هاوڵاتی

 بارەگای بارزانی و نوسینگەی سەدر راگەیەندراوێكیان بڵاوكردەوە مەسعود بارزانی داوایەكی لەموقتەدا سەدر كردووە و داوای لێكردووە كۆبوونەوەی سێ قۆڵی نێوان سێ لایەنە هاوپەیمانەكەی عێراق ئەنجام بدرێت.

 هاوكات پەیوەندییەكانی نێوان رەوتی سەدر، پارتی  و هاوپەیمانیی سەروەرییان تاوتوێ كردووە.

بەگوێرەی راگەیەندراوێكی بارەگای بارزانی، مەسعود بارزانی سەرۆكی پارتی پەیوەندییەكی تەلەفۆنیی لەگەڵ موقتەدا سەدر، رێبەری رەوتی سەدر ئەنجامداوە، وەكو لە راگەیەندراوەكەدا هاتووە: لەو پەیوەندییە تەلەفۆنییەدا هەردوولا تاوتوێی گرتنەبەری هەنگاوی پێویست و هەماهەنگیكردنیان لە هەڵوێستەكان لە هاوپەیمانییە سێقۆڵییە ستراتیژییەكە بۆ قۆناغی ئێستا كرد، ئەوەش بۆ گەیشتن بە قۆناغی پێكهێنانی حكومەتی زۆرینەی نیشتمانی.

هەر بەپێی ڕاگەیەندراوی بارەگای بارزانی: لە پەیوەندییە تەلەفۆنییەكەدا مەسعود بارزانی و موقتەدا سەدر كۆك بوون لەبارەی گرنگیی ئەنجامدانی كۆبوونەوەیەك بۆ هێزەكانی هاوپەیمانییە سێقۆڵیەكە لە چەند رۆژی داهاتوودا.

لەلایەن خۆشیەوە نوسینگەی موقتەدا سەدر رێبەری ڕەوتی سەدر بڵاویكردەوە: سەرۆكی ڕەوتی سەدر لەلایەن مەسعود بارزانییەوە پەیوەندی پێوەكراوە و تیایدا تاوتوێی هەڵوێستەكانی هاوپەیمانی سێ قۆڵی و هەماهەنگی نێوانیان كردووە لەم قۆناغە چەقبەستووەدا، ئەویش لەپێناو پێكهێنانی حكومەتێكی زۆرینەی نیشتیمانی. وەك نوسینگەكەی سەدر ئاماژەی پێداوە، هەردوولا ڕێككەوتوون بەمنزیكانە كۆبوونەوەی نێوان هەرسێ لایەنەكەی عێراق ئەنجام بدرێت.