ئەمیر عومەر
ھیچ شک و گومانی تێدا نیە، لەدوای کۆتاییھاتنی جەنگی دوانزە ڕۆژەی نێوان ئیسرائیل و ئێران، ھەتا دێت ناوچەی ڕۆژھەڵاتی ناوەڕاست بەرەو قۆناغێکی نوێ و مەترسیدارتری ناجێگیر مل دەنێت. زۆربەی ئاماژەکان پێمان دەڵێن وەستاندنی ئەم یەکتر گەوزاندنە تەنھا نەفەسدانێکە، لەگەڕی دووەمی گڕی زۆر گەورەتر و بێئامان لە ناوچەکە بەردەدەن. ئیسرائیل و یارمەتیدەرەکانی پێیان وایە دەرفەتێکی مێژووییان بۆ ھەڵکەوتووە، بە ھەر نرخێک بێت نابێت لە دەستی بدەن بۆ دامەزراندنی ڕۆژھەڵاتێکی ناوەڕاستی نوێ کە تێیدا ئیسرائیل ببێتە ھێزی باڵادەستی بێڕکابەر. بەڵام پرسیاری گرنگ ئەوەیە ئایا ئێران ڕێگە بە جێبەجێکردنی ئەم دیزاینە دەدات؟، ئایا ئەم دۆخە بۆ ئیسرائیل و ھاوپەیمانەکانی دەرفەتی مێژوویی دەبێت یان خەونێکی تاڵ و بە تاڵ؟. ئەم پرسیارەی کە وەڵامەکەی داھاتووی ناوچەکە دیاری دەکات، بە ھەوڵەکانی تارانەوە گرێدراوە بۆ پتەوکردنی پەیوەندییەکانی لەگەڵ وڵاتان، بە تایبەتی لەگەڵ ڕووسیا و چین، دیدارە بەردەوامەکانیان لەگەڵ ڤلادیمیر پووتن و سەرکردەکانی چین، ھەروەھا مامەڵەی کڕینی چەکی پێشکەوتوو، کە ھەموو ئەمانەش وەک تاکتیکێکی دژە ئەمریکی و ئیسرائیلی دەبینرێن. لەنێو ھەموو ئەو لێکدانەوە و شرۆڤانەی دەکرێن بۆ شکستی مێز و ئامادەیی ھێز، نوسەری کتێبی "ھاوپەیمانی بەرژەوەندییەکان"، ترینا پارسی، باس لەوە دەکات کە پێش کۆتایی ساڵی ٢٠٢٥ جەنگێکی گەورەتر لە جەنگی دوانزە ڕۆژی ڕوودەدات.

خوڵاسەی کەلام، باس لەوە دەکات بەردەوام ھۆکارەکانی جاڕدانی جەنگ چین لەسەر چین کەڵەکە دەبن و بە قەومانیشی زۆر گرووپی چەکداری تێدا دەگێلێت و ئاماژەی مەترسیداریشە بۆ تەقینەوەی گەورە و نادیاریی ئایندەی ناوچەکە. ئەگەر ھەواڵەکانی میدیاش کە بەشێکیان پەیام و لێدوانی بەرپرسانی باڵای ئیسرایلین و وەک سەرچاوە وەربگرین، دەبێت گومان بکەین کە لە گەڕی داھاتوودا تەلئەبیب مەیلی بۆ جەنگی ڕووبەڕووبوونەوەی ڕاستەوخۆیەو بە شەڕی بە وەکالەت ڕازی نییە، وەک ئەوەی نیازی ئیسرائیل ئەوە بێت لەدوای نیشتنەوەی تەپوتۆزی جەنگ بە جیھان بڵێ بە چەند ڕۆژێک ڕۆژھەڵاتێکی نوێ لەدایکبوو. زۆر پرسیار ھەیەو جارێ وەڵامیان نیە بەڵام با بپرسین ئایا ئەو ڕووداوە گەورانەی کە لە ڕێگادان و وەک باس دەکرێت بەروودانی نەک تەنھا ڕۆژھەڵاتی ناوەڕاست دەگۆڕن، بەڵکوو کاریگەری لەسەر جیھانیش درووست دەکەن، کەی ڕوودەدات؟. لە کۆتاییدا، زیادەڕۆیی نیە ئەگەر بڵێین ناوچەی ڕۆژھەڵاتی ناوەڕاست لە دۆخ و سەردەمێکی مەترسیدار و نا ئاسایدایە. ھەموو ئاماژەکان ئەوە پیشان دەدەن کە ئەم ئاسایشەی ئێستای جێگیر نیە و گۆڕانکارییەکی گەورە لە ڕێگادایە  کە نازانین بەرەو ئاشتی و سەقامگیری ھەنگاو دەنێت، یان ھێندەی تر قوڕەکە خەستتر دەکاتەوە و نان و ئەمان ناھێڵێت؟