لەنجە حاتەم رسول
 
١. بۆچی کۆمەڵگای باشووری کوردستان بەرگەی ئەو هەموو جەور و ستەم ونادادپەروەرییە دەگرێت کە لایەن حکومەتی کوردییەوە بەسەریاندا سەپێنراوە؟ 
لەبەرئەوەی خەڵکی هیلاک و بێهیوان. پاش دەیان ساڵ لە جەنگ و جینۆساید و ئازار، زۆرێک لە کوردەکان ئەوەی دەیانەوێت تەنها ئاشتییە، تەنانەت ئەگەر دادپەروەریشی تێدا نەبێت. بۆیە ئەمڕۆ کورد زۆربەی بێدەنگە، نەک لەبەر ئەوەی هاوڕان یاخود ڕازین بەوەی دەخولقێت، بەڵکو لەبەر ئەوەی هەست دەکەن هیچ هەڵبژاردەیەکی تریان نییە. 
 
٢. ئایا ژێردەستەیی مێژوویی کورد و دابەشبوونی کوردستانی گەورە بۆ چوار بەش هۆکارێکە بۆ قبووڵکردنی دۆخێکی ئاوا نادادپەروەرانە و نەخوازراو؟ 
بەڵێ، ڕۆڵێکی گەورە دەگێڕێت. کورد زیاتر لە پێنج سەدەیە دابەش بووە، چەندین نەوەیە لەلایەن وڵاتانی زلهێزەوە دەچەوسێنرێتەوە. بۆیە ئەو کاتەی کوردەکانی باشوور بەشێکی بچووکی ئازادییان لە وڵاتی عێراق بەدەستهێنا، زۆر کەس بە سەرکەوتنیان زانی. هەست بە شانازی دەکەن بە بوونی هەرێمێکی کوردی. ئەو شانازییە بە هەبوونی "حکومەتی خۆمان" وا لە خەڵک دەکات لە زۆرێک لە شکستەکانی ئەو حکومەتە خۆشبن و بڵێن: “بەلایەنی کەمەوە شتێکمان هەیە.” کە ئەمە 
تێکەڵەیەکی دروستکردووە لە هیوا و تراوما. 
 
٣. چی وای لە دەسەڵاتدارەکان کردووە ئەم دۆخە بقۆزنەوە؟ چارەسەر لەم قۆناغەدا چییە؟ 
فەرمانڕەواکان ناسیۆنالیزم بەکاردەهێنن بۆ بێدەنگکردنی خەڵک و دەڵێن "تۆ یارمەتی دوژمن دەدەیت ئەگەر گلەیی بکەیت." هەروەها کۆمەڵگاشیان دابەش کردووە بەپێی هۆز، حیزب، ترساندن. بۆیە چارەسەرەکە ئاسان نییە، بەڵام دەکرێت هەبێت. خەڵک پێویستیان بە هۆشیاری و پەروەردە و چاونەترسی هەیە. میدیا سەربەخۆکان، کۆمەڵگەی مەدەنی بەهێز و بزووتنەوەکانی گەنجان دەتوانن بازنەکە بشکێنن و گۆڕانکاری بەهێز دروستبکەن. لە هەمووی گرنگتر ئەوەیە کە دەبێت کورد خۆی (نەتەوە) لە سەرووی پارتە سیاسسیەکانەوە دابنێت. 
 
ئێمەی کوردی باشوور گەلێکی سەربەرز و خۆڕاگرین بەڵام لە نێوان ڕابردوویەکی پڕ ئازار و ئێستایەکی نادادپەروەرانەدا گیرمان خواردووە، ساڵانێک لە چەوساندنەوە فێری کردووین بەرگەبگرین بەڵام بۆهەمیشە نا، بەتایبەتی کاتێک نادادپەروەری لە سەرکردایەتی خۆمانەوە سەرچاوە دەگرێت.  
لە کۆتاییدا، داهاتوویەکی باشتر دەکرێ هەبێت لە کاتێکدا ئەگەر خەڵک داوای شکۆ و دادپەروەری و لێپرسینەوە بکەن لە سەرکردەکانی خۆیان نەک لە دوژمن.