فارس نەورۆڵی

 میللەتی کورد لەناو جەنگ و ململانێکانی مێژوودا  هێجگار بەهێزبووە، توانیویەتی بەرامبەر ئەو هەموو لەشکر و داگیرکاری و قڕکردنانە  بمێنێتەوە و خۆڕاگرێ، نیچە دەڵێ: (ئەو گورزەی لێم دەدەن نەمکوژێ بەهێزترم دەکات)، ئەگەر سەیری مێژووی دەسوەشاندنی ستەمکاران بکەیت لە دژی کورد، ئەو لێدانانە کوردی لەناو نەبرد بەڵکو بەهێزتری کرد، بۆیە هێزی ناوەکی کورد توانی لەبەرامبەر جەنگی وجوددا خۆی ڕاگرێ و قۆناغ بە قۆناغ دۆزی کورد بچێتە پێشەوە لە باشوری کوردستان.

بەعس بەهەموو هێزی سەربازی و ئەمنی و هزری و وێرانکاری ویستی بەخەیاڵی خۆی کورد بسڕێتەوە تا ئەو ڕادەیە سیاسەتی قڕکردنی لە پرۆسەی ئەنفالدا جێبەجێ کرد، ئا لەو کاتەدا برایانمان لە جیهانی ئیسلامی خۆیان کردبووە کەڕەی شەربەت، بگرە لە هەندێ ناوەندەوە ڕەوایەتیان بە بەعس دەدا بۆ قڕکردنی کورد. جیهانی سەرمایەداری و کۆمۆنیستی لە سەردەمی شەڕی سارد و دواتریش  لەبەر بەرژەوەندی خۆیان دەنگی کوردیان نەدەبیست، ئێستا دۆزی کورد لە ئاستی جیهاندا ژمارەیەکی حساب بۆکراوە، لە باشور سەرەڕای کەم و کوڕییەکان خاوەنی حکومەت و دامودەزگای ئیعتیراف پێکراوە، هەر بۆیە بە بەردەوامی نەیارانی کورد لە بیرکردنەوەدابوون بۆ شکاندنی هەرێم لە ڕێگای جۆراوجۆرەوە و بە ئامرازی جۆراوجۆر؛ شەڕی ئابوری بەغدا لە تەک هەرێم لەو چوارچێوەیەدایە و دەیەوێ لە ڕێگای شەڕی ئابورییەوە ئیرادەی مرۆڤی کورد بشکێنێت، لێرەوە پەیوەندی خەڵک و پرۆسەی سیاسی لە هەرێم لەبری یەکتر تەواوکردن بگۆڕێ بۆ یەکتر لەناوبردن، دەتوانم بڵێم ئەم شەڕە ئابورییە کاریگەری نەرێنی لەسەر کۆمەڵگای کوردی دروستکردووە. بۆ نمونە ڕێژەی بێکاری زیادی کردووە، ڕێژەی هەژاری زیادی کردووە، ڕێژەی دابڕان لە خوێندن زیادی کردووە، ئەمەش کاریگەری لەسەر بیرکردنەوە و ئینتیمای تاک دروستکردووە، ئەم بەئامانجگرتنەی بەغداد لەڕێگای شەڕی ئابورییەوە بەئامانجگرتنی حزبە کوردستانییەکان نییە، بەڵکو بەئامانجگرتنی کۆی کۆمەڵگای کوردی و پرۆسەی سیاسی و دۆزی کوردە، ئەوەتا جگە لە بڕینی مووچە و بوجەی هەرێم، شەڕەکەی وردترکردۆتەوە بۆ پەکخستنی بازاڕ و پەکخستنی بەروبومی خۆماڵی و ڕێگانادات بەروبومی کوردستان وەک (مریشک، هێلکە، پەتاتە و بەرهەمەکانی دیکە...) بەپێی  پێویست بڕوات بۆ پارێزگاکانی دیکەی عێراق و ساغبکرێنەوە. ئامانجی ئەم شەڕە ئابورییە بۆ ئەوەیە بەمانای ئەوەی کە هەین ئەوە نەبین، ئەوەی کەبیری لێ دەکەینەوە چیتر بیری لێنەکەینەوە، ئەوەی دەمانەوێ وەک کورد بیکەین نەیکەین، لەتوانا و پەیوەندیمان بەئامانجە گەورەکان جیامان بکاتەوە، سەرئەنجام نایەوێ بەزانست و مەعریفە گەشە بە کۆمەڵگا بدەین، بەڵکو دەیەوێ بزوتنەوەیەک و بیرکردنەوەیەکی نوێ لە کوردستان دروستبکات کار لە هزری  مرۆڤی کورد بکات کە کوردبوون نەهامەتییە، بەداخەوە بەئاگایی بێت یان بێئاگایی، لەناو ماڵی کوردیدا دەنگی یارمەتیدەر هەیە بۆ سەرکەوتنی ئەو پرۆسەیەی دژی هەرێم بەڕێوەدەچێت، ناشبێ ئەوەش نادیدەبگرین پەرتەوازەیی ناوماڵی کورد؛ بەتایبەتی گوتاری حزبی کوردی و تایبەتی تر پارتی و یەکێتی، ئەودارەمان داوەتە دەست بەغدا تابیکێشێ بەسەرماندا، ئەگینا بەغدا بەهێز نییە و لە هەرێم دیموکراتی تر نییە، ئەوە گوتاری شێواوی کوردییە ئەوانی بەهێزکردوە، بە کوردی و بەپوختی دۆخ و هەلومەرجی ڕژێمی بەعس ئەوەبوو توانی ئەنفالمان بکات، دەسەڵاتی ئێستاش ئەوەیە دەتوانێ برسیمان بکات  و بێنانمان  بکات، بەتایبەتی ئەوان دەزانن گۆڕنکاری  لەناوچەکەدا بەڕێوەیە دەیانەوێ لە ڕێگای شەڕی ئابورییەوە ماڵی کوردی لە ئاستی سیاسی و کۆمەڵایەتیدا تەواو بترازێنن بۆ ئەوەی توانای بیرکردنەوەمان نەبێت کە خۆمان بۆ گۆڕانکاریەکان ئامادەکەین،  بەڵام ئەزمون ئەوەمان پێ دەڵێ هەر چۆن ئەنفال نەیشکاندین برسیکردنیش ناتوانێ بمانشکێنێ بەمەرجێ ئەحزابی کوردی و دەسەڵاتی کوردی پێداچونەوەیەک بەخۆیاندا بکەن، پرسیار لە خۆیان بکەن ئێمە بۆ لاواز بوین بەرامبەر بەغدا؟ باوەڕم وایە کورد ئەوەندە خەڵکی ئاقڵی هەیە وەڵامی ئەو پرسیارە بداتەوە ئەگەر گوێ بۆیەکتر بگرین .