عەبدولڕەزاق شەریف

 نەوشیروان مستەفا، ساڵانێک بوو، خوڵکی بە زوو رازان لەکازیوەدا، چەند سەعاتێک خوێندنەوە، دوایی کەمێکیتر  خەوتنەوەی بەیانیانەوە گرتبوو!  لە نێوانی رازان و سەرخەوی ئەو سپێدەیە، لەگەڵ شەبەنگی خۆر، لەماڵەکەیدا، روخسەتم وەرگرت، وتم پێی بڵێن کارێکی گرنگم پێیەتی .

  چواردەی مانگی پێنجی دووهەزاروشانزە، ئەو رۆژەی وابڕیاربو لە سەعات یانزەدا، لەیەک کاتدا، لە گردی زەرگەتە جڤاتی نیشتیمانی و لەهۆڵی مەکتەبی سیاسی سەرکردایەتی یەکێتی، بە مەبەستی بڕیاردان لەسەر رێککەوتنی نێوان هەردوولا، کۆببنەوە .

  بەو بەیانیە، کۆپیەکی رەشنوسی رێککەوتنەکەم خستە بەردەستی ...  تیایدا، لای گروپێکی ئەوانەوە، بەقەڵەمێکی شین گۆڕانکاری لەسەر چەند خاڵێکی رێکەوتنەکە (بەسڕینەوە و ئیزافە)وە کرابوو! گرنگترینیان، یەکخستنەوەی فراکسیۆنەکان و یەک لیستی بۆ هەڵبژاردنەکانی ئایندەی عێراق و هەرێمی کوردستان، هێڵی بەژێردا هێنرابوو، لێی نوسرابوو (دوابخرێت بۆ قۆناغێکیتر) .

 دوای دڵنیابوونمان لەوەی کە نیوەشەوی رابردوو ئەو گۆڕانکارییە لەتەرەفێکی ناوخۆی یەکێتییەوە، رویداوە و کراوە، دواجار بۆ جێگرەکانی سکرتێری گشتی و مەکتەبی سیاسی نێردراوە، جارێکیتر کاک نەوشیروان دەستخەتەکەی تەماشاکردەوە و وتی :

  - ئەوە خەتی ئەرسەلان بایزە!

 وتم: ئەرسەلان لە هەولێرە، کۆسرەت رەسوڵ لەسلێمانی! ئەو گۆڕانکاریانەش لەهەولێر کراوە .

 ئەویش تێگەیشت کە مەبەستم چییە! رایسپاردم بەناوی خۆیەوە لەگەڵ چەند کەسێک لە ئەندامەکانی سەرکردایەتی یەکێتی قسە بکەم، تا زیاتر لەوبارەیەوە بزانین کە رویدابوو، وتیشی :

 وا ڕێکەوتووین ئەو بیستوپێنج خاڵە، بێ دەستکاریکردن وەک خۆی بڕیاری لێبدرێت! ئێمە کۆبونەوەی خۆمان ئەکەین و چاوەڕێی ئەوان ناکەین .

  ئەودەم، قوباد تاڵەبانی جگە لەوەی جێگری سەرۆکی حکومەتی هەرێم بوو، هیچ پۆستێکی حیزبی لەناو یەکێتی نەبوو! ئەو بەیانییە بە دەستی پڕی هەمواری رێککەوتنەکە و دەستخەتەکەی ئەرسەلان بایزەوە، بەتایبەتی لە هەولێرەوە گەڕابۆوە سلێمانی، لە شوێنی کۆبوونەوەکە خۆی و لاهوری ئامۆزای لەگەڵ گروپی جیاواز و لە ژوری جیاواز گفتوگۆی خێرا و پەلەیان بۆ (یان هەموار یان دواخستنی کۆبونەوەکە) دەستیپێکردبوو!

 لای ئێمەیشەوە لەکاتی خۆیدا، کۆبوونەوە کرا، بڕیاری لێدرا، دوا قسەی پەیامی رێکخەری گشتی بزوتنەوەکەش سەبارەت بەو رێککەوتنە ئەمە بوو :

 (وەک بیلبیلەی چاوی خۆتان ئەم رێککەوتنە بپارێزن )

  لە کاتی جێهێشتنا، من لە ناوەڕاست و کورسی یەکەمی راڕەوی هۆڵەکەیا دانیشتبووم، ئاماژەیەکی بۆکردم و پێکەوە کۆبونەوەکەمان بەجێهێشت .

 لە ژورەکەی سەید عومەر دانیشتین، زانیمان لەژێر کاریگەری قوباد و ماڵی مامجەلالدا، یەکێتی کۆبونەوەکەی خۆیانیان بۆ تاقی ئێوارە دواخستووە. داوایکرد عوسمانی حاجی مەحمود و قادری حاجی عەلی بێنە لای! هەرچەندە لەو سەروەختەیا ئەوان هیچ پلەوپۆستێکی رەسمی ناو بزووتنەوەکەیان نەبوو بەڵام بە قسەی نێوانیاندا من زانیم کەهەردووکیان، بەهەوڵەکانیان کاریگەرییان لەسەر رێککەوتنەکە و نزیککردنەوە و رازیکردنی کۆسرەت رەسوڵ و هاوڕێکانی هەبووە!

 لەگەڵ قادری حاجی عەلی بە تەلەفۆن قسەیکرد و عوسمانی حاجی مەحمودیش خۆی هاتە لای .

 هەندێک پرسیار و وەڵام لەنێوانمانا دروستبوو! قادری حاجی عەلی پەیوەندی کردەوە و هەمووان دڵنیابووین کە لە رێگەی قوباد تاڵەبانییەوە، پارتی دیموکراتی کوردستان کارەکەیان تێکداوە و "بەڕەیەکیشیان خستۆتە ناو مزگەوتەوە" .

 نیوەڕۆی هەمان رۆژ، (حەمە تۆفیق رەحیم) بە تەلەفۆنی ئیسماعیل ساڵحی سکرتێری رێکخەری گشتی، پەیوەندی پێوەکردم، بەتوڕەییەکی زیاد لە رادەی خۆی؛ داوایکرد لە ماڵەکەی نەوشیروان مستەفا، سەردانیان بکەم، لە قسەکانیشیدا وتی :

تۆ بوویتە هۆی تێکدانی نێوانی ئێمە و ماڵی مامجەلال، هێرۆخان و کوڕەکانی هیچ ئاگایان لەم بەزمە نییە! ئەم نوسراوەت لەکوێ هێناوە؟

وتم: من هیچ قسەیەکم بۆ تۆ پێ نییە، ئەتوانی لەگەڵ نەوشیروان مستەفا قسەی خۆت بکەیت .

 ئەو قسەیەم پێ وت و پەیوەندییەکە پچڕا! دواتر زانیم لە کاردانەوەی قسەکەی منا، تەلەفۆنەکەی داوە بەئەرزا و شکاندوویەتی .