سەرتیپ جەوهەر

بەپێی دروشمی هەڵبژاردنەكان بوایە، دەبوو ئێستا گۆڕانێكی زۆر لە حوكمڕانیی و ژیانی خەڵك ببوایە، بەڵام ئەوە زیاتر لە دوومانگ بەسەر هەڵبژاردندا تێپەڕیوە، وەك پێشتریش گوتمان هەمان تاس و هەمان حەمامە! نەك هیچ لە ژیانی خەڵك و حوكمڕانیی نەگۆڕاوە، بەڵكو خراپتر بووە. لە لایەك دەسەڵات ستەم و ستەمكاریی خۆی كەمنەكردۆتەوە و بەردەوامە لە فشاركردن لەسەر ژیانی خەڵك، لەلایەكی دیكە ئۆپۆزسیۆنێكی مردۆخ و بێدەنگ هەیە کە تەنها دروشمی سەر تۆڕی كۆمەڵایەتیی و موزایەدەی سیاسییە.

هەڵبژاردنیش تەواوبوو، ئەوەتا تانكەرەكان هەر وەكجاران ریزیان گرتووە! موچەی خەڵك هەر دوادەكەوێت و دەخورێت! دووكەڵە ژەهراوییەكەی پاڵاوگە و كارگەكانیان بەردەوامە و هەناسەی تەنگكردوین و توشی جۆرەها نەخۆشی و دەردی كردوین! هەر فەرمانگەیەك لەژێر ناو ناونیشانێك و لەدەرەوەی هەموو دەق و سیاقێكی دەستوریی و قانونیی كۆمپانیایەكیان داناوە بۆ ئەوەی خەڵك زیاتر بڕوتێننەوە!

لە دوای هەڵبژاردن، دەسەڵاتداران لەباتی كەمێك لەو ستەمكارییەیان كەم بكەنەوە و دەستبەرداری ئەو غرورەبن كەبەهۆیەوە ژیانی خەڵكیان كردۆتە دۆزەخ، دەبینین رۆژ دوای رۆژ زیاتر ئەم خەڵكە دەڕوتێننەوە.

ئێمە دەزانین ستەمكار سروشتی خۆیەتی تا پێی بكرێت ستەم دەكات، بەڵام ئەوەی جێی رامانە بێدەنگی و پەرتەوازەیی ئۆپۆزسیۆنە بەرامبەر ئەو هەموو ستەمكارییەی دەكرێت. من پێموایە زیاتربوونی فشاری دەسەڵات و تەجاوزی زیاتری لەسەر ماف و ژیانی خەڵك، لە بێ جورئەتی ئۆپۆزسیۆنەوە سەرچاوەی گرتووە. ئێستا دەسەڵات جورئەتی لە جاران زۆر زیاتر بووە بۆ تەجاوزكردن، ئەم جورئەتەی لەبێدەنگی ئۆپۆزسیۆنەوە وەرگرتووە.

 بەداخەوە ئەو ئۆپۆزسیۆنەی هەیە دەستوپێ سپییە و نەیتوانیوە ببێتە بەدیلی راستەقینە و كەمێك جورئەتی نەداوەتە خەڵك تا رووبەرووی ستەمكاریی ببنەوە، بەڵكو ئەوەی دەیبینین ئۆپۆزسیۆنیش بۆتە تەواوكەر و بەشێك لەو مەنزومە گەندەڵەی لە كوردستان هەیە! لەبری ئەوەی ببێتە هۆی فشار لەسەر دەسەڵات تا گۆڕانكاریی بكات، بۆتە كەڤەری ئەو دەسەڵاتە ستەمكارە و رووی راستەقینەی ئەم سیستمەی شاردۆتەوە.

ئەگەر دەسەڵات سەرچاوەی ستەمكاریی و نادادپەروەریی و خراپی ژیانی خەڵك بووبێت، ئۆپۆزسیۆنیش بۆتە فاكتەری نائومێدكردن و دەستلەخۆبەردانی خەڵك! ئەو ئۆپۆزسیۆنەی هەیە زیاتر دەنگە دەنگ و گارەگاری سەر تۆڕی كۆمەڵایەتییە و لەگەڵ كوژاندنەوەی مۆبایلەكان، ئیدی ئۆپۆزسیۆنیش بێدەنگ دەبێت! ئەگینا ئەو هەموو ستەمكارییەی رۆژانە بەبەرچاومانەوە ماوەی زیاتر لە 10 ساڵە دەیبینین، دەبوو تائێستا خۆپێشاندانێك، گردبوونەوە و ناڕەزایەتیەكی جەماوەریی بە پێشڕەوی ئۆپۆزسیۆن لێبکەوتایەتەوە!