قوباد تاڵەبانی: پێگەی کورد لە عێراق بەهێزتر دەکەین

هاوڵاتی دەستەی داکۆکی لە مامۆستایان و فەرمانبەرانی ناڕازی رایگەیاند، لەگەڵ هیچ بەرپرس و بەرێوەبەرێکی حکومی هەرێم کۆنەبونەتەوە و دوپاتی دەکەنەوە کە بایکۆتکردن بەردەوامە تا ئەو کاتەی داواکارییەکانیان جێبەجێ دەکرێت. دەستەی داکۆکی لە مامۆستایان و فەرمانبەرانی ناڕازی لە راگەیەنراوێکدا بڵاویانکردەوە، ئەمڕۆ کەسێک بەناوی (م.عومەر، جێگری بەڕێوەبەری گشتیی پەروەردەی سلێمانی)؛ لە سێ لێدواندا، ئاماژە بەوە دەکات گوایە لەگەڵ مامۆستایانی ناڕازی کۆبوونەتەوە و هەردوولا پێیان باشە دەوام دەستپێبکاتەوە. مامۆستایانی ناڕازی دەڵێن، ئێمە وەکو ئەنجومەنی سەرتاسەریی مامۆستایانی ناڕازیی، ئەم جۆرە لێدوانانە بە نابەرپرسانە و ناڕاست دەزانین و ڕەتیدەکەینەوە. ئەوەشخراوەتەڕو، کۆنگرەی ڕۆژی یەکشەممەش  بۆ  باسکردنی  سەردانەکەمان بوە بۆلای سەرۆک وەزیرانی عێراقی فیدراڵ، دوپاتی دەکەنەوە بایکۆت بەردەوامە تا جێبەجێکردنی داواکاریەکانیان. ئەوەش لە کاتێکدایە، عومەر محەمەد ئەمین، جێگری بەڕێوەبەری گشتی پەروەردەی سلێمانی بە میدیاکانی راگەیاندبو، لەم سێ چوار رۆژەدا پرۆسەی خوێندن لە سلێمانی یەکلایی دەکەنەوە و کاتی خوێندن درێژدەکەنەوە و بابەتی خوێندنیش کەمدەکەنەوە.

هاوڵاتی  سەرچاوەیەك لەهێزەكانی پاراستنی گەل هەواڵی تیرۆركردنی ئەندامێكی دیكەیان لەسلێمانی ڕەتدەكاتەوەو دەڵێت "نۆ مانگ لەمەوبەر ئەو هەڤاڵەمان لەشەڕێكدا شەهیدبووەو خۆمان هەواڵی شەهیدبوونەكەیمان بڵاوكردوەتەوە". سەرچاوەیەكی باڵا لە هێزەكانی پاراستنی گەل (هەپەگە) بە هاوڵاتی وت:"ئەو هەواڵەی كە گوایە میت لە سلێمانی ئۆپەراسیۆنی كردووەو هەڤاڵێكمانی بەناوی (جەسور وەدات) شەهید كردووە، سەرتاپا درۆیە". سەرچاوە باڵاكەی هەپەگە ئەوەشی وت"دەوڵەتی داگیركەری توركیا جارێك دیكە بۆ شاردنەوەی شكستەكانی پەنا دەباتە بەر درۆو شەڕی دەروونی، پێشتر لە 25-12-2023 رامانگەیاندبوو كە دەوڵەتی توركیا لەڕێگەی ئاژانسی ئانادۆڵەوە، بانگەشەی كردووە كە گوایە یەكێك لەو سێ هەڤاڵە شەهیدەی كە لە10ی  ئاداری 2023 لەشەڕدا لە هەرێمەكانی پاراستنی میدیا شەهید بووە (هەڤاڵ عەلی خەبات)، نەك لەسلێمانی تیرۆر كرابێت، بە بەڵگەوە هەواڵی دەزگای ئەنادۆڵمان بەدرۆ خستبووە كە چۆن ئێمە خۆمان لە 15ی كانونی یەكەمی 2023 هەواڵی شەهید بونی ئەو هەڤاڵانەمان راگەیاندوە". سەرچاوەكە وتیشی "ئێستاش دەزگای شەڕی تایبەتی ئەنادۆڵ ناوی یەكێك دیكە لەو سێ هەڤاڵەی بڵاوكردۆتەوە (شەهید جەسور وەدات) كە گوایە لە سلێمانی تیرۆركراوە". ئەو سەرچاوەیە هەپەگە ئەوەشی خستەڕوو:" ئەو هەڤاڵەمان لە شەڕداو لە هەرێمەكانی پاراستنی میدیا لە گەڵ دوو هەڤاڵی دیكەی نۆ  مانگ لەمەوپێش لە مانگی ئاداردا شەهید بوون و  خۆشمان ١٥ی ئەم مانگە هەواڵی شەهیدبوونی ئەو سێ هەڤاڵەمان بڵاوكردووەتەوە". جێی ئاماژەیە ڕۆژی 15-12-2023 ناوەندی ڕاگەیاندن و چاپەمەنی هەپەگە سەبارەت بە سێ گەریلا لە هەڕێمەكانی پاراستنی میدیادا شەهید بوون ڕاگەیەندراوێكی بلاو كردەوە. لە ڕاگەیەندراوەكەدا هاتووە: 10ی ئازاری 2023 لە ئەنجامی هێرشێكی دوژمن بۆ سەر هەرێمەكانی پاراستنی میدیا، هەڤالانمان عەلی خەبات، ڕێناس و جەسور شەهید بوون. ئاژانسی ئەنادۆڵی توركی بڵاویكردوەتەوە "دەزگای میت، لە ئۆپەراسیۆنێكیدا لە دەوروبەری سلێمانی (عەبدولموتەڵیب دۆغروجوی) كە بە (جێسور وەدات) ناسراوە كوشتوە".  

هاوڵاتی ئەمینداری پێشوی وەزارەتی پێشمەرگە ئاشكرای دەكات هێرشە دۆرنیەكان بۆ سەر هەرێم دەبێتە مایەی تێكچونی دۆخی ئاسایشی هەرێم و كاریگەری لەسەر گەشتی فڕۆكە مەدەنیەكان لەفڕۆكەخانەی هەولێر یان راگرتنی تەواوی هاتنی هەندێك فڕۆكەی كۆمپانیای نێودەوڵەتی بۆ هەولێر دەبێت، تەنانەت ئەگەر هێرشەكان بەردەوامبێت رەنگە كۆمپانیا وەبەرهێنەرەكان كارەكانیان لەهەرێم رابگرن. جەبار یاوەر مەندە، ئەمینداری پێشوی وەزارەتی پێشمەرگەی حكومەتی هەرێم هۆشداری دەدات لە زیادبونی هێرشە درۆنیەكانی سەر هەرێمی كوردستان، بەتایبەت ئەو هێرشە درۆنیانەی ماوەیەكە دەكرێتە سەر پارێزگای هەولێر، بەهاوڵاتی وت "هێرشە دۆرنیەكان دەبێتە مایەی تێكچونی دۆخی ئاسایشی هەرێمی كوردستان و عێراق، چونكە رۆژانە هێرشەكان دەكرێت، كاریگەری دەرونیشی بۆ سەر دانیشتوانی هەولێر دەبێت، بەتایبەت دەنگی تەقینەوەی درۆنەكان لەناوچە نیشتەجێبونەكان و دڵەڕاوكێ لەناو هاووڵاتیاندا دروست دەكات". "هێرشە درۆنیەكان كاریگەری بۆ سەر هاتووچۆو گەشتی فڕۆكە مەدەنیەكانیش دەبێت لەفڕۆكەخانەی هەولێر یان راگرتنی تەواوی هاتنی هەندێك فڕۆكەی كۆمپانیای نێودەوڵەتی بۆ هەولێر" جەبار یاوەر وای وت. ئەمینداری پێشوی وەزارەتی پێشمەرگە وتیشی"هێرشە درۆنیەكان كاریگەری لەسەر ئابوری هەرێمی كوردستان دەبێت، چونكە زۆر كۆمپانیا كە لەهەرێم وەبەرهێنان دەكەن بەهۆی سەقامگیری دۆخی هەرێمەوە هاتون و لێرە وەبەرهێنان دەكەن، بۆیە ئەگەر هێرشە درۆنیەكان بەردەوامبێت رەنگە ئەو كۆمپانیایانە هەڵسەنگاندن بۆ دۆخی ئاسایش بكەن و كارەكانیان رابگرن و كاریگەری نەرێنی لەسەر بازاڕو ئابوری هەرێم دەبێت". جەبار یاوەر ئەوەشی خستەڕوو"بەیاننامەكەی حكومەتی هەرێم توند بووە، وەڵامەكەی حكومەتی عێراقیش توندتر بوە، دیارە ئەوەش پەیوەندییەكانی نێوان هەرێم و بەغدای ئاڵۆزكردوە". لەبارەی وەڵامدانەوەی سەربازی هەرێمیش بۆ ئەو گروپانەی كە هێرشی درۆنی دەكەنە سەر هەرێمی كوردستان، جەبار یاوەر دەڵێت "مافی هەرێمە بەرگری لەخۆی بكات و وەڵامی دەستدرێژیی هەر گروپێكی چەكداری بداتەوە، بەڵام بەومەرجەی لێوەی دیار بێت كە ئەو چەكدارانە لەكوێوە دەستدرێژی دەكەن".  

هاوڵاتی  سیاسەتمەدارێكی كورد رایگەیاند: هێرشە درۆنیەكان بۆ هەرێمی كوردستان زیانی زۆری گەیاندووەو ئێستا وای لێهاتووە كەس نییە بەرگری لە كورد بكات و خۆشی بەرگری پێناكرێت و وەزعی كورد نالەبارەو لایەنەكانی هەرێمیش نەكۆدەبنەوە، نەیەكگرتوون نەدەشتوانن دۆخەكە باشبكەن. مەحمود عوسمان سیاسەتمەداری دیاری كورد هێرشە درۆنیەكانی سەر هەرێم بەمەترسی گەورە دەزانێت رایگەیاند:"ئەو هێرشانەی دەكرێتە سەر هەرێمی كوردستان زیانی زۆری گەیاندووە، هێرشەكان لەلایەن ئەو هێزانەوە دەكرێت كە سەر بەئێرانن، بەشێك لە هێرشەكان بۆ سەر هێزەكانی ئەمریكایە، لەهەمانكاتدا بەشێكیشیان دژ بەكوردە، بۆ نموونە لەڕۆژانی ڕابردوو وا بڵاوكرایەوە كە پەلاماری ئیستخباراتی موسادیان داوە لە ناو هەولێر، ئەمە ڕاست نییەو دەیانەوێت لە كورد بدەن، یاخود كورد ناچار بكەن لەگەڵیان بێت، بۆیە ئێستا وای لێهاتووە كەس نییە بەرگری لە كورد بكات و خۆشی بەرگری پێناكرێت". مەحمود عوسمان ئەوەشی بەدەنگی ئەمریكا وتوە: "وەزعی كورد نالەبارە، چونكە ئێران ڕۆڵی سەرەكی هەیە لەناوچەكەداو كوردیش بووە بە بەشێك لەو ململانێیەی لەنێوان ئەمریكاو ئێراندا هەیە، چونكە ئێران وا هەست دەكات كورد زیاد لەپێویست لەگەڵ ئەمركیاو توركیا ڕۆشتووە، كوردیش كەمتر بەلای ئێراندا شكاندویەتیەوە، ئەوان دەیانەوێت زەختێك بكەن بۆیە مەترسی هەیە، لەو لاشەوە توركیا لە كورد دەدات". "لەم دۆخە خراپەدا كورد دەبێت یەكگرتوو بێت، دواتر لە یەكی بداتەوە بەرژەوەندی بەلای ئێراندایە یان ئەمریكاو سودی چییەو كێشەكانی چۆن چارەسەر دەبن، ئەوكات بڕیاری خۆیی بدات تا زیانی كەمتری هەبێت، بەڵام بەداخەوە نەلایەنەكان كۆدەبنەوە، نەیەكگرتوون نەدەشتوانن دۆخەكە باشبكەن". مەحمود عوسمان وای وت.

هاوڵاتی وابڕیارە لە چەند ڕۆژی داهاتوودا وەفدێکی دیوانی چاودێری دارایی عێراق بگاتە هەرێمی کوردستان ، بۆ ئامادەکردنی ڕاپۆرتی وردبینی خۆی لەبارەی خەرجی‌ و داهاتی شەش مانگی كۆتایی ساڵی 2023 بەو سێ‌ مووچەیەشەوە كە نەدراوە و ئەو سێ‌ گوژمەی 700 ملیارەی بۆ مووچە نێردراوە. بەپێی زانیاریەکان بڕیارە وەفدەکەی دیوانی چاودێری دارایی عێراق ڕاپۆرتی هاوبەش لەگەڵ دیوانی چاودێریی دارایی هەرێمی کوردستان ئامادەبكەن، وەک بەشێک لەمەرجەکانی ناردنی پشکی هەرێم لەبودجەی گشتیی عێراق، کە لەیاسای بودجەی گشتیدا هاتووە. لەوبارەیەوە جەمال کۆچەر، ئەندامی لیژنەی دارایی پەرلەمانی عێراق ڕایگەیاندووە: “ئەو لیژنەیەی دیوانی چاودێری دارایی، کە سەردانی هەرێم دەکات، دەبێت ڕاپۆرت لەسەر خەرجی ‌و داهات ئامادەبکات دەبوو ئەو ڕاپۆرتە بەر لەداخستنی بودجەی 2023 ئامادەبکرایە، کە شەش مانگ پێکەوە دەکرێت”. جەمال کۆچەر وتیشی:“بەگوێرەی یاسای بودجەی گشتیی عێراق، دەبێت دیوانی چاودێری دارایی عێراق ڕاپۆرتەکەی لەسەر خەرجی ‌و داهاتی هەرێم بداتە ئەنجوومەنی وەزیران‌ و پەرلەمانی عێراق”. پێشتر موعین کازمی، ئەندامی لیژنەی دارایی لە لێدوانێکی ڕۆژنامەوانیدا ڕایگەیاندبوو:"بە ئەگەریکی زۆرەوە لەم هەفتەیە تا ناوەڕاستی ئەم مانگە وەفدەکە دەگەنە هەولێر و دەست بە کارەکانیان دەکەن و چارەنووسی سێ مووچەی کۆتایی ساڵی ڕابردووش لەگەڵ وردبینییەکدا یەکلایی دەبێتەوە".

هاوڵاتی بەشێک لە کۆمپانیا گەشتیاریەکانی سلێمانی دەڵێن بەهۆی داخستنی ئاسمانی تورکیا بەڕووی فڕۆکەخانەی سلێمانیدا ڕێژەی گەشتیاریەکانیان بۆ تورکیا بەڕێژەیەکی " بەرچاو" بۆ پشوی سەری ساڵ کەمی کردووە، هاوڵاتیانیش دەڵین" بەهۆی بۆردومانەکان پێویستە بایکۆتی تورکیا بکەین." کۆمپانیای سلێمانی تراڤڵ یەکێکە لە کۆماپانیا گەشتیاریەکان و لە لێدوانێکدا بۆ هاوڵاتی لەبارەی کەمی گەشتەکانەوە دەڵێت " بەهۆی داخستنی فرۆکەخانەی سلێمانی بەرووی تورکیادا گەشتیارەکانیان بە نزیکەی ٦٠٪ کەمی کردووە، لەبەرامبەردا گەشتەکانیان بۆ دوبەی و لوبنان زیادی کردووە". ماوەی زیاتر لە دوو مانگە بەهۆی تەقینەوەیەک لەبەردەم وەزارەتی ناوخۆی تورکیا لە ئەنقەرە کە پارتی کرێکارانی کوردستان ئەنجامیدا، بۆردومانەکان لەسەر ڕۆژئاوا و باشوری کوردستان لە لایەن تورکیاوە بەچڕی بەردەوامە و دەیان کەس گیانیان لەدەست داوە، سەدان گوند و ناوچەی هەرێمی کوردستان، ژێرخانی ئابوری و شوێنی مەدەنی لە رۆژئاوا کراونەتە ئامانجی درۆنەکانی تورکیا. بەشیک لە هاوڵاتیان لەبەرامبەر ئەم بۆردومانە چڕانەی تورکیا ديڵێن بایکۆتکردن" هەڵوێستیکی نەتەوەییە" و کاریگەری دەبێت. شاهید کوردستانی گەنجێکی شاری سلێمانیە و بەردەوام لەڕێگەی تۆڕەکۆمەڵایەتیەکانەوە زانیاری لەبارەی مێژووی کورد و کەسایەتیە گەورەکانی مێژووی کورد بڵاو دەکاتەوە، ئەو دەڵێت" چارەسەرەکە نەوەتە سازیە،دروستبوونی کۆدەنگی ئاوایە، ئەستەمە  لەدەرەوەی دەوڵەتیش کۆدەنگی دروست نابێت، کێشەکە ئەوەیە کە تاکەکان خۆیان بە هاوچارەنوسساز نازانن، تاکەکان ناپەیوەستن بەیەکەوە، ئەمەش پاشاگەردانی دروست دەکات... ئەوەی سود بە تورکیا و ئێران و عێراقیش دەگەێنێت نەبوونی نەتەوەسازیە، پێی وایە جینۆسایدی دەرسیم بەسەر ئەمدا نەهاتووە و خۆی بەکوردستانی نازانێت".  هاوکات سەرکاو محەمەد  کوردێکی تاراوگەیە دەڵێت" ئەگەر یەکگرتوویی و ئینتیمایی نەتەوەییمان هەبێت دەتوانین کاریگەریمان دەبێت، ڕاستە پەرتەوازەیی حزبەکان کاریگەری هەبووە، بەڵام پێویستە ئێمە لەبەرامبەر ئەم سنوربەزانەی خاکەکانمان بێدەنگ نەبین، دەشڵێت لەم کاتەدا گەشتکردن وەک ئەوەیە " بەدەستی خۆمان ئابوری ئەو وڵاتە ببوژێنینەوە وبۆردومانمان بکات"  تورکیا  لە ٣/٤/٢٠٢٣ ئاسمانی وڵاتەکەی بەڕووی فرۆکەخانەی سلێمانیدا داخستووە، دوای چەندین هەوڵی سیاسی و دیبلۆماسی بەڵام هێشتا گەشتەکان ئاسایی نەبوونەتەوە، بەڵکوو ماوەی داخستنی ئاسمانی وڵاتی تورکیا بەڕووی فرۆکەخانەی سلێمانی بۆ مانگی شەشی ساڵی داهاتوو دریژکراوەتەوە و هاوڵاتیانیش ناچارن لەڕێگەی فرۆکەخانەی کەرکوک و هەولێرەوە بۆ تورکیا گەشت بکەن.

هاوڵاتی بە پشتبەستن بە ئامارەکانی هەنگاو، لە ماوەی ساڵی ٢٠٢٣ی زایینی، کوژرانی کۆڵبەرەکان بە بەراورد لەگەڵ ساڵانی ڕابردوو بە شێوەیەکی بەرچاو زیادی کردووە و ٤١ کۆڵبەر و کاسبکار کوژراون و لانی کەم ٢٩٢ کۆڵبەر بریندارکراون. ڕێکخراوی هەنگاو ئاماری ساڵانەی خۆی سەبارەت بە پێشێلکارییەکانی مافی مرۆڤی لە ئێران و ڕۆژهەڵاتی کوردستان بڵاوکردەوەو بە گوێرەی ڕاپۆرتەکە، ئەم ساڵ٣٣٢ کۆڵبەر لەسەر سنوورەکانی پارێزگاکانی سنە، ورمێ و کرماشان بوونەتە قوربانی، کە لەو ژمارەیەش زیاتر لە ٨٦% بە تەقەی راستەوخۆی هێزەکانی پاراستنی سنوور بوون وەک لە ڕاپۆرتەکەدا هاتووە لە کۆی ئەو کۆڵبەرانەی کە بوونەتە قوربانی ٨٦.٥% (٢٧ کوژراو و ٢٥٨ بریندار) بە تەقەی ڕاستەوخۆی هێزە چەکدارەکانی  ئێران کوژراون و یان بریندارکراون و باقی حاڵەتەکان بەهۆی تەقینەوەی مین و ڕووداوی سروشتی وەکوو ڕەنووو هەرەسی بەفر و ڕق بردنەوە و … هتد بووە. هەروەها، کۆڵبەرێکی تەمەن ١٦ ساڵ بە تەقەی ڕاستەوخۆی هێزە چەکدارەکانی ئێران کوژراوە و ٢٥ منداڵی کۆڵبەریش لە ساڵی پێشوودا بریندارکراون. لە ڕاپۆرتەکەی ئەو ڕێکخراوەدا هاتووە کە زیاترین ئاماری کۆڵبەرانی قوربانی کە دەبێت بە ١٧٩ حاڵەت لە پارێزگای سنە بووە و دوای ئەو لە پارێزگای کرماشان کە ١٣٨ کۆڵبەر کوژراون یان بریندارکراون. کۆڵبەرەکان مێرمنداڵ و منداڵانیشیان تێدان، کە لەسەر سنوورەکان بارێکی زیاتر لە ئەندازەی خۆیان هەڵگرتووە بۆئەوەی بژێویی خۆیان و خێزانەکانیانی پەیدا بکەن.

هاوڵاتی لێپرسراوی هۆبه‌ی كوشتارگه‌ی هاوچه‌رخی سلێمانی ڕایگەیاند، له‌ماوه‌ی ١٢ مانگی ساڵی ٢٠٢٣دا، زیاتر لە ١٧ هه‌زار تۆ‌ن و ٤٥١ كیلۆ گۆشت ڕه‌وانه‌ی بازاره‌كانی سلێمانی كراون، دەشڵێت نزیكه‌ی ٤٥ تۆنیش له‌ناوبراون كه‌ بۆ به‌كارهێنان شیاو نه‌بوون. د.شاڵاو عارف، لێپرسراوی هۆبه‌ی كوشتارگه‌ی هاوچه‌رخی سلێمانی بڵاویكردەوە: له ‌ماوه‌ی یه‌ك ساڵی كاركردنی تیمی پزیشكی كوشتارگه‌ له‌ژێر چاودێری و ڕێنمایی به‌ڕێوەبه‌رایه‌تی ڤێتێرنه‌ری سلێمانی، بڕی ١٧ هه‌زار تۆ‌ن و ٤٥١ كیلۆ گۆشتی ته‌ندروست ڕه‌وانه‌ی بازاڕه‌كانی شاری سلێمانی كراون كه‌ له ‌ڕووی ته‌ندروستی و به‌های خۆراكیه‌وه‌ شیاوبوون بۆ به‌كارهێنان، به‌ سه‌رجه‌م هه‌نگاوه‌كانی به‌رهه‌مهێنانیشدا تێپه‌ڕیوون كه‌ له ‌ڕووی پێوه‌ره‌كانی پزیشكی ستاندارد بوون". وتیشی:"بڕی ٤٤ تۆ‌ن و ٩١٠ كیلۆ گۆشت له‌لایه‌ن تیمی پزیشكیه‌وه‌ دیاریكراون كه‌ له‌ ڕووی ته‌ندروستی و به‌های خۆراكیه‌وه‌ بۆ به‌كارهێنان شیاو نه‌بوون و به‌ڕێگه‌ی زانستی له‌ناوبراون، هاوکات به‌ هه‌زاران ئەندامی لاشه‌ی ئاژه‌ڵی نه‌شیاویش له ‌ناوبراون، نزیكه‌ی هه‌زار ئاژه‌ڵی زیندووش ڕێگه‌یان پێنه‌دراوه‌ كوشتاریان بۆ بكرێت كه‌ هه‌ڵگری نه‌خۆشی بوون و نێردراونه‌ته‌وه‌ بۆ چاره‌سه‌ر”. لێپرسراوی هۆبه‌ی كوشتارگه‌ی هاوچه‌رخی سلێمانی دەشڵێت: نزیکەی ١٦ وانه‌ی زانستی له‌ ڕووی پراكتیكیه‌وه‌ پێشكه‌ش به‌ ناوه‌نده‌ ئه‌كادیمیه‌ جۆراوجۆره‌كان كراون، هاوكاری ئه‌نجامدانی یه‌ك توێژینه‌وه‌ی زانستیش كراوه‌ له‌باره‌ی نه‌خۆشیه‌ مرۆژه‌ڵیه‌كان (گوازراوه‌كان) كه‌ له‌ ڕووی زانستی پزیشكیه‌وه‌ گرنگن بۆ ڕووبه‌ڕووبونه‌وه‌ و كۆكردنه‌وه‌ی زانیاری له‌باره‌یانه‌وه‌.

هاوڵاتی هێزەكانی سوریای دیموكرات ژمارەی هێرشەكانی توركیای بۆ سەر ناوچەكانی بەڕێوبەریی خۆسەریی لە ماوەی ساڵی ٢٠٢٣دا ئاشكراكرد، ئاژانسێكی ڕۆژئاوای كوردستانیش ئاشكرایكردووە كۆی گشتی بە ئامانجگرتنی شوێنەكان بەهۆی هێرشەكانی توركیا 121 شوێن بووە بە 179 هێرش . هێزەكانی سوریای دیموكرات ژمارەی هێرشەكانی توركیای بۆ سەر ناوچەكانی بەڕێوبەریی خۆسەریی دیموكراتی، لە ماوەی ساڵی ٢٠٢٣دا و ژمارەی قوربانییەكانیان و ئەو ئۆپەراسیۆنانەی كە لەلایەن هێزە سەربازییەكانیانەوە ئەنجام دراون لە چوارچێوەی  وەڵامدانەوەی شەرعیدا بۆ ئەو هێرشانە ئاشكرا كرد. بەگوێرەی ناوەندی ڕاگەیاندنی هێزەكانی سوریای دیموكرات-هەسەدە، توركیا ٧٩٨ جار ناوچەكانی ڕۆژئاوای كوردستانی كردوەتە ئامانج كە ٥٧٨ جار بە چەكی قورس، ١٠٣ جار بە فڕۆكەی سەربازی و فڕۆكەی بێفڕۆكەوان و خۆكوژی، ٢٥ جار بە چەكی ئاسایی و دوو جاریش بە مین و تەقەمەنی هێرشەكان ئەنجامدراون. بەپێی ئامارەكان، هێزەكانی سوریای دیموكرات بە ١٤٣ ئۆپەراسیۆنی دژ بە توركیا و میلیشیا چەكدارەكانی دڵسۆزی توركیا وەڵامی داوەتەوە و ئەو ئۆپەراسیۆنانەش بوونەتە هۆی كوشتنی٢٣٧ كەس كە ٥٢ سەربازی توركیایان تێدابووە، ئەوانی تریش لە میلیشیا چەكدارەكانی دڵسۆزی توركیا بوون، جگە لە برینداربوونی ٢٩٥ كەس و لەنێویاندا ٩١ سەربازی توركیا، هەروەها تێكشكاندنی دەیان ئۆتۆمبێل و شوێنی سەربازی. هەسەدە رایگەیاندووە، ناوچەكانیان لەلایەن شانەكانی ڕژێمی سوریاوە هێرشیان كراوەتە سەر، ئۆپەراسیۆنەكانی دژ بە هێزە سەربازییەكان بووەتە هۆی ئەوەی ١٧٣ شەڕەڤان لە كاتی رووبەڕووبوونەوەی توركیا و شانەكانی ڕژێمی سوریا شەهیدببن. لەماوەی ئەمساڵدا ٣٩ هاووڵاتی سڤیل گیانیان لەدەستداوە كە ١١ یان منداڵن، هاوكات ژمارەی بریندارەكان گەیشتووەتە ٩٨ كەس كە ١٥یان سەربازن، هەسەدە وادەڵێت. هاوكات ئاژانسی نۆرس پرێسی ڕۆژئاوای كوردستان بڵاویكردەوە: هەفتەی ڕابردوو توركیا ئۆپەراسیۆنێكی سەربازیی دەستپێكرد و بە هێرشی ئاسمانی و تۆپباران رۆژئاوای كوردستانی كردە ئامانج، لە ئەنجامدا جیا لە زیانی گیانی زیانی زۆر بە نەخۆشخانە و ناوەندە تەندروستییەكان و دامەزراوە خزمەتگوزاری و گرنگەكان كەوت. كۆی گشتی بە ئامانجگرتنی شوێنەكان بەهۆی هێرشەكانی توركیا 121 شوێن بووە بە 179 هێرش، توركیا نەخۆشخانەكانی كردە ئامانج، لەوانە نەخۆشخانەی شوشتنی گورچیلە و كارگەی ئۆكسجین، لە قامشلۆ، جگە لە بنكەی تەندروستی مەشتە نور لە كۆبانی. چەند ڕۆژێك لەمەوبەریش، دەستەی تەندروستی بەڕێوەبەری خۆسەری لە شاری قامشلۆ ڕایگەیاند، نەخۆشخانەی شۆردنی گورچیلە و وێستگەی ئۆكسجین كە پێداویستیی نەخۆشخانەكانی شارەكە و گوندەوارەكانی دابین دەكرد، بە تەواوی لە كاركەوتوون، لە ئەنجامی بۆردومانەكەی توركیا. پێشتر، هاوسەرۆكی دەستەی تەندروستی لە هەرێمی جەزیرە، مەعتەر عەباس لە لێدوانێكدا بۆ نۆرس پرێس ڕایگەیاند، كارگەی ئۆكسجین و نەخۆشخانەی شوشتنی گورچیلە لە گرنگترین سەنتەرەكان دادەنرێت كە رۆژانە خزمەتگوزاری تەندروستی بۆ دانیشتوانی ناوچەكە پێشكەش دەكرد. ئەو ئاژانسە ئاماژەی بەوەشكرد، نەخۆشانی شوشتنی گورچیلە ڕووبەڕووی ئازارێكی گەورە دەبنەوە، چونكە تاكە سەنتەرە كە ئەو خزمەتگوزارییانە لە ناوچەكەدا پێشكەش دەكات، لەكاتێكدا وێستگەی ئۆكسجین توانای دابینكردنی پێویستی نەخۆشەكانی بۆ ئۆكسجین نەماوە، هەروەها سەنتەری جێگرەوە نییە. هەڕەشەكانی توركیا بەردەوامن لە كردنە ئامانجی ژێرخان و دامەزراوە خزمەتگوزارییەكان لە رۆژئاوای كوردستان، سەرەڕای بەڵێنەكانی ئەمریكا بۆ كۆتاییهێنان بەم هەڕەشە و هێرشانە، بەپێی ئەوەی جەنەڕاڵ مەزلوم عەبدی، فەرماندەی گشتی هێزەكانی سوریای دیموكرات ڕایگەیاندووە كە ئەمەریكا بەڵێنی راگرتنی ئەو هێرشانەی داوە.  

هاوڵاتی وەزارەتی پێشمەرگەی حكومەتی هەرێمی كوردستان لەبارەی ئەو هێرشەی لەسنووری هەولێر بەدرۆنی بۆمبڕێژكراو لە 30-12-2023 كرایە سەر بارەگایەكیان ڕوونكردنەوەیەكی بڵاوكردەوە، ڕاشیدەگەیەنێت" بەتوندی سەركۆنەی دەكەین". لەڕاگەیەندراوەكەی وەزارەتی پێشمەرگەدا هاتووە: بە توندی سەرکۆنەی ھێرشی درۆنی بۆمبڕێژکراو بۆسەر بارەگاییەکی ھێزی پێشمەرگەی کوردستان دەکەین، کە لە بەرواری٢٠٢٣/١٢/٣٠ لە سنوری پیرمام-ھەولێر لەلایەن گروپە لە یاسا دەرچوەکان ئەنجام درا. سەقامگیری، ئارامی و ئاسایشی ھەرێمی کوردستان، زامنیی ئارامی و سەقامگیری عێراق و ناوچەکەشە.  وەزارەتی پێشمەرگە دەشڵێت: ئێمە لەوەزارەتی پێشمەرگە، بانگی حکومەتی عێراقی و تەواوی دۆستانمان لە ھاوپەیمانی نێودەوڵەتی دەکەین، کە  کە پاڵپشتمان بن بۆ راگرتنی ئەو پەلامارە نابەرپرسیارانەدا، کە دەبێتە ھۆی ئاشووبی زیاتر بۆ ھەرێم و عێراق و ناوچەکە بە گشتی.  " ھەرچی زووە بکەرانی ئەو کارە تیرۆریستیانە بدۆزرێنەوە و بە سزای یاسایی خۆیان بگەن، دووپاتیشی دەکەینەوە، ھێزی پێشمەرگەی کوردستان، وەک ھەمیشە بۆ پاراستنی خاک و میللەتەکەمان، مافی بەرپەرچدانەوەی پێویست و گونجاوی دەبێت". وەزارەتی پێشمەرگە وادەڵێت.  

هاوڵاتی بانکی ناوەندیی عێراق بڵاویکردەوە، لە سبەینێ وە مامەڵە داراییەکانی ناوخۆی وڵات بە دینار ئەنجامدەدرێن، دەشڵێت ته‌نها چوار لایه‌ن مافی وه‌رگرتنی حه‌واڵه‌ ده‌ره‌كیه‌كانیان به‌دۆلاری كاش هه‌یه‌. بانکی ناوەندیی عێراق لە ڕاگەیەندراوێکدا بڵاویکردەوە: بۆ جێبەجێکردنی ئامانجەکانی سیاسەتی دراو و توانا دارایی بانکەکان بۆ دابینکردنی پێداویستییەکانی دراوی بیانی بۆ کڕیارەکانیان، بانکی ناوەندیی عێراقی ئەو لایه‌نانه‌ی دیاریکردووە كە بۆ وەرگرتنی حەواڵە دەرەکییەکانیان بە شێوەی کاش دەتوانن مامەڵە بكەن. لە ڕاگەیەندراوەکەدا بانكی ناوەندی عێراق ئاماژەی بەوەشکردووە نێرده ، نوێنەرایەتییە دیپلۆماسییەکان، ڕێکخراوەکان و سەرجەم دەزگا نێودەوڵەتییەکان کە لە عێراق کاردەکەن، رێکخراوە مەدەنییە ناحکومییەکان کە لە سکرتاریەتی گشتیی ئەنجومەنی وەزیران تۆمارکراون، لە ئەگەری ئەوەی لایەنی بەخشەری بیانی مەرجی ئەوە دابنێت کە بڕە پارەی حه‌واڵه‌‌ی بیانی هاتوو بە دراوی دۆلار لە ناوخۆی عێراقدا بدرێت. بانكی ناوەندی ئەوەشی خستووەتەڕوو: گرێبەستە حکومییەکان کە بە دۆلاری ئەمریکی کاری پێدەکرێت و گرێبەستە بەردەوامەکان بۆ یارمەتییەکان و قەرز و رێککەوتنە دەرەکییەکان، ڕێژه‌ی ٪٤٠ی حەواڵەی هاتوو لە هەناردەکارانی عێراقیه‌کان لە ئەنجامی هەناردەکردنه‌کانیان بۆ دەرەوەی وڵات، بەکارهێنانی دراوی بیانی بۆیان ڕێگەپێدراوە. " بانکەکان رێگەیان پێدەدرێت ئەو بڕە پارەیەی کە لە دەرەوەی وڵاتەوە وەریانگرتووە بە شێوەی دۆلاری کاش بیگەیەننە کڕیارەکانیان، ئه‌‌و سەرچاوە داهاته‌ی که‌ له‌ بەردەستی بانکه‌که‌یه‌ و بەپێی رێککەوتنی نێوان بانک و کڕیار ده‌درێت، بانکەکان بۆیان نییە بە شێوەیەکی ڕاستەوخۆ پارەی کڕیاران کە لە دەرەوەی عێراقەوە بە دراوی دۆلاری ئەمریکی وەریدەگرن بیگۆڕنه‌وه‌ به‌ دراوی دیناری عێراقی تەنها به‌ ڕەزامەندی کڕیار نه‌بێت" بانكی ناوەندی عێراق وادەڵێت.  

هاوڵاتی بەرەبەیانی ئەمڕۆ، بە فڕۆكەی بێفڕۆكەوان ناوچەیەكی سنووری چەمچەماڵ سەر بەپارێزگای سلێمانی لەهەرێمی كوردستان بۆردوومان كرا، تائێستا زیانە گیانی و ماددیەكانی نەزانراون، ئەمەش شەشەم بۆردوومانە لەماوەی پێنج ڕۆژدا، هاوڵاتیش ئاماری هێرشەكانی توركیا و ئێران لەماوەی ساڵی 2023 دا بڵاودەكاتەوە. بەرەبەیانی ئەمڕۆ كاتژمێر هەشت و 15 خولەك، گوندی چنارتووی سەر بە شارەدێی ئاغجەلەر لەلایەن فڕۆكەی بێفڕۆكەوانەوە بۆردوومان كرا، تا ئێستا زیانە گیانی و مادیەكانی ئەو هێرشەی بەرەبەیانی ئەمڕۆ نەزانراوە و لایەنە ئەمنییەکانیش هیچ زانیارییەکیان بڵاونەکردوەتەوە. چوار ڕۆژلەمەوبەر زیاتر لە پێنج جار ئەو سنوورە لە لایەن فڕۆكە بێفڕۆكەوانەكانی توركیاوە بۆردوومان كرا، هەر هەمان ڕۆژیش توركیا سنووری پێنجوێنی بۆردوومانكرد، هاوكات بەردەوامە لەبۆردومانكردنی سنووری بادینان. هەرچەندە هیچ دەزگایەكی فەرمی هەرێمی كوردستان ئاماری هێرشەكانی توركیا و ئێرانی بۆ سەر هەرێمی كوردستان بڵاونەكردووەتەوە، بەڵام بەپێی ئەو بەدواداچوونەی هاوڵاتی ئەنجامیداوە، لەساڵی 2023 دا توركیا زیاتر لە 110 هێرشی لەڕێگەی فڕۆكەی جەنگی و درۆنەوە كردووەتە سەر هەرێمی كوردستان و ئێرانیش لەڕێگەی بۆردوومان و درۆنەوە زیاتر لە 50 هێرشی كردووەتە سەر هەرێمی كوردستان كە بەشێكیان بۆ سەر حزبەكانی ڕۆژژهەڵات بوون لەهەرێمی كوردستان كە بەهۆیانەوە زیاتر لە 30 هاوڵاتی مەدەنی شەهیدبوون. تەنها لە 17 ی تشرینی یەكەمی 2023 ەوە  ئەو گرووپە چەکدارە شیعانەی عێراق کە نزیکن لە ئێران و ناویان لەخۆیان ناوە "موقاوەمەی ئیسلامی"  27 هێرشان لەڕێگەی درۆنەوە کردووەتە سەر هەرێمی کوردستان. ئەوەی جێگەی سەرنجە لەگەڵ چەند بارەبوونەوەی ئەو هێرشانە سیستەمی بەرگری ئەمریكا و هێزی ئاسمانی عێراقیش نەیانتوانیوە ڕێگری بكەن، كاردانەوەش لەسەر هێرشەكان تەنها لەئیدانەكردندا ماونەتەوە و هەڵوێستی جددی لەسەر ئاستی ناوخۆیی و نێودەوڵەتی نیشان نادرێت.  

هاوڵاتی بەرەبەیانی ئەمڕۆ، بە فڕۆكەی بێفڕۆكەوان ناوچەیەكی سنووری چەمچەماڵ سەر بەپارێزگای سلێمانی لەهەرێمی كوردستان بۆردوومان كرا، تائێستا زیانە گیانی و ماددیەكانی نەزانراون، ئەمەش شەشەم بۆردوومانە لەماوەی پێنج ڕۆژدا. بەپێی زانیاریەكان بەرەبەیانی ئەمڕۆ كاتژمێر هەشت و 15 خولەك، گوندی چنارتووی سەر بە شارەدێی ئاغجەلەر لەلایەن فڕۆكەی بێفڕۆكەوانەوە بۆردوومان كرا، تا ئێستا زیانە گیانی و مادیەكانی ئەو هێرشەی بەرەبەیانی ئەمڕۆ نەزانراوە و لایەنە ئەمنییەکانیش هیچ زانیارییەکیان بڵاونەکردوەتەوە. چوار ڕۆژلەمەوبەر زیاتر لە پێنج جار ئەو سنوورە لە لایەن فڕۆكە بێفڕۆكەوانەكانی توركیاوە بۆردوومان كرا،هەر هەمان ڕۆژیش توركیا سنووری پێنجوێنی بۆردوومانكرد، هاوكات بەردەوامە لەبۆردومانكردنی سنووری بادینان. هێرشەكانی توركیا لەكاتێكدایە ئەو گرووپە چەکدارە شیعانەی عێراق کە نزیکن لە ئێران و ناویان لەخۆیان ناوە "موقاوەمەی ئیسلامی" لە 17ـی تشرینی یەکەمی 2023ـوە 27 هێرشان کردووەتە سەر هەرێمی کوردستان. کاردانەوەی ئەمریکا بۆ ئەو هێرشانە بۆردوومانکردنی پێنج بنکەی ئەو گرووپانە بووە لە عێراق، کە بەهۆیانەوە 12 چەکداریان کوژراون.  

هاوڵاتی - عەممار عەزیز ئەو گەنجەی دهۆك كە لەوڵاتی لوبنان لەلایەن چەند كەسێكەوە كوژرا، پێشتر لەسەر روداوێكی كوشتن لەدهۆك ئەو شارەی جێهێشتوەو بۆ كاری بازرگانی سەردانی دوبەیی و لوبنانی كردوەو چەند كەسێكیش بەفێڵ بردویانە بۆ گوندێكی لوبنان و دوای كوشتنی تەرمەكەیان سوتاندوە. ئازاد ئەحمەد كە گەنجێكی شاری دهۆكە، چەند رۆژێك لەمەوبەر لەوڵاتی لوبنان لەلایەن چەند كەسێكەوە ئەشكەنجە دەدرێت و دوای كوشتنی بەشێكی تەرمەكەی دەسوتێنن.  بەوتەی سەرچاوەیەكی ئاگادار بۆ هاوڵاتی، كوشتنی ئەو گەنجە پەیوەندی بەڕووداوێكی كوشتنەوە هەیە لەدهۆك كە مانگی شەشی ئەمساڵ ڕویداوەو پۆلیسی ئینتەرپوڵ سەرقاڵی لێكۆڵینەوەیە لەڕووداوەكە. سەرچاوەیەكی ئاگادار لەسەر روداوەكە تایبەت بە هاوڵاتی وت: "لەمانگی شەشی  ئەمساڵ بەهۆی روداوێكی تەقەكردن لەگەڕەكی ئیتیتی دهۆك كەسێك كوژرا، كەسوكاری كوژراوەكەش داوایان لە چەند كەسێك كردوە بكوژی كوڕەكەیان بۆ بكوژن". "چەند كەسێك ئازاد ئەحمەدیان بەفێڵ بردوەتە گوندێكی لوبنان، یەكەمجار ئەشكەنجەیان داوەو دواتر كوشتویانەو پاشانیش تەرمەكەیان سوتاندوەو دواتر تەرمەكەی لەدارستانێكی لوبنان دۆزراوەتەوە، حكومەتی لوبنانیش تا ئێستا ڕادەستی كەسوكاری نەكردوەتەوە تا كێشەكە یەكلایی دەكرێتەوە" سەرچاوەكە وای وت. بەپێی زانیارییەكان ئەو گەنجە پاش ڕووداوەكەی دهۆك لەسلێمانی و لوبنان ژیاوەو كاری بازرگانی كردووە، سێ برای ئازاد ئەحمەد لەچاكسازی زركای دهۆكن، دوو برای تریشی لەئەوروپا دەژین.  سەرچاوەكە وتیشی"ئازاد سەرەتای ئەم مانگە بۆ كار دەچێتە دوبەی، چونی بۆ دوبەی بەمەبەستی تەواوكردنی رێكارەكانی وەرگرتنی بریكارنامەی براندێك بووە، هەر لەدوبەی پەیوەندیی بە ئەرشەدی برایەوە دەكات و پێی دەڵێت دەیەوێت بۆ دوو رۆژ بچێتە لوبنان و سەردانی هاوڕێیەكی بكات، هەرچەندە براكەی داوا لەئازاد داوای لێدەكات نەچێتە لوبنان و پێی دەڵێت كارەكانت لە دوبەی تەواو بكە، مەچۆ بۆ بەیرووت، بەڵام براكەی سوور دەبێت لەسەر چوون بۆ بەیروت و رۆژی 4-12-2023 لەگەڵ هاوڕێیەكی بەناوی (ج.) دەچنە بەیروت". وەك براكەی باسی دەكات، بڕیاربوو كاتژمێر چواری پاشنیوەڕۆی هەمان رۆژ بگەنە بەیروت، بەڵام كات تێدەپەڕێت و هیچ هەواڵێكی ئازاد نییە. ئەرشەد ئەحمەدی برای كە بۆ "ڕووداو" قسەیكردووە ئەوەی خستوەتەڕوو"چاوەڕێ بووم براكەم مۆبایلەكەی بكاتەوە، قسە بكەین لەسەر گەیشتنی بۆ لوبنان، بەڵام هەر ئەو چاوەڕوانییە بوو و هیچم لێی نەبیست، 24 كاتژمێر تێپەڕی و هیچ هەواڵێكی نەبوو، پەیوەندیم بە هاوڕێكەی كرد كە لەگەڵی چوو بوو بۆ دوبەی و ئیمارات، بەڵام وتی ئاگاداری نیم و گەڕاومەتەوە، لە فڕۆكەخانەی بەیرووت ونم كردووە". براكەی ئازاد بەردەوام دەبێت لە بەدواداچوون و گەڕان بۆ چارەنووسی براكەی، بەڵام هیچ شتێكی دەستناكەوێت، رۆژی 8-12-2023 دەچێتە بەیرووت بۆ چارەنووسی براكەی، بۆی دەردەكەوێت كە دوای دەرچوونی لە فڕۆكەخانە، لەگەڵ چەند كەسێك بینراوە، هەرچەندە هەوڵدەدات بگاتە چارەنووسی براكەی، بەڵام هیچی دەستنەكەوتووە، پاشان پارێزەرێكی بۆ دەگرێت و بەدواداچوون بۆ هۆكاری دیار نەمانی دەكرێت.  ئەرشەد ئەحمەد دەشڵێت: "بۆ چارەنووسی براكەم و بەبڕیاری دادگا دەستكرا بەگەڕان بەدوای ئازاد، پاش نزیكەی 10 رۆژ لە ونبونی، دەزگا هەواڵگری و ئەمنییەكانی لوبنان پێیانوتین براكەتان كوژراوە." ڕۆژی 21ی مانگی 12ی 2023 هەواڵی كوژرانی ئازاد لە لوبنان راگەیەنرا، بەڵام بێ ئەوەی تەرمەكەی بدۆزرێتەوە، بەپێی وتەی براكەی دەزگا ئەمنییەكان راسپێردران بۆ دۆزینەوەی تەرمی ئازاد، پاش هەفتەیەك گەڕان دواجار تەرمەكەی لە گوندی بقەعتوتەی قەزای كەسرەوان لە پارێزگای جەبەل دۆزرایەوە.

هاوڵاتی وتەبێژی حكومەتی عیراق وەڵامی وتەبێژی حكومەتی هەرێمی دایەوەو رایگەیاند: لێدوانەكەی وتەبێژی حكومەتی هەرێم  تۆمەتی ناڕاست و نابەرپەرسیارانەی لەخۆگرتوەو درۆی بێ بنەمای تێدایە، بەتایبەت تۆمەتی برسیكردنی هاوڵاتیانی هەرێم، ژمارەی پارەداركردنە فەرمییە داراییەكانی بیرچوەتەوە، بەشاهیدی فەرمانبەرانی هەرێمی كوردستان.   پێشەوا هەورامانی وتەبێژی حكومەتی هەرێم ئەمڕۆ یەكشەممە 31-12-2023 لەبارەی هێرشە درۆنیەكەی شەوی رابردوی سەر بارەگایەكی هێزی پێشمەرگە لەپیرمام رایگەیاند"ئێمە ئەو لایەنانە و حكومەتی فیدڕاڵ بە بەرپرس دەزانین بەرامبەر ئەم هێرشە ترسنۆكانەیە، چونكە ئەم گروپە لە یاسادەرچوانە لە لایەن حكومەتی فیدراڵی بودجە و موچەیان پێدەدرێت و چەكدار دەكرێن و بە بەرچاوی حكومەتی عێراقەوە هاتوچۆ دەكەن و چەك و موشەك و درۆن دەگوازنەوە و هێرشی تیرۆریستی دەكەنە سەر دامودەزگا فەرمی و سەربازییەكان". باسم عەوادی وتەبێژی حكومەتی عێراق بەڕاگەیەنراوێك وەڵامی وتەبێژی حكومەتی هەرێمی دایەوەو رایگەیاند:"سەرمان سوڕماوە لە لێدوانەكانی پێشەوا هەورامانی وتەبێژی حكومەتی هەرێم، چونكە تۆمەتی ناڕاست و نابەرپەرسیارانەی لەخۆگرتوەو زانیاری تێكەڵ و درۆی بێ بنەمای تێدایە، بەتایبەت تۆمەتی برسیكردنی هاوڵاتیانی هەرێم". وتەبێژی حكومەتی عیراق هەر لەوەڵامەكەیدا ناردنی موچەی فەرمانبەرانی بەبیر وتەبێژی حكومەتی هەرێم هێناوەتەوەو دەڵێت: ژمارەی پارەداركردنە فەرمییە داراییەكانی بیرچووەتەوە، بەشایەتی فەرمانبەرانی هەرێمی كوردستان".  وتیشی، "پەلەكردن لە بڕیاردان دۆخی سیاسی ئاڵۆزتر دەكات لەگەڵ سیاسەت و بەرنامە نیشتیمانییەكەی حكومەتی عێراق یەكناگرێتەوە، چونكە بەغدا پابەندە بە بەرگریكردن لە بەرژوەندی سەرجەم عێراقییەكان بەبێ جیاوازی و ئەركی حكومەتی عێراقیشە پارێزگاری لە ئاسایش و ئارامی و سەقامگیری سەرتاسەری وڵات بكات" وتەبێژی حكومەتی عێراق وای وت. وتیشی:  حكومەتی عێراق رێكاری پێویستی گرتووەتەبەر بۆ لێكۆڵینەوە لە هێرش و بۆردومانەكان، بەڵام لێدوانی لەو جۆرە دەبێتە هۆی ئاڵۆزی دروستكردن بۆ لێكۆڵینەوەكان بەتایبەتی كە هێزە ئەمنییەكان بەهەماهەنگی حكومەتی هەرێم لێكۆڵینەوە دەكەن و حكومەتی عێراقیش دژی هەموو جۆرە هێرش و بۆردومانێكە لە هەرێمی كوردستان بێت یان شارەكانی تری عێراق و كاریش بۆ دۆزینەوەی ئەنجامدەرانی هێرشەكان و رادەستكردنیان بەیاسا دەكات بۆ ئەوەی سزا بدرێن".