بارزان شێخ عوسمان

بە درێژایی هەفتاو هەفت ساڵەی دەوڵەتی ئیسراییل ،  هێزە عەرەبییەکانی فەڵەستین و  نیشتمانی عەرەب چ بە هات وهاوار و ریزکردنی رستە و وشەی ئینشایی و وروژێنەری ناسیۆنالیستیی و ئاینیی ،چ بە رفاندنی فڕۆکە و بە بارمتەکردنی خەڵکی مەدەنیی یا بە هێرش و پەلاماری خۆکوژیی و سەربازیی ، لە مەینەتیی زیاتر بۆ گەلی فەڵەستین و مەسەلە رەواکەی   و لەدەستدانی  جوگرافیای زیاتر هیچ دەستکەوتێکیان  نەبوە .  

بۆ راڤە کردنی ئەو پەرەگرافەی سەرەوە سەدان کتێب و هەزاران سەعات  سیمینار و گفتوگۆ لەبەر دەستدان ،بۆیە راستەوخۆ دێمە سەر قومارەکەی تۆفانی الاقصی کەی حماس و سەرەزلەکانی تێرۆر لە یحیی سینوار تا هەنیە  بگرە تا محمد زەیف و ئەوانیتر کە   هەفت سەد و بیست رۆژە زیاترە  خوێنی لەبەر دەچۆڕێت و  هەزاران مرۆڤ  بە کوشتن دران ،سەدان هەزار مناڵ و ژن و بەساڵاچوی تیادا برسیی و بێ دەرەتان کردوە . 

حماس کە بۆ لاواز کردنی رێکخراوی رزگاریی فەڵەستین و هێزە چەپەکانی فەڵەستین دروست کرا  ،  هیچ باکی  بەو کارەساتانە نییە کە بەسەر خەڵکی بێ دیفاعی کەرتی غەزەدا دێت ، چونکە ئەویش و تەواوی هێزە ئیسلامییەکان ، خێر و بەناوبانگ بونیان  لەو  تیجارەتی خوێنڕشتن و برسیی بونەدا دەبینن . 

هەر زو لە ٧ی ئۆکتۆبەری ٢٠٢٣ وەك رۆژی روناك ئەوە دەبینرا کە  ئیسراییل بە لەدەستدانی  دوهەزار کەس   و ٢٥٠ بارمتەکراوەکەی ، بە بێ بەزەییانە و رەچاونەکردنی هیچ قانون ورێسایەك تۆڵە دەکاتەوە  وەک ئێستا دەیبینین ، کەچی مونەزیر و موفەکیر و قەڵەم بەدەستانی ئیسلامییەکانی کورد تەنانەت هەندێکی تریش پەلامار دانەکەیان بە نمونەیەکی باڵای مقاوەمەتە بەچۆك هێنەرەکەی ئیسلامیی و گۆڕانێکی چۆنایەتیی لەقەڵەم دا . بەڵێ  ئەوەی ئێستا دەیبینین ئەو گۆڕانەیە کە فەڵەستینییەکانی کەرتی غەزەی بەو دەردە بردوە ، هیچ مرۆڤێك کە مانای مرۆڤایەتی بزانێت حەزی پێ ناکات ، مەگەر حماس و هاو ئاوازەکانی  کە داوای زیاتری کوشتن و برسییکردن دەکەن تا بازاڕی  هەڕاجکردنی خوێنی ئەو خەڵکەیان باشتر بسوڕێت . 

ئەوەتا ئیسلامییەکانی لەمەڕ خۆمان لە هەرێمی کوردستان  وەك چۆن حەماسییەکانی غەزە سەرباری خوێن رشتن چاویان بڕیوەتە دو لەت نان و کیسەیەك خۆراکی خەڵك ، لە کوردستانیش وەك لە وتارەکانی کاک عەلی محمود و بەڕێز د.امیر حسێن دا بینیم   ئیسلامییەکان  بە کۆمەك کۆکردنەوە  و باربۆ کردن لە بازرگانیکردن بە جەستەی مرۆڤەوە،  خەڵک فریو دەدەن  هەبدێکیشیان چاویان بڕیوەتە  ئەو دو پولەی کە خانەنشین و موچە خۆران دوای نەوەد رۆژ  وەریدەگرن .

ئاخر ئەوە کرۆك و ناخ و ماهیەتی حزبە ئیسلامییەکانە کە هەمیشە فرسەت تەڵەبانە هەل دەقۆزنەوە   بۆ  تیجارەتەکەیان  تا مەیلی خەڵك بۆ ئیسلامێك رابکێشن کە هەمو کەس  دەزانێت سەرچاوەکەی لە کوێوەیە ، ئەو نەهامەتییە و ئەو مناڵانەی غەزە ، کە  ئەوان خەڵکی سادە و بێ ئاگای پێ دەخەڵەتێنن ، جیاوازە لەو مەینەتیانەی مناڵان و ژنان و بێدفاعەکانی تری  ئەو غەزەیەی  خەڵکی هوشیار و بە ئاگا و مرۆڤ دۆست دەیبینن . 

ئیسلامییەکان  بە هەستێکی  ئیخوانیی و داعشیی و لقەکانی تریانەوە  سەرنجی خەڵك رادەکێشن ،  بەو دڵرەقییەوە تیجارەت بە مناڵانی غەزە دەکەن کە حماس هاوسونفی خۆیانە ، نەك  بە گیانی مرۆڤ دۆستیی یا موسڵمانێتیی ، دەی باشە بۆچی داوای کۆمەك بۆ مناڵانی کۆبانی ، شەنگال  ناکەن  هەر لەبەر ئەوەی ئەوان قوربانیی  دەستی مامۆستا و هاوەڵەکانی  حماسن ؟!.

بەراستیی ئەو باندە ئیسلامییانەی دۆست و برای حماس زۆر فێڵبازانە  ختوکەی هەستی خەڵکی سادە دەدەن ،  یەکێکیان دەیوت کە ئەو مناڵانەی غەزە دەبینم خۆم پێ ناگیرێت !، ئەی بۆچی لە ئاست ماڵ و مناڵی خۆتدا  بێ دەنگیت کە پارەت پێ نییە داواکارییەکانیان بۆ جێبەجێ بکەیت ، ئەی بۆچی لە ئاست  نەهامەتیی سەدان هەزار مناڵ و ژندا  فزە ناکەیت کە بەهۆی پیسبونی ژینگە  و دوکەڵی پاڵاوتگە بێ فلتەرەکان و کەمبونەوەی ئاوی پاکژ لە ئەنجامی ئەو هەمو سیتی و شوقانە توشی شێر پەنجە و چەندین نەخۆشیی تر بون ؟!.

ئەو غەزە وێران و تارمایی مردوە،  تێرۆریستانی حماس لێی بەرپرسیارن   ،   کە هەرگیز بۆ جارێکیش  ئەو تاجیرانەی خوێنڕشتنی لەمەڕ خۆمان   خۆیان لەقەرەی نادەن !. ئەوە حماسە کە  هەمیشە   پەیامی خوێنڕشتن زاخاوی مێشکی نەك هەر غەزەییەکان بەڵکو تەواوی  ناوچەکە دەدات ،   کە سەرەنجام ئیسراییل قازانجی لێ دەکات و  بەرنامە و پلانەکانی خۆی زیاتر جێبەجێ دەکات .

هەر لەو روانگەیەشەوەیە کە  جیهانی شارستانیی لەگەڵ هاوسۆزیی بۆ مناڵانی غەزە و  سەرکۆنەکردنی ئیسراییل و داوای راگرتنی جەنگەکە ، بەردەوام حەماسیش وەك تێرۆریست  دەناسن داوا دەکەن ،غەزەی دوای جەنگ بێ حماس بێت ، کۆمەڵەی دەوڵەتانی عەرەب بە هەمان شێوە داوای دورکەوتنەوەی حماس دەکات .

کەواتە  کۆمەك کردنی مناڵانی غەزە تەنیا و تەنیا بەو داوایە دێتە دی کە  جیهان دوپاتی دەکاتەوە ئەویش کۆتایی حماس و  هەمو چەکدارە خوێن  رێژ و مافیاکانی هاوبیچمی  دورکەوتنەوەیانە لە مەیدانەکە ، نەك   خەم و مەینەتییەکانیان تیجارەتی پێوە بکرێت و لە شوێنێکی وەك هەرێمی کوررستان ئەو دوپولەی دەستی خانەنشینان و موچە خۆران  بدزرێت و بکرێتە خەڵات بۆ سەرەزلەکانی تێرۆری حماس !.