هەندرێن

- پێشهاتە هێدم و هەژەندهێنەکەی لالەزاری سلێمانی لە سەتەی بیستویەکدا، میراتی کۆی مێژووی ئەو خودە بوغزاوییەی کوردە لە ئازادبوونی خۆی.
مەرگی ئەو خودە بوغزاوییەیش لە دیمەنی (لێمگەڕێ با دیلێک ـ یەکیان بکوژم) خۆی بەرجەستە دەکاتەوە و بەمەیش ئومێدی داهاتوویەکی ئاوەدان بۆ خەونی ئازادی لە باشوور لەناو دەبات.
سەرباری هەموو ئەوانەیش، خەنی خۆشبوون و مەستبوونی بەناو رایەگەیاندنی حکومڕانی هەولێریش بە راوکردنی ڤیدیۆی قەباعەت و کەتن و نهێنییەکانی پاش ئەو کارەساتە دڕندانەیە، جەخت لەو خودە بوغزاوی کورد لە بەرانبەر یەکتردا دەکاتەوە. بۆیە حەقی خۆیەتی هەمان ئەو وەسفانەی کە ئەمڕۆ تۆماس بەڕاک لە کۆنگرەی رۆژنامەوانییەکەیدا بە مێدیاکارەکانی لوبنانی گوت، بەو مێدیا و بەناو مێدیاکارانەی هەردوو هەرێمۆکەکەی هەولێر و سلێمانی و هاونموونەکانیان بگوترێت. 

- مرۆڤ کە ئەو کارەساتەی سلێمانی دەبینێت، کۆی دیمەنی مێژووی ئەو میرنیشینە وابەستانەی کورد بە سەفەوی و عوسمانی دێنەوە بەرچاو. بۆیە لە خۆڕا نییە کە بە تایبەتییش ئەحمەدی خانی و حاجی قادری کۆیێ،ژانی نەزانی و بوغزی ناوخۆیی ئەو میرنشینە کوردییانە لە شیعرەکانیاندا رەنگڕێژە و خانیش لە داخی ئەو رووحە بوغزاوییەی میرنشینانی کورد، دەکات بە بەهانە بۆ تەقینەوەی ئەو تووڕەییەی. بۆیە هاوارەکانی ئەو دوو شاعیرە شکۆمەندە هەمیشە لە رووحی ئێمەدا دەلەرنەوە.

، لێ چونکە ئێمە شایەدحاڵی ململانێ و کەین و بەینەکانی بەرەبابە خێڵەکییەکانی ئەو میرنشینانە نین و ئەو سەردەمانەیش وەک هەنووکە تەکنۆلۆژیا و مێدیای نەبووە، هەروا قەوموقیلە و لایەنگرەکاننی ئەو میرنشینانەیش وەک حکومڕان و چەکدارەکانی ئێستەی ئەو هەرێمە دەغەزارە ئاڵوودەی ئەو هەموو سامانەی بەردەستییانە و دەستەڵاتخوازییەوە نەبوونە، بۆیە رەنگە بەو جۆرە ئەو بوغزە لە فیتیشیزمەی خود بەرانبەر یەکتریدا هەڵنەڕشتبێت. 

- لێرەوە دوای ئەو کارەساتەی لە لالەزار قەوما، کە لێرەدا کامە لەو دوو ئامۆزایە بەرپرسیارن لەو کارەساتەدا، لە کن من گرنگییەکی نییە، لێ من تا ئەو پێش ئەو کارەساتە، بە گومان بووم لەوەی کە کورد بەو قەبارە گەورەیە و مێژووە خوێناوییەی کە هەیەتی، لە خۆڕا نییە عەشقی بندەستی و کۆیلایەتییە، ئەو فشانەیش کە بەودواییە هەندێک کەس تەواوی شارستانییەتەکانی رۆژهەڵاتی نێوەڕاست بە میراتی کورد گرێ دەدەن، بەشێکن لە وێنەی ئەو خودە بوغزاوییەی کورد، چونکە دەستەوەستاون بەرانبەر ئەو بندەستییە خۆکردەی کورد و خۆیان.

- رەنگە کوردی باشوور، سەرتۆپی ئەو خودە بوغزاوییە بێت لە خودی کوردبوون، چونکە باشوور بە بەراورد لەگەڵ بەشەکانی دیکەی کوردستان لە سەرەتای دروستبوونی عێراق لە بیستەکانەوە تا ئێستەیش، وەک نەتەوەی دووەم مافی زمان و کەم و زۆر دەستەڵاتی سیاسیشی پێ بەخشراوە.

- لەوەیش گرنگتر، لە نەوەتەکان و بە تایبەتیش دوای ۲٠٠۳ لە دەستووری عێراقدا بە فەرمی خاوەن هەرێمێکی سەربەخۆی خۆی بووە و هیچ کاتیش لە رابردوودا، وەک دوای ۲٠٠۳ کورد ئەو هەموو سەرەوەت و سامان و پارە و ئازادی و هێزە چەکدارییە رەیعخۆرییەی بۆ فەراهەم نەبوو بێت و ئیمپراتۆرە عوسمانی و سەفەوییەکانیش، وەک بەغدا قەت ئەوەندە لاواز نەبوو بن. 
- بۆیە من تێداماوم و بەردەوام لە خۆم دەپرسم، بۆچی دەمڕاستی کورد لە باشوور بە حیزبە حکومڕان و لەشکرێک لە نووسەر و ئەفەندی لایەنگر و راوێژکاری بندیوار و ئۆپۆزیسیۆنی ساختە و...، نەک هەر نەیانتوانی ئەو خودە بوغزاوییەی کورد لە باشوور بەرانبەر بە خۆی وەرچەرخێنێت، تا بوونی کورد لەو نەریتە خێڵەکی و قەوموقیلەییە رزگار بکات و کۆمەڵگەیەکی خودسەرەوەر ساز بکات؟!

- ئێرە کەلکی ئەوەی نییە پەنا بۆ تیۆری و نموونەکانی کەتوار ببەم، بۆیە دەمەوێ بڵێم، ئەمەریکی و هاوپەیمانان بە هۆی شەڕی داعشەوە ئەو هەموو چەکە قوڕسەی بۆ شەڕی بەرەباب و کوردکوژی نەداوە بەو دوو حیزبە، بەڵکە بۆ کورد پاراستن لە دوژمنی دەرەکیی داوە بەو حیزبانە.

- بۆیە کوردگەلی زیندوو دەبێت لە خۆی و ئەو دوو حیزبە بپرسیت، ئێوە کە خاوەنی ئەو هەموو چەکە قوڕس و درۆن و هەمەر و ...، بۆچی جارێک بۆ فشەیش بێت، نەوێراون بە دژی ئەو هەموو کەڵەگاییەی تورکیا و ئێران نمایشییشی بکەن؟

- یان هەرنا بە دژی ئەو دەستدرێژییانەی حەشد و سووپای عێراق بەکاریان بهێنن کە ساڵانە دەیکەنە سەر جووتیارانی دەڤەری مەخموور و دیبگە و پەلکانە و غەوار و ...؟

- ئەو دوو حیزبە و کورد بە گشتی بەردەوام بەوە خۆیان هەڵدەکێشن، کە لێبووردە و تێرۆریست نییە و لەگەڵ دیل بەخشندە بووە، کەچی کۆی ئەوانەی کە بۆ بژێوی و نان پەیدا کردن بوونەتە چەکداری ئەو حیزبانە، مەگەر ئەو کەمینەیەی کە بە میرات خاوەن ئەخلاق بێت، ئەگینا بەرانبەر خەڵکی کورد و چەکداری حیزبە دژەکەیان، وەک ئەوەی لە لالەزار روویدا، چەتە و جەلادن، ئەمەیش خەسڵەتی ئەخلاقی بوغزاوی کۆیلە و چەکداری خود بوغزاوییە، کە بەرانبەر دوژمنی راستینە بەخشندەیە و بەرانبەر هاوخوێنیشی بە دڕەندەترین شێوە، بوغزە کەڵەکەبووەکەی خودی بەدژی خۆی هەڵدەڕێژێت.

- تەقینەوەی ئەو خودە بوغزاوییە ( لێمەگەڕێ با دیلێکیان یەکیان بکوژم) لە ساتەوەختی کارەستەکەی لالەزار، پەیوەندی بەو دۆخە رووکەشە ناناوەندییەی دەستەڵات هەبوو لەوێ، کە یەکێتی لە سەرەتاوە، وەک پارتی، پێکهاتەی حیزبەی ملکەچ نەبووە بۆ سەرۆکەکەی و بۆیە دۆخێک لە پەراوێزی ئازادی قسەکردن، ئەویش زیاتر بە هۆی دووبەرەکی لەگەڵ پارتی لەسەر هەولێر هەبوو، لێ رەنگە لەمە بەدواوە ئەو شلییەی سلێمانیش وەک هەولێر و دهۆکی لێ بێت.

- هەروا ئەگەر ئەو مەرکەزییەتە و پابەبەندبوونە بە سەرۆکی پارتی لە هەولێر و دهۆک نەبووایە، هەمان ململانێی ئاشکرا و دواجاریش رۆژێک لە رۆژان لە نێوان دووبەرەکی ناو پارتی یان دوو هێزی دیکەدا، هەمان هەژەند و هێدم لە هەولێر  روویدا بووایە یان رووبدات.
ئەو کوشت و بڕە دڕندانەییانەی کە زوو زوو بە هۆی کێشە کۆمەڵایەتییەکان و نێوان خێڵەکان لە کوردستان روو دەدەن، راستی ئەو خودە بوغزاوی خەڵک جەخت دەکەنەوە. 
من خۆم تووشی ئەو نامەدەنی و بوغزاوییەی چەکداران بوومە لە دەڤەری سۆران. 
- دواجار مرۆڤ کەمێک مێشکی لەو هەراوهۆریایە داگیرکارە و پایەبەندبوونە بە قەوموقیلەیەی، کە بە هۆی ئەو هەموو مێدیا و کەنالە ساختە و مشەخۆرانەوە، داگیرکراوە دوور بخاتەوە، دەزانێت کە هەرێمی کوردستان پێویستی بە شۆڕشێکی هزری و کولتووری و سیاسییەوە هەیە، بۆ ئەوەی سەرەتا ئەو خودە بوغزاوی بەرانبەر خۆی و ئازادی بوونەکەی هەڵبوەشێنێنتەوە و دووبارە سازی بکاتەوە. بەدەر لەوە، تا ئەو حیزبە ملیشیا بە دەست و ئۆپۆزیسیۆنە ساختە و ئەفەندییە بندیوار و گاڕان/مێگەلە لە نووسەرە پۆستخێڵە دەمڕاستی ئەو هەرێمە بن، ئەو خودە بوغزاوییەی کە دوژمنی سەرەکی خودی ئازادی بوونەکەی و کوردستانە، تا قەزاوقەدەرێک پێشنەیەت، هەمیشە بە دیار ئەو تاڵانکاری و قاتوقڕییەوە دۆشداوماو دەمێنینەوە.