ڕەنگین مەلا سەمەد
نووسەر و ڕۆژنامەنووس

قووڵبوونەوە لە هەڵبژاردن مەودایەکی فراوان و گشتگیری هەیە، لە ئەنجامدان و دیاریکردنی کاندیدیش بۆ ئەنجامدان، پێویستییە، ئەوەی هەیە بە مانا ڕاستەقینەکەی بکرێت، نەک بەرژەوەندییەت و هەڵەچنیی کەسانی دوور لەو شوێنەو نەشارەزا لە بڕینی ڕێگاکەی

پێویستە بۆ هەڵبژاردن هەڵە نەکرێت، بڕوانامە، ئاست، توانا، لێهاتوویی، تەمەن، ڕەوشتی پێشینە لەبەرچاو بگیرێت
خوو، کلتوور، کەسایەتی، تێڕوانین، بیرکردنەوەی بگۆڕێت بەو ئاراستەیەی هەنگاوی بۆ ناوە لەپێناو سەلماندنی ئەمری واقع و گۆڕینی کلتوور لە خوودییەوە بۆ دەوڵەتیی، ‌تا خاوەندارییەتی هەموو لێپرسراوییەتیەکانی سەرشانی بکات و دوورکەوێتەوە لە ئارەزووە کەسییەکان و هەڵپەی حکومکردن پێوەی، یاساییانە حکومکات نەک بە یاریکردن لەنێو سیاسەت بەرژەوەندی بقۆزێتەوە.

 دووربوون لە بەهاکان لابەلایی و هەڵەکان زەقدەکاتەوە، خواریی وەدەردەخات، گۆڕانکاریی و چاکسازی و دادپەروەریی و داهێنان لاسەنگ دەکات، هۆشیاریی سیاسی کاڵدەکاتەوەو بەرەو فەزایەکی ئاڵۆزو بێموبالاتی دەبات، سەلیقەو قوورسایی ناوەندی دەسەڵات و بڕیار ناهێڵێت.

پێویستە لە هەڵبژاردن هەل بە کەسانی ڕاست و دروست لە کارکردن بدرێت، ڕەوشت و کەسایەتی بکرێتە پێوەر بۆ دیاریکردنی، بنەما مرۆییەکانی تێدابێت، بەجۆرێک ئامادەبێت کە تەواوی ژیانی بۆ خزمەت تەرخان بکات نەک مەحسووبییەت و مەنسووبییەت.

لانیکەم هەڵبژاردنێک بە هەڵبژاردنی کەسانی خاوەن پێگەو ئەزموون و بەرپرسیارییەتی بکرێت، پرۆسەیەکی بەهێز دەبێت بۆ هێنانە کایەی حکومەتێکی ‌بەرهەمدارو خزمەتگوزار، سەقامگیری بۆ تەواوی سێکتەرەکان دەستەبەر دەکات، پێگەی کۆمەڵایەتیی پتەو و بەهێز دەکات.

قاڵبوون لەنێو ئەم پێوەرو هەڵسەنگاندنانە بۆ دەستنیشانکردنی کاندید، درۆو گەندەڵی و قۆرخکاری و تاکییەتیی ناهێڵێت و لە کاتی هەڵبژاردنی لە هەڵبژاردندا دروست دێتە بوون، بەڵام پێچەوانە لە جێبەجێکردن دەبێتە هەڵەی بژاردن لە هەڵبژاردنێکی نادروست و ئەنجام خراپترین پرۆسە لە جێبەجێکردن و، نابووتترین کاردانەوە لەچوارچێوەی حکومڕانیدا دێنێتە کایەوە تا ئەو ئاستەی کە بوون و نەبوون، باش و خراپ، دروست و نادروست، هەق و ناهەق لێک جیا ناکرێنەوە.