ئەنوەر حسێن (بازگر)

ڕووداوە سیاسییە نێگەتیڤ و ئاڵۆزەكانی ناوخۆی كوردستان، وردە وردە دەرهاویشتە و كاریگەرییە نێگەتیڤەكانی بە ئاشكرا و بێ ماسك خۆیان نمایش دەكەن، بە ڕووی تاك، خانەوادە، شەقام، بازاڕ و مزگەوت، تەنانەت هەموو كون و قوژبنێكی ئەم وڵاتە.

نەبوونی ئیستقراری سیاسی و ئەمنی، نادڵنیایی هاوڵاتی لە ژیان و كەرامەتی، ململانێی سیاسی و حیزبی، نەبوونی بازاڕی كاری كرێكار، مەترسی سەرمایەی سەرمایەدار، لە دەستدانی ساڵی خوێندنی خوێندكار لە خوێندنگا، بێ دەربەستی مامۆستا بەرامبەر پەروەردە، پەروەردە بەرامبەر مامۆستا، پزیشك لە تەندروستی، مەلا لە مزگەوت، پێشمەرگە لە نیشتیمان، نەبوونی مووچە و خزمەتگوزارییەكان وەكو پێویست، فەسادی ماڵی و ئیداری، هات و هاواری میدیا و سۆسیال میدیای بێ پڕەنسیپ، سیاسی بێ دەربەست و لۆمپەن، ڕێزنەگرتن لە یاسا – عەدالەت و بێ دەربەستی. هەموو ئەوانە بەردەوام پێشبینی ئەگەری ڕووداوی نەخوزرا و مەترسیدار دەخوڵقێنێت.

جیا لە قەیران و كێشە و گرفتە سیاسی و عەسكەرییەكانی ناوچەكە كە كاریگەری لەسەر هەر تاكێكی كورد لە زاخۆتا عەربەت هەیە. هەرچەندە من ئابووریناس نیم، بەڵام دەزانم بارودۆخی دارایی باش فاكتێكی بەهێزی ئاسوودەیی كۆمەڵگا و تاكەكانیەتی و ڕێگرە لە دیاردەی ناشاز و ناشەرعی و فەوزا.

گەمارۆدانی ئەو هەموو مەترسیانە لە ملی تاكی كورد، تا دێت كاریگەری نێگەتیڤی كۆمەڵایەتی، شەخسی و ژیانی ڕووحی لەسەر تاك بە تاكی كوردستان دروستدەكات و تا دێت خەونەكانی دەبنە سەراب و ئامانجەكانی ڕۆدەچنە خاكی بێ هیواییەوە، كاتێكیش ئینسان خەون و ئارمان و ئامانجەكانی لەدەستدا، بەهاكانی دەخرێنە ژێر پێوە، هەندێكجار دەبێتە جەلاد و دڕندە یان فەوزاگەر.

ئەو هەموو كوشتنانەی ڕۆژانە بە ئاشكرا لە كوچە و كۆڵانەكانی شار و شارۆچكەكانی كوردستان ڕوودەدات، بێ بەهابوونی ژیانە، ئەو هەموو كوشتنانەی شەوانە بە نهێنی ڕوودەدەن، نەمانی ترسە لە سزا و دادگا و جۆرێكە لە عەبەسیەت.

 ئەو هەموو بازرگانیە ناشەرعینانەی (ماددەی هۆشبەر، حەب و دەرمان، چەك، فرۆشتنی جەستەی مرۆڤ، دیاردەی لەشفرۆشی، دیاردەی مەترسیداری كچانی بەناو مۆدێلی بێ قەیدومەرج وفركە فركی ئۆتۆمبێلی بێ ژمارە و دزراو بێ پڕەنسیپ لەسەر شەقامەكان، كۆنتڕۆڵی شۆستەی سەر شەقامەكان لەلایەن تیكتۆك و عەرەبانچیەكەوە و بڵاوبوونەوەی فەساد، بێ مۆراڵی) دەرهاویشتەی ئەم بارودۆخە سیاسییەیە؟

هەڵتۆقینی هەزاران دەوڵەمەندی ناشەرعی بەناو بسنزمان و سەرمایەدار، قۆڵبڕین و ڕووتانەوەی خەڵكی بەناوی پڕۆژەی گەشتیاری، باڵەخانەی نیشتەجێ بوون، نەك هەر ڕێكخراو نییە، فۆڕمی چاولێكەری وای دروستكردوە، هەموو كەس دەیەوێت بازرگان و دەوڵەمەند بێت، پارەی پێ بێت بە شەرعی یان ناشەرعی...؟ كە دەرئەنجام ڕێگای ناشەرعی كۆمەڵگا بەرەو داڕمان دەبات.

با بپرسین گەر گەنجێك، لەناو كۆمەڵگەیەكی ڕێكخراودا بژی و مافەكانی زامن بكرێت و بارودۆخی دارایی باش بێت، چ پێویستی بەوەیە هەموو موجازەفەیەك بە ژیانیەوە بكات و خووبداتە (بازرگانی ناشەرعی، خواردنی ماددەی بێ هۆشكەر و بازرگانیكردن بە دیاردەی چەكداری).

یان دروستكردنی داهۆڵگەلێك لەناو ئەم بێ نەزمەیەی هەیە، بەناوی سەرمایەدار و بازرگانی ناشەرعی، بە ئامانجی پارە كۆكردنەوە بۆ خۆیی و شەریكە نەناسراوەكانی، نازانیت چی دەبێت؟ بەڵام بەدڵنیاییەوە كۆمەڵگە دەشێوێت، متمانە ناهێڵێ و زەرەری گەورە لە سەرمایەداری شەریف و شەرعییەكانیش دەدات.

هەڵكێشانی كێرڤی ڕێژەی تەڵاق و جیابوونەوەی هاوسەرەكان لە كوردستان و عێراق بەشێوەیەكی دەرچوون لە ستاندار هۆكارەكەی چییە؟ جیا لە تێكچوونی شیرازەی خانەوادەكان، كۆمەڵگەش دەشێوێت، بێ مۆڕاڵی شوێنی مۆڕاڵ دەگرێتەوە، ناپابەندی لە شوێنی ئیلتیزامی كۆمەڵایەتی خۆی نمایش دەكات، پابەندی ئەخلاقی، یاسایی، عورف و عادات نامێنێت، ئەم دیاردانە كە دەبوو حكومەت لەسەری بوەستێت، زۆر مەترسیدارن، زۆر بۆی گرنگ نییە، بێ ئەوەی بزانێ هەموو ئەو دیاردە ناشاز و ناشەرعیانە سەردەكێشێت بۆ (كوشتن و جەرایم، پشێویی، ژینگەی ناتەندروست، بازرگانی ناشەرعی، گیرۆدەبوونی خۆی و خوڵقاندنی فەوزا).

جیا لەوانە دەبێ بزانین ئاسایش و دەزگاكان بەتەنها دەرەقەت نایەن، دەرەقەتی ئەو هەموو دیاردە ناشەرعی و بەرەڵڵاییە نایات، با خەڵكانی باشیشی تێدابێت، چونكە هێزی ئینسانی كەمە، كارمەندی نوێ تەعین نابێ، پارە و ئیمكانیەتی پێویست نییە، دەخالەتی حیزب و نابەرپرس، دەخالەتی هێزگەلی پڕ لە جاسوسی و وڵاتانی دراوسێ، هێجگار سەختە بۆ ڕووبەڕووبوونەوە.
پەندێكی كوردی هەیە دەڵێ:"كاسەی پڕ ئاشتی ماڵە" بێگومان كاسەكە نەك پڕ نییە، خەریكە خاڵی دەبێت. سەبریش خەریكە دەپچڕێت، بۆیە هێشتا درەنگ نەبوە، بۆ نیەتی باش و كاری باش و ڕەفتاری باش...!، دوور لە درۆ و چەواشەكاری و هەڵخەڵەتاندن.