لەپێناو دروستنەبوونی قەیران و بەرزنەبوونەوەی نرخی غازی ماڵان، قایمقامییەتی سلێمانی دەستیکردووە بە دابەشکردنی غاز لەڕێگەی ئۆتۆمبێلی دیاریکراوی خۆیانەوە و بە نرخی هەشت هەزار و 500 دینار و قایمقامیەت دەڵێت، هەرکەس غازەکەی بهێنێت بۆى پڕدەکەنەوە.

لەوبارەیەوە هیوا ساڵح سەرۆکی لیژنە هاوبەشەکانی قایمقامیەتی سلێمانی بە کەناڵ8ـی ڕاگەیاند، زیاد لە 70 ئۆتۆمبێلیان بە بتڵی غازی ماڵانەوە ئامادەکردووە و لە چەند خاڵێکی دیاریکراو دەوەستن بۆ دابەشکردنی، ئەوەش دوای ئەوە دێت لە بەنزینخانەکان و شوێنە بازرگانییەکان نرخى غازى ماڵان بەرزبووەوە.

سەرۆکی لیژنە هاوبەشەکانی قایمقامیەتی سلێمانی گوتیشی، ئۆتۆمبێلەکان لەلای بەنزینخانەی بینایی، بەنزینخانەی بەختیارى، بەنزینخانەی شاری سپی و چەند شوێنێکی دیکە دەوەست و هاونیشتمانیان دەتوانن سەردانى ئەو شوێنانە بکەن بۆ بەدەستهێنانى غاز.