(برای عەرەبی چاو ڕەشم

تاڵ بوو بەشت، تاڵ بوو بەشم).

 - عەبدوڵڵا گۆران-

 (هاوڕێ‌ ئارام، سەركەوتنی نەتەوەی عەرەب و فەلەستینیە شۆڕشگێڕەكانی دژی ئیمپریالیزم و زایۆنیزم، بەسەرەنجامێكی بەڵگەنەویست زانیوەو دڵنیابووە لەسەركەوتنیان).

 -مەلا بەختیار: بابەتەكانی شەهید ئارام لەڕۆژنامەی هاوكاری، ل19-

-1-

ئەم نووسینە لەئان و ساتێكدا دەنووسم كە شەڕی تولانی نێوان ئیسرائیل و فەلەستینیەكان، خەریكە دەورانێكی خوێناوی تری خۆی بەڕێدەكات. موشەك بارانكردنی غەزە و تەلەڤیڤ لەوپەڕیدایە. كۆمەڵگەی ئێمەش لەم پارچەیەی كوردستان، هەندێك وەك تەماشاچی و هەندێكیش وەك لایەنگر و داكۆكیكار لەفەلەستینیەكان مامەڵە لەگەڵ پرسەكەدا دەكەن.

ئەمەش دەرفەتێكە بۆئەوەی بزانین، لەڕابردودا دیدگای یەكێك لە فیگۆرە دیار و خوێنەوارەكانی كۆمەڵەی ڕەنجدەرانی وەك (شەهید ئارام) بۆ ئەوكێشەیە چۆن بووەو چۆنی لێڕوانیوەو چی دەربارەی وتووە.

چاپكردنی بابەتەكانی ناوبراو لەڕۆژنامەی (هاوكاری) لەسەرەتای ئەمساڵدا، كۆمەكێكی باشمان پێدەكات بۆ ئەوەی هەڵوێستی چەپ و ماركسیستێكی كورد لەكێشەی عەرەب - ئیسرائیل ببینین و بزانین چی لەبارەیەوە نووسیوە. هەوڵیش دەدەم لەبری وەسفكردن و لاواندنەوە، ستایشكردن و پیاهەڵدان كەخەسڵت و تایبەتمەندی هەرەزەقی نێو ئەدەبیاتی سیاسی و ڕۆژنامەوانی ئێمەیە(لەساتەوەختی میقداد مەدحەت بەدرخانەوە تا ئان و ساتی هاتنەئارای گۆڤاری ڕەهەند)، بەدیدێكی ڕەخنەگرانەوە بۆچوونەكانم بنووسم و لەدەرەوەی ئەفسانەسازی و قەبەكردن و فوتێكردن و شكۆداركردن، هەڵوێست و بۆچونی شاسوار جەلال هەڵبسەنگێنم.

شاسوار جلال(ناسراو بەشەهید ئارام)، چل و ئەوەندە ساڵە سوێنی پێدەخورێت و تەقدیس دەكرێ‌ و بەباڵایدا هەڵدەدەن و لەمەدح و سەنا زیاتریش هیچی دیكە بەشایستەی نازانرێت. ئەڵبەتە وەك شەهیدێكی ڕێگەی ڕزگاری و گیان فیدای دەستی غەدر و خیانەت، شایەنی ئەوەیە (وەك تێكڕای شەهیدە سەربەرزەكانی كوردستان) ناوی بەپیرۆزی و شكۆمەندی بمێنێتەوە، بەڵام بەڕویەكی دیكەدا نەك بۆئەو، بۆهیچ سەركردەو تیۆرسین و شۆڕشگێڕێك نییە، لەسەرو ڕەخنەوەبێت و وەك موقەدەسێكی ئاینی دەستی بۆنەبرێت.

بەنەتیجە شەهید ئارام مرۆڤ بووە و كاری ڕێكخراوەیی و حیزبی كردووە. نوسیویەتی و بیری كردووەتەوە. خەریكی تیۆریزەكردن و بەرنامەڕێژی و سیاسەتكردن بووە. لەوانەشدا مرۆڤ هەندێ‌ جار كاری باش دەكات و هەندێ‌ جاریش خراپ، زۆرجاران دەیپێكێ‌ و زۆرجاریش بەهەڵەدا دەچێ‌. ئێمە لەم نوسینەدا هەوڵدەدەین بەشێوەیەكی بابەتی و شێلگیرانە، پەنجە لەسەر هەڵەو كەلێن و نوقسانی نووسین و بیركردنەوەی شاسوار جەلال دابنێین كە سەبارەت بەكێشەی عەرەب - ئیسرائیل بەیانیكردوون و لەو وتارانەشدا بەردەوام هەڵوێستی خۆی بەپیتی درشت دەربڕیووە.

-2-

ئەوە بەڵگەنەویستێكە و هەمووان دەزانن كەلەسێ‌ چارەكە سەدەی ڕابردوودا كێشەی فەلەستین – ئیسرائیل، یەكێك بووە لەو پرسانەی تەواوی وڵاتانی جیهانی بەخۆیەوە خەریككردووەو هەتا ئێستاش سەرباری ئە وهەموو خوێن و گێرمەو كێشەو قسەو باسانەی لەبارەیەوە دەكرێت، هەر بێ‌ چارەسەر ماوەتەوە. حیزب و كارەكتەری سیاسی و ڕۆشنبیرانی ئێمەش كەم تازۆر(هەر لەسەرەتاوە تائێستا)، هەڵوێستیان نواندووە و قسەی خۆیان هەبووە.

شاسوار جەلال نمونەی ئەوانەیە كەزۆر بەتوندی و حەماسەتێکی بێوێنەوە، قسەی لەو بابەتە كردووەو ڕێك و ڕاست هەڵوێستی خۆی وەک لایەنگرێکی عەرەب و فەلەستینیەکان، یەكلایی كردۆتەوە. خوێندنەوەی یەك بەیەكی وتارە ڕۆژنامەوانیەكانی لەڕۆژنامەی هاوكاری(4 - 3 - 1972 بۆ 27 – 6 - 1975) كەپەنجاو چوار بابەتە، دەریدەخەن چۆن و بەچ نەفەسێك داكۆكی لەمافی عەرەب و لەدۆزی فەلەستین و فەلەستینییەکان كردووە.

لەلاپەڕە(81)دا بەوپەڕی دڵنیایی و باوەڕبەخۆبوونەوە دەنووسێت:(ڕۆژێك هەردێت تەخت و تاراجی ئەو بنكە ئیمپریالیستییە لەفەلەستین تێك بدرێت). ئەم تۆنی قسەكردن و نووسینە هەڵوێست وەرگرتنێكی جێنتڵمانانەی مارکسیستێکی عەدالەتخواز نییە، لایەنگری و تەرەفدارییەكی بێگوناه و مرۆڤانە نییە، ئەوەندەی دژایەتی كردنێكی زەق و زۆپی گەل و وڵات و قەوارەیەكە، هێندەی فەلەستینیەكان مافیان لەو شوێنەدا هەیە.. چونكە لەڕووی مێژوویی و مرۆییەوە، وابەستەیی جولەكەكان بەخاكی ئیسرائیلەوە وابەستەییەكی پوخت و ڕەسەنەو تەنها بنکەیەکی دروستکراوی ئیمپریالیستی نییە(کەلەباشترین حاڵەتدا ئەمەیان ویردی سەر زمانی نەتەوەپەرست و ئیسلامیستە توندڕەوەکانی وڵاتانی عەرەبە).

وێناكردنی كێشەی عەرەب – ئیسرائیل لەفەلەستین، وەك دوو بەرەی هەق و ناهەق، ستەمكار و قوربانی، زاڵم و مەزڵوم، داگیركەر و داگیركراو، بەرهەمی هەوڵ و پڕوپاگەندەی شۆڤێنیزمی عەرەبی و فێندەمێنتالیزمی ئیسلامییەو زۆرێكی زۆریش لەم پەڕ بۆئەو پەڕی دونیا لەژێر كاریگەری ئەو گوتار و ئەو وێناكردنە مەبەستدارەدا، هەڵوێست وەردەگرن و خۆیان یەكلادەكەنەوە.

ڕۆمان نووس و ئەكادیمیستی گەورەو ناوداری ئیسرائیلی ئامۆز ئۆز(ئامۆز كلاوسنەر) لەوتارێكی كورت و پوختدا، لەژێر سەردێڕی (ئیسرائیل و فەلەستین لەنێوان دوو داوای ڕەوادا) كە كاك خەبات عارف كردوویەتی بەكوردی و دەساڵێك بەر لەئێستا بڵاوبۆتەوە، ئەوە بەڕەوا نازانێت ئێمە لەو ململانێ‌ و كێشە دژوارەدا بۆئەوە بگەڕێین، كامیان فریشتەن و كامیان ئەهریمەنن، چونكە بەبڕوای ئەو وەك نووسەرێكی خۆبەپرسزان:(ناكۆكی نێوان فەلەستین و ئیسرائیل فیلمی كاوبۆی نییە، شەڕێك نییە لەنێوان چاكە و خراپەدا، بەڵكو تراژیدیایەكە بەمانای پڕاوپڕی وشەكە.. دژواری و ناخۆشی ناكۆكی نێوان ئیسرائیل و فەلەستین لەوەدایە، لەبنەڕەتدا ناكۆكی نێوان دوو قوربانییە، دوو قوربانی دەستی هەمان خوێنخۆر و ستەمكار).

ئەوخواست و تەمەننایەی شەهید ئارام، وەك چەپ و ماركسیست و ئازادیخوازێكی كورد هەیەتی و دەخوازێت ڕۆژێك بێت تەختوتاراجی ئەو بنكە ئیمپریالیستیەی فەلەستین تێك بدرێت، نەلەجێی خۆیدایە و ناواقیع بینییە. ئاخر ئەوە بۆ هەموو کەس ڕوون و ئاشکرایە پرۆسەیەکی وا، بەواتای دووبارەبوونەوەی كارەساتێكی دیكەی وەك هۆلۆكۆستە گەر ڕووبدات. پاشان شاسوار جەلال وەك خوێنەوارێكی سەردەمی خۆی،  دەبوو بیزانیایە كەنیوەی دانیشتوانی ئیسرائیل بریتین لەوانەی لە وڵاتە عەرەبی و ئیسلامییەكانەوە دەركراون (بەسلێمانی و كەركوك و كۆیە و دهۆكەوە) و ئیسرائیل لەباشترین حاڵەتدا لەسەرەتایەوە تابەئێستا، ئۆردوگایەكی گەورەی پەنابەرە جولەكەكانە، وەک لەوەی دەوڵەتێک بێت بەماناو فۆرمە مۆدێرنەکەی.

هەر لەو وتارەیدا ئامۆز ئۆز بەحەسرەتێكی زۆرەوە دەنووسێت :(لەڕاستیدا ئیمە لەئیسرائیل نیوەمان پەنابەرانی جولەكەین كە لەوڵاتە عەرەبیەكانەوە دەركراوین. كەچی هێشتا كەسانێك هەن لەو ڕوانگەیەوە سەیرمان دەكەن كەدرێژەپێدەری ئیمپریالیزم و كۆلۆنیالیزمین لەناوچەکەدا). 

ئامۆز ئۆز وەك جولەكەیەك ڕاست دەكات و ئەوە ڕوانگەی زۆرێكە لەنەتەوە پەرستەكانی عەرەب و ئیسلامی ئسوڵی، هەر لەوانیشەوە بەچەپ و ماركسیستەكانی ئیمە گەیشتووە، بۆیە ئەوانیش بەهەمان تۆن دەخوێنن و هەمان شت دەڵێنەوە. ئەی ئەوە نییە لەلاپەڕە(19)كتێبی (بابەتەكانی شەهید ئارام لەڕۆژنامەی هاوكاری)، مەلا بەختیار بەهەمان ڕوانگەی نەتەوە پەرست و ئیسلامی سەلەفی دەنووسێت (هاوڕێ‌ ئارام، سەركەوتنی نەتەوەی عەرەب و فەلەستینیە شۆڕشگێڕەكانی دژی ئیمپریالیزم و زایۆنیزم، بەسەرەنجامێكی بەڵگەنەویست زانیووەو دڵنیابووە لەسەركەوتنیان).

جارێ‌ بالەوەگەڕێین كەپێشبینی ماركس بۆداهاتووی كەپیتالیزم چەند نادروست و پڕهەڵەو پەڵەبوو، تەنەبوئەكەی شاسوار جەلالیش بۆ داهاتووی كێشەی ئیسرائیل - فەلەستین لەو دروستتر نییە، بەڵام گرفتەكە ئەوەیە دوو چەپ و ماركسیستی كوردی لە حەفتاكان و لەڕۆژگاری ئەمڕۆشدا، هێشتا ئیسرائیل و جولەكە بەدرێژەپێدەری ئیمپریالیزم و تەواوكەری پرۆژەی كۆلۆنیالیزم بزانن و لەهەوڵی تۆخکردنەوەی گوتاری  ناسیۆنالیزمی عەرەبی و فێندەمێنتالیزمی ئیسلامیدابن لەوبارەیەوە.

ڕاستیەكەی ئێمە وەك كورد (وەك میللەتێكی بەش مەینەت و ئازادیخواز)، پێویستمان بەوە نییە لەنێوان لایەنگیری جولەكە و ئیسرائیل و تەرەفداری عەرەب و فەلەستینیەكاندا، یەكێكیان هەڵبژێرین و هەربەتۆپزی خۆمان بەلایەكدا ساغ بكەینەوە، بەڵكو شتێک كەپێمان بكرێت و دەبێت بیكەین ئەوەیە، لایەنگری ئاشتی و پێكەوە ژیان بین بۆیان، لەچوارچێوەی دوو دەوڵتداو هیچی تر.

- 3-

شەهید ئارام شۆڕشگێڕێكی كوردەو بەكوردی دەنووسێت، بەڵام مەخابن بەدرێژایی ئەو پەنجاو چوار وتارە ڕۆژنامەوانیەی، تێدەگەیت ئەو بەعەرەبی بیردەكاتەوەو وەك عەرەبێك هەڵوێست وەردەگرێت.

لەكتێبی (سجالات عربیة كردیة) ی دكتۆر هەڵكەوت حەكیم كەمامۆستای یاریدەدەرە لەزانكۆی پاریس و ئەندامی سەنتەری نیشتیمانییە بۆ لێكۆلینەوەی زانستی لە فەرەنسا، لەوتارێكدا بەناوی:(لماذا یؤبلس اكراد العراق؟ لماذا تنكر علیهم شجونهم الفلسطینیة؟)، دەنووسێت: (بۆ زیاتر لەنیودانە سەدە دەچێت، ئیسرائیل لەجیهانی عەرەبیدا وەك ئەهریمەنێكی ڕەش سەیردەكرێت).

تەسلیم بوونی شەهید ئارام بە گوتار و دید و تێڕوانینی پانعەرەبیزم، وایكردووە عەرەبیانە بیربكاتەوەو عەرەبانە هەڵوێست وەربگرێت و بڕیار لە كێشەكان بدات. تەمەننا خواستنیشی بەژێرەو ژوربوونی ئیسرائیل، مانای سەیركردنیەتی وەك ئەهریمەنێكی ڕەش و نەخوازراو لەوڕووبەرە جوگرافییەی نێو خۆرهەڵاتی ناوەڕاستدا. لێرەدا ئەو قسەیەم دێتەوەبیر كەزۆرجار بەرگوێمان دەكەوێت و دەوترێتەوە: (عەرەب هەر خاك و ئاوی داگیرنەكردووین، بەڵكو مێشك و بیركردنەوەشی كۆنتڕۆڵ كردووین). گەر نا مانای بەچی كارەكتەرێكی سیاسی ژیر و دیاری وەك شاسوار جەلال، بێت و كێشەی فەلەستین بکاتە خەمی گەورە و پرسی ژمارەیەكی خۆی و ئەو هەموو لاپەڕەیەی  بۆ ڕەش بكاتەوەو ئەو پشگیریە سەرسەختەی لێبكات.

ئەم حاڵەتە یەك ڕاستی تاڵ و تفتمان پێدەڵێت، ئەویش ئەوەیە :( كارەكتەری سیاسی كورد، نە لەناو كێشەكانی خۆیدا دەژی و نە لەناویشیاندا بیردەكاتەوە). بە كورتیەكەی كاری شەهید ئارام بە ئاگاییەوە بووبێت یان لەبێئاگاییەوە ( لەو نووسینانەیدا)، هەوڵێكە بۆ شاردنەوەی پرسی كوردو كێشە و گرفتی ڕەنجدەران و زەحمەتكێشانی كوردستانی، لەنێو كێشە و شۆڕش و پرسوباسی ئەوانی دیکەدا.

نەتەوەپەرستەكانی عەرەب و هێز و گروپە ئیسلامیە توندئاژۆكان، پرسی فەلەستین بە یەكەمین و تاقانە پرسی سەرگۆی زەوی دادەنێن، شەهید ئارامیش بە شوێنپێهەڵگرتنی ئەو دیدگایە، لەو وتارانەیدا كێشەی فەلەستین بە كێشەی سەرەكی خۆی و تەواوی مرۆڤایەتی دادەنێت. لەدوای ئەویش دێتە سەر شۆڕشی گەلانی ڤێتنام و كەمبۆدیا لە ئاسیا و ڕۆدیسیا و زیمبابۆی و گینیای بیساو لە ئەفریقا، فەنزوێلا و پۆلیڤیا و كۆلۆمبیا لە ئەمریكای لاتین، كەچی لە پەراوێزی پەراوێزیشدا شوێنێك بۆ  باسی كوردو دۆزە ڕەواكەی لە چوار پارچەی كوردستان دا نادۆزیتەوە.

لەسەردەمانی شەهید ئارام و پێشو و پاشتریشدا، لەنێو عەرەبەكان خۆیاندا هەبوون و ئێستاش هەن باوەڕیان بە پێكەوە ژیانی فەلەستینی و ئیسرائیلیەكان هەیە، لە چوارچێوەی دوو دەوڵەتی سەربەخۆی دراوسێدا، بە بوونی دیوارێك لە نێوانیاندا. وەك سیاسەتمەدارێكی دوربین و قاڵبوو، ساڵی 1965 حەبیب بۆرقیبەی سەرۆكی پێشووتری تونس لەگوتارێكدا ( كەبەگوتاری ئەریحا ناسراوە)، پەسەندی دوو دەوڵەتی بۆ كۆتایپێهێنان بە كێشەی فەلەستین - ئیسرائیل دەكات.

تەنانەت ئێدوارد سەعیدیش وەك بیرمەند و ئەكادیمیستێكی بەناوبانگ و داكۆكیكارێكی سەرسەخت لەمافی فەلەستینیەكان، لە بەرهەمە جیاجیاكانی دا(كلتوور و بەرخودان، پێنووس و شمشێر، ئەمریكا – ئیسرائیل - عێراق و .... هتد)، ژیانكردن لەنێو دوو دەوڵەتدا بە چارەسەرێكی گونجاوی كێشەكە دەزانێت. كەچی شەهید ئارام وەك چەپ و ماركسیست و شۆڕشگێرێكی ئازادیخوازی كورد، لەوان توندتر پێداگیری دەکات و وەک عەبدولناسر و هاوشێوەكانی، پانعەرەبانە تر بیردەكاتەوە و لەبری چارەسەری دوو دەوڵەت، هەڵکەندنی قەوارەی جوولەکە لەوێدا، بە هەنگاوی ڕاست و دروست دەزانێت.

بەرواری 17-8 -2004 لە ژمارە (19)ی ڕۆژنامەی (ئاسۆ)دا، نووسەر و لێكۆڵكاری ئەمریكی بەڕەگەز لوبنانی فوئاد عەجمی، لەمیانی گفتوگۆیەك لەگەڵیدا دەڵێت: ( لەوڵاتانی عەرەبی و فەزای عەرەبیدا، قەرەچەناغییەكی زۆر هەیە). جاران و ئێستاشی لەگەڵدا بێت، نوخبەی سیاسی و ڕۆشنبیری و ئایینی ئێمە وەك كورد، دەكەونە ژێر كاریگەری ئەو قەرەچەناغی و چەلەحانێیانەوە. ئەوەش وامان لێدەكات سوك و باریك فەلەستینیەكان وەک فریشتەو ئیسرائیل و جوولەکەش، وەك ئەهریمەنێكی ڕەش سەیربکەین.

دواجار دەبێت بڵێم :( بەداخەوە شەهید ئارام لەبیركردنەوەی و حوكمدانی لەسەر كێشەی عەرەب - ئیسرائیل، وەك كورد و وەك كەسێكی چەپڕەو و وەك ماركسیست و ئازادیخوازێك هەڵوێستی نەنواندووە، هێندەی وەك عەرەبێكی نەتەوەپەرست و دیلی گوتاری پانعەرەبیزم ڕەفتاری كردووە. ئەوەش بەسەرێك خراپە بۆ مێژووی سیاسی خۆی و بەسەرێكیش بەزیان و نابووتی بەسەر دۆزی ڕەوای كورددا دەشكێتەوە).

هەر تەنها بەكوردی نووسین گرنگ نییە، گرنگ ئەوەیە لە پاڵیشیدا كوردانە بیربكەینەوە.

- 4 -

لەكۆتایدا ناچارم هەندێ‌ دەردەدڵی دیكەش بەیانبكەم.. یەك لەوانەش كورتبینی و سەرگەردانی كوردە.. هاورێی ئازیز و بەهەشتیم، نووسەر و شاعیری بەهرەمەند كاك ئازاد سوبحی لەدیمانەیەكیدا كەلەژمارە (47)ی ئایاری ساڵی (2000) گۆڤاری(ڕامان)دا بڵاوبۆتەوە، دەڵێت:( كۆمەڵگەی كوردی یەكێكە لەو كۆمەڵگانەی خۆی زۆر پێ پەسەندە و هەمیشە لاسایی خۆی دەكاتەوە. كورد هێزێكی سەیری لاسایكردنەوەی خۆیی هەیە).

من تەواو بەپێچەوانەی ئەوەوە، وای دەبینم كۆمەڵگە و مرۆڤی ئێمە، خۆی زۆر پێ بچوكەو كوشتەی لاسایكردنەوەی ئەوی دی و خۆهەڵواسینە بەوانی تردا، وەك سێبەر و پاشكۆیەك و  لەدەورگەڕانیانە، لە پێناو دەستخۆشی و ئافەرینێکدا. جاران بەگەرمی ئەوەی بۆ فەلەستین و ڤێتنام و كوریای ئازا و كێشەكانی دونیای عەرەب  دەكرد، لەدوای ڕاپەڕینیشەوە ئەو ڕۆڵە بۆ خۆرئاوا و ئەمریكا و ئەوروپا دەگێڕێت.

هەڵوێست و نووسینی سیاسیەكانی ئێمە ( كە شەهید ئارام چاكترین نمونەیانە)، هاوكات شیعر و چیرۆكی ئەدیبانمان، سەرشارن بە وێنەی مەزڵومیەتی عەرەب و فەلەستینیەكان، لە پشتگیری لەمافە ڕەواكانیان و فرمێسك ڕشتن بۆیان. كەچی بەودیودا جیهانی عەرەبی (كەمێكی كەمی لێبەدەر)، باكیان بە بەشمەینەتی و بێمافی و ستراتیژیەتی كوردقڕان نییە( بەتایبەت لەعێراق و سوریا).

هەر ئەوەشە وا لەكەنعان مەكییە دەكات بەویژدانێكی بیمارەوە لە كتێبی (دڵڕەقی و بێدەنگی)دا، بپرسێت:( ئەرێ‌ ئەو هەموو زوڵم و ستەمەی بەعسی سەدام حوسێن، بۆ نەیهێنانە دەنگ؟). لەوەش خراپتر سیاسەتوان و ڕۆژنامەوان و ڕۆشنبیرانی عەرەب، نەك هەر باسی مەرگەساتی ئێمە ناكەن ( بەتایبەت فەلەستینیەكانیان)، بەڵكو هەر گاڵتەشیان پێدێت و پێیان وایە كەیسێكەو خۆرئاوا بۆ بەرژەوەندی تایبەتی خۆی و بۆ بەدناوكردنی عەرەب و قوتکردنەوەی ئیسرائیلێکی تر لەناوچەکەدا، كێشەی كورد و بوونی مەسەلەیەكی لەوجۆرە زەق دەكاتەوە.

 کاک خالید سڵێمانی ڕۆژنامەنووس چەند ساڵێك لەمەوبەر، لە ڕۆژنامەی (سەفیر)ی لوبنانیدا وتارێكی پڕ گلەیی و گازندەی نووسیبوو كەئەمە ناونیشانەكەی بوو (بۆچی ڕۆشنبیرانی عەرەب باوەڕ بە مەرگەساتی كورد ناكەن؟). شاعیر و ڕۆماننوسی ناوداری ڕۆژئاڤاش (سەلیم بەرەكات) لە بەرواری 15-6-2003 لە ڕۆژنامەی (الحیاة)، لەوتارێكیدا بەناوی (نكبات العقل -1- صور صدام اذ تمتزج باعلام حماس و یروح البیان العربي یتحدث عن خیانة الكرد)، هەمان زوخاو لەدەست بێویژدانی نوخبەی عەرەبی هەڵدەڕێژێت.

دەستەبژێر و عەوامی وڵاتانی عەرەب، نەك داكۆكی و بەرگری لەمافی ڕەوای كوردان ناكەن، بەڵكو باوەڕ بەتراژدیاكانیشی ناهێنن و لەلیستی ناپاكان و كلكایەتی و پاشكۆی زایۆنیزم و ئیمپریالیزمدا، پۆلێنیان دەكەن. لەولاشەوە نوخبە و عەوامی ئێمە، وەك عەرەبێكی ڕەسەن و موسوڵمانێكی ڕاستەقینە، كێشەی قودس و فەلەستین بە كێشەی ژمارەیەكی خۆی دەزانێت.