سەرەڕای بەڵێنەکانی سەرۆککۆماری ئێران، مەسعود پزیشكیان کە وڵاتەکەی هێرش ناکاتە سەر وڵاتانی دراوسێ، بارەگای خاتەمولئەنبیا ڕایگەیاند، هێرشی سەربازیی وێرانکەر بۆ سەر ئامانجەکانی ئەمریکا و ئیسرائیل لە ناوچەکەدا ڕێکدەخات.

بارەگاکە ڕایگەیاندووە "بە پشتبەستن بە لێدوانەکانی سەرۆککۆماری ئێران، دووپاتی دەکەینەوە هێزە چەکدارەکانمان ڕێز لە بەرژەوەندی و سەروەریی وڵاتانی دراوسێ دەگرن" و جەختیشی کردووەتەوە لەوەی هێزە چەکدارەکانی ئێران هیچ دەستدرێژییەکی سەربازییان بۆ سەر وڵاتانی دراوسێ ئەنجامنەداوە.

بارەگای خاتەمولئەنبیا بەڵێنی هێرشی توندی داوە و دەڵێت" "دڵنیایی دەدەین هەموو بنکە سەربازییەکانی ئەمریکا و ئیسرائیل و بەرژەوەندییەکانیان لە دەریا، ئاسمان و وشکانی لە ناوچەکە ڕووبەڕووی هێرشی وێرانکەر دەبنەوە."

ئەم ڕاگەیێنراوەی بارەگای خاتەمولئەنبیا لە کاتێکدایە هەر ئەمڕۆ مەسعود پزیشکیان، سەرۆککۆماری ئێران لە پەیامێکی ڤیدیۆییدا داوای لێبوردنی لە وڵاتانی دراوسێیان بەهۆی هێرشەکان کە کردوویانەتە سەریان کرد و گوتی: "چیتر هێرش ناکرێتە سەر وڵاتانی دراوسێ و هیچ مووشەکێک ناتەقێنرێت تەنیا ئەگەر لەو وڵاتانەوە هێرش بکرێتە سەر ئێران".