دۆناڵد ترەمپ دەڵێت، بە هاوئاهەنگی حکومەتی عێراق و حکومەتی هەرێمی کوردستان والیی عێراق و سووریای رێکخراوی داعشیان کوشتووە. 
 
رۆژی شەممە، 15ـی ئاداری 2025، دۆناڵد ترەمپ، سەرۆکی ئەمریکا لە تۆڕی کۆمەڵایەتیی تروس سۆشیاڵ لەبارەی کوژرانی والیی عێراق و سووریای داعش نووسی: "سەرکردە هەڵهاتووەکەی داعش لە عێراق کوژرا. ئەو بێوچان لەلایەن جەنگاوەرە چاونەترسەکانمانەوە راودەنرا."
 
ترەمپ دەشڵێت: "بە هاوئاهەنگی حکومەتی عێراق و حکومەتی هەرێمی کوردی ژیانە نەگریسەکەی ئەو سەرکردەیەی داعش لەگەڵ ئەندامێکی دیکەی داعش کۆتایی پێهێندرا."
 
سەرۆکی ئەمریکا لە کۆتایی پۆستەکەی نووسیویەتی: "بەرقەرارکردنی ئاشتی لە رێگەی هێزەوە دەبێت."
 
ئێوارەی دوێنێ محەممەد شیاع سوودانی، سەرۆکوەزیران و فەرماندەی گشتیی هێزە چەکدارەکانی عێراق لە پلاتفۆرمی ئێکس کوژرانی عەبدوڵڵا مەکی موسڵیح رەفیعی، ناسراو بە ئەبو خەدیجەی راگەیاند.
 
دوای راگەیێندراوەکەی سوودانی، ئەنجوومەنی ئاسایشی هەرێمی کوردستان روونکردنەوەیەکی بڵاوکردەوە کە رەخنە لە هەڵوێستی سەرۆکوەزیرانی عێراق گرت و گوتی: "ئاماژەیان بە رۆڵی سەرەکیی ئەنجوومەنی ئاسایشی هەرێمی کوردستان نەکردووە" لە کوشتنی ئەو سەرکردەیەی داعش دا.
 
دوابەدوای راگەیێندراوەکەی ئەنجوومەنی ئاسایشی هەرێمی کوردستان، فەرماندەیی ئۆپەراسیۆنە هاوبەشەکانی عێراق لە راگەیێندراوێکدا گوتی: "کوشتنی ئەبو خەدیجەی تیرۆریست، بە هاوکاری هەواڵگری بەرهەمداری ئەنجوومەنی ئاسایشی هەرێمی کوردستان بووە."
 
عەبدوڵڵا مەکی ناسراو بە ئەبو خەدیجە، لە ماوەی کارکردنییدا لەگەڵ رێکخراوی داعش، چەندین پۆستی باڵای هەبووە لەوانە، جێگری خەلیفەی داعش، والی عێراق و سووریا و بەرپرسی نووسینگەی ئۆپەراسیۆنەکانی دەرەوە.
 
لە 9ـی حوزەیرانی ساڵی 2023دا وەزارەتی دەرەوەی ئەمریکا خستیە نێو لیستی تیرۆرەوە.