د. هەردی مەهدی میکە

نامەوێ دڵخۆشی کاتی لە هاونیشتمانییەکانم تێکبدەم، لە بنجدا بەم جۆرە ئەم ناردنەی مووچە شینی دەوێت نەک شایی شایەرە سیاسییەکان. بەڵام لانیکەم دەرکەوت پرسی ناردن و نەناردنی مووچە بەتەواوی پەیوەستە بە ئیرادەی سیاسیی ئیقلیمی-نێودەوڵەتی پاشان نێوخۆییەوە، وەک نموونەیەکی ڕۆڵی دەرەکی: تا ئاماژەی نزیکبوونەوەی ئێران و ئەمریکاش هەبێت بۆ گەڕانەوە بۆ مێزی دانوستاندن دیسانەوە بەغدا (وەک تاکتیک نەک ستراتیژ) لەگەڵ هەرێم نەرمتر دەبێتەوە. ئیتر ئەم تەکنیک و ڕێککەوتن و وردەکارییە، ئەسڵی ئیرادەی ناردن و نەناردنەکە نیین.

هەینی دادێ ترۆیکا (سیانەی ئەوروپی) و ئێران کۆدەبنەوە و ترەمپ و خامنەیی و ئێراقچیش ئاماژەی گەڕانەوەیان بۆ سەرمێز درکاند، بەڵام ئەمە زۆر ناخایەنێت و تێکدەچێتەوە.

کاتی خۆی، هەرکات سودانی بیویستایە بچێتە واشنتۆن لەگەڵ هەرێم ڕێککەوتنی دەکرد و کە دەهاتەوە کێشەی بۆ دروستدەکردەوە! ئەمڕۆ و سبەیش وەزارەتی دەرەوەی ئەمریکا دەیەوێت قسە لەگەڵ سودانی بکات دەی دیارە خاڵێکی هەر مووچەی هەرێمە و خاڵەکەی دیکەشی نینۆککردنی حەشد و دەسکورتکردنەوەی ئێرانە. سودانیش دەبێت قسەی پێبێت!
ئیتر بچڕ پچڕ ئاوا پەیوەندیی ڕووکەشانەی هەولێر و بەغدا دەقرتێت و گرێی دەدەنەوە و گەر هاوکێشە ئێراقی و ئیقلیمیەکان وا بمێننەوە تا یانزە ساڵی دیکەش هەروا دەبێت و چارە نابێت. سەد بەناو ڕێککەوتنی دیکە بکرێت هەر درێژمەودا نابێت، چونکد ئیرادەی هەردوو حکومەتەکە بڕیاردەری سەرەکی نییە و هەردوولا گۆڕاوەکانی پشتەوە کاریگەرییان لەسەریان هەیە.

بە کورتی زۆر باشترە هەرێم خۆی بیرێکی ڕیشەیی لە پرسی مووچە بکاتەوە بە سیستمی مووچەی خۆی و (عادیلانە و سەرلەنوێ نەک وەک ئێستا) بەو واقیع و توانایەی کە هەیەتی، مووچەی مووچەخۆرانی کوردستان دابین بکات، کە دڵنیام گەر حکومەتی هەرێم و خەڵکەکەی (کە بارمتەی دەستی گەندەڵان و مافیا هەرێمی و عێراقییەکانە) دەستی تۆڕە حیزبییەکانی نێو پارتی و یەکێتی و هەندێ لە بەناو ئۆپۆزسیۆن کورتبکەنەوە و ئەو هاوپەیمانێتییە گەندەڵەی سیاسییە بازرگانەکانی نێو هەرێم و دەرەوەی هەرێم و «هێڵی تەنسیقی مەرزەکان و تەنکەرە قاچاخەکان» ڕاگرێت و هەڵوەشێنێتەوە، نەک مووچەی هەرێم بەڵکو دەتوانین یارمەتی پارچەکانی دیکەی کوردستانیش بدەین و پاشتر وەک نەرمەهێزی یەکدی یاریی و دەرفەت و فشارە هەرێمایەتییەکان تێپەڕێنرێت.