ئه‌مریکا 200 بارهه‌ڵگرى دیکه‌ بۆ هەسەدە ده‌نێرێت

5 ساڵ لەمەوپێش



کاکه‌لاو عه‌بدوڵا

ئه‌مریکا به‌رده‌وامه‌ له‌ هاوکارییه‌ سه‌ربازییه‌کانى بۆ یه‌په‌گه‌ و له‌دواین کارواندا ٢٠٠ بارهه‌ڵگرى هاوکارى گه‌شتنه‌ باکورى سوریا. هێزه‌کانى سوریاى دیموکرات ٢٠٠ بارهه‌ڵگرى هاوکارى و لۆجیستى ئه‌مریکاى به‌ده‌ست گه‌شت که‌ زۆرینه‌ى پێکهاتووه‌ له‌ ئۆتومبیلى سه‌ربازی.

ئه‌مه‌ ٢٦ه‌مین کاروانى هاوکارییه‌ و دوێنى شه‌و به‌خاڵى سنورى سمێڵکاى هه‌رێمى کوردستان – سوریا تێپه‌ڕیووه‌.

ڕۆژى ٩ى ئه‌م مانگه‌ش (٥٥) بارهه‌ڵگر گه‌شتنه‌ ده‌ستى یه‌په‌گه‌ و به‌ره‌و ناوچه‌کانى بۆزانێ (عه‌ین عیسا) و شه‌دادییه‌ ڕه‌وانه‌کران که‌ پێکهاتبوون له‌ ئۆتومبیلى سه‌ربازى و چه‌ک و ته‌قه‌مه‌نى له‌کاتێکدا له‌ چوارى مانگ ٦٠ بارهه‌ڵگرى دیکه‌ به‌ده‌ست یه‌په‌گه‌ گه‌شتوون. له‌ماوى شه‌ش مانگدا و دواى ڕووخانى داعش له‌ سوریا، ئه‌مریکا له‌ ٢٦ کارواندا نزیکه‌ى ٢٦٠٠ بارهه‌ڵگرى سه‌ربازى ڕه‌وانه‌ى هێزه‌کانى سوریاى دیموکرات (هه‌سه‌ده‌) کردووه‌. ئه‌مه‌ له‌کاتێکدایه‌ واشنتۆن و ئه‌نقه‌ره‌ له‌مانگى ڕابردوو بڕیارى دامه‌زراندنى ناوچه‌ى ئارامیاندا، به‌ڵام تورکیا ئه‌مریکا به‌وه‌ تۆمه‌تبار ده‌کات که‌ سستى ده‌نوێنێت له‌ دامه‌زراندنى ناوچه‌که‌دا و ده‌ڵێت که‌ ئه‌وه‌ى تا ئێستا کراوه‌ "له‌به‌رژه‌وه‌ندى گروپه‌ تیرۆرستییه‌کانه‌".

هاوکات دوێنێ ره‌جه‌ب ته‌یب ئه‌ردۆغان رایگه‌یاند ئاماده‌ى هێرشى تاکلایه‌نانه‌ن و "ئاماده‌کارییه‌کانمان له‌سه‌ر سنورى خۆمان کۆتاى پێهاتووه‌، ئێمه‌ خۆزیارى ئه‌وه‌ نین له‌گه‌ڵ ئه‌مریکا ڕووبه‌ڕوو ببینه‌وه‌ به‌ڵام ناشتوانین چاوپۆشى له‌و پاڵپشتییه‌ سه‌ربازییانه‌ بکه‌ین که‌ ده‌سته‌به‌رى ده‌که‌ن بۆ ڕێکخراوێکى تیرۆرستی".

place for reklam
بابه‌تی په‌یوه‌ندیدار