یەکێتى دەبێت چى بکات؟

ئەنوەر حسێن (بازگر)

2 مانگ لەمەوپێش



ئەنوەر حسێن (بازگر)

-کێشە ناوخۆییەکانى یەکێتى لەدواى (8)ی تەمموز. 

- ژەهرخواردکردنى سێ لە سەرکردەکانى یەکێتى.

- پرۆسەى هەڵبژاردنى عێراق.

- خۆنیشاندانى خوێندکارانى زانکۆو پەیمانگاکان.

چوار رووداوى نیوەى دووهەمى ساڵى (2021)ە، کە کاریگەرى لەسەر هەرێم، زۆنى سەوزو یەکێتى بەگشتى جێهێشتوە و پێويستى بەڕامان و پێداچوونەوە هەيە:

یەکەم: ئەو فاكتەرانەى کە حزبەکەى زەعیف کردووە، تووشى قەیرانى سیاسی و ناوخۆیى بووەتەوە، کە رەنگە گەر هەوڵى جددى هەبێت، بتوانێت ئەم قەیرانە تێپەڕێنێت، ئەوەش بە ڕێگەى کۆنگرە یان پلینیۆمێک، کە  نابێت لەژێر ناوى نوێبوونەوە و دروشمى ناواقیعییانەدا بێت، نابێت بەم فۆڕمەى کۆنگرەى چوارو بەم سەرکردایەتییەى ئێستا (زۆرینەى) دەست بۆ چاکسازى، یان ریفۆرم و تەنانەت خۆڕێکخستنەوە بەرێت، بەڵکو کۆنگرەى پێنج، یان پلینیۆمى کۆنگرەى چوار، پێکهاتەکەى کۆن و نوێ، بەقابیلییەت و بە فەراهەمکردنى ئازادى سیاسى و حزبى، واتا یەکێتى پێویستى بە فۆڕم و ریفۆرمێکە، بۆ دەربازبوون لەم قەیرانە، کە بتوانێت وەڵامى خواستەکانى ئەندامان و هاووڵاتیانى کوردستان بداتەوە، لەئاستى پێداويستى مێژوويى حزبەكە و تەوەقعى خەڵكدا بێت.

دووهەم: ژەهرخواردکردنى سەرکردەکانى یەکێتى، بەجۆرێک متمانەى لەناو ریزەکانى حزبدا و لە دەرەوەش لەق کردەوە، کە خراپترین فۆڕمى سیاسەتکردنە لە دروستبوونى يەكێتييەوە.

ئەم کەیسە دەبێت بە هەموو دەلیل، فاکت و دۆکیۆمێنتەکانییەوە یەکلا بکرێتەوە، چ بۆ گەڕانەوەى متمانە، چ بۆ دڵنیایى و نەترسانى ئەو میوانانەى دێنە ناو بارەگاکانى یەکێتى بۆ چا، یان قاوە خواردنەوەیەک لە دیدارو سەردانێکدا، كە ناهەقييان نييە، گەر گومان بكەن، ئەم بابەتە دەتوانێت متمانە بداتەوە بەو رووداوانە.

سێیەم: پرۆسەى هەڵبژاردن کە سێهەم قۆناغى سەختى هەرێم و یەکێتى بووە، ئامارو داتاکان دەڵێن «خەڵک و هاووڵاتیان، یان رێژەى بەشدارى خەڵک، پاشەکشەیەکى غەریبى کردووە».

ئەوە ڕاست و دروستە، بەڵام بۆچى دەبێت یەکێتى و زۆنى سەوز، هێزى سەرەکى ئەم پاشەکشەیە بن، کە نابێت یەکێتى نە لەگەڵ هێزە دۆڕاوەکان، نە لەگەڵ هێزە براوەکان خۆى بەراورد بکات، بەڵکو دەبێت تەنها خۆى لەگەڵ خۆییدا بەراود بکات، یان یەکێتى بۆچى ناتوانێت هێزى یەکەم بێت؟ کە ئەگەرێکى قورس نییە، بەڵام دەبێت خۆى لەکێشەى یەکەم، دووهەم، سێیەم و چوارەمى ناو حزبەکەى و هاوشێوەى دەرباز بکات و مەجالى دووبارەبوونەوە نەدات، هەم خواست و داواکارییەکانى جەماوەر لەبەرچاو بگرێت.

کە لەم خاڵەدا دەبێت داخوازى خەڵک پێش کادرە حزییەکانى بخات، یان ریفۆرم و چاکسازییەکانى قوڵتر کۆمەڵگە بگرێتەوە بە حزبیشەوە.

چوارەم: خۆنیشاندانى خوێندکاران، ئەگەرچى سادەترین خواست و داواکارى ئەم توێژەیە بۆ ژیانێکى باشتر، بەڵام بێ کاریگەرى سیاسی نییە، بەڵام چۆن هەموو لایەک کێشە و داخوازییەکانى خوێندکاران بە بەرهەق دەزانین، ئەوە بۆ کرێکاران، کەمئەندامان، مامۆستایان، ژنان و گوندنشینان و تەنانەت سەرمایەدارانیش راستە، بەواتایەکى تر هەر کام لەم چین و توێژانە گرفتى خۆیان هەیەو داواکانیشیان هەقیقەتى تێدایە.

واتا دەبێت یەکێتى، هەر رۆژە، هەم هەفتەیە، هەر مانگ، سەعات و ساڵێک، گوێ لەو دەنگانە بگرێت و کارێکى ئاسایى و نۆرماڵیشە، بە شەفافى رایبگەیەنێت، ئەوەم پێدەکرێت و ئەوەم پێناکرێت، خۆ مەرج نييە بۆ هەموو رووداوێك موعجيزە بخوڵقێنێت، بەڵكو دەبێت بۆ هەموو رووداوێك، ئامادەگى هەبێت بە تۆلێرانس و كلتورو بيركردنەوەى مام جەلال، دەبێ بڵێم هەنگاوى دروست لەم کەیسەدا بینى هەڤاڵ بافڵ تاڵەبانى بوو، لەگەڵ نوێنەرى خوێندکاران و بەڵێنى جێبەجێکردنى داخوازییەکانیان بوو، كە ئەوانە كوڕو كچى ئێمەن.

چ داواى لێبوردنى هەڤاڵ قوباد تاڵەبانى بوو، لەوەى کە هەڵەیان بەرامبەر خوێندکاران کردووەو کەیسى سوتاندنى ئاڵا واقیعى نەبووە، بەمەبەست ئاڕاستە کراوە.

ئەم بینین و داواى لێبوردنە، کلتورى تۆلێرانسە، سیاسییە باشەکانى ئەوانەن بەعەقڵ گرفتەکان چارەسەر دەکەن، نەک بەهێز، بەڵام دەبێت هەنگاوەکان بکرێتە کردارو شان بدرێتە بەر ئەرکە قورسەکان، کە ئەرکى قورستر لەڕێگادایە لەناو ئەو گۆڕانکارییە گەورەیەى لەناوچەکە بەڕێگاوەیە.

بابه‌تی په‌یوه‌ندیدار