ئاسۆ عەبدولەتیف

- ئەوە بزانە پەڕلەمانی عێراق قەت جێگای ئومێد نەبوە بۆ کوردو نەتەوەی کورد، تەنها ناوەندی خۆدەوڵەمەندکردن و کۆکردنەوەی ئیمتیازاتی شەخسی و حیزبی بوەو بەس، تۆ هەر بڕۆ دەنگ بدەو مەوەستە ئەوە فەرزە فەرزی عەین.

- تۆ دەزانیت پەڕلەمانی عێراق دەوڵەتی قوڵی وەلائی و ڕەهبەریزم بەڕێوەی دەبات و هەزاران سەفەقات و کڕین و فرۆشتنی گەورەی تێدا دەکرێ و بازاڕی بەندەکانە سوقی ڕەقیق، خۆ نەدەستورێک هەیەو نەیاسایەکی فیدراڵی و نەمافی کەمینەکان بۆ لێپرسینەوەو ئیستیجواب، تۆی کورد لێرە یاریپێکراوی بۆ ململانێی حیزبی و تایەفەگەریی و دەبێ هەر غاردەی بەدوای دەنگدان و کورسی و نوێنەری ڕاستەقینەی خۆت و حیزبەکەت و هەڵواسینی فلێکس و خۆبەنجکردن و خۆفریودان و وەهم و هیلاکەت و فەلاکەتدا دواجاریش نەکورسی کورد زیاد دەکاو نەکەم ئەکاو بڕاوەتەوە ئەوە دەسەڵاتی کوردە تا ئەو سنورە.

- کورد بەهەموو ئەحزابی سیاسیەوە، بەم جۆرە هەڵبژاردنە نمایشیگەریە، خۆی ئەخەڵەتێنێ و گەلەکەشی سەرگەردان ئەکات، ئەگینا بەدەنگدان نەگۆڕانکاریەک ڕووئەداو نەئومێدێک بۆ کورد بەدی دەکرێ، ئەوەی هەیە قەڵەوبوونی زیاتری خێزانە سیاسیە ئۆلیگاریشە گەورەکان و ئەقتابەکانی بازرگانی نەوت و کۆمپانیاکانی دەرمان و چەک و باروتەو عێراق وەک سەرزەمینی فیتنەو بەهەدەردانی سامان و نەوتەکەی دەمێنێتەوە.

- عەرەبی بزانی یان نا، قسەو موداخەلە بکەی یان نا، شەڕبکەی یان نا لەو پەڕلەمانە مەزهەبیەدا وەک یەک وایەو مافی کوردان ناپارێزی و ئەسڵەن ماف لەوێ نیەو درۆیەکی گەورەیەو هیچ پڕۆژە یاساو بڕیارێک لەئارادانیە، بودجەو موازەنەو ئاسایش و دارایی و نەفەقاتی سیادی و مادە دەستوریەکان بەبێ ئۆکەی ئەو زۆرینەیەو دادگای باڵای فیدڕاڵی نابێتە بڕیار.

- بۆمەگەر دوورخستنەوەی حەلبووسی سەرۆکی پەڕلەمان چی بوو؟ دەنگدان بەیاساکانی حەشدی شەعبی چۆن بوو؟ تێپەڕاندنی میزانیەو موازەنەی ٢٠٢٣ و ٢٠٢٤ و ٢٠٢٥ چۆن ڕویداو چەند مادەو فەقەرە دەستکاریکراو کورد هیچی پێنەکرا لە ١٢/٦/٢٠٢٣ کەسێ شەوی خایاندو کرایە ٦٩ مادەو نەخشەی فاشیزمانەی ئەو پڕۆکسییە مەزهەبیەمان بینی؟ هەڵوەشانەوەی پەڕلەمانی کوردستان کێ کردی؟ دەنگدان لەدژی کوردو شایستە داراییەکانی چۆن کرا؟ 

- ئەمجارەش کورد وەک کەمینەیەکی لاوازی پەرت و لات و پووتی حیزبی و شوانکارەیی دەڕواتەوە بەغداد، دەچێتەوە تەنیشتی زۆرینەیەکی بەهێزی مەزهەبی نەتەوەیی و سوێندی یاسایی پەڕلەمانی دەخوات بۆ سەروەریی و یەکپارچەیی عێراقی فاشیست، دەی عێراقی یەکپارچە سودی چیی بووە بۆ تاکی کورد جگە لەقوربانیدان و کارەسات و ماڵوێرانی. 

- کۆمەڵە وەزیرو مەندوب و سەفیرێک بەسەرۆک کۆمارێکی تەشریفاتی و سەدان ڕاوێژکاری بێئیش و ماستاوچی نەشئەی سەرکەوتن ئەیانگرێ و، مەست ئەبن بۆ یەک دوومانگ، رەسم ئەگرن و دێن و ئەچن. گەشت ئەکەن بۆ دەستکەوت و ئیمتیازاتی حیزبی و حەماسەتی ناوخۆیی پێ سواق ئەدەن لە هەولێرو سلێمانی و دهۆک و هەڵەبجەو کەرکوک، دواتر شاندی حیزبی دەڕۆن بۆ بەغداد بۆ دانوستان، دەی ئەوە چ جۆرە نوێنەرایەتیەک و چ جۆرە فۆڕمێکی حوکمڕانی و موشارەکاتێکی سیاسیە؟

- ئینجا بەو ٦٠ کورسیەی کورد، بەهەموو حیزبەکانەوە، کەهەرگیز نابێت بە ٧٠ کورسی، لەبەرامبەردا ئەوان کە ڕێژەی کورسیەکانیان ٢٦٩ کورسی مەزهەبی ڕقئەستوورە، هەرپڕۆژەیاسایەکیان بوێت تێیدەپەڕێنن وەک دەساڵی ڕابردوو بەزۆرینەی پەڕلەمانی.