عەتا شەمێرانی

هێندەی سلێمانی و هەولێر و هەڵەبجە، مەهاباد و بۆکان و سنەم خۆش ئەوێ، پێشەوا قازی لەناو گلێنەی چاومایە، کێلی شەهیدەکانیان لەناو شوشەی ڕۆحمایە، بست بەبستی خاکی کوردستان تاجی سەرمە، وەک کوردێک، ناتوانم هاوسۆزی دۆزی حیزبە کوردییەکانی ئێران و هەوڵەکانیان بۆ یەکخستنی ڕیزەکانیان و داڕشتنی سەردەمی دوای ڕژێمی ئێران بەدوور بگرم، ئەوان مافی خۆیانە خۆیان ڕێکبخەن، مافی خۆیانە بەدوای ئاسۆیەکی سیاسی جیاوازدا بگەڕێن و خەون بە داهاتوویەکی دادپەروەرترەوە بۆ گەلەکەمان ببینن. ئەمە هەڵوێستێکی پرەنسیپییە، هەڵوێستێکە کە هیچ دوودڵی و سازشێکی لەسەر نییە، بەڵام هەمیشە سیاسەت تەنها بە حەز و نیاز بەڕێوەناچێت!!

هەرێمی کوردستان تەنیا سەکۆیەکی ڕەمزی نییە بۆ دەربڕینی سیاسی، بەڵکو قەوارەیەکە کە لە دڵی زریانێکی هەمیشەیی ناوچەییدا دەژی. سنوورەکانی بە هاوسەنگییە ئەمنییە ناسکەکانەوە بەستراوەتەوە، ئابوورییەکەی هەستیارە بەرامبەر بە هەر گرژییەک و دۆخی ناوخۆی ڕاستەوخۆ کاریگەریی لەسەر پەیوەندییەکانی لەگەڵ دراوسێکانیدا هەیە. لە واقیعێکی وادا هەر چالاکییەکی سیاسی پەیوەست بێت بە دەوڵەتێکی دراوسێوە - بە تایبەت ئەگەر دژایەتی دەسەڵاتەکەی بکات - وەک بابەتێکی ناوخۆیی تێپەڕین لێکنادرێتەوە، بەڵکو وەک پەیامێکی سیاسی بە ڕەهەندە ناوچەییەکان لێکدەدرێتەوە!!

کاتێک پارتە کوردییەکانی ڕۆژهەڵاتی کوردستان لە باشووری کوردستان کۆبوونەوەیەک ئەنجام دەدەن، پەیامەکە نەک هەر دەگاتە دەستەبژێرەکانی خۆیان، بەڵکو دەگاتە تاران و بەغدا و پایتەختەکانی دیکەش کە سەیری ڕووداوە پەرەسەندووەکان دەکەن. ئەو پرسیارەی کە دەبێت بە هێمنی لە خۆمان بکەین ئەوەیە: ئایا هەرێمی کوردستان شوێنی مانۆڕکردنی تەواوی هەیە بۆ ئەوەی بەرگەی هەر کاردانەوەیەکی ئەگەری بگرێت؟!!

ئەزموون فێری کردین کە هەرێمی کوردستان زۆرجار گۆڕەپانێکە بۆ یەکلاکردنەوەی نمرەکان کە هیچ کۆنتڕۆڵێکی بەسەردا نییە. ڕەنگە هەمیشە فشارەکان ڕاستەوخۆ نەبێت، بەڵام دەتوانێت وەک گرژییە ئەمنییەکان، سنووردارکردنی ئابووری، یان پەیامی توندی سیاسی دەربکەوێت. دواجار ئەوە سەرکردە سیاسییەکان نین باجەکەی دەدەن، بەڵکو هاوڵاتی ئاسایی باجەکەی دەدات کە ئارەزووی سەقامگیری و چانسی ژیانێکی شایستە دەکات!!

لە دڵەوە ئاواتەخوازبووم ئەم دیدار و ڕێکەوتنە، لە دەرەوەی هەرێمی کوردستان، لە ئەمریکا یان وڵاتێکی ئەوروپی ڕووی بدایە. لەوێدا لایەنەکان دەیانتوانی هاوپەیمانییەکانیان دوور لە هەستیارییەکانی جوگرافیا و لە چوارچێوەی ژینگەیەکی سیاسیدا دروست بکەن کە کەمتر تووشی ڕووبەڕووبوونەوەی ڕاستەوخۆ لەگەڵ وڵاتانی دراوسێدا دەبن. بەڵام لێرەدا هەموو هەنگاوێک بە کێشی ناڕەوا حیسابی بۆ دەکرێت و هەموو ئاماژەیەکیش لە چاویلکەیەکی ئەمنی قورسەوە لێکدەدرێتەوە!!

هاوپشتی نیشتمانی بەهایەکی باڵایە، بەڵام نابێت ببێتە پابەندبوونێکی کراوە و تێچووی پێشبینینەکراو. پشتیوانی ئێمە بۆ دۆزی ئەوان بە مانای گۆڕینی هەرێم بۆ گۆڕەپانی شەڕی بە وەکالەت نییە. ئەوان مافی خەباتیان هەیە، ئێمەش مافی ئەوەمان هەیە ماڵەکەمان بپارێزین لەوەی ببێتە هێڵی پێشەوەی هەمیشەیی، سیاسەتی ژیرانە سیاسەتێکە کە هاوسەنگی لە نێوان دڵ و دەرووندا دروست بکات!!

بەڵێ بۆ هاودەنگی و یەکگرتوویی و کاری پێکەوەیی حیزبە کوردییەکانی ڕۆژهەڵاتی کوردستان، بەڵام نەک لەسەر حیسابی سەقامگیری باشووری کوردستان و ئاسایشی دانیشتووانەکەی!!