ئیبراهیم گه‌له‌ژێرى-چۆمان

کاتێک دکتۆرەکانی پسپۆری جۆراوجۆر لەسەر شاشەکانی تیڤی هەموو خورافیەتیەکانی مەلا عەلی-یان رەتدەکردەوە، لیژنەی فتوای هەرێم رۆژێک هەڵنسا بێت و ئەو کارەی مەلا عەلی حەرام و شوبهاندن بەتەڵەکەبازی وێنای بکات، لەو سۆنگەیەوە بوو بەشێک لەهاووڵاتیانی هەرێم چووبوونە ژێر ئەو بڕوایەی، کەئەوقاف و لیژنەی فتوا ئەو کارانە ناخاتە چوارچێوەی کارە حەرامەکان، کەواتە خۆی دانپیانانێکە بۆ کارەکانی مەلا عەلی, بەشێک لەهاووڵاتیانی هەرێم لەماوەی (15) ساڵی رابردوودا لەنێو گێژاوی رووداوەکانی هەرێمدا, لەنەبوونی باشترین سیستەم بۆ تەندروستی و لێنەپێچینەوە لەو کارانەی کە مەلا عەلی و هاوشێوەکانی دەیانکرد تووشی دڵەڕاوکێ و پەنابردن بۆ چارەسەرێک چووبوون، بەهاکانی زانستی دەخستە ژێر ئەو پرسیارەی چۆن دەکرێ نەخۆشییە مەحاڵەکان لە روانگەی فەنتازیاوە چارەسەر وەربگرن.

وەزارەتی تەندروستی بەدرێژایی چوار کابینە هیچ وەزیرێک نەیتوانی ئەو مەلایە لەوشەی چارەسەری شێرپەنجەو نەخۆشیەکانی تر چارەسەردەکەم، قەدەغە بکات، ئەمەش بەدیوێکدا پرسیارێکی بێ وەڵامی دروستکرد، کەهۆکاری ئەو هەموو رەواجیدانە بەکارەکانی مەلا عەلی لەپای چی، رەنگە وەک هەر دەستوەردانێکی تر لەبەرژەوەندی حزبێک یاخود کەسێک و لەپاڵ کپبوونی داواکاری گشتی هەرێم مەودای ئەو پیاوەی لەکارکردن بردە لوتکەی جەنجاڵی لەکارەکانی، گروپە  رادیکاڵە ئایینیەکانیش نەیانتوانی ئەو پیاوە لەکارەکانی رابگرن، چ جای ئەو میانڕەوانەی، لەحکومەت و پەرلەماندا بەدریژایی هەبوونی ئەو پیاوە داڕێژەری چەندەها یاساو بڕیاری سیاسی وڵات بوونە.

کاتێ لەسعودیە دەنگوباسی دەستگیرکردنی بۆتە بابەتی رۆژەڤ، پێویستییەکی گرنگە تیبگەین، لەناوەندێکی مەزن و هەڵقوڵاوی بڵاوکردنەوەی بانگەوازی ئیسلام  ئەو کارە بەسحرو کاری دەجالی وێنابکرێت، ئەبێت لەهەرێمی کوردستان و ئەوقاف و لیژنەی فتوا روونکردنەوە بدەنە خەڵک، کارکردنی ئەو پیاوە لەژێر یاساو دەقە پیرۆزەکان چۆن رێگەی پێدراوە.

دەبێت ئەو پیاوە بەهاووڵاتی هەرێمی کوردستان بناسێندرێ و ناکرێ فەرمانگەی پەیوەندییەکانی دەرەوەی هەرێم خۆی بێدەنگ بکات، دەبێت وەک هەر هاووڵاتیەکی هەرێم کارێکی سەرپێچی یاسای کردووە دەبێت لەچوارچێوەی یاساکانی عێراق و هەرێمی کوردستان بخرێتە بەردەم دادگاکانی هەرێم، چونکە دواجار مرۆڤەکان هەڵەدەکەن و هەر مرۆڤیش پەشیمان دەبێتەوە.