.jpeg)
كاك نه‌وشیروان دەیویست له قه‌ندیل بمرێت
عەبدولڕەزاق شەریف
12 كاتژمێر لەمەوپێش
كاك نه‌وشیروان دەیویست له قه‌ندیل بمرێت
عەبدولڕەزاق شەریف
نەوشیروان مستەفا له‌گه‌ڵ مام جه‌لالدا، چل ساڵی ته‌مه‌نیان پێكه‌وه هاوڕێ و هاوكار و پشتیوانی كاری سیاسی یه‌كتری بون، دوای كۆنگره‌ی یه‌كی (ی ن ك) بڕیاری چونه‌ده‌ره‌وه‌ی كۆتایی دا.
ساڵی 1995 له شه‌ڕی ناوخۆدا، مه‌كته‌بی سیاسی به گه‌له‌كۆمه‌یه‌ك، به ئیمزای زۆرینه، به قه‌واڵه‌یه‌ك مام جه‌لالیان قاودا، جه‌بار فه‌رمان ئیمزاكان و داواكه‌ی مه‌كته‌بی سیاسی له هه‌ولێر دایه‌ده‌ست، له رۆیشتنا مام جه‌لال وتی:
- من ده‌ڕۆم، به‌ڵام تا هه‌موتان ئیمزای گه‌ڕانه‌وه نه‌كه‌ن ناگه‌ڕێمه‌وه.
حیكایه‌تی هانابردنی مام جه‌لال بۆ ئه‌و، پێكه‌وه گه‌ڕانه‌وه‌یان باسی لێوه كراوه، له ده‌روازه‌ی په‌روێزخانه‌وه مام جه‌لال به خه‌تی خۆی هه‌واڵی گه‌ڕانه‌وه‌یانی نوسی و بۆ یه‌كه‌مجار ناوی جێگری سكرتێری گشتی بۆ ئه‌و به‌كارهێنا، به‌بێ ئه‌وه‌ی له‌وكاته‌دا پله‌و پۆستی وه‌ها له هیچ به‌ندێكی په‌یڕه‌وی ناوخۆی (ی ن ك)دا هه‌بێت، هه‌موان قبوڵیان كردو "جێگری سكرتێر"یش وتی:
- ته‌نیا ئه‌ركێك له كوردستان بۆی گه‌ڕاومه‌ته‌وه، پشتیوانیكردنی مام جه‌لاله.
به‌شبه‌حاڵی خۆم هه‌رگیز له‌و بڕوایه‌دا نه‌بووم، ئه‌و كیانێكی سیاسی دروست بكات و له (ی ن ك) جیابێته‌وه، زۆر كه‌سیش تا هەنوكه ئه‌و جیابونه‌وه‌یه به سیناریۆی نێوان مام جه‌لال و ئه‌و وێنا ده‌كه‌ن!! بۆیه كه چوومه لای له بزوتنه‌وه‌ی گۆڕان، یه‌كه‌م پرسیارم ئه‌وه بوو:
+ كه‌ی ؟ بۆچی ؟ چۆن بڕیاری دوركه‌وتنه‌وه‌ت له مام جه‌لال دا؟
وه‌ڵامه‌كه‌ی وه‌ك خۆی ده‌نوسم:
(من مام جه‌لالم وه‌ك پیاوێكی به وره‌و خۆراگر، ئازاو نه‌ترس له مردن و بێمنه‌ت له ماڵ و پاره ناسی بو، به سێ قۆناغی جیا بێ ئومێد و دڵشكاوی كردم! یه‌كه‌مجار دوای ئه‌نفاله‌كان پێشنیازی كرد واز له شه‌ڕی چه‌كداریی بهێنین، موڵك و ماڵی یه‌كێتیی بۆ ئه‌وروپا بگوازینه‌وه، هاوشێوه‌ی جوله‌كه‌كانی سه‌ده‌ی رابردوو كاری دیپلۆماسی بۆ كورد و كوردستان له ته‌واوی دنیادا بكه‌ین. بیركردنه‌وه‌كه‌ی مام جه‌لالم به توندی ره‌تكرده‌وه، دوای گفتوگۆ گه‌یشتینه رێككه‌وتن، به‌وه‌ی كه مام جه‌لال بڕوات له ده‌ره‌وه‌ی خه‌ریكی ئه‌و به‌رنامه‌یه‌ی خۆی بێت و منیش هێزی پێشمه‌رگه رێكبخه‌مه‌وه و ده‌سته‌ی پارتیزانه‌كان له ناوخۆ دروست بكه‌م. قۆناغی دووه‌م له‌دوای راپه‌ڕین بو، كاتێ مام جه‌لال خه‌ریكی دروستكردنی باره‌گای تایبه‌ت و هێزی گه‌وره‌ی تایبه‌ت به خۆی بوو، كه پێم وت بۆچی و له‌چی ئه‌ترسێ وا له هه‌ر شوێنێ باره‌گاو هێزی تایبه‌ت به پاراستنی خۆی دروست ئه‌كات؟ وتی: حوكمڕانی شار جیاوازه له‌و حوكمڕانییه‌ی له شاخ كردوومانه، له‌ناو شاردا ئه‌بێ هه‌مو ده‌قه‌و سه‌عاتێ ئاگادار و وریای ئینقیلابی عه‌سكه‌ری بین. له قۆناغی سێیه‌میش كه به‌ته‌واوی لە کاری پێکەوەیی نائومێدی كردم، دوای روخانی رژێمی به‌عس و ئه‌و ساڵانه بوو كه زانیم هه‌وڵی هه‌رچی ده‌ستخستنی پاره‌و موڵك و ماڵی زۆرتر بۆ خۆی و ماڵ و مناڵه‌كانی ده‌دات، ئیتر لێره‌وه بڕیاری كۆتایی و دوركه‌وتنه‌وه و جیابونه‌وه‌م دا.)
ئه‌و له نوسینه‌كانیدا هه‌رگیز قۆناغی یه‌كه‌م و دووه‌می باس نه‌كردووه، به‌ڵام له وتارێكدا، له ساڵی 2005 كه سایتی (ریفۆرم) بڵاویكرده‌وه نوسیویه‌تی؛ مه‌سعود بارزانی و مام جه‌لال ملیارێك و سه‌دان ملیۆن دۆلاریان بۆ ئاوه‌دانكردنه‌وه‌ی كوردستان له (پۆل بریمه‌ر)ی حاكمی عێراق وه‌رگرتوه، بۆ خۆیان برابه‌شیان كردوه‌و گواستویانه‌ته‌وه بۆ ده‌ره‌وه‌ی كوردستان، ته‌نانه‌ت نوسیویه‌تی نه‌متوانیوه رێگرییان لێ بكه‌م و داوا له خه‌ڵك ده‌كات هه‌ڵوێست وه‌ربگرن.
گه‌نجه‌كانی كۆمه‌ڵه‌ی ره‌نجده‌رانی كوردستان (جگه له‌وانه‌ی ئه‌و سزای دابون یان به حه‌ق و ناحه‌ق له بۆنه‌یه‌كدا شكاندبونی) هه‌موان وه‌كو په‌یامبه‌ر و فه‌رمانه‌كانیشمان وه‌كو كه‌لاموڵا جێبه‌جێ ده‌كرد. پێش دامه‌زراندنی بزوتنه‌وه‌ی گۆڕان ده‌سته‌یه‌كمان زۆر هه‌وڵماندا له گردی زه‌رگه‌ته بمێنێته‌وه و حزب دروست نه‌كات، به‌ڵام بێ سود بو! حزبی دروست كرد و منیش وه‌ك وه‌فایه‌ك چه‌ند كورته شعرێكم پێشكه‌ش به خۆی و بزوتنه‌وه‌كه‌ی كرد و جارێكیش به هاوڕێیه‌كماندا داوای لێ كردبوم كه ڕای هه‌ندێ له ئه‌ندامه‌كانی مه‌كته‌بی سیاسی و سه‌ركردایه‌تی له‌سه‌ر خۆی و بزوتنه‌وه‌كه‌ی بۆ بنوسم، ئه‌وه‌ی له كۆبونه‌وه‌ی ره‌سمی و ناڕه‌سمی به‌ر گوێم كه‌وتبو، بۆم نوسی و هه‌ر به‌و هاوڕێیه‌دا بۆم نارد، ئیتر به درێژایی چوار ساڵ هیچ په‌یوه‌ندیه‌كم پێوه‌ی نه‌ما.
رۆژی 30ی حوزه‌یرانی 2013 كۆسره‌ت ره‌سوڵ و نێچیرڤان بارزانی ئیمزای رێككه‌وتنی دو ساڵ درێژكردنه‌وه‌ی سه‌رۆكایه‌تی مه‌سعود بارزانییان كرد.
هێرشێكی چڕوپڕی راگه‌یاندنی رێكخراو له‌لایه‌ن بزوتنه‌وه‌ی گۆڕان و حزبه‌كانی تری ئۆپۆزسیۆن و رێكخراوه‌كانی كۆمه‌ڵی مه‌ده‌نی و میدیای ئه‌هلییەوە بۆسه‌ر (ی ن ك) ده‌ستی پێكرد، ئۆرگانه‌كانی ئێمه به راگه‌یاندنیشه‌وه قوڕوقه‌پ به‌دیار ره‌وایه‌تی و ناڕه‌وایه‌تی ئه‌و هێرشه‌وه دۆش دامابون، چونكه هێنده نهێنی بوو، كه‌س ناوه‌ڕۆكی رێككه‌وتنه‌كه‌ی نه‌بینی بوو.
له ژوره‌كه‌ی خۆی و به ئاماده‌بونی چه‌ند كه‌سێک، به مه‌لا به‌ختیارم وت:
+ ئه‌م بێده‌نگییه‌ی ئێمه مانای چییە؟! ئایا ئه‌و قسانه‌ی له‌سه‌ر رێككه‌وتنه‌كه ده‌كرێ ڕاسته؟
وتی: نه‌خێر. هیچی وا نییه.
پاشان په‌نجه‌كانی ده‌ستێكی لێكئاڵاندو كردی به تۆپێكی تێنس و وتی:
- مه‌سعودمان وا بچوك كردۆ‌ته‌وه، چاره‌نوسیمان خستووەتە ده‌ستی چه‌ند په‌رله‌مانتارێكه‌وه.
وتم: ئه‌ی بۆ ئه‌مه له راگه‌یاندنه‌كاندا باس نه‌كه‌ین ؟!
وتی: بڕۆ تۆ باسی بكه.
وتم: رێككه‌وتنه‌كه‌م بده‌رێ.
وتی: من ته‌نیا خوێندومه‌ته‌وه. بڕۆی لای كاك كۆسره‌ت وه‌ریبگره.
ئه‌و ئێواره‌یه رێككه‌وتنه پێنج خاڵییه‌كه‌م وه‌رگرت و خوێندمه‌وه، هه‌ر له ماڵی جێگری یه‌كه‌می سكرتێری گشتییه‌وه ته‌له‌فۆنم بۆ (سه‌ردار محه‌مه‌د)ی سه‌رنوسه‌ری رۆژنامه‌ی (ئاوێنه) كرد و وتم:
+ مانشێتی سبه‌ینێی (ئاوێنه) بنوسه.
به‌ناوی خۆم و پۆسته‌كه‌مه‌وه (لێپرسراوی راگه‌یاندنی مه‌كته‌بی سیاسی ی ن ك) ته‌واوی رێككه‌وتنه‌كه‌م به گفتوگۆیه‌ك و وه‌ڵامی پرسیاره‌كانی له ژماره‌ی (384)ی رۆژی 2/7/2013ی رۆژنامه‌كه‌دا بڵاوكرده‌وه. رۆژی دواتر، وه‌ك قیامه‌ت هه‌ستابێ، مه‌لا به‌ختیار بانگی كردم و به توڕه‌یی وتی:
- چۆن ئه‌توانی بڵێی كاك مه‌سعودمان بچوك كردووه‌ته‌وه؟!
وتم: ئه‌وه قسه‌ی خۆته، پێنج كه‌س شایه‌تن، وتت بڕۆ بیڵێ.
وتی: من نه‌موتوه له راگه‌یاندنا بیڵێ.
وتم: ئه‌ی خۆ له به‌رده‌ركی سه‌را خه‌ڵك كۆناكه‌مه‌وه پێیان بڵێم.
پاشان مه‌سعود بارزانی به‌ناوی سه‌رۆكایه‌تی هه‌رێمه‌وه رونكردنه‌وه‌یه‌كی له‌سه‌ر من بڵاوكرده‌وه، په‌یامێكیشی بۆ مه‌كته‌بی سیاسی یه‌كێتیی نارد كه من ده‌ربكه‌ن.
په‌یامنێری ته‌له‌فزیۆنی (NRT) به‌ره‌و ڕووم هات و پرسیاری ڕای خۆمی له‌سه‌ر به‌یاننامه‌كه‌ی سه‌رۆكایه‌تی هه‌رێم كرد، منیش وتم:
+ هێنده بێ مسته‌وایه، شایه‌نی وه‌ڵامدانه‌وه نیه، چونكه له 17 دێڕدا 17 جنێوی نوسیوه.
ئه‌و شه‌وه، بۆ یه‌كه‌م جار له‌دوای چوار ساڵ، کاک نەوشیروان ته‌له‌فۆنی بۆكردم و وتی:
- كاكه من لێدوانه‌كه‌ی تۆم بینی، ده‌موچاوت ماندو بو، بێتاقه‌ت دیار بوی، داوات لێ ئه‌كه‌م گوێ نه‌ده‌یتێ و خۆڕاگربی، هه‌ر كاتێكیش حه‌زت لێ كرد ئه‌تبینم و سه‌ردانێكم بكه.
چه‌ند رۆژێك دواتر ئه‌و په‌یامه‌شی به (مامۆستا جه‌مال)دا بۆ ناردم، هه‌فته‌ی دواتر و دره‌نگانێكی شه‌و، له خانوه‌كه‌ی گردی عه‌لی ناجی سه‌ردانم كرد، كه‌متر له سه‌عاتێ دانیشتین، مامۆستا جه‌مال به یه‌ك وشه‌ش به‌شداری گفتوگۆی نێوان من و ئه‌وی نه‌كرد، له کاتی خواحافیزیا وتی:
- ئه‌م بزوتنه‌وه‌یه هی خۆته. له هه‌ر شوێنێ بی وه‌ك سه‌ركرده‌یه‌كی بزوتنه‌وه‌ی گۆڕان ئه‌تبینم.
باوه‌شم پێدا كرد و له ژوره‌كه‌ی قاتی سه‌ره‌وه، له‌ناو ده‌رگاكه‌یا جێم هێشت.
هه‌فته‌ی دواتر، مه‌لا به‌ختیار بڕیاری كۆبونه‌وه‌ی مه‌كته‌بی سیاسی پێ راگه‌یاندم و وتیشی جگه له مه‌كته‌بی سیاسی، له هه‌ر ئۆرگانێكی تر بته‌وێت، ئه‌تگوازینه‌وه، هه‌ندێكیش له ئه‌ندامه‌كانی مه‌كته‌بی سیاسی، به جیا بڕیاره‌كه‌ی مه‌سعود بارزانی و شێوازی پشتیوانی هاوڕێكانی خۆیان بۆ جێبه‌جێكردنی، بۆ گێڕامه‌وه.
جاری دوه‌م، کاک نەوشیروان له‌ڕێگه‌ی مامۆستا جه‌ماله‌وه بانگی كردم، ئه‌م جاره‌یان به ره‌سمی داوای كرد ئیستیقاله بده‌م و په‌یوه‌ندی به بزوتنه‌وه‌ی گۆڕانه‌وه بكه‌م.
وتم: ئه‌گه‌ر هه‌فته‌یه‌ك مۆڵه‌تم بده‌یتێ بیر بكه‌مه‌وه.
قسه‌كه‌م ته‌واو كردو هه‌ستم كرد هه‌ڵه‌یه‌كم كردوه، راستكردنه‌وه‌و پینه‌كردنی له‌و ده‌قیقەیه‌دا ئه‌سته‌مه، رۆژی دواتر هه‌ر له‌ڕێگه‌ی مامۆستا جه‌ماله‌وه په‌یامی لێ بوردنم بۆ ناردو ئاماده‌یی خۆم بۆ په‌یوه‌ندیكردن به بزوتنه‌وه‌ی گۆڕانه‌وه پێ راگه‌یاند.
ئه‌و ئه‌یویست په‌یامێكی خۆی له‌ناو نامه‌ی ده‌ستله‌كاركێشانه‌وه‌كه‌ی مندا جێگه بكاته‌وه، بۆیه داوای كرد پێش بڵاوبونه‌وه، بۆی بنێرم و ئیزافه‌كه‌ی خۆی بكات، به‌ڵام كه وێنه‌یه‌كی نوسراوه‌كه‌م به ئیمێڵ بۆ نارد، ته‌له‌فۆنی بۆ كردم و وتی:
- ئه‌وه‌ی ویستم ئیزافه‌ی بكه‌م، خۆت جوانتر جێگه‌ت كردوه‌ته‌وه. بڵاوی بكه‌ره‌وه.
وتم: به‌ڵێنم به (ئه‌حمه‌د میره) داوه بۆ یه‌كه‌م جار له گۆڤاری (لڤین) رایده‌گه‌یه‌نم.
دواتر ئه‌و له ناوه‌ڕاستی ساڵی 2016 دا، دوای بێ ئومێدبونی له ژیانی به‌رده‌وام و چاره‌سه‌ری نه‌خۆشییه‌كه‌ی، گه‌ڕایه‌وه هه‌رێمی كوردستان، زۆربه‌ی كاته‌كانم به گفتوگۆی دور له سیاسه‌ت له‌گه‌ڵیدا به‌سه‌ر ده‌برد، ئه‌و قسه‌ی له‌سه‌ر هه‌ر بوارێكی كۆمه‌ڵایه‌تی، ئابوری، زمان و فه‌رهه‌نگی كورد و نه‌ته‌وه جیاوازه‌كان ده‌كرد، شتێكی تازه‌ی ئه‌وت و فێرده‌كردی، كه هه‌رگیز نه‌تبیستبوو، من خۆم نه‌مزانیوه له مێژوی كورددا، پیاوێكی وا پڕ له مه‌عریفه‌ت هه‌بوبێ، هه‌ر له‌و مانگه‌دا و له دانیشتنێكدا، به هه‌ندێ ئاماژه‌و ده‌سته‌واژه، ناڕاسته‌وخۆ تێی گه‌یاندم كه چه‌ند مانگێكی له ژیاندا ماوه.
وتی: ماڵێكم له‌و شاخه بۆ ته‌رتیب بكه، له باوزێ تا قه‌ندیل له هه‌ر كوێ خۆت پێت باش بێ، ناشمه‌وێ كه‌س پێم بزانێ و كه‌س سه‌ردانم بكا.
له په‌یوه‌ندییه‌كی ته‌له‌فۆنیدا ئه‌م قسه‌ی به (ره‌حیم باوزێی) وت، دوای دانانی ته‌له‌فۆنه‌كه‌ی ده‌ستی وتی:
- ئه‌ڕۆم، ئه‌مه‌وێ ئه‌و چه‌ند مانگه‌ی له ته‌مه‌نما ماوه، له قه‌ندیل و دور له هه‌مو كه‌س به‌سه‌ری ببه‌م، ئه‌مه‌وێ له‌و شاخانه بمرم.
منیش جگه له شۆك و واقی وڕماو، به‌بێ ده‌نگیی جێهێشتنی، هیچ وه‌ڵامێكم پێ نه‌بو.
له هاتنه ده‌ره‌وه‌یا، چیای كوڕی یه‌خه‌ی گرتم و وتی:
- ئێوه بۆ هانی ئه‌ده‌ن له كوردستان بمێنێته‌وه، ئه‌و عیلاجی هه‌یه له به‌ریتانیا و خه‌سته‌خانه‌كه‌ی داوای ئه‌كات، هه‌مو هه‌وڵی ئێمه رازیكردنیه‌تی بۆ گه‌ڕانه‌وه بۆ له‌نده‌ن، به‌زۆریش بێ ئه‌یبه‌ینه‌وه.
به بێده‌نگی و بێ وه‌ڵام ئه‌ویشم به‌جێهێشت.
.jpg)
