دڵشاد تاڵەبانی

گەر ئەم بارە بەردەوام بێت و بەخێرایی چارەسەر نەکرێت، هەرێم و کورد چارەنووسی دەکەوێتە مەترسی و نادیار دەبێت. هەرێم کە تاچەند ساڵ پێشتر نیمچە دەوڵەت بوو، دەرئەنجامی چەند سیاسەتی هەڵە (دەرهینانی نەوت کە نەک ئابوری سەربەخۆی نەهێنا، بەڵکو وابەستەیی تەواو بەبەغداو لە ژێر رەحمەتی ئەنکەرە-ریفراندۆمی ماڵویرانی-رێکنەکەوتن لەگەڵ بەغداو نەتوانینی دانی موچەو بەردەوامبوونی گەندەڵی و ئەوپەڕی نارەزایی خەڵک، لەئەنجامی ئەوانە دەستتێوەردانی نەوەک هەر بەغدا، بەڵکو وڵاتە ئیقلیمیەکان هەموو شتی خستووەتە مەترسییەوە. پلانی گەورە هەیە بۆ لەناوبردنی ئەو ئەزمونەی لەکاتی راپەڕین دروستبوو. خەمساردو بێمنەت بوون لەخەڵک، هێڵاتان کێشە و هەموو مەبەستەکان کەڵەکە بکەن و چارەسەر نەکران، بەرژەوەندی لایەن و کەسایەتی خرایە زۆر سەرووی بەرژەوەندی کوردەوە. هەموو مەبەستەکان پەنگیان خواردەوە، وای لێهات. وا هەندێک لایەنی عێراقی (گەر راستەوخۆ لوتکەی حکومەتیش نەبیت) بەپشتگیری و پاڵپشتی لایەنی دەرەکی چەکداری کورد بەناوی حەشدو ناوی ترەوە دادەمەزرێنن، کە سەرەتا رەنگە لەبەر نەبوونی و ناڕەزایی خەڵک رووی تیبکات و هێزێکی کەم بن، بەڵام لە ماوەی کورتدا قەوارەی گەورە دەبێت و نەوەک هەر ناوچەیەکی کەرکوک دەگرێتەوە، بەڵکو دەگاتە خانەقی، جەلەولا، قەرەتەپە، کفری و دوزو بەرەو سنوری هەولێرو سەنجارو ناوچەکانی تریش لەگەرمیان، بەشێک لەجاشە کۆنەکانیش سەریان بۆ ئەوە دەخورێت (کەوەک خەفیفە دەبێت). ئەوکاتە حکومەتی بەغدا هیزی سوپای عەرەبی ناوێت، بەلکو گەر گرفت دروستبوو یان هەر شتێکی بەدڵ نەبوو کورد بەکورد لەگەڵ فشاری ئابوری بەکاردیت. هەموو کەس لەمانە دەگات و نامەوێت بڕۆمە قوڵایی مەبەستەکان، دەرئەنجامەکەشی نەوەک زەرەری هەموو کوردە، بەڵکو ئێوەش رەنگە زەرەرمەندی یەکەم بن. کەخەڵک مەئیوس بوو روودەکاتە شوێنی تر، ئەوەش لەناو کورد تازە نیە!.

بەکورتی. گەر زۆر زوو فریانەکەون: جەماوەر ئاشت نەکەنەوە، بەهەموو کارو کردارو هەموو شتەکاندا بەبنەڕەتی نەڕۆنەوە. واز لەهەڕەشە نەهێنن لەجیاتی هەوڵی چارەسەرو هەقدان بەخەڵک لەناڕەزاییان. کار لەکار دەترازێت و باری کوردستان هەموو بەئاقارێکی تردا دەڕوات و مەترسی جیدی لەسەر هەموو ئەزمونەکە دروستدەبێت. با هەندێک هەموو لەخۆیان ببورن، هەریەکە لای خۆیەوە واز لەگەندەڵی بهێنێت، لایەنەکان و حکومەت بە راستی نەوەک تەنها بڕیاری کەکاری پێنەکرێت، بەرەنگاری گەندەڵی بێتەوە. راستی ئەو رێکەوتنە لەگەڵ کۆمپانیا نەوتەکان و تورکیا زۆر بەڕوونی و ئاشکرا بخرێتەڕوو، گەر وانیە کە هەریەکەی بەشێوەیەک باسی دەکات و تەفسیری دەکات (کە من بۆ خۆم لەهیچ نەگەیشتووم) خەڵکیش هیچی لێ نازانێت. گەر هەرزانفرۆش نەکراوە، گەر خەرجیەکان وا نین،  گەر بۆری نەفرۆشراوەو جارێکی تر بەگران بەکرێ نەگیراوە، گەر لەخاڵە سنورییەکان دەسەڵاتداران بەناشەرعی و بێ گومرگ شت داخڵ ناکەن، گەر چەند کۆمپانیا یان کوڕی بەرپرس کۆنترۆڵی هەناردەو هاوردە ناکەن. بەبەڵگەوە بیخەنە بەردەم جەماوەرو ئەوانە بدەنە دادگا کە بەنادروست ئەوانە دەڵێن و دەنووسن. گەر واشە ئەوانە سزا بدەن کەئەوانەیان کردووە. ئەوەی بەغدا داوای دەکات: (٢٥٠) هەزار بەرمیل نەوت تەسلیم بکەن (نەوەک داهات کە زۆری بۆ خەرج رۆیشتبێت و ئەوان قەت قەبولی ناکەن) لەگەڵ نیوەی داهاتە گومرگییەکان. گەر ئەوان رازی نەبوون و نەیانکرد، با هەموو کورد ئەوکاتە بزانێت بە راستی لەبەغداوە غەدر لەکوردو هەرێم دەکرێت. بەڵام تا ئەو کاتەی ئەوانە بەبەڵگەوە نەکرێت ئەوان پاساویان دەبێت. مەڵێن ئێمە ئامادەین، بەڵام ئەوان نایەنە پێشەوە، بڵێن ئێمە ئەو بڕە نەوتەمان داوە رازیین و ئیعلانی بکەن کە ئەوان رازی نەبوون ئەوکات هەموو دەزانن خەتای ئەوانەو بەدڵنیاییەوە رووی توڕەبوون و نارەزایی جەماور بەرەو ئەوان دەڕوات، پلانی هێزە ئیقلیمیەکانیش بۆ کەرتکردنی شەقامی کوردی سەرنەکەوتوو دەبێت.

ئەو دامەزراندنەی فەوجی حەشد لەکورکوک رەنگە سەرەتا مەترسی نەبێت و بەئاسایی تەماشا بکرێت، بەڵام دەرئەنجامی زۆر مەترسیدار دەبێت، هەر ئەوەندە دوو فەوج دروستبوو، مەبەستەکە تەشەنە دەکات و دەگاتە ناوچەکانی هەرێمیش ، لە برسێتی، رق یان هۆی تر.

من وەک کوردێک کەزۆر خەمی ئەم بارە دەخۆم. زۆرم لا ناخۆشە کەدەیان ساڵ خەباتمان کرد، نزدیکیش بووینەوە، بەڵام لەم کاتە وای لێبێت و میللەتەکەم سەرلەنوێ تووشی ئازارو مەینەتی بێت.

ئەوە باش بزانن ئێمە هێشتا هیچمان نیە، هەوڵی دەسەڵات، قۆرغکردن... هەر هەوڵێکی تر بەهیج دەچێت.. چونکە هەر ناوەیە. لەبەرئەوە داهاتوو هێشتا نادیارە. پاپۆڕەکەش غەرق بێت، دەسەڵاتداران و دەوڵەمەندەکان زیاتر زەرەر دەکەن، لەبەرئەوەی هەژارەکان راهاتوون . بۆیە تکایە زۆر بەخێرایی بیرێک لەوانە بکەنەوە. کە سەدان کەسی تریش بە راستەوخۆ و ناراستەوخۆ هۆشداری بەئیوە داوە. ئەم رۆژەش بۆ من تاڵە کەباوکم کۆچی دوایی کرد، بەڵام پاش زیاتر لە (١٤) ساڵ توانیم گۆڕی ببینم لەکەرکوک.

ئومێدەوارم کار لەکار نەترازێت و ئەم سەری ساڵە خۆشی بۆ میللەتەکەمان بهێنێت، نەوەک مەینەتی زیاترو نادیاری داهاتوو