هاوڵاتی

- لەدوای ڕوداوەكانی سوریاوە ڕێوشوێنە ئەمنییەکانیان بەدرێژایی سنوری سوریا توندتركراون.

- پاسەوانانی سنوری عێراق بەدرێژایی سنورەكان ئامادەن بۆ هەر هەڕەشەیەک، كە بۆ سەر موسڵ و عێراق بە گشتی دروست دەبێت.

- ژورێکی ئۆپەراسیۆنی هاوبەش لە نێوان هێزەكانی عێراق و هێزەکانی سوریای دیموكراتدا هەیە.

محەمەد كاكەیی ئەندامی ئەنجومەنی پارێزگای نەینەوا ئاشكرايكرد لە نێوان هێزەكانی عێراق و هێزەکانی سوریای دیموكرات ژورێکی ئۆپەراسیۆنی هاوبەشیان هەیە.

محەمەد كاكەیی، ئەندامی لیژنەی ئاسایش لە ئەنجومەنی پارێزگای نەینەوا بەدەنگی ئەمریكای ڕاگەیاند، لەدوای ڕوداوەكانی سوریاوە ڕێوشوێنە ئەمنییەکانیان بەدرێژایی سنوری سوریا توندتركراون و کامێرای ئاسایشی لەسەر تەواوی سنوری پارێزگای نەینەوا لەگەڵ سوریا دانراون.

ئاماژەی بەوەشکرد، پاسەوانانی سنوری عێراق بەدرێژایی سنورەكان ئامادەن بۆ هەر هەڕەشەیەک، كە بۆ سەر موسڵ و عێراق بە گشتی دروست دەبێت و لە ئامادەباشیدان.

باسی لەوەشكرد، دەسەڵاتدارانی عێراق هەوڵەکانی هەماهەنگییان لەگەڵ هێزەکانی سوریای دیموکرات (هەسەد) چڕتر کردوەتەوە، کە بەشێک لە دیوی سوریای سنورەکەیان کۆنترۆڵکردوە.

ئەوەشی خستەڕو، ژورێکی ئۆپەراسیۆنی هاوبەش لە نێوان هێزەكانی عێراق و هێزەکانی سوریای دیموكراتدا هەیە، ئێمە زانیاری هەواڵگری هاوبەشین لەسەر هەر هەڕەشەیەک كە بۆ سەر هەردولا دروست دەبێت.