عەبدولڕەزاق شەریف

    ئێمە وا ڕاهاتبوین هەرکات ئیشێکی پێمانبێت سکرتێرەکەی یان کەسێکی نزیکی تەلەفۆنی بۆ ئەکردین، ئەوجارە بەژمارەی خۆی و هەرخۆیشی وتی:

 - هەتا ئێرە وەرە!

 ئازاد چۆمانی، پارێزەر و وەکیلی تایبەتی نەوشیروان مستەفا بوو، کە من چوومە لایان بە لاپەڕە و فایل و نوسراوەکانی بەردەستیانا دیاربو کاتێکی زۆری گفتوگۆیان پێکەوە تەواو کردبو، روی لە ئازاد کرد و وتی :

- ئەوەی بۆ منت باسکرد وەکو خۆی هەموی بۆ ئەمیش باسبکە.

 ئازاد هەندێ لاپەڕەی نوسراوی بەدەستیەوە گرت، روو لە من کەوتە قسەکردن:

+ ئەم داوایە لە دادگای هەولێر، پارتی و شەخسی مەسعود بارزانی لە پشتەوەیە، پێشتر وەک مافێکی یاسایی داوامانکردبو بیگوازینەوە بۆ سلێمانی، ئەمڕۆ بەیانی لە دانیشتنێکی تری دادگاکەدا، گواستنەوەکەیان ڕەتکردەوە و فەرمانی گرتنیان بۆ کاک نەوشیروان دەرکرد. جگە لەو تۆمارە دەنگیەی بڵاویانکردۆتەوە، تۆمارێکی ڤیدیۆیی لە بەڵگەکانی دادگایا نیشاندرا، دوو شایەت بەجیا، لە پشتی پەردەوە هەمو تۆمەتەکانیان پشتڕاستدەکردەوە، حاکمەکان زۆر گرنگیان بەقسەکانی ئەوان ئەدا، چونکە یەکێکیان ئەندامی جڤاتی نیشتیمانی و ئەویتریشیان کەسێکی نزیکی رێکخەری گشتی و بزوتنەوەی گۆڕانە.

 ئێمە وەک پارێزەر لەو کەیسەدا هیچیترمان پێناکرێت.

   لە ژیانی خۆم، چەندجارێک لە توڕەبون و کاردانەوەی شەخسیدا، لە نزیکەوە بینیبوم، جارێک ساڵی هەشتاوپێنج، لە (موزاهەرەی مەلاکان دژی ی ن ک لە بنگرد) جارێکیتریش ساڵی هەشتاوحەوت، لە ئاشکرابون و گرتنی پێشمەرگەیەکی دەستەکەی خۆیدا، کە بە هاوکاری ئیستیغباراتی عەسکەریی عێراقی، ییلانی تیرۆر کردنیان بۆ داڕشتبو بەڵام هیچ جارێکیان هێندەی ئەو نیوەڕوانەی ماڵەکەی خۆی بێ ئۆقرە و پڕ و داخ لە دڵ نەبو.

 هەستایە سەرپێ و ڕوو لە من وتی :

- ئێستا شۆڕش دێت و پێتاندەڵێم چی بکەن! قادر بەگم راسپاردوە بەنهێنی لێکۆڵینەوە بکات، ئەبێت ئەو کەسانەی ناوخۆمان بدۆزینەوە، تۆش هاوکاری بکە.

 شۆڕش حاجی وتەبێژی بزوتنەوەکە بو، هات و وەک من دانیشت، وەک منیش ئازاد چۆمانی حیکایەتەکەی بۆ گێڕایەوە. 

   ئەو نیوەڕۆیەی شانزەی حوزەیرانی ساڵی دوهەزاروشانزە، رۆژێکی تایبەتە لە ژیانما، دوای ساڵانێکیش بوە وانەیەکی تایبەت لە ژیانی کاری سیاسی و کۆمەڵایەتیما، چونکە هەرگیز بڕوام نەدەکرد کەسانێک هەبن لە تەنگانەدا پشت بکەنە نەوشیروان مستەفا، چجای ئەوانە لە هاوڕێ و پشتیوانەکانی دەیان ساڵی کاری سیاسی و پێشمەرگایەتی بووبێتن!

 هەر بە پێوە بە من و شۆڕشی وت :

 -  هەرئێستا ئەچن لەسەر شەخسی مەسعود بەرزانی قسەدەکەن، بە شەخسی ئازاری بدەن (واو وای لێبکەن)، نامەوێ باسی پارتی و کەسیتر و هیچیتر بکەن، هەتا قسە بە خۆی نەڵێن نایەتە ژێر بار، چلوهەشت سەعات و دوای ئەوە رایبگرن.

وتم: پێم باشە سەعات سێ، کۆنگرەیەکی رۆژنامەوانی بۆ کاک شۆڕش وەکو وتەبێژی بزوتنەوەکە رێک بخەین، ئەم قسانە بکات و بە دوایدا منیش لە کەناڵەکانی میدیای گۆڕانەوە دەستپێبکەم، چونکە یەک  دوو سەعاتێکم بۆ ئامادەکاری ئەوێت.

 من ئەو پێشنیازەمکرد و ئەویش قەبوڵیکرد.

 لە ماوەی نێوان جێهێشتنی ماڵەکەی و دەستپێکی کۆنگرەکەی وتەبێژەکەماندا :

 ⊕ پەیامنێر و رۆژنامەنوسی کەناڵە جیاوازەکانی میدیا عێراقی و کوردستانیەکانمان بۆ گردی زەرگەتە بانگکرد و شوێنمان بۆ چێکردن.

 ⊕ کۆبونەوەی پەلەی بەرپرسی بەشەکانی میدیامان رێکخست و پەیامەکەی رێکخەری گشتیم پێگەیاندن.

⊕ گشت ئامادەکاریەکانمان بۆ چلوهەشت سەعات شەڕی هەق و ناهەقی مەسعود بارزانی کرد.

 ⊕ سەعاتی سفری شەڕم پێڕاگەیاندن کە دوای یەکەم ئاربیجی وتەبێژەکەمان، لە سێی تەواو ئێمەش دەستپێدەکەین.

  شۆڕش حاجی کۆنگرەی رێکخست، قسەکانی هیچ پەیوەندیان بە ڕاسپاردە و پەیامەکەی نەوشیروان مستەفاوە نەبو! شپرزەییەکی ناکات و ناشوێن بە روخسار و قسەکردنەکانیەوە دیاربو! لە جێگەی ئەو ئاربیجیەی چاوەڕوان بوین ئاراستەبکرێت، ئاڵایەکی سپی بۆ مەسعود بارزانی هەڵکرد.

لای بەرپرسی بەشەکان و کادرەکانی میدیای گۆڕان گومانێکی گەورەی لەسەر قسەکانی نێو کۆبونەوەکەی من و پەیامەکەی نەوشیروان مستەفا دروستکرد، خەجاڵەتی کردین؛ چونکە بە پێچەوانەی فەرمانەکانی رێکخەری گشتییەوە ئەو وتی :

⊞  ئەو دۆسیەیە رەتدەکەینەوە چونکە هیچ بنەمایەکی یاسایی نیە .

⊞ دادگا و دەسەڵاتی دادوەری لە هەرێمی کوردستان چاونەترس و سەربەخۆ نیە.

⊞ دەبوایە دادگا لە رێگەی پۆلیسەوە ئاگادارکردنەوەکە بگەیەنێتە دەست کاک نەوشیروان بەڵام ئەوان داویانە بە مەکۆی هەولێری بزوتنەوەی گۆڕان.

⊞ ئاسایش و دادگا ناتوانن پشتڕاستی ئەو تۆمارە دەنگییە بکەنەوە.

⊞ چاوەڕێی دادگای تەمیز دەکەین بزانین دەتوانێ سەربەخۆیانە کاربکات و فەرمانی گرتنەکە هەڵبوەشێنێتەوە؛ چونکە تانە لەبڕیارەکە ئەدەین.

ئەمە هەڵوێستی رەسمی بزوتنەوەی گۆڕانە.... تەواو .

  چەند رۆژێک دواتر...

ئنجا زانیم، شۆڕش حاجی بەڕاوێژ و راسپاردەی ئەوکەسانە قسەیکردوە کە هەواداری ئاساییکردنەوەی پەیوەندیەکانیان لەگەڵ پارتی و هەوڵی گەڕانەوە بۆ پەرلەمان و حکومەتی هەرێم ئەدەن!

 چەند مانگێکی دواتریش...

 زانیم کە هەمان ئەو کەسانە وێڕای ئەوەی حەزیاندەکرد نەوشیروان مستەفا بگەڕێتەوە بۆ لەندەن لە هەوڵی ئەوەشدا بوون خۆیان بۆ قۆناغی دوای ئەو ئامادە بکەن، چونکە سەرگەرمی بەهێزکردنی دەستەوتاقمی تایبەت بەخۆیان بوون، نەوشیروان مستەفاش چەند جارێک بە نامە و بەقسەی کۆبونەوەش پێی وتبوون (چیتر پەیوەندیم بەبڕیاری بزوتنەوەکەوە نامێنێت).

 ساڵانی دواتریش بە یەقینەوە بۆم دەرکەوت زۆر لەوانەی ناوی هاوڕێی تازە و دێرینی نەوشیروان مستەفایان هەڵگرتوە و دەسەڵاتداری ناو بزوتنەوەکەن، نە هاوڕێ و دۆست و نەخۆشەویستی بون! نە هیچیشی لێوە فێربوون! بە پێچەوانەوە لە سەرەمەرگ و دوای مردنیشی هەموو رەفتار و کارەکانیان بە نهێنی و ئاشکرا بۆ سڕینەوەی مێژوی سیانزە ساڵی چەکداری چیا و سیانزە ساڵی زویری و دورکەوتنەوە لە کوردستان و سیانزە ساڵی هەوڵی ریفۆرم و چاکسازی ئەو بوو..! بۆ ئەو ئامانج و مەبەستەش، راستەوخۆ و ناراستەوخۆ بە ئەجێندای بێگانە بە هەماهەنگی و رێنمایی خانەوادەی بارزانی و تاڵەبانی، هەنگاویان دەنا.

 لە دەیان کۆبونەوە و لێدوان ونوسیندا، لای دەیان هاوڕێی خۆم و نەوشیروان مستەفا تەنانەت لای کوڕەکانیشی لە قۆناغەکانی ئەو رۆژ و مانگ و ساڵانەدا، هەمو سەرنج و زانیاریەکانم بە بەڵگەوە باسکردووە و خستومەتە روو، لە جڤاتی نیشتیمانیەکەشیدا، باسمکرد، بەرپرسیارێتی مردنی بیری نەوشیروان مستەفا و پرۆژەکەی و بزوتنەوەکەیم خستە ئەستۆیان، بۆیە لێرەدا بەڵگەی ئەم قسانە دووبارە ناکەمەوە تەنیا و تەنیا دەڵێم :

(نەوشیروان مستەفا مەللاک و بازرگان نەبوو! کە مرد خاوەنی یەک مەتر زەوی و هیچ ژمارەیەک لە پارەی بانک و پارەی کاش نەبوو! ئەوەی بەناوی خۆی جێما موڵکی بزوتنەوەکە و پرۆژە سیاسیەکەی گۆڕان بوو، ئەوەشی کە رێگەی خۆشکرد لە پرۆژە سیاسیەکە دایبڕن، بیکەنە موڵکی شەخسی و بۆ کوڕەکانی بمێنێتەوە، ئەو نەخشە و ئەجێندایەی دوژمنانی کورد و دوژمن و نەیارەکانی خۆی بوو! کە بەئاگا و بێئاگا بڕیار بەدەستەکانی گۆڕان، هاوڕێ دەستپیسەکانی و خاوەن کۆمپانیاکان و خوازەڵۆکە سیاسییەکان جێبەجێیانکرد.)

 بە هەرحاڵ... ئێمە بەفەرمانی ئەو دەستمان بەشەڕەکە کرد، لە ناوەڕاستی ئەو چلوهەشت سەعاتەی رێکخەری گشتی دوای نیوەڕۆژی شانزەی شەش بۆی دیاریکردین، لە لایەن هەموو دەسەڵاتدارانی گۆڕانەوە سەرزەنشت دەکراین و داوای راگرتنیان لێدەکردین، چەند گەنجێکی سەرگەرمی گۆڕان نەبێت کەس ئامادە نەبوو بە نووسین و لێدوان و چاوپێکەوتن دژی بڕیاری دادگای هەولێر و شەخسی مەسعود بارزانی قسە بکات، کە پێم دەوتن فەرمانی رێکخەری گشتییە، بە کاردانەوەیەکی هەڵە ناویان دەبرد و ئەیانوت نابێ بەقسەی بکەیت.

بیستوچوار سەعات تێپەڕی و لەژێر فشاری ئەواندا، بۆ پرس و راگۆڕینەوە لە ماڵەکەی خۆی سەردانمکرد، بەدیار تەلەفزیۆنی "ک ن ن" ەوە دانیشتبو، رەنگ و روی بێتاقەتی دوێنێ بەریدابوو، دوای دەستخۆشی پرسیاری (وێنە، ڤیدیۆ، نوسین، شیعری هەجو، تەنزەکان)ی لێکردم و وتم: کادرەکانمان هەموان بە پەرۆشەوە بەرگریت لێدەکەن، ئەنجامی توانا و ماندوبونی هەمویانە بەڵام لەناو بزوتنەوەکە هاوکارمان کەمە، تەنانەت داوای راگرتنی شەڕەکەمان لێدەکەن .

وتی: کێ داوای راگرتنی دەکات؟ ناوم پێ بڵێ؟

 من بەوشەی "هەمویان" کۆتایم بەوەڵامەکە هێنا، ئەو بەردەوام بو ...

 - ئەمڕۆ سەید عومەر و قادر و هەمو ئەوانیتر هاتبونە لام، گلەییان لە کاردانەوە، بەرنامەکان و تەلەفزیۆنەکە کرد! پێم وتن: "تەنیا ئەو پیاوە بەرگریم لێدەکات ئەتانەوێ ئەویش بێدەنگ بکەن؟ مانای چییە فەرمانی دەستگیرکردن بۆ من دەرچووە و دوو رۆژە کەسێکتان قسەیەکتان نەکردوە؟ بەراست من رەفیقی وەکو ئێوەم هەبوە!!؟ "

 لە درێژەی هەڵچون و قسەکانیا باسی بەرژەوەندی هەندێکیانی کرد، باسی ترسنۆکی و بێوەفایی هەندێکیتریان، وتیشی مادام فشارت لێدەکەن چلوهەشت سەعاتی شەڕەکە بکە بە هەفتاودوو سەعات.

دوای چلوهەشت سەعاتی شەڕە وێنە، وشە و قسەی توند و رەقی میدیا، هەژدەی مانگ سەرۆکایەتی هەرێم بەناوی مەسعود بارزانیەوە بەیاننامەیەکی لەسەر راگرتنی شەڕی راگەیاندن بڵاوکردەوە و داوایکرد کەناڵەکانی پارتی و گشت حیزبەکان بۆ ئارامی و پابەندبون بە بڕیاری وەستاندنی شەڕی راگەیاندنەوە پابەند بن. بەدەرچونی ئەو بەیاننامەیە بیری قسەی یەکەم رۆژی رێکخەرم کەوتەوە کە وتی: (هەتا قسە بەخۆی نەڵێن نایەتە ژێر بار).

 هەر دوای ئەو چل و هەشت سەعاتەش "قادری حاجی عەلی" لێدوانێکی بێدەنگ و بێ وێنەی، کە لاپەڕە و نیوێک بوو بە نووسین! بۆ میدیا نارد و بە توندی ئیدانەی فەرمانی دەستگیرکردنەکەی رێکخەری گشتی بزوتنەوەکەی کرد. هێندەی بزانم ئەو تەنیا سەرکردەی بزوتنەوەکە بوو دوای دوو رۆژ، بەئاشکرا هەڵوێستی توندی بەرامبەر ئەو بڕیارەی دادگای هەولێر وەرگرت.

بڕواناکەم کەسێکی سیاسی هەبێت لە دنیادا هێندەی نەوشیروان مستەفا، مەسعود بارزانی ناسیبێت! باشتر بڵێم کەس نەیدەناسی ئەو نەبێت. تەنیا لەخراپەکاری و خراپە ئەقڵیدا نا! پیاو بەویژدانەوە بڵێ:

 زۆر جار و لە هەندێک هەڵوێستی کۆنی وێستگەکانی کاری پێکەوەیی و سیاسەتیشدا، وەسف و ستایشی دەکرد.