.jpeg)
دادوه‌ره سزادراوه‌کانى گه‌رمیان وەڵام نەدراونەتەوە
یه‌کێک له‌دادوه‌ره سزادراوه‌کان: بێده‌نگیمان بۆ ئه‌وه‌یه که‌چاوه‌رێى وه‌ڵامى په‌رله‌مانین‌و دواتر هه‌ڵوێست راده‌گه‌یه‌نین
5 ساڵ لەمەوپێش
شاناز حه‌سه‌ن
دادوه‌ره سزادراوه‌کانى گه‌رمیان و لیژنه په‌رله‌مانییه‌که چاوه‌ڕێى وه‌ڵامى سه‌رۆکایه‌تى په‌رله‌مان ده‌که‌ن بۆ یه‌کلاکردنه‌وه‌ى دۆسییه‌که‌یان و تائێستا هیچ وه‌ڵامێکیان وه‌رنه‌گرتۆته‌وه.
رۆژى پێنجى تشرینى دووه‌مى 2019، کۆمه‌ڵێک دادوه‌رو داواکارى گشتى گه‌رمیان دژى ده‌ستتێوه‌ردانى حزبى مانگرتنیان راگه‌یاندو به‌هۆیه‌وه چه‌ند دادوه‌رێکیان سزادران.
دواى هه‌شت رۆژ له‌مانگرتنه‌که، په‌رله‌مان لیژنه‌یه‌کى پێنج که‌سى پێکهێنا بۆ ڵێکۆڵینه‌وه له‌داواکاریه‌کانیان، به‌وهۆیه‌شه‌وه دادوه‌رانى ناڕازیى گه‌رمیان به‌شێوه‌یه‌کى کاتیى مانگرتنه‌که‌یان هه‌ڵپه‌سارد، ئه‌وه‌ش وه‌ک مۆڵه‌تێکى کاتیى بۆ حکومه‌ت تاداواکاریه‌کانیان جێبه‌جێبکات.
جه‌لال محه‌مه‌د، ئه‌ندامى لیژنه‌ى یاسایى له‌فراکسیۆنى گۆڕان سه‌رۆکایه‌تى لیژنه‌که‌ى کردووه‌و ئه‌ندامه‌کانى پێکهاتوون له رۆژان محه‌مه‌د له‌فراکسیۆنى یه‌کێتى و کاوه عه‌بدولقادر له‌فراکسیۆنى نه‌وه‌ى نوێ و ئه‌رشه‌د حسێن له‌فراکسیۆنى پارتى و رۆبین ئویملک له‌فراکسیۆنى هاوپه‌یمانى یه‌کێتى نه‌ته‌وه‌یى.
جه‌لال محه‌مه‌د، سه‌رۆکى لیژنه‌ى به‌دواداچوون بۆ که‌یسى دادوه‌ره‌کانى گه‌رمیان، له‌لێدوانێکدا به هاوڵاتى وت «له‌نزیکه‌وه له‌کاره‌کان و داواکارییه‌کانمان کۆڵییه‌وه، راپۆرتى خۆمان ئاماده‌کردو داومانه‌ته ده‌سته‌ى سه‌رۆکایه‌تى په‌رله‌مان و ئه‌وانیش لاى خۆیانه‌وه له‌گه‌ڵ ئه‌نجومه‌نى دادوه‌رى و ئه‌نجومه‌نى وه‌زیران کارى خۆیانى له‌سه‌ر ده‌که‌ن».
هه‌روه‌ها وتیشى «له‌کۆى راپۆرته‌که گه‌یشتینه ئه‌و ئه‌نجامه‌ى به‌شێکى زۆرى داواکاریه‌کانیان ره‌وایه، بۆیه چاوه‌ڕوانى ده‌سته‌ى سه‌رۆکایه‌تین».
دادوه‌ره ناڕازییه‌کانى گه‌رمیان چاوه‌ڕوانى راپۆرته‌که‌ى په‌رله‌مانن بۆ ئه‌وه‌ى مافه‌کانیان بۆ بگه‌ڕێته‌وه، به‌پێچه‌وانه‌وه هه‌ڕه‌شه‌ى هه‌ڵوێست وه‌رگرتن ده‌که‌ن.
بورهان ئه‌حمه‌د، داواکارى گشتى له‌گه‌رمیان که به‌هۆى ناڕه‌زایى ده‌ربڕینه‌وه پله‌که‌ى نزمکراوه‌ته‌وه‌و وه‌ک سزایه‌ک شوێنه‌که‌ى گوازراوه‌ته‌وه له‌گه‌رمیانه‌وه بۆ سلێمانى به هاوڵاتى وت «لیژنه‌که‌ى په‌رله‌مان هاتن له‌گه‌ڵمان دانیشتن و له‌نزیکه‌وە گوێیان لێگرتین، راپۆرتى خۆیان نووسیوه‌ته‌وه‌و داویانه‌ته ده‌سته‌ى سه‌رۆکایه‌تى».
جه‌ختى له‌وه‌شکرده‌وه، له‌ئێستادا چاوه‌ڕوانى وه‌ڵامى راپۆرته‌که‌یانن تا بۆ راى گشتى بڵاوبکرێته‌وه‌و سه‌رجه‌م سزاکان هه‌ڵبوه‌شێنرێته‌وه.
بورهان ئه‌حمه‌د وتیشى»ئێمه تائێستا به‌بێده‌نگى ماوینه‌ته‌وه‌و چاوه‌ڕوانین، چونکه زۆرجار پێیان وتووین پێش ئه‌نجامه‌کان مه‌که‌ون بزانین چیمان بۆ ده‌کرێت، هیوادارم بڕیاره‌کان به‌دادپه‌روه‌رى بدرێت، ئه‌گه‌ر وانه‌کرێت بێگومان هه‌ڵوێستى نوێمان ده‌بێت».
.png)
