عومەری حاجی عنایت هەڵەبجەیی

تۆ بڵێی ئەمجارەش مێژووی شۆڕشی کورد چەند بارە نەبێتەوە؟!!
ئەمشەو شەوی ١٠/١١/٧/٢٠٢٥ سبەینێ ١١/٧/٢٠٢٥ سەعات ١٠ وادەی چەک دانانی پ. ک. ک (شۆڕشگێڕترین، ئازاترین، باوەڕدارترین کەسانێک) کە مێژووی کوردو مرۆڤایەتی وێنەیانی نەدیوەو نایبینێ، بەتایبەت لەڕوی بەشداری ژنانەوە لەسەرتاسەری شۆڕشەکانی گەلاندا ژن ئاوا قارەمان و چالاک نەبوون.

ئەمشەو سەرنجم دا، زۆربەی سیاسەتمەدارو رۆشنبیرەکانی کورد نا کورد ئەم هەنگاوەی پ.ک. ک بە مێژووی یەکلاکەرەوە دەزانن لە باکوور کوردەکان جەژن و شادی دەکەن، نازانم بۆچی من لەوپەڕی ماتەم و حوزن ناخۆشیدام زۆر نیگەرانم.

ئاخر من شاهیدی رێکەوتنەکانی نێوان شۆڕشی ئەیلول و شۆڕشی نوێ و حکومەتی عێڕاقم لە شەستەکان حەفتاکان و هەشتاکاندا  و دواتر بینیم، چۆن دەسەڵاتدارانی عێڕاق فێڵیان لە کورد کرد، نسکۆی ساڵی ١٩٧٥ م بینیوە، بە ووردی ئاگاداری تیرۆری قاسلمۆی مرۆڤ دۆستم ، ئەویش لە هەوڵێکی تاکە کەسیدا دەستی خستە ناو دەستی ئێرانیەکان و لەسەر مێزی گفتوگۆ خەنجەریان لە پشتیدا، من چیبکەم خەمی گەلەکەم کوشتمی ، لە کاتێکدا ئوچئالان نوای دەنێ پڕۆسەی ئاشتی ، سەرۆکی تورکیا دەڵێ دیواری تیرۆر بۆ هەمیشە دەڕوخێ .

هاوڕێیان گومانم هەیە، تورکەکان لە بۆسەدابن  بۆمان، دەیانەوێ شکۆی گەریلا بشکێنن، بە شکاندنی شکۆی گەریلا شکۆی هەموو کورد دەشکێ، شەڕڤانەکانی رۆژئاواش وێران دەبن و دەستیان تفەنگ ناگرێ، تکایە پێممەڵێن سەردەمی شەڕی چەکداری نەماوە، ئەوە دەزانم، بەڵام کورد هیچ چارەیەکی دیکەی نییە، جگە لە چەک و هیچ دۆستێکی نییە جگە لە چیا، سەرنج بدەن ئەوە هەڵوێستی  ئەمریکا بەرامبەر کوردی رۆژئاوا دوای ئەو هەموو قارەمانێتیە بەرامبەر داعش، ئێستا (جبهة تحرير شامی) تیرۆرستی دوێنێو دۆستی ئەمڕۆی لە لیستی تیرۆر دەرهێناو فەزڵی تحریر شامی بە رەچەڵەک  داعشی دا بەسەر هەسەدەی هاوپەیمان و داعش کوژدا.

سەرنج بدەن  چۆن  هەڵوێستی ئەمریکا لە پاشەکشەدایە، بەرامبەر بەو هەسەدەیەی دە هەزار شەهیدی داوە بەرامبەر داعش و تحریر شام جبهە النصرە، ئێستا بەرامبەر کورد دەڵێ:-( یەک ووڵات و یەک سوپاو یەک ئیدارە) فیدڕاڵی حوکمی ذاتیش هیچ سەرنجی رۆژهەڵات بدەن دوای جەنگی دوانزە رۆژەی ئیسڕائیل و ئێران ، ئەوەی باجەکەی دەدات هەر گەلی کوردە  بە بیانوی موساد بوون رۆژانە سەدان لاوی کورد زیندانی دەکرێن و لە سێدارە دەدرێن.

لە باشوور دەسەڵاتی ناوندی بەغدا سزای جەماعی مان دەدات، درۆن بارانمان دەکات،  مووچەمان دەبڕێ و هەڕەشەی هێرشمان لێدەکات، لە رۆژئاوا حکومەتەکەی شەرع زمانی بەرامبەر کورد زبرتر بووە، سبەینێش گەریلا بۆ نیاز پاکی چەک دادەنێ تۆ بڵێی ئەم هەموو رووداوانە هەڵکەوت و سودفە بن، هەرگیز نا و نەخێر، ئەمە دووبارە بوونەوەی کۆبونەوەکانئ ( ئەنقەرە، دمشق، تاران، بەغدا) یەو بە شێوەکی دیکە من قسەی خۆم دەکەم گوێ لە توانج و کۆمێنتی کەس ناگرم، کەسیش وەڵامم نەداتەوە، چونکە ئاواتە خوازم هەڵەبم ، چیبکەم گومانم هەیە کە:-
ئوچ ئالان لە خشتە برابێ و ئەم هەنگاوە تاک لایەنی بە زۆر یان بە فێڵ پێکرابێ
من ئەمشەو وەک شەوی ٥/٦ /ئازاری/ ١٩٧٥ خەمبارو دڵ پڕ لە گرینم

چەک دانانی ئەو کۆمەڵە گەریلایەی سبەینێ لە باشوور ( ئەگەر رووبدات) چەکەکانیان وەک لیژنە دار ئاسای چەکەکانی پێشمەرگەکانی شۆڕشی ئەیلول دەبینم لەبەردەم سەربازو استخبارات و ئەمنەکانی بەعسدا کەڵەکەمان دەکرد
من لەیلا عبدالەتیف نیم فاڵ بگرمەوە بەڵام بیرکردنەوە و هەستی شەشەمم وام پێدەڵێ و نەم توانی بیشارمەوە، ئەزانم قسەکانم دژ بە شەپۆلی بیرکردنەوەی زۆرینەیە، بەڵام مەرج نییە هەر بۆچۆنێک هی زۆرینە بوو راستبێت( خۆزگە بۆچونەکەم هەڵە دەبوو) ئەم پڕۆسەیەی سبەینێ ئاشتی و ئارامی و خۆشگوزەرانی بۆ کوردانی باکوور دەهێنا

داخەکەم سبەینێیەکی  رەش دەبینم، لەو بەیانیانە دەچێ کە مرۆڤ شەوەکەی لە چاوەڕوانی هێنانەوەی تەرمی ئازیزێکیدا تا سپێدە خەو نەچووەتە چاوی، بێ ویستی خۆی لەگەڵ کازیوەدا چاوەکانی لێکدەنێ و پاش یەک دوو سەعات لەبەر گریانی ژنان و غەڵبەغەڵبی پیاوان وەخەبەردێ و یەکسەر مردنی براکەی ، خوشکەکەی، جگەرگۆشەکەی ....هتد دێتەوە پێش جاوی و ئیتر دۆش دادەمێنێ و بەزەحمەت چنگێک ئاو ئەکات بە دەموچاویداو بە زۆر دوو پارو خواردنی بێ تام و بۆن ئاودیوی گەدەی دەکات و ئەچێتە لای خزمان و چاوەڕێی هێنانەوەی تەرمەکەیە سبەینێ  بۆ من وایە لە کاتێکدا بەندە هیچ پەیوەندی ئۆرگانیم بە پ ک ک و ئەو حیزبانەشی نزیکن لێوەیان نییە، رەخنەشم هەبووە لەسەر ئەدائیان  بەتایبەت چڕکردنەوەی ناوەندی بڕیار لە یەک کەسدا سەرباری رەخنەکانیشم هەرگیز نەمخوێندوەتەوە و نەمبیستوە وەک ئەم شۆڕشگێڕانە ئازاو جەربەزەو خۆنەویست و دڵسۆز و دەسپاک و داوێن پاک، بەداخەوە بێ ئەنجام وا مۆمی تەمەنی خەباتیان دەکوژێتەوە

11 ی تەمموزی/ ٢٠٢٥ن