ئاسۆ حاجی

زانیاریەکان دەڵێن بە فەرمانی سەرکردایەتی پەکەکە لە قەندیل مەزلوم کۆبانێ لە کارەکەی وەک فەرماندەی گشتی هێزەکانی سوریای دیموکرات لادراوە، و لە شوێنی ئەودا کادیرێکی سەرکردایەتی پەکەکە کە هاوشاری مەزلوم کۆبانی و ناوی مەحمود بەرخودانە و بە (مەحمودێ رەش) بەرنیاسە لە جێگەی داندراوە. ئەو کارە چەند مانگێکە کراوە، بەڵام مەزلوم کۆبانی هێشتا وەک فەرماندە دەوام دەکا و رۆژانە دەچێتە ئۆفیسەکەی بەڵام ئەوە تەنها رووکەشە، ئەوە لە ژێر فشاری ئەمریکایی و فەڕەنسیەکانە کە بە (پەیەدە)یان راگەیاندووە ئەوان تەنها مامەڵە لەگەڵ جەنەڕال مەزلوم دەکەن، بۆیە وەک واجیهە ئەوا ماوەتەوە و زیاتر کاری هەماهەنگی لەگەڵ هێزی هاوپەیمانان دەکات و بەرپرسیارێتی دۆسیەی سیاسی هێزەکانی سوریای دیموکراتی لەلایە، بەڵام فەرماندەی راستەقینەی ئەو هێزانە و مەحمودێ رەشە کە لە ساڵی ١٩٨٦ وە پەیوەندی بە پەکەکەوە کردووە.

مەزلوم کۆبانێ لە دوای هێرشی داگیرکاری تورکیا بۆ سەر گرێ سپی و سەرێ کانیێ، بە پێچوانەی بڕیاری سەرکردایەتی پەکەکە هەڵوێستی وەرگرت و بە نێوەندگیری هاوپەیمانان و روسیا رازی بوو لەگەڵ تورکیا بۆ وەستاندنی هێرشەکە، توانی بەشێکی زۆری خاکی رۆژئاوای کوردستان لە داگیرکاری تورکیا و خەڵکەکەشی لە ئاوارەبوون بپارێزێ، لەو کاتەوە مەزلوم کۆبانێ وەک قارەمانێکی نەتەوەیی وەدیارکەوت، بە ئامۆژگاری ئەمریکا و فەڕەنسا بانگهێشتی هەموو لایەنە کوردستانیەکانی رۆژئاوای کوردستانی کرد بۆ دانیشتن و گفتوگۆ و دەست پێکردنی قۆناغێکی نوێ لە ژیانی سیاسی لەو پارچەی کوردستان، کە دەسەڵاتێکی هاوبەشی کوردستانی دروست بکرێ و هێزی هاوپەیمانان پاڵپشتی بکات تا ئەو رادەیەی تورکیا بە خۆشی بێت (لە رێگای دانووستان لەگەڵ بەڕێوەبەرایەتی رۆژئاوای کوردستان) یان بە ناخۆشی (فشاری هاوپەیمانان بە تایبەتی ئەمریکا و فەڕەنسا) پاشەکشێ لە ناوچە داگیرکراوەکانی رۆژئاوای کوردستان بکات، هەروەها مەزلوم عەبدی(کۆبانی) پەیوەندیەکی باش و هاوسەنگی لەگەڵ سەرکردایەتی سیاسی هەڕێمی کوردستانی عێڕاق دروست کرد، هەموو ئەوانە هۆکار بوون، سەرکردایەتی پەکەکە لە قەندیل لەوە بترسن کە رۆڵیان لە رۆژئاوای کوردستان دەگۆڕێت لە فەرمانڕەواوە بۆ دۆست و هاوکار لە باشترین حالەتدا، بۆیە سەرەتا بە گژ پڕۆژە و بریارەکانی مەزلوم کۆبانی دا چوونەوە و دواتریش بڕیار دوورخستنەوەیان دا.

رۆژئاوای کوردستان یان وەک رێڤەبەریا خۆسەر ناوی لێناوە باکور و رۆژهەڵاتی سوریا بە دۆخێکی هەستیار و مەترسیدار تێدەپەڕێت، فشار و هەڕەشەکانی تورکیا رۆژ بە رۆژ زیاتر دەبن، تورکیا لە رێگای رازیکردنی رووسەکان هەولی داگیرکردنی (تەلرەفعەت) دەدات، چونکە شوێنێکی ستراتیژی گرنگە بۆ تورکیا و هەژموونی لە سوریا زۆرتر دەبێتەوە. لەو بارەیەوە ئەگەر دەسەڵاتی رۆژئاوای کوردستان گوێ لە روسیا لەلایەک و ئەمریکا لەلایەکەی دیکە رانەگرن و نەتوانن هاوسەنگی لە نێوان بەرژەوەندی هەردوولایان رابگرن ئەوە هەموو ئەگەرەکان کراوەن و رەنگە تورکیا زیاتریش داگیر بکات.

دەرفەتێکی گەورە و زێڕین لە بەردەم رۆژئاوای کوردستانە، ئەگەر دەسەڵات و بڕیار بۆ کەسێکی وەک جەنەڕال مەزلوم کۆبانێ بگەڕێتەوە، چونکە جاری یەکەمە ئەمریکا و روسیا دەربارەی شێوازی مانەوە و حوکمڕانی ئەو ناوچەیە هاوڕابن، هەردوو وڵات دوو مەرجیان خستۆتە بەردەم سەرکردایەتی رێڤەبەریا خۆسەر، لە دواین سەردانی ئیلهام ئەحمەد هاوسەرۆکی ئەنجوومەنی سوریای دیموکرات بۆ مۆسکۆ و واشنتن ئەو پەیامەی بە ڕوونی بۆ دووبارە کراوەتەوە، خاڵی یەکەم، دەبێ هەموو سەرکردە و فەرماندە و شەڕکەرەکانی پەکەکە کە خەڵکی سوریا نین لە رۆژئاوا دەربچن و دەسەڵات بە تەواوی بدرێتە دەست کوردانی سوریا، خاڵی دووەم، پێویستە هەموو لایەنە کوردیەکانی رۆژئاوا بەشداربن لە حوکمڕانی بە تایبەتی (ئەنەکەسە). لەوەش گرنگتر لە مێژووی سوریادا جاری یەکەمە سەرۆکی ئەو وڵاتە رایبگەیەنێ کە ئامادەن حوکمی لامەرکەزی لەو چوارچێوەی وڵاتی سوریا بدرێتە نەتەوەی کورد، بەڵام روسەکان دەیانەوێ لەوەش زیاتر لە بەشاڕ ئەسەد وەربگرن و وێڕای حوکمی لامەرکەزی لە دەستوری سوریاش مافەکانی گەلی کورد وەک نەتەوەی دووەم لە سوریا بچەسپێنن، بەڵام بە مەرجێک کورد رووبکەنە دیمەشق و ئامادەبن لەگەڵ حکومەتی سوریا دابیشن. ئەو قۆناغە هەستیارەی رۆژئاوای کوردستان، پێویستی بە هاوکاری هەموو لایەنە کوردستانیەکان هەیە لە هەر چوار پارچەی کوردستان بە تایبەتی پارتی دیموکراتی کوردستان و پارتی کرێکارانی کوردستان کە زیاتر دەرفەت بدەنە کوردانی سوریا خۆیان بڕیار لە چارەنووس و شێوەی حوکمڕانی و ئیدارەکردنی خۆیان بدەن.