سەرکەوت جەبار

ئێوەی ناڕازیی هێندەی بە حیزب و کارەکتەرەکانییەوە خەریکبوون، نیو هێندە بەوانەوە خەریک نەبوون کە لە دەوری حیزب و سیاسییەکانن. ئێوە هێشتان مرۆڤی کورد ببێت بە بندیوار، هێشتان مرۆڤی کورد ببێت بە شەلاتیی حیزب و شەق لە خەڵکی بدات لەپێناو چەند سیاسییەک. بەڵام هێشتا نائومێد نین و چاوەڕێن خودا لەناویان ببات. لە چایخانە و چێشتخانە و بازاڕ هەمیشە گوێم لەوە دەبێت خەڵکی دەڵێن بەشکم خودا لەناویان ببات. ئەوە گاڵتەجاڕییە میلەتێک لەناو هەندێک چیرۆک و خورافەی چەندین هەزار ساڵەدا بژی و پێی وابێت یەکێتی و پارتی لەناودەچن و ژیانێکی شایستەیان دەبێت، بەڵام عەقڵە بۆگەنەکانیان هێشتا لەناو خوڕافە و کۆمەڵێک چیرۆکی پڕ لە هەڵیتوپەڵیتدا تەراتێن دەکات. یان هەندێک کاڵفامیش ئومێد بە ئەمەریکا و ڕۆژئاوا دەبەستن بۆ ئەوەی یەکێتی و پارتی لە دەسەڵات دوور بخەنەوە.

ئەبوو ئێوە نەهێڵن مرۆڤ کەرامەتی، بیرکردنەوەی بۆ مەعاشێک بفرۆشێت بە سیاسییەکان. هێزە چەکدارەکان سەر بە کێن؟ مەگەر سەر بە کۆمەڵگای کوردیی نین؟ خزم و ناسیاو و هاوڕێی خۆمان نین؟ ئێوە هەرگیز لەوە تێنەگەشتن کە حیزب بچکۆلەترە لە دارودەستەکەی، لە دەوروبەرەکەی، هەربۆیە تووشی وەهم بوون بەوەی هەموو گوتارێکتان ئاڕاستەی حیزب و کارەکتەرەکانی کرد، بەبێ ئەوەی تێبگەن لەوەی ئەوەی گرنگە ئەوەیە نەهێڵن خەڵکی ببێت بە حیزبی، نەبێت بە ماستاوچی و کۆیلە و شەلاتی و لەپێناو مووچەیەکدا شەق لە هاونیشتیمانی خۆی بدات. ئێوە خراپ دۆڕان و هێشتاش نائومێد نین و وەک سیزیف بەردێکتان لەسەر شانە و بەردەوام غلۆر دەبنەوە و هەرگیز تێناگەن بۆچی غلۆر دەبنەوە.

ئێوە ئەتانەوێت کێ بگۆڕن. یەکێتی و پارتی؟ ئەی چی دەکەن لە حیزبە ئیسلامییەکان؟ ئەی چی دەکەن لە شاسوار و عەلی و لاهور؟  ئەی چی دەکەن لە سەلەفییەکان؟