وەزیری بەرگری ئیسرائیل ئێران تۆمەتبار دەکات بەوەى ناوەندەکانى مەدەنى دەکاتە ئامانج و دەڵێت ئەوان هەموو سنورە ئەخلاقییەکانی بەزاندووە،  موشەک دژی منداڵان و بەساڵاچووان هەڵدەدات.

ئەم بەیانییە ئێران بە مووشەک و درۆن هێرشی کردەوە سەر ئیسرائیل. میدیای ئێران بڵاویکردەوە، ئامانجی سەرەکیی هێرشەکە بارەگای فەرماندەیی، هەواڵگری سوپای ئیسرائیل و سەربازگەی هەوڵگریی بووە لە ناوەندی توێژینەوەی گاڤ یام لە شاری بیەرشیبا. 

یسرائیل كاتز، وەزیری بەرگری ئیسرائیل،  لەدواى هێرشەکانى ئەمڕۆ لەلێدوانێکى ڕۆژنامەوانیدا وتى: من و سەرۆک وەزیران فەرمانمان كرد بە چڕكردنەوەی هێرشەکان بۆ سەر بە ئامانجە ستراتیژی و ئامانجە سیادییەكان لە تاران، بۆ نەهێشتنی هەڕەشەکانیان و لەناوبردنی رژێمەكەیان.

ناوبراو زیادیکرد کە دیکتاتۆرە ترسنۆکەکەی ئێران، لە قوڵایی حەشارگە قایمەكەی دانیشتووەو بە ئەنقەست نەخۆشخانەو باڵەخانەكانی نیشتەجێبوون لە ئیسرائیل دەکاتە ئامانج.

یسرائیل كاتز وتیشى: ئێران تاوانی جەنگ لە مەترسیدارترین جۆری ئەنجام دەدات، خامنەیی لێپرسینەوەی لەگەڵ دەکرێت لەسەر تاوانەکانی، رژێمی خراپەكاری ئێران هەموو سنورە ئەخلاقییەکانی بەزاندووە،  موشەک دژی منداڵان و بەساڵاچووان هەڵدەدات.

جەختى لەسەر ئەوەکردەوە رژێمی ئێرانی، تیرۆریست و دڕندەیە، پێویستە لە ڕەگەوە هەڵبکەندرێت، لەپێناو ئاسایشی ئیسرائیل و جیهان.

وەزارەتى تەندروستى ئیسرائیل بڵاویکردەوە، لە ئەنجامی هێرشەکەی ئێران بۆ سەر چەند ناوچەیەک لە ئیسرائیل، بەتایەتى نەخۆشخانەى سۆرۆکا ژمارەی بریندارەکان بۆ ٦٥ کەس بەرزبووەتەوە.