هیوا موحه‌مه‌د که‌ریم

دوای بیستنی هەواڵی پەسەندکردنی بودجە، بۆ پارێزگاکانی هەرێم و دانانی بڕی لەسەدا دوو بۆ پارێزگای هەڵەبجە، خەڵکی هەڵەبجە هەموو تووشی شۆک بوون، کەبڕێکی هێندە کەم بۆ ئەو شارە پەسەندکراوە، کەسەلمێنەری ئەوەیە کەدەستەڵات بەئەنقەست ئەو شارەی پشتگوێ خستەوە، بۆیە ئەم بڕیارە ناڕەزایییەکی گەورەی دروستکرد لای خەڵکی هەڵەبجەو زۆر نیگەڕان و توڕەن، لەوەها بڕیارێک کەدەرچووە، لەلایەن کەسانێکەوە، کە لەیادی هەڵەبجەدا هەست و دڵسۆزیی خۆیان بۆ ئەو شارە دەردەبڕن بەهەزارو دوو هەزار پەیمان و بەڵێن بەخەڵکی هەڵەبجە دەدەن، بەڵام کە دێتەسەر کردار، رێکوپێک پێچەوانەی پێشویان کردار دەکەن، پەسەندکردن و دانانی لەسەدا دووی بودجە کەدەکاتە (35) دەفتەر  دۆلار، بۆ ئەو شارە، خەڵکی بەگشتی  بەتەواوەتی قەناعەت پێکرد کەدەستەڵات  نایەوێ هەڵەبجە ببوژێتەوە، ئەو بڕە کەمەی کەدانراوە بۆ ئەو شارە بەشی شوقەی ماڵە بەرپرسێکی هەژار دەکاو ناکات!!

بۆیە جێگەی خۆیەتی بڵێین، ئەگەر بەشە بودجە، بەشە کیمیایی و گازی خەردەل بوایە، ئایا حکومەتی هەرێم لەسەدا دووی بۆ هەڵەبجە دەنارد؟؟ یان لەسەدا سەد، هەروەک چۆن رژێمی سەدام لەسەدا سەد کیمیایی و گازی خەردەلی بۆ نارد!!

شاری هەڵەبجە لەهەموو کۆستێکدا که بەر کورد کەوتووە، بەدرێژایی مێژوو لەسەدا سەدی بۆ ئەو بووە، لەکیمیایی و ماڵ رووخان و ئاوارەبوون و تۆپباران و هەزاران دەردەسەری و قوربانیدانی تر، خێرە ئێستا ئەو شارە لەبیرکراوەو بەبڕێک بودجە رایی دەکرێت، لەکاتێکدا بەپێی قوربانیدان و خوێن بوایە، دەبوایە لەئێستاداو تاسەد ساڵی تر هەڵەبجە حسابێکی جیاوازتری بۆ بکرایە، بەڵام نەک حسابی جیاوازی بۆ نەکراوە، بەڵکو مافی خۆشی خوراوەو دەخورێت!!  ئەمە کێ لێی بەرپرسە؟  سەدام؟ مالیکی حەیدەر عەبادی؟ نەخێر ئەو کوردانە لێی بەرپرسن، رۆڵەی ئەم خاک و ئاوەن!!

زۆرجار دەبینی بنەماڵەیەک، یان حزبێک، یان چەند کەسانێکی بەرپرس، لەسەروەت و سامانی ئەم نەتەوەیەدا تەخشان و پەخشانیانە، کاتێک دەڵێن ئەمە بۆ وادەکەن؟ ئەوانیش دەڵێن ئێمە خوێن و قوربانیمان داوە!!

بۆ ئەی ئایا هەڵەبجە، ئاویان داوە؟ دەربەدەر نەبوون؟ هەموو خانووەکانیان نەڕوەخا؟ ماڵەکانیان نەسووتا؟ هەموو بەجارێ ئاوارەی ئێران و شارەکانی تر نەبوون، چەندین ساڵ لەماڵ و جێگەی خۆیان هەڵنەکەنران؟ مەگەر ئەوانیش خوێن و قوربانییان نەداوە؟؟

بەپێی خوێن و قوربانیش بێت بۆ ئەو شارە، لەناو هەموو شارەکانی تردا دەبوایە، تایبەتمەندی هەبوایە، نەک بەشخوراویش بکرێ، بەڵام  ئەمە بەکێ دەڵێی؟؟