فارس نەورۆڵی 

 بانگەشەی سیاسی یاخود ڕیكلام، هۆكارێكی گرنگە كە هێز و كەسایەتییە سیاسییەكان لەو ڕێگایەوە كاریگەریی لەسەر ڕای گشتی دروستدەكەن و ڕای خەڵكی بۆ خۆیان مسۆگەر دەکەن، لەكاتی هەڵبژاردنەكاندا بانگەشەی سیاسی پەیام و بەرنامەی كاندیدەكان دەگەیەننە خەڵك بۆ ئەوەی بەشداربن لە پرۆسەی هەڵبژاردندا، لەو وڵاتانەی دیموكراتییەت بۆتە كلتور و پەروەردە، خەڵك بە وردی چاودێریی بانگەشەی حزبەكان دەكەن بۆ ئەوەی بزانن ڕاستی تێدایە یان چەواشەكاری، بۆ ئەم مەبەستە هەڵسەنگاندن بۆ پەیامی دوێنێی حزبەكان و ئەمڕۆیان دەكەن، ئەوانەی چ لە حكومەت و چ ئۆپۆزسیۆنن بزانن چەندە لەتەك پەیامەكانی خۆیاندا ڕاستگۆ بوون، حزبەکان لەڕێگەی خزمەتكردنەوە دەتوانن متمانەی خەڵک بەدەستبهێنن نەك پەیامی ئایدۆلۆجی و پۆپۆلیستی، بۆیە پەیامی  کۆمەڵگەیەکی خۆشگوزەران و ئارام ڕای خەڵک بۆ خۆی دەبات بەمەرجێ بکرێتە کردار، ئەگەر واقیعی سەیری بانگەشەی ئێستای حزبەکان بکەیت  دەبینین پارتی جیاواز لە پەیامی بانگەشەی حزبەکانی دیکە توانیویەتی پەیامێکی وردو کاریگەر بکاتە هێزی بانگەشە ئەویش لە ڕێگای نیشاندانی پرۆژە خزمەتگوازارییەکانەوە ( کارەبا، ڕێگاوبان، پرۆژەی ئاو) ئەمەش لەڕێگای گوتارێکی باڵاو ئارامەوە وای کردوە ببێتە گوتاری زاڵ لە بانگەشەدا ، ئێمە لە هەرێمی كوردستان لە ناوچەیەكدا دەژین بە درێژایی مێژوو ستەمكاریی بەرهەمهێناوە، بۆیە دیموكراتییەت كاتی دەوێت بۆ ئەوەی ببێتە کلتور، هەرێمی كوردستان لە ساڵی 1992وە پرۆسەی هەڵبژاردنی كردۆتە بەرنامەی كاری سیاسی و پرۆسەی سیاسی، سەرەڕای كەموكوڕی، بەڵام بەردەوام بووە.

 بە باوەڕی من قۆناغ بە قۆناغ خەڵك زیاتر لەتەك پرۆسەی هەڵبژاردن ڕادێن، ئەگەر بەراوردی ئێستا و هەڵبژاردنەكانی پێشوو بكەین  گیانی دەمارگیری خاوبووەتەوە، خەڵك بە توندی ڕووبەڕووی یەكتر نابنەوە، ئەوەی گرنگە پێویستە حزبەكان بزانن خەڵك بە وشیارییەوە چاودێریی بانگەشەكان دەكات و پێوەری خۆیانیان هەیە بۆ جیاكردنەوەی ڕاستی و چەواشەكاری، بۆیە بەشێك لەو دروشمانەی ئێستا بانگەشەی پێدەكەن، یان زۆر لاوازە، یان زیادەڕۆیی زۆری تێدایە، بەڵام دوای ئەوەی تای هەڵبژاردن بەریان دەدات تێدەگەن قسەكانیان چی خەراباتێ بووە، بۆیە باشتر وایە لەنێوان ڕاستی و چەواشەكارییدا ڕاست بدوێین، چونكە خەڵك دەزانێ كام پەیامە ڕاستە و كامە چەواشەكارییە،  بانگەشە بنەما و ئەخلاقی خۆی هەیە كەبریتییە لە:.

 ۱- ڕاستگۆیی و ڕاست و دروستی پەیامی بانگەشە.
 ۲- ڕێزگرتنی ئەوی دیكە و دووركەوتنەوە لە سووكایەتی واتە تۆ ئازادی چۆن بانگەشەی خۆت دەکەیت هەتا ئەو سنورەی ئازادی ڕکابەرەکانت پێشێل ناکەیت.

 ۳- وشیارکردنەوەی ڕای گشتی و دڵخۆشکردنیان لەڕێگای  پەیام و کردارەکانی حزب و کاندیدەکانی، واتە پەیامەکانت ئەوەندە کاریگەربن خەڵک هەست بکات کە پەیامی دڵخوازی ئەون.
 ٤- ڕێزگرتنی ئازادی ڕكابەرەكەت و کلتووری کۆمەڵگەکەت لە پەیامەکانتدا ڕەنگ بداتەوە.

 ٥- پەیامەكەت ڕوون بێت، مانادار بێت، واتە ئەوەندە ئاڵۆز نەبێت خەڵک لێی تێنەگات.

 كەواتە دەبێت تێبگەیین، كە بانگەشەی سیاسی هۆكارێكی بەهێزە بۆ هۆشیارکردنەوەی  تاك و كۆمەڵگە بەمەرجێ نەبێتە هۆكارێك بۆ چەواشەكردنی ڕای گشتی و لادانی ئەخلاقی بانگەشە، پێویستە لەكاتی  بانگەشەدا ڕاستگۆیی و ئاكار و شەفافییەت لەبەر چاو بگیرێت ئەمە دەبێتە هۆكارێك بۆ گەشەكردنی پرۆسەی دیموكراتی.