هاوڵاتی

ئەمڕۆ دووشەممە 3ی حوزەیارنی 2024، بانکی ناوەندیی عێراق بەپێی نوسراوێک کە بڵاویکردووەتەوە، رایگەیاند، 197 کۆمپانیای قەدەغەکرد لە مامەڵەکردن بە دۆلار لەسەکۆی کڕین و فرۆشتنی دراوی بیانیدا بەھۆی سپیکردنەوەی پارە و بەقاچاخبردنی دۆلار.

دەشڵێت، چیتر رێگەیان پێنادرێت بچنە ناو سەکۆی ئەلیکترۆنی بانکەکەوە بۆ کڕین و فرۆشتنی دراوی بیانی.

جێگای ئاماژەیە، بانکی ناوەندیی عێراق لە مانگی تشرینی دووەمی 2022، سەکۆیەکی ئەلیکترۆنی دانا بۆ کڕین و فرۆشتنی دۆلار، بە مەبەستی کۆنتڕۆڵکردنی نرخی دۆلار و رێگریکردن لە سپیکردنی دۆلار و بەقاچاخبردنی بۆ دەرەوەی وڵات.

لە هەمانکاتدا، بانکی ناوەندیی چەند رێنماییەکی بڵاوکردووەتەوە، کە چاودێری جوڵەی ئەژماری ئەو کۆمپانیایانە دەکات، کە دۆلار و دراوی بیانی لە بانکەکە دەکڕن و ھەر کۆمپانیایەک پابەندی ئەو رێنماییانە نەبێت کڕین و فرۆشتنی دۆلاری لێ قەدەغەدەکرێت.