کوێخا لەگەڵ هەڵۆکەی چەمچەماڵ

2 هەفتە لەمەوپێش



عەبدولڕەزاق شەریف

هەموو بونەوەرێک بە خۆڕسکی بە شوێن نوای ئارام و ئەمیندا، بۆ ژیان ئەگەڕێ . پێویستی خۆپاراستن و مانەوە، لە پێش پێداویستی خواردن و ( گوزەران خۆشی ) یە، مرۆڤ جیاواز لە گیاندارانیتر، پاراستنی ( شکۆ و کەرامەت )ی بە ژیان و مانەوە و گشت غەریزەکانیەوە پەیوەستە، بۆیە لەو پێناوەدا، هەمیشە ئامادەیە سنورەکانی ئایدۆلۆجیا و نەتەوە و حیزب و خێڵ و خێزان ببەزێنێت . گەر لێکۆڵینەوە لەسەر رەگ و ریشە و هۆکارەکانی هەڵگەڕانەوە و دیاردەی جاشایەتی لە مێژوی کوردا بکرێت، ئەبێ تێزی ( ئەمان + پاراستنی شکۆ ) نادیدە نەگیرێ .

بارزانی لە وەڵامی سیویەکی ئابدا، ئەڵێت ( چاڵمان بۆ هەڵکەنرابو مابو بمانخەنە ناوی )، ئەم قسەیە بۆ هەمو ئەوانیتریش راستە . وازهێنان لە حیزب و پەنا بردن بۆ حیزبێکیتر، ئەوەی پێی ئەڵێن ( سەنگەر گواستنەوە )، لەگەڵ مێژوی دروستبونی حیزب و رێکخراوی سیاسیدا، هەبوە و رویداوە، لە ناو کورد، بۆ هۆکار بگەڕێین نمونەکانی گۆڕانکاری بنەڕەتی لە دید و ئایدا و بیروڕا زۆر کەمتر بوە، بەڵکو بە هەمان ئەو میتۆد و پاڵنەرانەی لە سەرەتا بۆ ئەمان و مانەوە باسمانکرد رویانداوە و روئەدەن . دەیان پێشمەرگە وکادر و سەرکردەی باش و نمونەیی( ی ن ک ) لە ئانوساتی شکاندنی کەرامەتدا، سەنگەری بۆ لای ( پ د ک ) یان حیزبێکیتر ئەگۆڕی، بە پێچەوانەشەوە رویئەدا، بەڵام هەمیشە سەنگەرگۆڕەکە بە خۆفرۆشی و ویژدان فرۆشی لای هەوادارانی حیزبی دایکەوە تۆمەتبار کراوە و رای گشتی لە دژی هاندراوە، کە لەراستیدا، زۆرجار ئەو کەسە جگە لە پارێزگاری و گەڕانەوەی شکۆ و کەرامەتی خۆی بۆ هیچ مەبەستێکیتر ئەو کارەی نەکردوە . چەمکی تۆڵە کردنەوە لە قابیل و هابیلەوە بۆ ئەمڕۆ لە ویژدانی مرۆڤدا، کارئەکات .

کار و کاردانەوەی سیاسی کە بە تاکتیک و ستراتیج بۆ گەیشتن بە ئامانجێکی دیاریکراو وەسفدەکرێ، لە ناوەرۆکدا، هەڵگری هەست و خواستی تۆڵەکردنەوەیە، هەر ئەمەش هەمو جەنگ و وێرانکاریەکانی ئەم تۆپی زەویەی بەدوای خۆیدا هێناوە ، گیانی تۆڵەکردنەوەش پەیوەستی توانا و شکۆ و ئیرادەیە، کە دۆڕا و براوەی پێ پێناسە ئەکرێت . سەبارەت بە دوێنێ و ئەمڕۆی عەبدوڵای کوێخا موبارەک و هەمو ئەوانەی پێشتر و ئەوانەشی ئایندە روئەدەن لێکۆڵینەوە و تێگەیشتنی دروست پێویستە . ئەو لای من هەر کوێخای ماڵ و دیوەخانەکەی چەمچەماڵە، هەر وەک چۆن هەڵۆ چەمچەماڵی تا مەرگی لای من هەر هەڵۆ بو ..!! ( گۆڕان و عەبدوڵای کوێخا موبارەک ) ئەو رۆژەی هەردو سەید ( عومەر و مستەفا )، بۆ تەبلیغی تەسلیمکردن و هەڵوەشاندنەوەی میدیای گۆڕان بانگیانکردم پێم وتن : گۆڕانکاری پۆست و پلە ئاساییە، ئەوەی ئاسایی نیە ئەم شێوازی شکاندنی شکۆ و کەرامەتە ( فێڵ و تەڵەکە )یەی ئێوەیە، کە لە ناو یەکێتی و لە شاخەوە فێری بون و پیادەی ئەکەن، بەوەش سەدان پیاوی تێکۆشەری ئەم شارەتان قاودا و ناچارتان بە تەسلیمبون و جاشایەتی کرد ، سەدان خێزانتان وەک خائین خستە مێژوی کوردەوە، لە گۆڕانیشدا دەیان کادر و سەرکردەی باشی هاوڕێمان بەهەمان دەرد ڕاونرا، رومکردە مستەفا و وتم تۆ سەرۆکی تیمی حکومەتی بزوتنەوەکە بویت پێم بڵێ رێباز حەملان خائین یان دز بو ؟ راستەوخۆ وتی نەخێر لە کوڕە باشەکانی ئێمە بو ! - گەر ئەتانەوێ منیش وەک ئەو لێبکەن، دڵنیابن ناتوانن و نایبینن .

ئەو قسەیەمکرد و میدیای بزوتنەوەکەم وەک ئەوەی ئەوان ویستیان بە زویری جێهێشت، ئەوەندە بێ نەزاکەت بون هەمو داوای من لە پاداشتی سێ ساڵ کارکردن سوپاسنامەیەک بو، نەیانکرد . عەبدوڵا ستونێکی پتەوی بزوتنەوەی گۆڕان بو، وەک زۆریتر کە کشانەوە یان دەرپەڕێنران، ئەویش رەخنەی جدی لە دەسەڵاتی کوڕەکانی کاک نەوشیروان و تەوریسی سیاسی و گواستنەوەی موڵکوماڵی بزوتنەوەکە بو بۆ سەر وەرەسەکانی رێکخەری پێشو . ئێستا بزوتنەوەی گۆڕان و هەوادارەکانیان، وەک هەنگی کلۆرە داریان دۆزیبێتەوە، ئەمڕۆی هەواڵی پارتی بونی ( عەبدوڵا ) یان کردوە بە سەرکەوتنێکی گەورە و بەهۆیەوە بەرەی نارازی دەسەڵاتدارانی هەرێم و هەمو ئەو کەسانەی پێ جنێو باران ئەکەن کە لە بزوتنەوەکەیان دورکەوتنەوە و بە پۆست و پوڵ فریویان نەخوارد .

هەڵوێستەکەی کوێخا هی رەخنە و گلەیی و تەنانەت توڕەبونی هاوڕێکانیشیەتی، بەڵام هەرگیز بزوتنەوەی گۆڕان و شڕە ماکینەی جنێوەکانیان بۆیان نیە توخنی تخوبی کوێخا و خەڵکی نارازیتر بکەون، چونکە : - لە مێژە بە ئاشکرا دەستی لە هەمو کارێکی ( ب گ ) کشاندۆتەوە، بە دوایدا ئازادە لە هەر حیزبێکیتر درێژە بە کاری سیاسی بدات . - پەنای بۆ دوژمن و کاری گەندەڵی و دوژمنکارانە بەرامبەر هاوڕێکانی خۆی و میلەتەکەی نەبردوە . - ئەوەی بۆ تەسلیمبونی ئیرادە بە پارتی رچەی شکاند ئەم سەرکردانەی گۆڕان بون نەک کوێخاکەی چەمچەماڵ ( گەر ئەڵێن بۆ چاکسازی و ئاشتی کۆمەڵایەتی یان بۆ مانەوە وامانکرد ! ئەو قسەیە بۆ کوێخاش هەر راستە ) . - ئێستا ( ب گ و پارتی و یەکێتی )، هاوشێوەی یەکتری، سێ حیزبی سێ بنەماڵەی سێ سەرکردەی سیاسی مێژوی کوردایەتین و لە ستراکچەردا، جیاوازیەکی ئەوتۆیان نیە، گەر بە نۆرم و بەها و پێگەی بنەماڵەیی بێت و لەڕوی مێژویی و کۆمەڵایەتیەوە بەراوردیان بکەین ، بارزانیەکان لە دوانەکەیتر رەسەنتر و باشترن ، حیزبەکەشیان گەورەتر و مەحکەمتر و دەسەڵاتدارترە . - ب گ ، بەتەسلیمکردنی ئیرادەی نزیکەی نیو ملیۆن دەنگدەر و کوشتنی هیوای هەمو خەڵکی کوردستان تاوانبارە . - ب گ ، دوای مەرگ زیانی بە فکر و مێژوی نەوشیروان مستەفا گەیاند، هەمو کەسێکی بەئاگا دەزانێت پێناسەی پێش مەرگ و دوای مەرگی ئەو پیاوە، بەهۆی کاروکردەوەکانی هاوڕێکانیەوە دو پێناسەی تەواو جیاوازە . لەبەر هەمو ئەو هۆیانە باشترە بزوتنەوەی گۆڕان و هەوادارەکانیان توخنی کوێخا و ئەوانەی وەک کوێخان نەکەون ، ئەم مەسەلەی سەنگەر گۆڕین و تەنانەت جاشایەتیش کە هۆکار گەلێکی بەدواوەیە پێویستی بە لێکۆڵینەوەی چڕ و پڕ لە ناوخۆی حیزبەکان و دەزگا تایبەتەکان و تەنانەت زانکۆکانیشدا، هەیە .

بابه‌تی په‌یوه‌ندیدار