عادل عەبدولمەهدی: پەیوەندییەکانی هەرێم و بەغدا بەرەو ئاسایی بوونەوە دەچێت

2019-05-03 12:29:25



هاوڵاتی

عادل عەبدولمەهدی سەرۆک وەزیرانی عێراق  ئەمڕۆ هەینی ڕایگەیاند، پەیوەندییەکانی نێوان هەرێمی کوردستان و حکومەتی عێراق بەرەو ئاسایی بوونەوە دەچێت و بەشێکی زۆری کێشەکان چارەسەر کراون و لە باشترین حاڵەتدایە.

لە کۆنگرەیەکی ڕۆژنامەوانی هاوبەشدا لەگەڵ ئیمانوئێل ماکرۆن سەرۆکی فەرەنسا لە پاریس، سەرۆک وەزیرانی عێراق دەربارەی پەیوەندییەکانی نێوان بەغدا و هەرێمی کوردستان ڕایگەیاند، پەیوەندییەکانیان لە باشترین حاڵەتدایە، بەڵام ئەوەش بە مانای ئەوە نییە کە ناکۆکی و جیاوازی نییە لە بیرو بۆچوونەکاندا، بەڵام ناکۆکیەکان خراونەتە چوارچێوەی چارەسەرکردنەکانەوە.

ئەمڕۆ هەینی عادل عەبدولمەهدی سەرۆک وەزیرانی عێراق بە سەردانێکی فەرمی گەیشتە پاریسی پایتەختی فەرەنسا و لەگەڵ سەرۆکی فەڕەنسا و لێپرسراوانی باڵای ئەو وڵاتە و کۆمپانیا گەورەکانی فەرەنسادا کۆبۆوە.

عادل عەبدولمەهدی لە کۆنگرە ڕۆژنامەوانیەکەدا جەختیکردەوە، لەگەڵ هەرێمی کوردستان لەڕێگەی گفتوگۆ و لێکتێگەیشتنەوە دەتوانن بگەنە چارەسەری گونجاو لەسەر کێشەکانی شنگال و نەینەوا و دۆسیەی نەوت.

لە بەشێکی تری وتەکانیدا سەرۆک وەزیرانی عێراق ئاماژەی بەوەشکردن لەگەڵ هەرێمی کوردستان لە بابەتی دەروازە سنورییەکان گەیشتوونەتە ڕێککەوتن و بۆ یەکەمجارە لە دوای ساڵی ١٩٩٠وە لە سەرانسەری عێراقدا کار بە یەک تاریفەی گومرک دەکرێت.

لە چوارچێوەی سەردانەکەی بۆ وڵاتانی ئەوروپا، ڕۆژی چوارشەممە (٣٠ی نیسانی ٢٠١٩) سەرۆک وەزیرانی عێراق گەیشتە ئەڵمانیا و لەگەڵ کۆمپانیای سیمنیسی ئەڵمانی بە بڕی ١٤ ملیار دۆلار ڕێککەوتنێکی چوارچێوەی کارکردنیان ئیمزاکردووە بە تایبەت لە بواری کارەبا و وزەدا.

بابه‌تی په‌یوه‌ندیدار