هاوڵاتی

ئەمڕۆ چەند پێشمەرگەیەکی کۆمەڵەی زەحمەتکێشانه کەوتنە بۆسەی سوپای پاسداران لەم بارەیەوە سەرچاوەیەک بە هاوڵاتی ڕاگەیاند، لە ئەنجامی شەڕی نێوان سوپای پا*ســدا*ران و کۆمەڵەی زەحمەتکێشانی کوردستان، لە ناوچەی مەریوان چوار ئەندامی کۆمەڵە شەهیدبوون کە یەکێکیان ئەندامی سەرکردایەتی کۆمەڵە بوو بە ناوی ڕێبوار کەریمیان.

ئەمڕۆ پێنجشەممە، 19ی ئەیلوولی 2024، ئارام مودەریسی، ئەندامی سكرتاریەتی كۆمەڵەی زەحمەتكێشانی كوردستان، ڕایگەیاند، ڕێبوار كەریمیان ئەندامی كۆمیتەی بەڕێوەبەری كۆمەڵە و بەرپرسی فێرگەی پێشمەرگایەتی كۆمەڵە و چەند پێشمەرگەیەك بەیانی ئەمڕۆ لە سنوری مەریوان كەوتوونەتە بۆسەی پاسدارانی ئێران، ڕێبوار كەریمیان كوژراوە و سێ پێشمەرگەش بە برینداری بە دیل گیراون.

دەشڵێت، ڕێبوار كەریمیان و ئەو پێشمەرگانە بەبێ ئاگاداری كۆمەڵە چوونەتە سنوری ڕۆژهەڵاتی كوردستان و كۆمەڵە لێكۆڵینەوە لە بابەتەكە دەكات.

هاوکات لەسەر ئەم ڕووداوە، دەستەی كارگێڕیی كۆمەڵەی زەحمەتكێشانی كوردستان ئەوەیانخستۆتەڕوو، بە داخێكی زۆر گرانەوە ئەمڕۆ هاوڕێ ڕێبوار كەریمیان ناسراو بە ڕێبوار داسێران، ئەندامی كۆمیتەی ناوەندیی كۆمەڵەی زەحمەتكێشانی كوردستان و بەرپرسی كۆمیسیۆنی نیزامی لە تێكهەڵچوونێك لەگەڵ هێزە داگیركەرەكانی كۆماری ئیسلامی  لە پیرانەكۆن دوای چەندین كاتژمێر شەڕ و خۆڕاگری گیانی ئازیزی بەختكرد.

دەستەی كارگێڕی كۆمەڵەی زەحمەتکێشانی کوردستان دەشڵێت " لە ڕاگەیاندنەكانی دواییدا وردەكاری زیاتر بە ئاگاداریی خەڵكی كوردستان دەگەیەنین". 

جێگەی ئاماژەیە، لە كاتژمێر سێی نیوەشەو تا ئەمڕۆ دوانیوەڕۆ شەڕ بەردەوام بووە لە سنووری مەریوان لە نێوان سوپای پاسداران و پێشمەرگەکانی کۆمەڵەی زەحمەتکێشانی کوردستان.