مەلا فرمان

گەر بە خێراییش بێت چاوێک بە دیمەنی کەرکوکدا بگێڕین، دەبینین، جگە لە سیما کوردییە سروشتی و دێرینەکەی، هیچ پرۆژەیەکی وا ئەنجام نەدراوە بە ڕۆخی زەویدا چوبێ و سیمای زیاتری کوردستانیی دابێ بە کەرکوک. پرۆژەیەک لەگەڵ ڕاکردنی دەسەڵات بە زیندویی بمێنێتەوە، بە درێژایی ١٤ ساڵ ( ٢٠٠٣ – ٢٠١٧ ) لە دەسەڵاتی حیزبی کوردی لەم دەڤەرە هەنگاوێکی لەو جۆرە نەنراوە. ئەو هەنگاوانەی نراویشن یان ئەو خزمەتگوزاریانەی کراون، یان دەڵێن دانوستان و  شۆڕشمان لەسەر کەرکوک تێکداوە، یان هەزاران شەهیدمان بۆ کەرکوک داوە، راست دەکەن. بەڵام منی کەرکوکی بەم شێوەیە دەیانبینم:

١ــ هیچ بەردێک و لوتکە شاخێک و دۆڵێک نییە لە کوردستانەکەم خوێنی لاوانی کەرکوکی پێوە نەبێ، یان باروبنەی ئاوارەی کەرکوکی لێنەخرابێ.

٢ــ تەواوی ئەو پرۆژانەی ئەنجام دراون بە حیزبی کراون و مۆری حیزبیان لێدراوە، سەنتەری رۆشنبیری بە نمونە.

٣ــ هەرچی بۆ کەرکوک کراوە یان لێی دزراوە یان ئاشی حیزبی پێگێڕدراوە.

ئەو ژیانە تاڵەی ئێستای جوتیارانی کوردی کەرکوک، مانەوەی زەویەکان بە داگیرکراوی، پیادەکردنی سیاسەتەکانی تەعریب و روداوەکانی گوندەکانی شەناغە، تەڕکەشکان، دەڤەری داقوق، تۆپزاوە  و دروسکردنی گونە عەرەبەکانی وەک ئال بودێر، عیزە و زەهرای نێوان کەرکوک و دوبز بەرهەم و دەرهاویشتەی کەمتەرخەمی و بێگوێی و بە تەنگەوە نەهاتنی دەسەڵاتی حیزبی کوردییە، ئەو دەسەڵاتەی لە بەغدا و لە هەولێر وەک موچەخۆر دەڕوانێتە کێشەی کەرکوک نەک وەک خاوەن پرسێکی نیشتمانی. ئێستای ئەنجومەنی پارێزگای کەرکوک بە نمونە.

ئەو جوتیارەی سەربازی سوپای عێراقی ملپێچەکە لە ملی رادەکێشێ لە کاتێکدا لەسەر تراکتۆرەکەی خەریکی زەویکێڵانە، نیشانەی ئەوپەڕی بەدرەوشتیە، بونی بیرکردنەوەیەکی بەعسیانە و رەگەزپەرستانەیە، نەنگیەکی گەورەیە بۆ دەسەڵاتەکانی بەغدا. لەهەمانکاتدا بێویژدانیە گەر باسی دەسبەجێ کاردانەوەی بەغدا نەکرێ بەرامبەر روداوەکە، بەناردنی شاند و  سزادانی ئەو سەربازەی کارە ناشرینەکەی ئەنجامدا.

لە لایەکی ترەوە پێویستە باس بکرێت و وەبیربهێنرێتەوە هەمان ئەو حەمەمینی جوتیارە لە خۆپیشاندانی هەولێر لە ساڵی ٢٠١٨ بۆ قوتی مامۆستایان، ئاسایشی هەولێر نەک جل و بەرگیان دڕاند بەڵکە ئازاری جەنابی و کچ و ژنەکانیشیان دا. ستەم هەر ستەمە هەر کەرسێ بیکات و لەهەر کەسێ بکرێ، بەڵام  گومان لەوەدا نیە ستەمی خۆماڵی برینەکەی قوڵتر و بە ئازارترە. زۆرجار ستەملێکراو یەکە بەڵام ستەمکار جیاوازە، کەواتە جیاوازیی لە چیدایە؟

١ــ بەغدا دەستبەجێ سزای سەربازەکانی خۆی دا. شاندی تایبەتی هات بۆ کەرکوک، لیژنە بۆ چارەسەری کێشەکان پیکهیندرا. کەچی هەولێر پاداشتی ئاسایشەکەی کرد و بەردەوامە لە ستەمکردن.

٢ــ بەرامبەر بە کردەوەی سەربازە عێراقیەکە بەرپرسێکی پارتی و راگەیاندنەکانی خەڵاتی حەمەمینی جوتیاریان کرد. خەڵاتێک کە یادی شەهیدانی ١٧ شوباتمان بیردەخاتەوە و برین دەکولێنێتەوە.

ئەوەندە ماوە بڵێم، ئەم بارودۆخەی ئێستا و رابردوو دەریدەخات کە چەند پێویستە کەرکوکیەکان بە ئاگابێنەوە و بێنە دەنگ و چیتر نەبن بەو ئاوەی ئاسیاوی ئەم و ئەو بگێڕێ، هێندەش پێویستە خۆیان خاوەنداری شارەکەیان و پرسی کەرکوک بکەن. مرۆڤیش چۆن ستەمی ستەمکارێکی تر دەبێنی ئاواش رەفتاری ستەمکارانەی خۆی هەست پێدەکات و دەیبینێت.