.jpeg)
تاكه‌ى چاوى جیهان داخراو ده‌بێت؟! رژێمی ئێران ته‌نها له‌به‌ر كوردبوونمان ده‌مانكوژێت
شەم شەمەیی
4 ڕۆژ لەمەوپێش
شەم شەمەیی
رۆژنامه‌نووسى كوردى/ سویدى
هه‌ر به له‌دایكبوونت له ئێران و به‌حوكمى كوردبوونت، مه‌حكومیت به‌وه‌ى په‌تى سێداره بكرێته گه‌ردنت، ئێستا (په‌خشان عه‌زیزى و وه‌ریشه مورادی) چالاكوان، ته‌نها له‌به‌ر كوردبوون و ژن بوون و داواكردنى مافه سه‌ره‌تاییه‌كان، رووبه‌رووى هه‌مان چاره‌نووسى هه‌زاران كه‌سى تر بوونه‌ته‌وه، كه پێشتر به سزاى له‌سێداره‌دان شه‌هیدكراون. له ئێران ده‌سه‌ڵاتێكى توند و دڕه‌نده فه‌رمانڕه‌وایه‌تى ئه‌و وڵاته ده‌كات، لە ڕێگەی ئەشکەنجە و زیندان و له‌سێداره‌دانه‌وه، ده‌نگه ناڕازییەکان كپ و بێ ده‌نگ دەکات. ئێستا کاتی ئەوەیه جیهان لە ئاستى كورددا له خەوى سه‌دان ساڵه هەستێ و ئه‌و زوڵمه بەو شێوەیە ببینێت کە هەیە، نه‌ك به‌و شێوه‌یه‌ى به‌رژه‌وه‌ندییه سیاسییه‌كان ده‌یه‌وێت، چونكه ئه‌وه‌ى ئێستا ده‌گوزه‌رێت جینۆسایدێکی سیستماتیکی دەنگ و ناسنامە و خەونی کورده.
پێشتریش بینیمان ژینا ئەمینی، ئەو ژنە گەنجە کوردەی لەسەر دەستی پۆلیسی ئەخلاق له ئێران شه‌هیدكرا، به‌ڵام شۆڕشێکی گه‌وره و فراوانى هەڵگیرساند، لەسەر حسابی کورد بووە سیمبولی خەباتی ژنان لە ئێران، ئەوەی زۆرینه لەبیری ده‌كه‌ن ئه‌وه‌یه ژینا تەنیا ژن نەبووە، به‌ڵكو كوردیش بوو، ناسنامەکەی وەک ژنێکی کورد كردییه قوربانى ئه‌و سیاسه‌ته.
رژێمی ئێران لە مێژە سیاسەتێكى توندى بە ئامانجی بنبڕکردنی ناسنامەی کورد پەیڕەو کردووە، زمان قەدەغە دەکرێت، کلتوور ده‌سڕدرێته‌وه، ناوچە کوردییەکان بە شێوەیەکی سیستماتیک پشتگوێ دەخرێن، ژن و گه‌نج و پیاو و كه‌سانى به‌ته‌مه‌ن زیندانى ده‌كرێن و له‌سێداره ده‌درێن، تێکۆشەرانی کوردی وەک (عەزیزی و مورادى) له‌به‌ر بوێرییه‌كه‌یان بۆ داواكردنى مافى ژنبوون و كوردبوون، رووبه‌ڕووى نه‌هامه‌تى و ئه‌شكه‌نجه و سزاى له‌سێداره‌دان ده‌بنه‌وه.
لە زیندانەکانى ئێراندا، زیندانیانی کورد ئەشکەنجەى قورس و دڕندانه ده‌درێن، بۆ دانپێدانانی درۆ، بەبێ دادگاییکردنێكی دادپەروەرانە و ئاشكرا، رووبه‌روى سزاى له‌سێداره‌دان ده‌بنه‌وه، ئەمە پاکتاوکردنێكی سیستماتیکیانه‌ى نه‌ته‌وه‌یه‌كى ته‌نها و بێ پشته له‌م جیهانه گه‌وره‌یه‌دا.
ئه‌گه‌رچى جیهان کاردانەوەی توندی هەبوو بەرامبەر شه‌هیدبوونى (ژینا ئەمینی) و له‌سه‌رانسه‌رى جیهاندا ناڕەزایی و خۆپیشاندانى گه‌وره‌ى بەدوادا هات، بەڵام له‌سه‌ر ئاستى ره‌سمى، هه‌نگاوێكى ئه‌وتۆ نه‌گیراوه‌ته‌به‌ر تا ده‌سه‌ڵاتدارانى رژێمى ئێران ناچار بكرێن، چیتر به‌و شێوه نامرۆڤانه و دڕندانه‌یه مامه‌ڵه له‌گه‌ڵ هیچ كه‌س و گرووپێكدا نه‌كه‌ن كه ده‌یانه‌وێت پیاده‌ى مافى سه‌ره‌تایی مرۆڤبوون و كوردبوون و ژنبوونى خۆیان بكه‌ن.
تا ئێستا (عەزیزی و مورادى) دواین كه‌سن كه ناویان له لیستى سزاى له‌سێداره‌داندا هه‌یه له‌به‌ر ژنبوون و كوردبوونیان، به‌ڵام پێ ناچێت دوا كه‌س بن، وڵاته به‌هێزه‌كان و ئه‌نجومەنی ئاسایش دەسەڵات و تواناى کردارییان هەیە بۆ رێگرتن له‌م دیارده‌یه، بەڵام بێدەنگبوون هەڵدەبژێرن، له‌پێناوى به‌رژه‌وه‌ندییه‌كانى خۆیاندا، له‌و چوارچێوه‌یه‌شدا مه‌گه‌ر به‌س خودا بۆخۆى بزانێت، چه‌ند كچ و ژن و گه‌نج و پیاوى كورد، سزا و ئه‌شكه‌نجه ده‌درێن و په‌تى سێداره‌ى زوڵم و دیكتاتۆرى له‌گه‌ردنیان ده‌ئاڵێندرێت.
ئێستا دەبێت چی بکرێت؟
ناساندنی ستەم و چەوساندنەوەی کورد بە تاوانی دژ بە مرۆڤایەتی: بۆ ئێران "بابەتی ناوخۆیی" نییە، بەڵکو تاوانێکە کە پێویستی بە ئیدانەکردن و هه‌ڵوێستى جددى و كرداریی جیهانی هەیە.
ئازادکردنی زیندانیانی سیاسی: دەبێت بەپەلە عەزیزی و مورادى و چالاکوانانی دیکەی کورد ئازاد بکرێن، پێویستە سوید و وڵاتانی دیکە داوای لێپرسینەوە لە ڕژێمی ئێران بکەن.
سزای توندتر: دەبێت سزای ئامانجدار بەسەر سەرکردە و دامودەزگاکانی ئێراندا بسەپێندرێت کە پێشێلکاری ئەنجام دەدەن.
سەرنجڕاکێشان بۆ جینۆساید دژی کورد: پێویستە ڕێکخراوە نێودەوڵەتییەکان بەدواداچوون بکەن بۆ توندوتیژییە سیستماتیکییەکانی ئێران بەرامبەر بە کورد بۆ ڕێگریکردن لە پێشێلکارییەکانی داهاتوو.
ڕژێمی ئێران تەنیا لەبەر ئەوەی كوردن (عەزیزی و مورادى) شه‌هید ناكات، به‌ڵكو هەوڵی سڕینەوەی تەواوی ناسنامەیەک دەدات، بەبێدەنگبوونمان، ده‌بینه شاهید و هاوبه‌ش لەم تاوانانەدا، با شه‌هیدكردنى (ژینا ئەمینی) بێهودە نه‌ڕوات، با له‌سه‌ر ئاستى نێوده‌وڵه‌تى هه‌نگاوى جدى و كردارى بنرێت بۆ ئازادكردنى (عه‌زیزى و مورادی)ییه‌كان له زیندان و رزگاركردنیان له‌ئه‌شكه‌نجه و په‌تى سێداره.
.jpeg)
(1).jpg)
.jpeg)
.jpg)
.jpg)
.png)
