دەسەڵات لە نێوان پرسیار و وەڵامدا!

4 ساڵ لەمەوپێش

ئارێز عه‌بدوڵڵا

هەر جارێک، کە بەندە رەخنە لەسەر دیاردە، کەموکوڕی یان خەوشێکی دەسەڵات دەنوسێ چەند کەسێک بە توانجەوە لێم ئەپرسن:
- ئایا تۆ یەکێتی نیت و یەکێتیش لە دەسەڵات نییە؟
- ئایا ئێوەش بەرپرسیارنین لە پێکهێنانی ئەو سیستەمە سەقەتە و ئەو شێوە بەڕێوەبردنە؟
ئەوانەی ئەو پرسیارانە دەکەن یان ئەو توانجانە داوێن دوو بەشن، بەشێکیان سەر بەدەسەڵات و بەشەکەی تریان لە دەرەوەی دەسەڵاتن. پرسیار و توانجی ئەو کەسانەی دەرەوەی دەسەڵات بە ئاسایی وەردەگرم، بەڵام هی ئەوانەی پابەندی دەسەڵاتن ئاسایی نییە، چونکە ئەوانە دەیانەوێ بڵێن هەموومان وەکو یەکین، بەم شێوەیەش ئۆباڵی سەرشانی لایەنەکەی خۆیان سوکتر دەکەن.
بەڵێ، یەکێتی لە دەسەڵاتە و لە چاکە و خراپەی ئەو وڵاتەش بەرپرسیارە، بەڵام ڕاددەی بەرپرسیاریەتیەکەی لە دوای جیابونەوەی گۆڕان و تێکچوونی ناهاوسەنگی زۆر جیاوازە لە راددەی بەرپرسیایێتی پارتی. لە لایەکی دیکەوە، باس لە هاوپەیمانیێتی و هاوبەشی یەکێتی و پارتی و گۆڕان دەکرێ. ئەوەش ئاساییە، بەڵام خۆ هاوپەیمانیێتی و هاوبەشی لە حکومەت مانای سڕینەوەی ڕەنگ و جیاوازیەکان نییە، بەڵکو هاوپەیمانیەتیەکە بۆ مەسەلە سەرەکیەکانی بەڕێوەبردنی وڵاتە، نەک درێژەدان بە سیستمێکی باوی ماوە بەسەرچوو. واتە لەو کاتەیدا بەیەکەوە کار دەکەین پێویستە ململانێکی ئاشتیانەشمان هەبێ، ئەویش بە پێشکەشکردنی پڕۆژە و بۆچوونی جیاواز.
بەڵێ، من لە ناو یەکێتی و یەکێتیش لە دەسەڵاتە. ئایا ئەوە پاساوێکی ڕەواییە کە یەکێتیەکان بەو هۆکارەوە بۆ چاک و خراپی ئەم وڵاتە دەست لەسەر سنگ بن؟
بێگومان، نا، چونکە ڕاستی و دروستی ئەوەیە کە لە کوێ هەڵە بکرێ پەنجەی بۆ درێژ بکرێ، لە کوێ گەندەڵی هەبێ بەگژداچوونەوەش هەبێ، لە کوێ نادادپەروەری هەبێ بەرپەچدانەوەشی هەبێ....
ئەوانەی ئەو جۆرە پرسیارانەی سەرەوە دەکەن، منیش لەوان دەپرسمەوە:
- ئایا بونی هەر حزبێک لەناو دەسەڵات پاساوێکی ڕەوایە بۆ ئەوەی هەموو ئەندام و لایەنگرانی ئەو حزبە رەش و سپی لە یەکتری جیا نەکەنەوە؟
- ئایا ئەو سیستەمە حوکمڕانییە پێویستی بە چاکسازیەکی بنەڕەتی نییە؟
- ئایا لە ساییەی ئەو دەسەڵاتە هەڵی یەکسان و دادپەروەری و سەروەری یاسا پایەدارن؟
هەندیجار دەبینم گەنجێکی خێر لە خۆ نەدیوی پارتی بەو پەڕی توندیەوە رەخنەم لێ دەگرێ و تومەتیشم بۆ دروست دەکا، وەکو ئەوەی من بەرپرسیاربم لەو نەهامەتییەی ئەو تیایدا دەژی!
هەندێ لە هەڤاڵانی خۆشمان سەرزەنشتم دەکەن و دەڵێن ئەگەر تۆ وابڵێی ئەی خەڵکی تر چی!
بەدڵنیاییەوە دەسەڵات لە نێوان ئەو پرسیار و وەڵامانە پێویستی بە گۆڕانکاری و ڕاستەڕێکردنی حوکمڕانیەکی چاکە لە پێناوی تەواوی خەڵکی کوردستان، بەلایەنگرانی پارتی، یەکێتی، گۆڕان و هەموو حزبەکانی ترەوە. دیارە ئەوەش بەبێ سەربەخۆ بیرکردنەوە و رۆڵبینینی تاکەکان کارێکی مەحاڵ دەبێ.