عەبدولڕەحمان گەورکی (مەهابادی)، نووسەر و لێکۆڵەری سیاسی

رۆژی 4ی جۆزەردانی ئەمساڵ وەزارەتی ناوخۆی رژێمی دەسەڵاتدار لە ئێران، لیستی ناوی پاڵێوراوانی پەسندکراوی ئەنجوومەنی پاسەوانان بۆ شانۆی هەڵبژاردنەکانی راگەیاند و بەو پێیە لێهاتوویی سەرتیپی پاسدار (عەلی لاریحانی) سەرۆکی پێشووی مەجلیسی رژێم و ئیسحاق جەهانگیری، جێگری سەرۆک کۆماری ئێستای رژێم، لەگەڵ سەرجەم پاڵێوراوانی نزیک لە حەسەن رۆحانی، سەرکۆماری شاشخاپێنی رژێم رەتکرایەوە کە خۆی دەرخەری نەشتەگەییەکی بنەڕەتی و جیددییە لەسەر جەستەی رژێم و باس لە قۆناغێکی نوێی لێکترازان و قەیران دەکات لە ناو رژێمدا.

هەرچەند کە پۆستی سەرۆکایەتی کۆمار لە ئێرانی ژێر دەسەڵاتی ئاخوندان، پۆستێکی رواڵەتییە و هەمووی دەسەڵات بەدەست وەلی فیقیهەوەیە، بەڵام هەڵبژاردن تەنها شانۆیەکی فریودەرانەیە و لە راستیدا هەڵبژاردن لە ئێرانی ژێر دەسەڵاتی ئاخوندان شتێکی بێ واتا و بێ ناوەرۆک و لە هەمان کاتدا گاڵتەجاڕانەیە.

لە ئیرانی ئەمڕۆدا،

وەلی فەقیهـ، دەسەڵاتداری رەها و بێ هاوتایە لە ناو رژێمی دیکتاتۆریی ئایینیدا و تا ئەو کاتەی سیستەم لەسەر بنەمای ویلایەتی فەقیهی بێت هەموو پۆست و پلە و پایەکان بێ رەوایەت و بێ بنەمان. چون بەر لە هەر شتێک، وەلی فەقیهی ئاخوندان خۆی رەوایەت نەک لە خەڵک، بەڵکو لە نادیار (غەیب) وەردەگرێت و کاربەدەستانیتری رژێم بە شێوازی جۆراوجۆر لە لایەن ئەوە کەسەوە دادەنرێن و ئەوانیش سوێندیان لەسەر خواردووە کە بێ قسەیی ناوبراو نەکەن. کەوایە کەس لە لایەن خەڵکەوە هەڵنابژێردرێت!

بە تێپەڕبوونی چل و چەند سال بەسەر دامەزراندنی دەسەڵاتی ئایینی لە ئێران، بەرنامە و سیاسەتەکانی ئەم رژێمە نەک هەر گۆڕانکاری بەسەردا نەهاتووە بەڵکو  هەروەک رابردوو لەسەر ئەو بنەمایانەیە کە دز و جەردەی دەستکەوتەکانی راپەڕینی دژە پاشایەتی خەڵکی ئێران (واتا خومەینی) دایمەزراند. رژێمێک لەسە بنەمای مەزهەب، سەرکوتکردنی ئازادییەکان، شەڕ هەڵایسان و ئاژاوەنانەوە و دەستتێوەردان لە کاروباری دەوڵەتان بە مەبەست مەزنخوازی، هەناردەکردنی تیرۆریزم و بناژوخوازی و هەوڵدان بە بەرهەمهێنانی چەکی ناوکی، تا بتوانێت بەم رێگەیەوە چارەنووسی گەلانی ناوچەکە و بگرە جیهانیش بە بارمتە بگرێت!

لە ئێرانی ژێر دەسەڵاتی ئاخوندان، بوونی رەوتی چاکسازی کارێکی فریودەرانەی گەوەرەیە. خەڵکی ئێران ئێستا ئەم راستیە بە باشی دەزانن کە رژێمی ئێران چاکسازی هەڵناگرێت ، رەوەتی چاکسازی ویترینێکی رژێمی وەلی فەقیهە بۆ لەخشتەبردنی خەڵک لە ئێران و دەوڵەتان لە دەرەوەی ئێران. هەر بۆیە ئێستا خەڵکی ئێران بە کەمتر لە رووخاندنی رژیم رازی نابن. ئەمەیش پێشکەوتنێکی گەورەیە بەرە رزگارکردنی وڵاتەکەیان. ئێستا خەڵکی ئێران هەموویان هاوڕان کە ئەم رژێمە بە تەواوەتی دەبێ بڕوخێندرێت و دەسەڵاتێکی نیشتمانی، جەماوەری و دیمۆکراتی لەسەر بنەمای جیاکردنەوەی دین لە حکومەت لە جێگەی دابنرێت. دەکرێ ئەم داواکارییەی گەل لە راپەڕینەکانی ساڵانی 2017 ، 2019 بەدی بکرێت کە دەیانوت "ئیسڵاح تەڵەب، ئوسولگەر.. ئیتر تەواو بوو ماجەرا". کەواتە خەڵکی ئێران لە دوای روخاندنی رژێمی پاشایەتی لە ساڵی 1979 ئێستا خوازیاری رووخاندنی جؤرێکیتری دیکتاتۆرییە کە ئاخوندان بەسەر ئێرانیاندا سەپاندووە. خەڵکی ئێران دەڵێن: "ئیران موڵکی خەڵکی ئێرانە و بەس!".

ئێستا لە ساڵی نوێی ئێرانیدا (1400) ئەم وڵاتە ئاسیاییە 85 ملیۆنییە،  لە هەناوی دا هەلگری زۆر رووداوی گرینگ و چارەنووسسازە بۆ خەڵکی ئێڕان و ناوچەکە. بە هۆی راپەڕینە جەماوەرییەکان و بێ دەرەتان بوونی وەلی فەقیهی دەسەڵاتدار بەرانبەر بە قەیرانگەلێکی چارهەڵنەگر، رژێمی ئاخوندان لەوپەڕی لاوازیدایە. لەم هەلومەرجەدا رژێمی ئاخوندی بۆ مانەوەی لە دەسەڵاتدا بەدوای دەرچوونێکدا دەگەڕێت. کاربەدەستانی رژێم کە مانەوەی خۆیان لە دامرکاندنی راپەڕینی جەماوەر و لەناوچوونی موقاومەتی ئێراندا دەدۆزنەوە،هاوکات لەگەڵ دێواندنی تاکە رکابەری سەرەکی خۆی، واتا ئەنجومەنی نیشتمانیی موقاومەتی ئێران، رێگەی گفتوگۆکردن لەگەڵ ئەمریکای گرتۆتەبەر تا هەناسەی بێتەوە بەر خۆی. بەڵام ئایا کاربەدەستانی رژێم لەم کارەدا سەرکەوتو دەبن؟ دۆخی روو لە تەقینەوەی ئیران پێمان دەڵێت "نا!". لەبەچی؟

سەرکوتکردن خەڵکی ئێڕان لە لایەنە رژێمەوە لە هەڵکشاندایە. ئاماری دەست بەسەر کردن و ئەشکەنجە و لە سێدارەدان لە ئێرانی هەنوکەیی دا روو لە زیادبوونە و تا ئێستا زیات لە 120 هەزار کەس لە سێدارە دراون. بە لە بەر چاوگرتنی  ئاپۆرەی ئیران لە چاو وڵاتان، ئێران ریکۆردداری ئیعدام و لە سێدارەدانە لە جیهاندا. دانانی یەک سەکۆمار و لادانی یەکێکیتر نەک هەر هیچ باشبوونێکی بە دوادا نەهاتووە بەڵکو کارنامەی ئەم رژێمەی رەشتر و تاوانەکانیشی زیات کردووە. لەبەر ئەوەی لە راستیدا پۆستی سەرۆکایەتی کۆمار دەستکەڵای وەلی فەقیهە کە هۆکاری سەرەکیی ئەم هەموو ناخۆشییەی ناو ئێرانە. پاڵێوراوانی هەموو خولەکانی شانۆی هەڵبژاردن دەستیان سوورە بە خوێن گەل و چارەنووسی خەڵک و بە تاڵانبردنی داراییەکانیان. وادە و بەڵێنی پاڵێوراوان لە رۆژانی شانۆی هەڵبژاردندا، تەنها بۆ وەرگرتنی پشک و بەشکردنی دەسەڵاتە. واتە شەڕەگورگی ناو دەسەڵاتە و بەس. بە وتەی کاردەستانی رژێم، تەنها لە سەدا چواری ئاپۆرەی ئێرانە کە لە دەسەڵاتدان و لە سەدا پەنجای ئاپۆرەی خەڵک لە ژێر هێڵی هەژاریدان. بۆشایی نێوان تاقمی دەسەڵاتدار و خەڵکی ئێران رۆژ لە رۆژ زیاتر گەورەتر دەبێتەوە.

ئێستا خەڵکی ئێران بەرانبەر بە رژێمی ئێران زۆر زۆر تووڕەن و بە دوای دەرفەتێکدا دەگەڕێن کە ئەم رژێمە داماڵن. ئەوە هەر ئەو راستیەیە کە تەنانەت کاربەدەستانی رژێم بە ناچاری لێرە و لەوێ دانی پێدا دەنێن و لە نزیکبوونەوەی وەها رۆژێکی ئاگرین بەتەواوی تۆقاون. بە تایبەتی کە ئێستا هێزەکانی رێکخراوی موقاومەتی ئێران بۆ رێنوێنی کردنی راپەڕین و ناڕەزایەتی دەربڕینەکانی جەماوەر، بۆ بە ئاکام گەیاندنی لە ئێران، لق و پۆی دەرکردووە و جەماوەر لەمڕووەوە هەست بە هێز و ورەی زیاتر دەکەن و خۆیان بە براوەی مەیدانی خەبات دەزانن.

ئێستا لە سەروبەندی ئەنجامدانی شانۆی هەڵبژاردنەکان لە ئێران، دوو هێزی دژ بە یەک ریزیان بەستووە: خەڵک و موقاومەتی ئێران لە لایەک و رژێمی دیکتاتۆریی دەسەڵاتدار لە لایەکیترەوە.

ئاخوند عەلی خامنەئی بە هۆی لەناوچوونی رژێمەکەی، پەنای بردۆتە بەر یەکپارچەکردنی و چیتر تەنانەت کەسانی شاشخاپێنی وەک رەفسەنجانی و خاتەمی و رۆحانیی پێ قبووڵ ناکرێت و لێهاتوویی هەموو پاڵێوراوانی بە ناو چاکسازیشی رەت کردەوە و بە سەرکۆمارکردنی (ئیبراهیم رەئیسی)ی بە پێویست زانیوە. بەڵام بێ سودە کە وا بیر دەکاتەوە کە دەتوانێ بەرەنگاری قەیرانگەلی وەک داڕمانی ئابوری و بن بەستی سیاسی و هەڕەشەی راپەڕینی جەماوەر و هەروەها سزا نێو دەوڵەتییەکان ببێتەوە. ئەم دوخەی ئێستا یاسامەند پێگەیشتووە و ئیتر بەرەو دواوە ناگەڕێتەوە.

ئەگەرچی پاڵێوراوانی قبووڵکراوی ئەنجومەنی دەستکردی عەلی خامنەئی، هەر هەموویان پێشینەیەکی خوێناوی و گڵاویان هەیە لە ناو کارنامەی 42 ساڵەی رابردووی ئەم رژێمە بەڵام بەڵگەکان باس لەو راستیە دەکەن کە ئیبراهیم رەئیسی (کە یەکێکە لە ئەندامانی دەستەی لەسیدارەدان لە رەوتی قەتڵ و عامکردنی زیاتر لە 30 هەزار زیندانیی سیاسی لە ساڵی 1988) زیات لەوانیتر رێکە لەگەڵ پلانی دانراوی عەلی خامنەئی لەم شانۆگەییەدا.

بە سڕینەوە و لادانی پاڵێوراوان کە بە لای هەمووانەوە روون و ئاشکرایە، دەرەنجامەکی دەرکێشانی ناوی ئەم بکۆژە خوێنڕێژەیە لە سەندووقی شانۆی هەڵبژاردنەکان و، ناوبراو سەر بە عەلی خامنەئییە و هەروەها بە سەرنجدان بە پێکهاتەی هێزی یاسادانەر (مەجلیسی نوێنەرانی رژێم) کە بە تەواوی لە لایەن کەسانی سەر بە خامنەئییەوە دەستی بەسەردا گیراوە و سەرۆکایەتیەکەیشی بەدەست پاسدار محەمەد باقر قاڵیبافەوەیە و هێزی دادوەریش کە سەرۆکەکەی لە لایەن شەخسی وەلی فەقیهەوە دەستنیشان دەکرێت، هەر سێ دەزگاکە بە تەواوی لە لایەن عەلی خامنەییەوە پاوان کراوە. لەمرووەوە ریزبەستنی وەلی فەقیهی دەسەڵاتدار لە بەرانبەر راپەڕینی خرۆشانی خەڵکی ئێران دەچێتە قۆناغی کۆتاییەوە. راپەڕینێک کە بە هۆی بەهرەمەندبوونی لە دەزگای رێبەرایەتیی بە کۆمەڵ و پشتگیریکردنی موقاومەتێکی رەسەن و ریشەدار بۆ ماوەی پێنج دەیە، چارەنووسەکەی لە رووخاندنی رژێمی ئیران و سەرکەوتنی خەڵک بەسەر دیکتاتۆردا و ئاسۆی دامەزراندنی رژێمێکی نیشتمانی و خەڵکی و دیموکراتی بەدەر نیە.

شەپۆلی بە تەوژمی رەتکردنەوەی سەڵاحیەتی پاڵێوراوان کە هەر هەموویان هاوتەریبی وەلی فەقیهی ئاخوندین و پێشتر باوەڕمەندیی خۆیان بۆ دووبارە کردۆتەوە، بە رادەیەکە کە تەنانەت هێزەکانی رژێمی کەمینە (لە سەدا چواری خەڵکی ئێران و بگرە کەمتریش!)یش تووشی گومان بوونەتەوە و پرسیاری ئەوەیا لا درووست بووە کە "ئەی کێ لە رژێمەدا خاوەن سەڵاحیەتە!" هەر ئەمەیش سەرەتایەکە لە شەقبوونی سیاسی و بنەڕەتی لە ناو لایەنگرانی ئەم رژێمە کە بە خێرایی بەرۆکی رژێم دەگرێتەوە. رەتکردنەوەی سەڵاحیەتی کەسانێک کە هەر کامەیان بۆ ساڵانێکی زۆر، خۆیان بەڕێوەبەری بەرنامە و سیاسەتەکانی وەلی فەقیهی رژێم بوون و هەر کامەیان هۆکار و بەرپرسن لە بەشێک لە کارنامەی رەشی ئەم رژێمە!

خانمی مریەم رەجەوی، سەرۆک کۆماری موقاومەتی ئێران لە پێوەند لەگەل سڕینەوەی پاڵێوراوانی شانۆی هەڵبژاردن وتی: "خامنەیی بە سڕینەوەی پاڵێوراوانی شانۆی هەڵبژاردنی سەرۆکایەتی کۆمار کە لە ماوەی چل ساڵی رابردوو لە هەموو تاوانەکانی ئەم رژێمە بەشدار بوون، بۆ یەکپارچەکردنی رژێمەکەی و ئەوپەڕی سەرکوتکردن و گرژبوونەوە هەنگاوی ناوە کە ئەمەیش  نیشانەی زەقی قەیرانی رووخاندنی رژێمی ئێران و کەوتنە دواقۆناغی دیکتاتۆریی ئایینی و تیرۆریستییە"

خانمی رەجەوی جارێکیتر داوای لە سەرجەم خەڵکی ئێران کرد بە تەواوی شانۆی هەڵبژاردنەکان بایکۆت بکەن بە تەواوی و هەڵسن بە ناڕەزایەتی دەربڕین و سازدانی راپەڕین دژ بە سیناریۆی خامنەیی کە بریتیە لە دزی و جەردەیی و زەوتکردنی دەسەڵاتی خەڵکی ئێران و ئەوەی دووبارە کردەوە کە ئەمڕۆ ئیتر هیچ بیانوو و پاساوێک نەماوەتەوە بۆ دانوستان و موداراکردن لەگەڵ ئەم رژێمە و هەرچەشنە ئاڵوگۆڕکردن و دانوستان و هاوکاریکردنی ئەم رژێمە، راستەوخۆ دەچێتە قاڵبی خزمەتکردن بەو رژێمە لە پێناو سەرکوتکردن و کوشتاری خەڵکی ئێران و دەست پێڕاگەیشتنی ئەم رژێمە بە چەکی ناوکی و ئاگر تێبەردانی ناوچەکە.

لەم دواییانەدا رێبەری موقاومەتی ئێران بەدوای دان پێدانانی وەلی فەقیهی ئاخوندان لەسەر بەشداربوون و دەوری رژێمی ئێران لە شەڕ و کوشتار لە فەلەستین گوتی: "خامنەیی پێشتر زۆر جار وتبووی، ئەگەر لە دەرەوەی سنوورەکانی ئێران شەڕ نەکات و شەڕ رابگرێت، ئەوا دەبێ لە کرماشان و هەمەدان و ئیسفەهان و تاران و خوراسان بەرانبەر بە خەڵکی راپەڕیو و لاوانی شۆڕشگێڕ شەڕ بکات... بەڵام ئاگری راپەڕین بە ئەڕتەشی خەڵکانی برسی، لە ژێر خۆڵەمێشی کڕۆنادا سەرهەڵدەداتەوە و بڵێسە دەسەنێت". رێبەری موقاومەت هەروەها وتی: "هەروەک چاوەڕوانی دەکرا و موقاومەتی ئێران پێشتر رایگەیاندبوو، رژێمی ویلایەتی فەقیهی ئاخوندی لە لێژایی رووخاندنیدا بەرەو یەکپارچەبوون و گرژی و سەرکوتکردنی لە رادەبەدەر دەچێت. شەڕهەڵایسان لە غەزە، ئاگری پشتیوانیکردنی خامنەییە لە ئەندازیاریکردنی هەڵبژاردنی ساختەیی دا. خامنەیی بە سەڕینەوەی "کەسانی نزیک خۆی" لە شانۆگەرییەکەدا، راشکاوانە هەڕەشەیان لێدەکات و ئەمەیش راگەیاندنی شەڕێکی بە ئاشکرای بە دووقاتە بەرانبەر بە خەڵکی ئێران لە لایەن گەورە دزی دەسەڵات".

بە باشە دەرکەوتووە کە رژێمی فاشیزمی ئایینی لە ئێڕان هەر لە سەرەتاوە، هەڵبژاردن و چاکسازی لەم رژێمەدا هیچ بایخ و واتا و مانایەکی نەبووە لە کاری فریودەرانە بەدەر و وڵامی خومەینی و خامنەیی لەوە بەدەر نیە. واتا کوشتار و لەسێدارەدان و قەتڵوعامکردن و لەم رێڕەوەدا کوشتارکردنەکانی لە ساڵانی 2017 و 2019 ، ..." هەر بۆیە خەڵکی ئێران بڕیاری خۆیان داوە کە ئەم رژێمە دیکتاتۆری لە رەگ و ریشەوە لە ناو ببەن.

هەر لەم راستەوەیە کە خەڵکی ئێران بەشداری ناکەن لە شانۆی هەڵبژاردنەکانی رژێم و پێداگرن لە سەری.

رێبەری موقاومەتی ئێران چەند بە باشی وتی کە: "خۆش بە حاڵی موقاومەتی ئێران کە لە 40 ساڵ بەر لە ئێستاوە لەم راستیە و لەم پێویستییە گەیشت. هەر قسە و وتەیەک دەربارەی چاکسازی لەم رژێمەدا، تەنها کارێنی فریودەرانەیە و پێڕەوکردنی پیلانی کۆنەپەرستان و زلهێزەکانە".