی ئەم چوار زیندانییە سیاسییە راگەیەندراوە تەرمی كوڕەكانیان نادرێتەوە پێیان و ناوەندە حكوومەتییەكان خۆیان لە شوێنێكی شاراوە دەیاننێژن. سۆران ئازەربار، كوڕی مامی وەفا ئازەربار، بە هاوڵاتی راگەیاند " بە بنەماڵەكانیان راگەیاندوون تەرمی كوڕەكانیان نادرێتەوە بە بنەماڵە و خۆیان لە شوێنێك تەرمەكان دەینێژن". جوانە تەیمەسی، هاوژینی موحسین مەزڵووم لە تویتێكدا نووسیویەتی "بەرپرسانی ئەمنییەتی بە بنەماڵەكانیان راگەیاندووە خۆیان تەرمەكان لە شوێنێكی نادیار دەنێژن". مانگرتن لە شارەكانی كوردستان لەگەڵ بڵاوبوونەوەی جێبەجێكردنی سزای لەسێدارەدانی ئەم چوار لاوە، ژمارەیەك لە رێكخراوەكانی پارێزەری مافی مرۆڤ، حیزب و لایەنە سیاسییەكان داوایان لە خەڵكی رۆژهەڵاتی كوردستان كرد كە ئەمڕۆ سێ شەممە دووكان و بازاڕ دابخەن و داوایان لە خەڵك كرد مان بگرن. بە پێی زانیارییەكان تا كاتی ئامادەكردنی ئەم راپۆرتە، خەڵكی شارەكانی، مەهاباد، سنە، دیواندەرە، بۆكان، سەقز بە هانای بانگەوازەكەوە رۆیشتوون و بازاڕ و دووكان داخراوە.

هاوڵاتی  كۆمەڵەی پیشەسازیی نەوتی كوردستان رایگەیاند راگرتنی هەناردەی نەوتنی هەرێم هەڕەشەی لەسەر ئابوری هەرێم دروستكردووە كە هاوپەیمانێكی ئەمنی ئەمریكایە. دەشڵێت داوایان لە كۆنگرێسی ئەمریكا كردووە فشار بخاتەسەر بەغدا تا هەناردەی نەوتی هەرێم دەستپێبكاتەوە. كۆمەڵەی پیشەسازیی نەوتی كوردستان (ئەپیكۆر) راگەیەنراوێكی بڵاوكردەوەو ئاماژەی بەوەداوە ماوەی 10 مانگە نەتوانراوە كێشەی راگرتنی هەناردەی نەوتی هەرێمی كوردستان چارەسەر بكرێت  راشیگەیاند "ئەوەش هەڕەشەی لەسەر ئابوری هەرێمی كوردستان دروستكردووە كە هاوپەیمانێكی ئەمنی ئەمریكایە لە رۆژهەڵاتی ناوەڕاست و كۆمپانیاكانی ئەمریكاو وڵاتانی تریش بە بەهای  10 ملیار دۆلار وەبەرهێنانیان لەكەرتی وزەی كوردستاندا  كردووە". ئەپیكۆر ئەوەشی خستوەتەڕوو "داوامان لە كۆنگرێسی ئەمریكا كردووە رێكاری بەپەلە بۆ دەستپێكردنەوەی هەناردەی نەوتی هەرێمی كوردستان بگرێتەبەر، چونكە راگرتنی نەوت بۆ ماوەی 10 مانگ كاریگەری نەرێنی كردووەتەسەر ئابوریی و ئارامی ناوچەكە". لەبەشێكی تری راگەیەنراوەەكەیدا كۆمەڵەی پیشەسازیی نەوتی كوردستان  دەشڵێت "داوامانكردوە كۆنگرێس فشار بخاتەسەر بەغدا، تا بەر لە سەردانە چاوەڕوانكراوەی سەرۆك وەزیرانی عێراق بۆ واشنتۆن، كێشەی هەناردەی نەوتی هەرێمی كوردستان چارەسەر بكرێت".  

هاوڵاتی  لەسەر رێگای هەولێر – گوێر پاڵاوگەیەكی نەوت ئاگریگرت و بەهۆیەوە چەند كەسێك بریندار بوون و زیانێكی زۆری مادیشی لێكەوتەوەتەوە. موقەدەم كاروان میراودەلی، وتەبێژی بەرگریی شارستانی هەولێر رایگەیاند "بەرەبەیانی ئەمڕۆوە ئاگر لەپاڵاوگەیەكی سەر رێگای هەولێر - گوێڕ ئاگر لەپاڵاوگەیەكی نەوت كەوتوەتەوەو بەهۆیەوە زیانێكی زۆری مادی بەر پاڵاوگەكە كەوتووەو سێ كەسیش بریندار بوون". ئەوەشی خستەوەڕوو كە تیمەكانی ئاگركوژێنەوە سەرقاڵی كۆنتڕۆڵكردنی ئاگرەكەن، بەڵام بەهۆی گەورەی ئاگرەكەوە تائێستا كۆنتڕۆڵ نەكراوە.  

هاوڵاتی  لەبەردەم كەمپی نوێی زانكۆی سلێمانی لەسەر رێگەی سلێمانی - ڕاپەڕین بەئاڕاستەی ناوشاری سلێمانی لەئەنجامی پێشبڕكێی دوو ئۆتۆمبێل كەسێك گیانی لەدەستداو دووانی تریش بریندار بوون. بەپێی زانیارییەكانی هاوڵاتی، لەبەردەم كەمپی نوێی زانكۆی سلێمانی لەسەر رێگەی سلێمانی - ڕاپەڕین دوو ئۆتۆمبێل پێشبڕكێیانكردوەو لەئەنجامدا یەكێك لەئۆتۆمبێلەكان لەجۆری نیسان پیكاب خۆی كێشاوە بەڕاگری  سەرشەقامەكەداو بەهۆیەوە گەنجێكی تەمەن 17 ساڵ كەسەكنی بووە گیانی لەدەستداوەو دوو كەسی تریش بریندار بوون". هاتووچۆی سلێمانیش لەبارەی رووداوەكە، بڵاویكردەوە، هۆكاری رووداوەكە دەگەڕێتەوە بۆ تیژڕەوی و لەدەستدانی كۆنترۆڵ لەلایەن شۆفێری ئوتومبێلی جۆری نیسان پیكاب دوای ئەوەی كۆنترۆڵ لەدەست دەدات دەپەڕێتەوە شەقامی بەرامبەر و خۆی دەكێشێت بە دوو ئوتومبێلی تردا.

هاوڵاتی  وەزیری دارایی هەرێم رایگەیاند داتاو زانیارییەكانمان پێشكەشی حكومەتی عێراق كردوە رۆژانە لەگەڵ وەزیرو نوێنەرانمان بۆ چاودێریكردنی رێكارەكانی ناردنی 618 ملیارەكە لەسەر هێڵین. ئاوات شێخ جەناب، وەزیری دارایی و ئابووری حكومەتی هەرێمی كوردستان بەمیدیای نزیك لەپارتی وتوە "حكومەتی هەرێم هەموو رێكارێكی ناردنی مووچەی جێبەجێكردوەو داتاو زانیارییەكانی پێشكەشی حكومەتی فیدراڵ كردوە". لەبارەی ناردنی 618 ملیار دینارەكەش، ئەوەی خستوەتەڕوو "رۆژانە لەگەڵ وەزیرو نوێنەرانمان بۆ چاودێریكردنی رێكارەكانی ناردنی 618 ملیارەكە لەسەر هێڵین، چاوەڕێش دەكەین لەم چەند رۆژەدا ئەنجامی هەبێت". وەزیری دارایی هەرێم دەشڵێت "لەگەڵ حكومەتی فیدراڵی لەسەر هەمواردكردنەوەی یاسایی بودجە رێككەوتووین".

هاوڵاتی  وەزارەتی نەوتی عێراق رەتیدەكاتەوە حكومەتی فیدراڵ و حكومەتی هەرێمی كوردستان لەسەر تێچووی بەرهەمهێنانی نەوت رێكەوتبن. عاسم جیهاد، وتەبێژی وەزارەتی نەوتی عێراق لە لێدوانێكدا رایگەیاند “شتێكی لەو شێوەیە لە ئارادا نییەو ئاگامان لێی نییە رێككەوتن كرابێت، هەر شتێك هەبێت خۆمان رایدەگەیەنین".لە رۆژی 25ـی ئازاری 2023ـەوە هەناردەی نەوتی هەرێمی کوردستان لە رێگەی بەندەری جەیهانی تورکیاوە راگیراوە، ئەوەش دوای بڕیاری دادگای ناوبژیوانی نێودەوڵەتی لە پاریس، کە دۆسیەی نێوان بەغداد و ئەنقەرەی یەکلایکردەوە و بڕیاریدا تورکیا پابەند بکرێت بە قەرەبووکردنەوەی عێراق بە بڕی ملیارێک و 400 ملیۆن دۆلار.

هاوڵاتی وتەبێژی حکومەتی هەرێم لەرێگەی چەند سەرچاوەیەکی  میدیای جیاوازەوە ئاماژە بەهەدەردانی ئەو بڕه‌ پارانه‌ دەکات کە لەسەر عێراق بڵاوکراوەته‌وەو دەڵێت، "ئەگەر بابەتەکە گەندەڵییە، دەبوو موچەی خەڵکی هەموو پارێزگاکانی عێراق ڕابگیرایە. پێشەوا هەورامانی، وتەبێژی حکومەتی هەرێمی کوردستان له‌ هه‌ژماری تایبه‌تی خۆی له‌ تۆڕی كۆمه‌ڵایه‌تی فه‌یسبوك نوسیویه‌تی، "لەوەتەی دروستبونی کێشەکان لەسەر موچەی فەرمانبەرانی هەرێمی کوردستان هەر ڕۆژەو بابەتێکی تازە دەخرێتە بەردەم حکومەتی هەرێمی کوردستان بەمەرجی ناردنی موچەو مافی خەڵک، لەکاتێکدا ئێمە ڕون و ئاشکرا هەمو شتێکمان پێشکەشی حکومەتی فیدڕاڵ کردوە!". قسەکانی وتەبێژی حکومەتی هەرێم دوای ئەوەهات کە بەبەردەوامی حکومەتی هەریم تۆمەتبار دەکرێت بە هۆکاری نەناردنی ئەو پارەیەی کە بڕیارە لە موچەی مووچەخۆرانی هەرێمدا سەرف بکرێت ، هەر ئەمڕۆش موعین کازمی ئەندامی ئەنجومەنی نوێنەرانی عێراق لە چاوپێکەوتنێکی تەلەفزیۆنیدا ڕایگەیاند" تائێستا هەرێم شەفاف نەبوە لەگەڵ عێراق ئاماری موچەخۆرانی بەتەواوی نەناردوە" و بە گەندەڵ ناوی بردن. پێشەوا هەورامانی لە بڵآوکراوەکەیدا ژمارەیەک سەرچاوەی میدیای بەکار دەهینێت و عێراق بە گەندەڵ ناودەهێنێت و دەڵێت،ئایا ئەم شەفافییەت‌و تەوزیحەی لەئێمەیان دەوێت لای ئەوان هەیە؟".   ده‌قی بڵاوکراوەکەی وته‌بێژی حكومه‌تی هه‌رێم: ئایا کەس لیستی ئەو گروپە میلیشیانەی لەلایە کە هەرێمی کوردستان بۆردومان دەکەن؟ لەوەتەی درووستبوونی کێشەکان لەسەر موچەی فەرمانبەرانی هەرێمی کوردستان هەر ڕۆژەو بابەتێکی تازە دەخرێتە بەردەم حکومەتی هەرێمی کوردستان بەمەرجی ناردنی موچەو مافی خەڵک،لەکاتێکدا ئێمە ڕوون و ئاشکرا هەموو شتێکمان پێشکەشی حکومەتی فیدراڵ کردووە! بەڵام لێرەدا پرسیارێک دێتە ئاراوە! ئایا ئەم شەفافییەت و تەوزیحەی لە ئێمەیان دەوێت لای ئەوان هەیە؟ گەڕانێکی سادە، لە چوار هەواڵی بڵاوکراوەی ژمارەیەک سەرچاوەی میدیایی باوەڕپێکراو: ئەلجەزیرە، 20%ی پارەی مووچەی عێراق بۆ مووچەخۆری وەهمی دەڕوات کە نزیکی 10 ملیار دۆلاری ساڵانەیە کە زیاترە لە موچەی هەموو مووچەخۆرانی هەرێمی کوردستان. ئەلحوڕە: 300 ملیار دۆلار لە عێراق بۆ پڕۆژە و مووچەی وەهمی چووە.. ئەلبەغداد ئەلیەوم: لە لیستی خانەنشینانی عێراقدا، 22 هەزار مووچەخۆری وەهمی هەن کە 800 ملیار دینار لەژ خەزێنەی عێراق دەبەن. بی بی سی: ساڵی 2014 حکومەتی عێراق خۆی دانی بەوەدا ناوە کە 50 هەزار سەربازی وەهمی مووچەیان لە خەزێنەی عێراق وەردەگرن،وەهمی نەک بندیوار!. ئایا کەس لیستی ئەو گروپە میلیشیانەی لەلایە کە هەرێمی کوردستان بۆردومان دەکەن؟ ئەگەر بابەتەکە گەندەڵییە، دەبوو مووچەی خەڵکی هەموو پارێزگاکانی عێراق رابگیرایە، نەک وەکو ئەوەی هەندێک موراهیقی سیاسی ناوخۆیی دەڵێن لەبەر خاتری شەریف ناوێک گەلێک لە کوردستان برسیکراوە! پێشەوا هەورامانی