هاوڵاتی

- هێزەکانیان هێرشی گرووپە چەکدارەکانیان دژی پردی قەرەقۆزاق و بەنداوی تشرین تێکشکاندووە.

- گرووپە چەکدارەکان بە پشتیوانی 20 درۆنی تورکیا زیاتر لە 160 جار هێرشیانکردە سەر بەنداوی تشرین و پردی قەرەقۆزاق لە باشووری رۆژهەڵاتی منبج.

- لە سێ رۆژی شەڕدا 142 چەکداری گرووپە چەکدارەکان لە بەنداوی تشرین، 68 چەکدار لە پردی قەرەقۆزاق و 13 بەرپرسی گرووپەکان لە هەردوو شەڕەکەدا کوژراون.

ئەنجوومەنی سەربازیی منبج ڕایگەیاند دوای سێ رۆژ شەڕکردنی بەردەوام پلانی کۆنترۆڵکردنی پردی قەرەقۆزاق و بەنداوی (تشرین)مان تێكشكاند.

فەرماندەیی گشتیی هێزەکانی ئەنجوومەنی سەربازیی منبج لە راگەیێندراوێکدا کە ئەمڕۆ هەینی بڵاوی کردەوە رایگەیاند، هێزەکانیان هێرشی گرووپە چەکدارەکانیان دژی پردی قەرەقۆزاق و بەنداوی تشرین تێکشکاندووە.

 لە راگەیێندراوەکەدا هاتووە: لە سێ رۆژی رابردوودا گرووپە چەکدارەکان بە پشتیوانی 20 درۆنی تورکیا زیاتر لە 160 جار هێرشیانکردە سەر بەنداوی تشرین و پردی قەرەقۆزاق لە باشووری رۆژهەڵاتی منبج، بەهۆیەوە شەڕی سەخت لەنێوان هێزەکانمان و چەکدارەکاندا ڕوویدا.

ئەنجوومەنی سەربازیی منبج کە سەر بە هێزەکانی سووریای دیموکرات (هەسەدەیە) دەڵێت: لە ئەنجامی بۆردوومانی درۆنەکاندا بۆ بەنداوی تشرین، "زیانێکی زۆر بەر بەنداوەکە کەوتووە".

 بەگوێرەی راگەیێندراوەکە شەڕڤانەکانیان بە "شێوازێکی نوێ شەڕیان لە دژی گرووپە چەکدارەکان کرد؛ بۆسەیان بۆ دانان و گورزی قورسیان لێدان".

 وتيشى: لە ئەنجامی بەرخودانی هێزەکانمان، هەوڵی کۆنترۆڵکردنی بەنداوی تشرین و پردی قەرەقۆزاق لەلایەن چەکدارەکانەوە پووچەڵ کرایەوە.

 ئاماژەی بەوەکردووە، لە سێ رۆژی شەڕدا 142 چەکداری گرووپە چەکدارەکان لە بەنداوی تشرین، 68 چەکدار لە پردی قەرەقۆزاق و 13 بەرپرسی گرووپەکان لە هەردوو شەڕەکەدا کوژراون.

 لەبارەی زیانی هێزەکانیانەوە ئەنجوومەنی سەربازیی منبج رایگەیاند، لە سێ رۆژی شەڕەکەدا هەشت شەڕڤانی ئەنجوومەنی سەربازیی منبج گیانیان لەدەستداوە و 13ـی دیکەش بریندار بوون.