هاونیشتیمانیان ئەمجارەش لەسەرژمێریدا پەرۆشی خۆیان بۆ نەتەوەى كورد دەربڕی

بەرپرسەكان هەڵوێستی كەركووكیان لەبەرچاو دەگرن؟ یان سەرژمێری بۆ مەرامی سیاسی و حزبی خۆیان بەكار دەهێنن؟!

ئامادەکردنی: هاوڵاتی

ڕۆژی 20ی مانگی 11ی 2024، پرۆسەی سەرژمێری گشتی لە سەرتاسەری عێراق ئەنجام دەدرێت، تیمەکانی سەرژمێری سەرقاڵی پرۆسەکەن و ئێستا لە قۆناغی دووەمدان، کە لە 17ی مانگەوە پرۆسەی گەڕان بە گەڕەکەکاندا دەستی پێکردووە و ولە قۆناغی کۆتاییدا، ڕۆژەکانی 20 و 21 ی مانگ قەدەغەی هاتوچۆ ڕادەگەیەنرێت، بەمەبەستی مانەوەی هاوڵاتیان لە ماڵەکانیاندا و بەڕێوەچوونی ئەنجامدانی پرۆسەکە بەشێوەیەکی دروست.

بەشێکی زۆر لە خاوەن سەرنج و چاودێرانی سیاسی  ترسیان لەم سەرژمێریە هەیە و پێیان وایە لێدانە لە پێگەی هەرێم و دژی بەرژەوەندییەکانی گەلی کوردە، چونكە عەرەبێكی زۆر هاوردەی ناوچەكانی ماددەی 140 كراون و كوردێكی زۆرى ناوچەكانی ماددەی 140 دانیشتووی هەرێمی كوردستانن.

بەرپرسە كوردەكان داوا لە کەرکوکییەکان دەکەن لەهەر شوێنێکن ئەم چەند کاتژمێرەی کە ماوە بگەنەوە شاری کەرکوک و بەشداربن لە سەرژمێری گشتیی دانیشتوواندا و داهاتووی خۆیان و نەوەکانیان زامن بکەن.

محەممەد شیاع سودانی، سەرۆکوەزیرانی عێراق وتارێکی لەبارەی پرۆسەی سەرژمێریی گشتی لە عێراق و هەرێمی کوردستان پێشکەشکرد و داوای لە هاوڵاتییان کرد هاوکاریی تیمەکانی سەرژمێریی بکەن و پابەندی قەدەغەی هاتوچۆ بن و زانیاریی دروست بدەن و گوێ لە دەنگۆ ناڕاستەکان نەگرن.

سودانی رایگەیاند، سەرژمێری تەنها داتا و کەڵەکەکردنی ژمارە نییە، بەڵکو هێڵی دابەشکەری نێوان پێشبینی و راستییەکانە و ئامرازێکی یەکلاکەرەوەیە بۆ دیاریکردنی بڕیارە گرنگ و کاریگەرەکان.

وتیشی، "باشترین ڕێگەی سەردەمیانەمان گرتووەتە بەر بۆ جێبەجێکردنی پرۆسەی سەرژمێری بەشێوەیەکی ورد و زانستی و ئەلیکترۆنی بۆ ئەوەی ئەنجامەکانی خزمەت بە ئێستا و داهاتووی عێراقییەکان بکات."

لەلایەن خۆیەوە وەزارەتی پلاندانانی هەرێمی کوردستان رایگەیاند هەر هاوڵاتییەک بگەڕێتەوە بۆ زێدی خۆی لە کەرکوک و شوێنی مانەوەی نەبێت هاوکاریی دەکەن.

دارا رەشید، وەزیری پلاندانانی حکومەتی هەرێمی کوردستان رایگەیاند، "دەبێت هاوڵاتییان ئەوە بزانن کە ئەم سەرژمێرییە بۆ ئێمە زۆر گرنگە و داتاکانی لە داهاتوودا بەکاردەهێنرێت، پێویستە ئەوانەی دانیشتووی هەرێمی کوردستانن هاوکاریی بژمێرەکان بن، چونکە ئەمە لە بەرژەوەندی کورد دەشكێتەوە".

ئاماژەی بەوەشکرد، "شەڕی ئێمە لەسەر کەرکوک و ناوچە کوردستانییەکانە، داوا لە هاوڵاتییانی ئەو ناوچانە دەکەین ستەم لە خۆیان و لە مێژوویان و لەو میراتەی باو و باپیرانیان بۆیان جێهێشتوون نەکەن، بگەڕێنەوە شوێنی خۆیان و دەبێت هەر کەرکوکییەک لە هەر شوێنێک بێت بگەڕێتەوە زێدی خۆی و ئێمە وەک حکومەت هەموو جۆرە هاوکارییەکی دەکەین".

بەپێی دوایین زانیارییەکان كەركووكیەكان بەلێشاو دەگەڕێنەوە زێدی خۆیان بۆ خۆناونووسكردنیان لە كركووك و ئەمەش بەوتەی بەرپرسان لە بەرژەوەندی كورد دەشكێتەوە، بەڵام ئاخۆ بەرپرسانی كورد ئەو هەڵوێستەی هاونیشتیمانیانی كەركووك لەبەرچاو دەگرن، یان هەر وەك جارانی پێشوو، تەنها سەرژمێری بۆ مەرامی سیاسی و حزبی خۆیان بەكار دەهێنن؟!