بێمتمانه‌یى ده‌گاته‌ لوتکه‌

2 هەفتە لەمەوپێش



هاورێ سوره‌

یه‌کێک له‌ هۆکاره‌کانى نه‌مانى متمانه‌ پابه‌ند نه‌بوونه‌ به‌ به‌ڵێنه‌کان , ئه‌وه‌تا حکومه‌تى به‌غدا نه‌ک هه‌ر به‌رامبه‌ر هه‌رێم  به‌ڵکو له‌ به‌رامبه‌ر  شاره‌  وێران بووه‌کانى سونه‌کان، به‌رامبه‌ر  خه‌ڵکى ناڕازى ناو شاره‌کانى ناوه‌ڕاست و خوارووى عێراقیش  به‌ڵێنه‌کانى جێبه‌جێ نه‌کردووه‌  ,ڕابردووش  وابووه‌   بێگومان  داهاتووش واده‌بێت.
لایخۆشمان  خه‌ریکه‌ به‌یه‌کجارى متمانه‌ نامێنێت له‌ به‌ینى خه‌ڵک و حکومه‌ت، ده‌بینین  نه‌حکومه‌ت  ئاگاى له‌ دژواربوونى  ژیان و گوزه‌رانى  خه‌ڵکه‌   نه‌خه‌ڵکیش  بڕواو متمانه‌ى به‌حکومه‌ت ماوه‌،  بێگومان  ئه‌گه‌ر  وابڕوات  چاره‌نووسى قه‌واره‌که‌ ده‌که‌وێته‌ به‌ر مه‌ترسى  و  دواجار  کاره‌ساتى گه‌وره‌ى لێده‌که‌وێته‌وه‌  له‌به‌رئه‌وه‌ى هیچ هۆکارێک نابینین  بۆ گه‌ڕانه‌وه‌ى  متمانه‌، دڵنیاشم  زۆر نین ئه‌وانه‌ى ئاگادارن له‌ ئه‌جندا و  ستراتیژیه‌تى داگیرکه‌ران که‌ چ پیلانێکى مه‌ترسیداریان داڕشتووه‌ بۆ له‌ له‌ ناو بردنى قه‌واره‌ى هه‌رێم  وه‌ک قه‌واره‌که‌  نه‌ک لایه‌نێک  و دووان.

بۆیه‌ پێویسته‌ دڵنیابین  کاتێک هێزه‌کانى  هاوپه‌یمانان له‌ کوردستان ڕۆیشتن ئه‌وکاته‌ ئاسمانى عیراق به‌ گشتى ده‌که‌وێته‌ ژێر کۆنترۆڵى عیراقیه‌کان  بۆیه‌ مه‌ترسى جێبه‌جێ کردنى پیلانى  نه‌یاره‌کانمان  نزیک ده‌بێته‌وه‌ ،  به‌داخه‌وه‌   زۆر له‌   که‌ناڵه‌کانى  ڕاگه‌یاندنى   لایه‌نه‌  سیاسیه‌کان  به‌ به‌رنامه‌ کارده‌که‌ن نه‌ک هه‌ر  بۆ نابووتکردن و ناشیرین کردنى حکومه‌ت  به‌ڵکو بۆ ڕوخاندن  , ئاگاداریشن  که‌ خه‌ڵک  ئه‌وانیش   باش  ده‌ناسێت  بۆیه‌ ڕابردووش ده‌نگى پێنه‌داون، نوخبه‌ى سیاسى و ڕوناکبیران  باشده‌زانن ئه‌و حزبۆکانه‌ى دڵۆپێک ئاره‌قیان بۆ پرسى کورد نه‌ڕشتووه‌ له‌ سه‌رده‌مى خه‌باتى سه‌خت و ڕۆژه‌ ڕه‌شه‌کانییش نه‌بوون  بۆیه‌ پێیان ده‌ڵێن ئێوه‌ش به‌دیلى  باش  نین  و گومانی تێدا نیه‌ که‌ چوونه‌ ده‌سه‌ڵات هه‌ندێکتان  دیموکراتخواز و ئازادیخوازان له‌ دار ده‌ده‌ن،  ئاشکرایه‌ حکومه‌تى هه‌رێم خۆشى هۆکارى  نه‌مانى متامانه‌یه‌ بۆ نمونه‌ به‌ڵێن ده‌دات  هه‌موو بیست و پێنجى مانگێک  موچه‌ دابه‌شده‌که‌ین  به‌ڵام  وانیه‌  ڕۆژى  وه‌زاره‌تێک یان دووان  موچه‌ وه‌رده‌گرن  وا دوومانگه‌  موچه‌ى به‌ شێک له‌ موچه‌ خۆران ده‌چێته‌ دواى  ده‌ى مانگى داهاتوو له‌ کاتێکدا  پێویسته‌ به‌ دوو یا سێ ڕۆژ موچه‌ى هه‌موو موچه‌خۆران بدرێت.

 ئه‌وه‌ى ئێستا ده‌گوزه‌رێت هه‌رگیز به‌وه‌ ناڵێن  موچه‌ دابه‌شکردن  پانزه‌  بیست ڕۆژ خه‌ریکى دابه‌شکردنى  موچه‌یه‌کن  ! , ده‌رباره‌ى لێبڕینیش ئاشکرایه‌ کاتێک بڕیارى لێبڕینى  له‌ سه‌دا بیست و یه‌ک درا  دۆلار به‌ (118) هه‌زار دینار بوو  , ئێستا  سه‌د  دۆلار به‌ (147) هه‌زار دیناره‌، ئه‌وکاته‌  به‌رمیلێک نه‌وت به‌ (36) دۆلار بوو ئێستا به‌ (75)  دۆلاره‌  , زۆربه‌ى داهاتى حکومه‌تیش  به‌ دۆلاره‌ ,  ئه‌وکاته‌ نزیکه‌ى دوو ملیۆن ئاواره‌ له‌ کوردستان بوون  ئێستا له‌ چوار به‌ش  به‌شێکیان له‌ کوردستان ماون  ئه‌وکاته‌ تازه‌  شه‌ڕى داسه‌پاوى داعش  کۆتایى هاتبوو.

نمونه‌  زۆرن که‌ خه‌ڵک  باوه‌ڕ نه‌کات حکومه‌ت پاره‌ى دابه‌شکردنى موچه‌ى نه‌بێت،   ئه‌گه‌ر هاوڵاتیه‌ک  بچێت ساڵانه‌ى ئۆتۆمۆبیله‌که‌ى نوێ بکاته‌وه‌ ده‌بێت پاره‌یه‌کى  زۆر له‌گه‌ڵ خۆى  ببات به‌تایبه‌تى  ئه‌گه‌ر  سه‌یاره‌که‌ى بارهه‌ڵگر بێت،  ڕێگه‌و بانه‌کانیش دیارن چه‌ند  وێرانن  ئه‌گه‌ر که‌سێک  خانوو بفرۆشێت  یان باوک بیه‌وێت  تاپۆى خانووه‌که‌ى  بخاته‌ سه‌ر کوڕه‌که‌ى , خانووه‌که‌  دابنرێت به‌ بیست ده‌فته‌ر دۆلار له‌ تاپۆ  و باجه‌کان  به‌لاى که‌مه‌وه‌  ده‌بێ  چل بۆ په‌نجا  گه‌ڵا بده‌ن  ,   ڕۆژانه‌ش  سه‌دان که‌س بۆ ئه‌م مه‌به‌سته‌ سه‌ردانى  به‌ڕێوه‌به‌رایه‌تیه‌کانى  تاپۆ  و باجه‌کان و  به‌ڕێوه‌به‌رایه‌تیه‌کانى پۆلیسى هاتووچۆ ده‌که‌ن , !  ئه‌وه‌شیان  به‌شێکه‌ له‌زوڵم  و نادادپه‌روه‌رى ,   به‌داخه‌وه‌  لێره‌  یان له‌ هه‌ندێک  وڵاتى دیکه‌  ئه‌وه‌ى ده‌سه‌ڵاتى هه‌بوو  واده‌زانێت  ئه‌و  مرۆڤه‌کانى له‌ قوڕ دروستکردووه‌ بۆیه‌ به‌ قۆنده‌ره‌  گرانبه‌هاکانیان سه‌رى خه‌ڵکه‌که‌ پان ده‌که‌نه‌وه‌  ڕیسوایان ده‌که‌ن ,  ده‌خوازن له‌برسانا بمرن !

هه‌روه‌ها   چه‌ند ساڵه‌ خه‌ڵک  و قوتابیانى ده‌ر چوو  دانه‌مه‌زرێنراون ,  گومرگ له‌سه‌ر هه‌موو پێداویستیه‌کانى ژیان  زیادى کردووه‌  , نرخى شیش و چه‌مه‌نتۆ  چه‌ند  قات چووه‌ته‌ سه‌ر ,  لم و چه‌و  ده‌رگا و په‌نجه‌ره‌  و پێویستیه‌ ته‌ندروستیه‌کان , عیاده‌کان  ,  نه‌خۆشخانه‌ ئه‌هلیه‌کان و پێداویستى خواردن  و شتى ناو ماڵ   ,  گران بوونى سوته‌مه‌نى به‌ تایبه‌تى به‌نزین  که‌ کاریگه‌رى له‌ سه‌ر ژیانى زۆربه‌ى هاوڵاتیان هه‌یه‌  ,  زیاد بوونى  بێکارى ئه‌وانه‌ و زۆرى دى هه‌ر باسناکرێت , له‌ زۆربه‌ى شار و شارۆچکه‌کان کێشه‌ى که‌م ئاوى هه‌یه‌  , کێشه‌ى کاره‌با و هاتنه‌وه‌ى پاره‌یه‌کى زۆر بۆ خه‌ڵک  به‌تایبه‌تى له‌دواى  به‌ستنى سه‌عاتى  زیره‌ک , هه‌روه‌ها به‌ ئه‌هلى  کردنى که‌رتى گشتى , لوتبه‌رزى  و گه‌نده‌ڵکارى , ئه‌مانه‌ى سه‌ره‌وه‌  بوونه‌ هۆکار بۆ ئه‌وه‌ى خه‌ڵک هه‌ست  به‌ نائومێدى بکه‌ن  بۆیه‌ ڕۆژ به‌ ڕۆژ  درزه‌کانى به‌ینى خه‌ڵک و حکومه‌ت , خه‌ڵک و حزبه‌کان گه‌وره‌ تر ده‌بن  , ئه‌وانه‌ هۆکارن  که‌ لاوان  زیاتر کۆچده‌که‌ن  نه‌ک  بۆ خوێندن و فێربوونى زانست  به‌ڵکو  به‌ دواى ژیانێکى شایسته‌ تردا  ده‌گه‌ڕێن  ده‌شزانن  ڕێگاکان  ڕێگه‌ى هات و نه‌هاتن   زۆریشیان نه‌گه‌یشتوونه‌ ئه‌و  وڵاته‌ى  ویستویانه‌ بۆى بچن له‌ ڕێگا به‌ هۆکارێک تێدا چوون , به‌داخه‌وه‌ ئاسۆى  چاره‌سه‌ر  یان که‌مبوونه‌وه‌ى به‌شێک له‌و نه‌هامه‌تیانه‌  ڕوون  و دیار نیه‌  , پێویسته‌ هه‌مووان ئاگاداربین هه‌ر که‌سێک  یان حزب  و حکومه‌ت   پابه‌ندى  به‌ڵێن  و په‌یمانه‌کانى نه‌بێت  دواجار زۆربه‌ى خه‌ڵکه‌که‌ لێى  ڕاده‌په‌ڕن ئه‌وکاته‌ دوورنیه‌ ته‌ڕ و  وشک به‌یه‌که‌وه‌ بسوتێنن   سه‌ره‌نجام  فدرالیه‌ت  و قه‌واره‌که‌ش له‌ ناو بچێت   ئه‌مه‌ش  ئاواتى هه‌ر چوار ده‌وڵه‌تى داگیرکه‌ره‌  , ئه‌وکاته‌  کورد به‌ده‌سه‌ڵاتدار و بێده‌سه‌ڵاته‌وه‌  له‌ ڕابردووى ئه‌نفال , کیمیاباران , کۆڕه‌و , ڕاگواستن  خراپتریان به‌سه‌ر دێت , له‌ کۆتاییدا ده‌خوازم  ئه‌وه‌ بیر هه‌مووان بێنمه‌وه‌  که‌ خوداش  نه‌فره‌ت  له‌ ئه‌وانه‌ ده‌کات   درۆ ده‌که‌ن و ڕاست  نین له‌ گه‌ڵ  په‌یمان و به‌ڵێنه‌کانیان ..         

بابه‌تی په‌یوه‌ندیدار