ئەبوبەکر کاروانى

ساڵی نوێ لە هەموو لایەك پیرۆزبێت، دۆعا خوازین، بۆ کورد و گەلی کوردستان و گەلانی ناوچەکەو تێکرای مرۆڤایەتی، ساڵی کەمتر بوونەوەی رەنج و تێچوونی گۆڕانکارییەکان و دەرکەوتنی ئاسۆی پێکەوە ژیانێکی ئازادو دادپەروەرانەتر بێت. 

 کوردستانیانی خۆشەویست،  لە کاتێکدا ئەم بۆنە دەکەینەوە، خۆرهەڵاتی ناوەڕاست و دۆزی کوردو پرسی کوردستان و عێراق، لە بەردەم قۆناغێکی ڕاگوزەری گرنگ و مێژووسازی خۆیاندان.

 ئەو رووداوو گۆڕانکارییە جیۆسیاسی و سەربازی و بونیادیانەی دوو ساڵە دەستیان پێکردووە، پێشبینی دەکرێت لە ساڵی داهاتووشدا بەگوڕو تینێکی زۆرترو  شێوازێکی شوێندانەرتر درێژەیان هەبێت. بەجۆرێك  رەوش و هاوپەیمانی و هاوکێشەی سیاسی نوێ لە ناوچەکەدا بێنەکایەوە. 

هەموو ئەوەش پەیوەندییەکی نزیك و توندی بەدوارۆژی نەتەوەی کوردو گەلی کوردستان و کێشەی کوردو ئایندەی ناسیۆنالیزمی کوردییەوە هەیە بەحومی ئەوەی لە ناو دڵی خۆرهەڵاتی ناوەراستدا دەژین. 

هەر بۆیە چاوەڕێ دەکرێت ئاڵنگاری نوێمان بۆ بێتە پێش ، لە هەمانکاتدا دەرفەتی مێژوویی گرنگی وامان بێتە بەردەم، لە مێژووی هاوچەرخی ناوچەکەدا وێنەی کەم بێت . هەموو ئەوەش  لێمان دەخوازێت، وەك گەل و خاوەن دۆز، نەك کۆمەڵێ هێزی پەرش و بڵاو دژ بەیەك، وێنا لەخۆمان بۆ جیهان و گەلەکەشمان نیشان بدەین، بیسەلمێنین ناسیۆنالیزمی کوردستانی ڕاستیەکی مەیدانی و حقووقی و مێژوویی ئەم قۆناغەی خۆرهەڵاتی ناوەڕاستەو بوونی هەیە و خاوەن دیدو داواکارییەو هێزەو بەشێکە لە جوگرافیای گۆڕانکارییەکان و دووبارە دارشتنەوەی پەیکەری دەوڵەتەکان و هاوپەیمانی و هاوکێشەکان. 

ئەم ساڵە چاوەروانکراوە پڕ لە گۆرانکارییە نوێیەو دۆخی کۆی ناوچەکە، یەکگرتوویی، هاوئامانجیی، هاوهەڵوێستی هێزەکانی هەر پارچەیەکی کوردستان( کۆنفرانسی نیشتیمانی) و یەکتر تەواوکردنی نەتەوەیی هێزەکان لەسەر ئاستی پارچە جیاوازەکان دەخوازێت،.  ئەمەش دژ بە واقیعی ئێستای پەیوەندی هێزەکان لە باشوورو ئاستی خۆ ئامادەکردنی هەندێ  لە پارچەکانی ترە. 

لێرەشەوە سەرکردەو هێزەکان دەخەینە بەردەم لێپرسراوێتی مێژوویی خۆیان و ئەرکە مەزنەکانی قۆناغەکە، بانگەوازیان لێدەکەین لە بازنە سنووردارو بێ ئاسۆ حیزبیی و ئایدۆلۆژی و لۆکاڵییەکان بێنە دەرێ و لەروانگەیەکی نیشتیمانی و نەتەوەیی و ئینسانی و ئەخلاقی بەرفراوانەوە سەیری گۆرانکارییەکان و رۆڵی خۆیان و سرووشتی پەیوەندییەکانیان بکەن. 

 لەبەرئەوەی گرنگە هەموو لایەك تێبگەین کە لەبەردەم ساڵ و قۆناغ و رەوشێکی ئاوارتەو نائاسایداین. عەقڵی ساردووسڕی حیزبیی  و ئایدۆلۆژی و بیرکردنەوەی تێکەڵ بەرق و کینە لە ئەوی دی کوردی و کوردستانیی، دەرەقەتی مامەڵەکردن لەگەڵیاندا نایەن. هەل و مەرجەکە جیاوازو تەکاندەرو  لەیەک کاتدا ترسێنەرو مژدە بەخشە.بەجۆرێك  خۆمان هەبین لە ئاستێکیشدا بێت، دەرفەتەکان لە ئاڵنگارییەکان زۆرترن، زەمینەی لەبارتر لە جاران دەرەخسێت بۆ هەڵسانەوەی کوردو بوونە هەوێنی خۆرهەڵاتێکی ناوەراستی نوێ لە دیدی گەلەکانییەوە، خۆرهەڵاتێك هەڵە مێژووییەکان دەربارەی کورد لە سەد ساڵی ڕابردوودا،  تیایدا راستبکرێتەوە، دەوڵەتەکان لەسەر بناغەی راستیە مێژوویی و واقیعیەکان دابمەزرێنەوەو سیستمە سیاسییە نادیموکرات و دژە گەلیەکانیش وەك خۆرە ناوەرۆکی کرمۆڵ نەکەن. بەوەش سەردەمێکی نوێی برایەتی گەلان لەناوچەکەدا بێتە کایەوە، کوردستانی ڕزگارو کوردو کوردستانیی ئازادیش لەو چوارچێوەدا، ڕۆڵی مێژوویی خۆیان بگێرن. 

باساڵی نوێ بکەین بە ساڵی ئاشتبوونەوەی نیشتیمانی و کۆکردنەوەی تواناکان و یەکخستنی هێزەکان و هاودڵیی رۆڵەکانی گەلی کوردستان.
خوای گەورە پشتیوانی گەلەکەمان و تێکڕای ستەمدیدەو عەدالەتخوازانی جیهان بێت.