هاوڵاتی

- هێزەکانمان لە بەنداوی تشرین، ‌هێرشی گەورەیان کردە سەر هێزەکانی داگیرکەری تورک و بەکرێگیراوەکانیان.

- 17 بەكرێگیراوی توركیایان كوشتووە و 40ـی دیکەشیان برینداركردووه.

- تەنیا یەک شەڕڤانیان بریندار بووە و ئەویش برینەکەی سووکە. 

لە رووبەڕووبووەنەوەی هێزەکانى هەسەدە لەگەڵ چەكدارە بەكرێگیراوەكانی تورکیا لە دەوروبەری بەنداوی تشرین، 17 بەكرێگیراویان كوشتووه.

ئەمڕۆ شەممە ناوەندی راگەیاندنی هێزەکانی سووریای دیموکرات (هەسەدە) لە راگەیێندراوێکدا وتی: "هێزەکانمان لە چەندین بەرەی ناوچەکانی باکووری رۆژهەڵاتی سووریا، بەتایبەت لە بەنداوی تشرین، ‌هێرشی گەورەیان کردە سەر هێزەکانی داگیرکەری تورک و بەکرێگیراوەکانیان".

 هەسەدە ئاماژە بەوەش دەکات، دوێنێ ئێوارە گرووپە چەکدارەکان هێرشیان کردووەتە سەر گوندی ئەبو قەلقال و گوندی عەلوش لە نزیک بەنداوی تشرین و شەڕ و پێکدادانی قورس لەنێوانیان روویداوە.

 بەگوێرەی هەسەدە، لە پێکدادانەکانیان لەگەڵ گرووپە چەکدارەکان، 17 بەكرێگیراوی توركیایان كوشتووە و 40ـی دیکەشیان برینداركردووه و لەنێویشیاندا چەند فەرماندەیەک هەن.

 لەبارەی زیانەکانی خۆیانەوە، هەسەدە دەڵێت، تەنیا یەک شەڕڤانیان بریندار بووە و ئەویش برینەکەی سووکە.  

25 رۆژە گرووپە بەكرێگیراوەكانی تورکیا هەوڵی کۆنترۆڵکردنی بەنداوی تشرین دەدەن کە بە دووری 90 کیلۆمەتر لە ناوەندی حەلەبەوە هەڵکەوتووە.