عەبدولرەحمان گەوركی(مهاباتی)

وڵاتێک دیکتاتۆری بەسەردا زاڵ بێت هەڵبژاردن تیایدا شتیکی بێ مانایە. لەبەرئەوەی لەو وڵاتەدا نە ئازادی بوونی هەیەو نە دیموکراسی. ئێران یەکێکە لەو وڵاتانە.

لەماوەی 42 ساڵی رابردوودا لەئێران، رژێمێک حوکمڕانە کە زوبان و کردەی، تەنها سەرکوتکردن و کوشتارو تاڵانکارییە. هەربۆیە هەڵوێستی هەمیشەیی هێزو لایەنە شۆڕشگێڕو ئازادیخوازەکانی ئەم وڵاتە لەهەمبەر شانۆی هەڵبژاردن «بایکۆت» بووە و ئەمساڵیش بینیمان کە لەلایەن زۆرینەی هەرە زۆری خەڵکی ئێرانەوە، ئەم شانۆیە بایکۆت کرا، کە تەنانەت کاربەدەستانی رژێمی ئێران دانیان پێدا نا!

ئەم بایکۆتکردنە سەراسەرییە باس لەگۆڕانکارییەک دەکات لەهاوکێشە سیاسیەکانی تایبەت بەئێران و ئەم دۆخەیش بەئاسانی نەهاتۆتە ئاراوە. لەم ساڵانەی دواییداو بەتایبەتی لەمانگی گەڵاڕێزانی (2019) راپەڕینێکی جەماوەری جێگەی بە رژێم لەق کرد. عەلی خامنەئی لەدژکردەوەیەکی نەزۆکانەو شێتانەدا فەرمانی دەکرد هێلی ئینتەرنێت ببڕن و راپەڕینکاران کوشتار بکرێن. ئەوە بوو زیاتر لە 1500 کەس لەسەر دەستی هێزەکانی حکومەت شەهید کران. دروشم و داواکاریی خەڵک بریتی بوو لەنەمانی ئەم رژێمە بە تەواوەتی. ئەوان هەڵگری ئەم دروشمە بوون کە (ئیسڵاح تەڵەب، ئوسولگەرا.. ئیتر تەواوبوو ماجەرا) کە باس لەنەهێشتنی تەواوەتی رژێم دەکات. جەخت کردن لەسەر رەتکردنەوەی دیکتاتۆری پێشوو (حەمەرەزاشا)یش یەکێک بوو لەدروشم و سنووربەندییەکانی خەڵکی ئێران بەرانبەر بەهەبوونی هەمەجۆر دیکتاتۆرییەت لەئێراندا. ئەم دوو دروشمە سەرەکییە باس لە پێگەیشتوویی شۆڕش و دواقۆناغی دەسەڵاتی رژێمی ئێران دەکات. واتا نەمانی رژێمی دیکتاتۆریی مەزهەبی و رەتکردنەوەی هەمەجۆر دیکتاتۆرییەت لە ئێراندا!

عەلی خامنەئی بەر لەهەڵبژاردنەکانی خولی دوازدەیەمی شانۆی هەڵبژاردن لەساڵی 2017 بڕیاری خۆی دا لەسەر یەکپارچەکردنی رژێمەکەی، بەڵام بەهۆی راگەیاندنی «بزوتنەوەی دادخوازی خوێنی زیاتر لە (30) هەزار زیندانیی سیاسی لەهاوینی 1988» لەلایەن خاتوو (مریەم رەجەوی) سەرۆکی مقاوەمەتی ئێرانەوە، پرۆژەکەی شکست پێهێنا، کە بریتی بوو لەهێنانە سەرکاری ئیبراهیم رەئیسی وەک سەرکۆماری رژێم لەوخولەدا. لەم رووەوە خامنەئی بۆ قەرەبووکردنەوەی شکستەکەی، لەخولی سێزدەیەمی شانۆی هەڵبژاردن ویستی بەدێواندن و پیلانگێڕی دژ بەئەم بزوتنەوەیە، پێناسەی راستەقینەی بزوتنەوەکە بگۆڕێت و بەلاڕێیدا بەرێت و واتای دڵخوازی خۆی پێ ببەخشێت!

خامنەئی بەر لەخولی سێزدەیەمی شانۆی هەڵبژاردنی ئەمساڵ لە 18ی حوزەیران، بەفەرمی باسی لەوەکرد کە خوازیاری حکومەتێکی (گەنج) و (حزبوڵڵایی)یە و نموونەکەیشی بە (قاسم سلێمانی) هێنایەوە کە هەڵگری دوو مەسجی روونە: (لاوازی و لاوازبوونێکی لە رادەبەدەری رژێم) و (پیداگریی ویلایەتی فەقێ لەسەر سەرکوتکردن و گرژبوونەوەی زیاتری دەسەڵات).

بە لای ئەوانەی شارەزان لەسەر رژێمی دیکتاتۆریی ئایینی لەئێرانەوە، روون و ئاشکرایە کە عەلی خامنەئی سەرباری ئەوەی، کاردانەوەو دەرهاویشتەکانی ئەم بڕیارەی بەلاوە روون بوو، بەڵام ناچار بوو ئەم بڕیارە دەربکات و بەپێویستی زانی لەپێناو مانەوەی رژێمەکەی، (ئیبراهیم رئیسی)ی بخاتە سەر دەسەڵات و هەرسێ هێزی سەرەکیی دەسەڵات قۆرخ بکات. لەکاتێدا هەموو لایەک ئاگادارن کە رەئیسی تا تەوقی سەر، دەستی سوورە بەخوێنی خەڵک و زیندانیانی سیاسی!

ئیبراهیم رەئیسی کەسێکە تەنانەت لەناوخۆی دەسەڵاتی ویلایەتی فەفیهیشدا تۆقاون لەهاتنە سەر کاری. لەبیرمان نەچێت، زۆرێک لەمۆرەکانی ئەم رژێمە، هەر لەلایەن ئەو دەسەڵاتەوە بەشێوەی مافیایی بێسەروشوێن کراون!

خامنەئی خومەینی نییە بەڵام!

خامنەئی سەرباری ئەوەی خومەینی نیەو ناشتوانێت خومەینی بێت، بەڵام لەهەلە ناسک و هەستیارو مێژووییەکاندا هەروەک خومەینی کاری کردووە:

خومەینی لەکۆتایی مانگی جۆزەردانی ساڵی 1981 هەستی بەوە کرد دەسەڵاتەکەی لە رووخاندایە، هەر بۆیە فەرمانی کرد بۆ کوشتاری ئەو خۆپیشاندانە (500) هەزار کەسییە جەماوەرییەی موجاهیدینی خەلق کە رژابوونە سەرشەقامەکان تاران بۆ راماڵینی دەسەڵات. (7) ساڵ دواترو لەساڵوەگەریی ئەم خۆپیشاندانەدا، کاتێ خومەینی دوای ئۆپەراسیۆنێکی (ئەڕتەشی ئازادیبەخشی میللی) لەناوچەی (مێهران)ی سەر بەپارێزگای ئیلام، ترسی رووخاندنی لا درووست بوو، دەستبەجێ و بەشێوەیەکی چاوەڕوان نەکراو، پەرداخی ژەهری (ئاگربڕ)ی شەڕی نێوان ئێران و عێراقی خواردەوە (وەک خۆی وتی) و بڕیارنامەی 598ی رێکخراوی نەتەوەیەکگرتووەکانی قبوڵ کرد، تا رژێمەکەی لەفەوتان قوتار بکات. هەر بەو پێیە بوو کە خامنەئی لەمانگی گەڵاڕێزانی 2019 فەرمانی کوشتاری راپەڕینکارانی شارەکانی ئێرانی دەرکردو سەرەتا (هێڵی ئینتەرنێت)یان بڕی و ئینجا زیاتر لە (1500) گەنجی راپەڕیوی ئێرانیان بەشێوازی جیاجیا کوشتار کرد. چۆن لەو رۆژانەدا، راپەڕینی گەل لەهەموو شوێنەکانی ئێران بەرەو ئەوە ملی نابوو کە لەپەیوەند لەگەڵ دەزگای رێبەرایەتیی راپەڕیندا، رژێمی ئێران بەتەواوی راماڵن!

دەرهاویشتەکانی هاتنەسەر کاری ئیبراهیم رەئیسی

ئێستا پێدەچێت لۆژیکیانە بێت کە بەدەستپێکی سەرۆکایەتیی ئیبراهیم رەئیسی، هاوکات لەگەڵ پەرەسەندنی سەرکوتکردن لەناوخۆی ئیران و تیرۆرکردن لەدەرەوەی ئێران، وتووێژەکانی تایبەت بە (رێککەوتننامەی ئەتۆم)یش بگاتە بنبەست. هەروەها پێشبینی ئەوە دەکریت لەناوخۆی ئێران، شەپۆلێکی (قەتڵی زنجیرەیی) جیابیران و تەنانەت کەسانی بەناو ریفۆرمخوازو رەخنەگر دەستپێبکاتەوە. چۆن رەئیسی بۆ ئەم کارە خراوەتە سەر کورسیی دەسەڵات. خامنەئی و رەئیسی بەهۆی ناهاوسەنگییەکانی دواقۆناغی دەسەڵات، سڵ ناکەنەوە لە (خۆخۆری). واتا خەڵکانی نزیک لە رژێم بێسەروشوێن بکەن. هەر لەم رێڕەوەدا بینەری شەپۆلێک لەتیرۆرو دەستتێوەردان لەکاروباری وڵاتانی تر دەبین کە تیرۆری موسا باباخانی لەنموونە هەرە تازەکانیەتی.

کاردانەوەکانی بەسەرۆککردنی ئیبراهیم رەئیسی!

یەکەم گریمانەو لێکدانەوەکان دەربارەی شانۆی ئەندازیاریکراوی هەڵبژاردن لەئێران و ئەگەری بەسەرکۆمارکردنی ئیبراهیم رەئیسی و لەئەنجامدا، بەڕێوەچوونی شانۆکە، شەپۆلێک کاردانەوەی بەدوادا هات لەمیدیاکان و کۆڕو کۆمەڵە سیاسییەکانی جیهاندا:

*دوای کۆتاییهاتنی شانۆی هەڵبژاردنەکانی رژیمی ئیران، رێکخراوی لێبوردنی نێونەتەوەیی دەستبەجێ رایگەیاند: ئیبراهیم رەئیسی «ئەندامێکی دەستەی مەرگ بووە لەناو زیندانەکانی تاران لەساڵی 1988دا، کەتیایدا چەندین هەزار زیندانیی سیاسیی لەسێدارە دراون، کە لەدەرەوەی یاسادا بڕیاریان بۆ دەرکراوە»و «رەئیسی لەبری وەرگرتنی دەسەڵات، بەپێی یاسای نێودەوڵەتی، دەبێ بخرێتە بەر لێکۆڵینەوە لەسەر تاوانەکانی».

*ئاژانسی رۆیتەرز رایگەیاند «واشینتۆن و گروپەکانی مافی مرۆڤ، ئیبراهیم رەئیسی بەبەرپرس دەزانن لەئیعدامکردنی هەزاران زیندانیی سیاسی لەساڵی 1988 کە لەدەرەوەی بازنەی دادوەریدا ئەنجام دراون». وال ستریت ژورناڵ نووسی «لەساڵی 1988 ئیبراهیم رەئیسی لەهەنگاوێکی دوور لەبازنەی دادوەری، هەزاران زندانیی سیاسیی نەیاری حکومەتی لەسێدارە داوە».

*جاوید رەحمان ریپۆرتەری رێکخراوی نەتەوەیەکگرتووەکان وتی: «کاتی ئەوە هاتووە ئێستا کە رەئیسی بووەتە سەرکۆماری رژێمی ئێران، ئێمە لێکۆڵینەوە بکەین لەسەر ئەو رووداوانەی تایبەت بەساڵی 1988 و بزانین دەوری ئەو کەسانە لەو قەتڵوعامکردنەدا چۆن بووە... ئەگینا ئێمە نیگەرانیمان زۆر زۆرە لەسەر ئەم سەرکۆمارەی ئێران و دەوری ناوبراو لە قەتڵوعامکردنەکەدا».

*سەدان وەزیرو کەسایەتی و پەرلەمانتاری دیار لەوڵاتانی جیاجیای جیهانەوە، لەوانە وەزیری پێشووی کاروباری دەرەوەی ئەمریکا، مایک پۆمپیئۆ، سەرۆک وەزیرانی وڵاتی ئۆسلۆنی، یانس یانشا، لەکۆبوونەوەی ساڵانەی نەیارانی رژێمی ئێران، کە لەڕۆژانی 10 بۆ 12ی یۆلیۆ بەڕێوەچوو، دووبارەیان کردەوە کەپێویستە لێپرسینەوە بکرێت لەئیبراهیم رەئیسی.

*سەدان زیندانیی سیاسیی ئێرانی کە توانیویانە لەزیندانەکانی رژێم رابکەن، دژ بە ئیبراهیم رەئیسی رایانگەیاندووە کەخوازیاری لێکۆڵینەوەو لێپرسینەوەن تایبەت بەقەتڵوعامکردنەکانی ساڵی 1988.

*لەڕۆژی 7ی بانەمەڕی 2021 زۆرینەیەکی ئەندامانی کۆنگرێسی ئەمریکا سەر بەهەردوو حزبی سەرەکیی ئەو وڵاتە لەبەیاننامەیەکی هاوبەشدا بەژمارە (118)، وێڕای ئاماژەدان بەقەتڵوعامکردنەکانی ساڵی 1988رایانگەیاند: «کارناسانی رێکخراوی نەتەوەیەکگرتووەکان وریاییان داوە کەئەم قەڵوعامکردنە دەکرێت وەک (تاوانی دژ بەمرۆڤایەتی) دابنرێت. لەبەرئەوەی رێکخراوی نەتەوەیەکگرتووەکان بانگەشەی کۆمەڵگەی نێونەتەوەیی کردووە بۆ لێکۆڵینەوە، وڵاتە یەکگرتووەکانی ئەمریکا دەبێ بەشداربێت لەهەموو لێکۆڵینەوە نێونەتەوەییەکان دەربارەی قەتڵوعامکردنەکانی ساڵی 1988».

بڵاوبوونەوەی شریتێکی مێژوویی!

چەند رۆژ دوای ئەکتیڤبوونی (بزوتنەوەی دادخوازی) لەساڵی 2016، (ئەحمەد مونتەزیری) شریتێکی دەنگیی بڵاوکردەوە تایبەت بەچاوپێکەوتنی باوکی (واتا بەڕێز حسێنعەلی مونتەزیری، جێگری ئەوسای خومەینی) کە لەگەرماوگەرمی قەتڵوعامکردنەکەی ساڵی 1988دا بەدەستەی مەرگی وتبوو «مێژوو ناوی ئێوە وەک تاوانکارانی مێژوو تۆمار دەکات»، بەڕێز مونتەزیری بەدەستەی مەرگی وتبوو «تاوانی هەرە گەورە بەدەست ئێوە ئەنجامدراوە!».

شیاوی باسە کە وتەکانی بەڕێز مونتەزیری روو لەچوار ئەندامی دەستەی مەرگ، کە یەکێکیان ئیبراهیم رەئیسی بووە، بووەهۆی ئەوەی کەمونتەزیری لەپۆستەکەی دوور بخرێتەوەو تاکۆچی دوایی، لەماڵەکەیدا دەستبەسەر بکرێت.

بزوتنەوەی دادخوازیی!

یەکەم ئاستەنگی بەردەم ئیبراهیم رەئیسی لەپۆستە تازەکەیدا، کە لەیەکەم دەرکەوتنی ناوبراو وەک سەرۆک کۆماری رژێم لەبەردەم میدیاکاندا خرایەڕوو، قەتڵوعامکردنی زیندانیانی سیاسی لەساڵی 1988 بوو. لێکۆڵەران بەدووری دەزانن کە رەئیسی بتوانێت ئەم ئاستەنگە بخاتە پشت سەر. چون ئەم پرسە بۆ بیروڕای گشتی (وە نە تەنها لەئێران) زۆر گرنگە. لە یەکەم کۆنفڕانسی میدیایی رەئیسیدا، هەواڵنێری ئەلجەزیرە وتی: «هەر لەو رۆژەدا کە وەک سەرکۆمار راگەیاندراوی، رێکخراوی لێبوردنی نێونەتەوەیی وتی کە دەبێ لێپرسینەوەت لەگەڵدا بکرێت دەربارەی تاوانی دژ بەمرۆڤایەتی». کەچی رەئیسی لەوەڵامدا وتی «ئەوەی کردوومە بۆ داکۆکیکردن بووە لەمافەکانی مرۆڤ!».

رووداوەکانی تایبەت بەقەتڵوعامکردنەکانی ساڵی 1988

لەبەهاری ساڵی 1988 خومەینی شکستی هێنا لەشەڕی هەشت ساڵانەیدا لەگەڵ عێراق و بۆ مانەوەی رژێمەکەی، نەخشەیەکی شوومیتری داڕشت. خستنە بواری جێبەجێکردنی فەتواکەی پێشووی. واتا «قەتڵوعامکردنی ئەندامان و لایەنگرانی سازمانی موجاهیدینی خەلق لەناو زیندانەکاندا». هەر بۆیە:

*هەر لەمانگی خاکەلێوەی ساڵی 1988وە بەجیاکردنەوەی زیندانیەکان رێگە بۆ ئەو تاوانە خۆشکرا.

*بەپێی فەتواکەی خومەینی، بڕیاری لەسێدارەدان بۆ هەموو ئەندامان و لایەنگرانی موجاهیدینی خەلق دەرکرا. تەنانەت لایەنگرانی لایەنە سیاسیەکانی تریشی دەگرتەوە کە بەکردەیی لەناو بازنەی بەرەی موجاهیدیندا یەکیاندەگرتەوە.

*بەوتەی شایەتحاڵان و سەرچاوە و میدیاکانی رژێمی ئێران، زیات لە(30) هەزار زیندانیی سیاسی لەماوەیەکی کورتی دوو بۆ سێ مانگدا لەسێدارە دران.

*موقاوەمەتی ئێران تائێستا زانیاریی تایبەت بە (کۆمیسیۆنەکانی مەرگ)ی (70) شاریان لەئێران کۆکردووەتەوە.

*لەحاڵی حازردا لەسەرانسەری ئێران گۆڕی بەکۆمەڵ هەیە.

*هەندێک لەگۆڕە بەکۆمەڵەکان لەگۆڕستانەکان و هەندێکی تریش لەناو دارستان و دەشتاییەکاندان.

*ئەگەرچی زۆرێک لەگۆڕەکان کەشف نەکراون بەڵام زۆرێکیش کەشف کراون و رژێمی ئێران لەبەرئەوەی دەترسێت وەک بەڵگە بەکاربهێندرێن تایبەت بەقەتڵوعامکردنەکان، شوێنەکانی تێکداوە، کەخۆی بەڵگەی حاشەهەڵنەگرن لەسەر (ژینۆساید) و (تاوانی دژ بەمرۆڤایەتی).

*هەر هەموو سەران و کاربەدەستانی ئێستاکەی رژێم لەهۆکاران و بەڕێوەبەرانی ئەم قەتڵوعامکردنانەن.

*رێکخراوی لێبوردنی نێونەتەوەیی زۆر جار خوازیاری هەنگاونانێکی بەپەلە بووە بۆ رێگریکردن لەتێکدانی گۆڕە بەکۆمەڵەکان.

رژێمی ئێران بۆ تۆقاوە لەوەی لاوانی ئێرانی بەو تاوانە بزانن؟!

ئازادی تاک لەمافە هەرە سەروشتی و سەرەتاییەکانی مرۆڤە لەسەر زەوی. کەچی لەئێرانی ژێر دەسەڵاتی رژێمی ویلایەتی فەقیهیدا ئەوە(تاوان)ەو سزای توندی بەدوادا دێت. هەوڵی سیستەمیانەی کاربەدەستانی رژێم لەسەر ئەوە چڕە کەنەهێڵن خەڵک و بەتایبەت لاوانی ئێرانی دەنگی ئۆپۆزیسیۆن ببیستن یاخود رەنگیان ببینن و لە راستیەکانی رابردوو و ئێستای ئێران ئاگادار بن. ئەشکەنجە و سێدارە و سانسۆر و فیلتەرینگی میدیاو سۆشیال میدیاو دەرکردنی فەتوا دژ بەنەیاران و کوشتارو قەتڵوعامکردن و جینۆسایدکردنیش هەر بۆ ئەم مەبەستەیە. هەروەها تێکدانی مەزاری شەهیدانی قەتڵوعامکردنەکان لەقووڵاییەکانی زەویدا!

هاوکات لەگەڵ ئەم تاوانانە، دێواندن و دیپلۆماسیی هەڕەشەو تیرۆرو سیخۆڕیکردن و ناردنە دەرەوەی مۆرەکانی ئیتڵاعات لەژێر ناوی (رۆژنامەنوس) و (لێکۆڵەرو شرۆڤەکاری سیاسی) و بەکارهێنانی پاشماوەکانی رژێمی پێشوو و تەنانەت، کردنەوەو چالاککردنی هەندێک میدیای بریقەدار، هەر بۆ ئەو مەبەستەیە تا نەیاران بە (شەیتان) و خۆیان بە (نوێنەرانی خوا) یا خودی (خوا) بناسێنن و لەو رێگەیەوە خەڵکی ئێران بەکۆیلە بکەن و بەردوام بن لەدەسەڵات!

کاربەدەستانی کۆن و ئێستای ئەم رژێمە باش دەزانن کە ئەگەر ئەمکارانە نەکەن و نەوەی نوێ بە راستیەکان بزانن، زۆر بەخێرایی دەکەونە رێ و دەبنە شەپۆلێکی بەهێزی دژ بەدەسەڵات!

گرژکردنەوەی دەسەڵات!

لەدۆخێکی ئاوهادا، عەلی خامنەئی بۆ لەسەر پێ مانەوەی رژێمەکەی، پێویستی بەکەسانی گرژو ناب و بێ خەوشە بۆ ئەوەی پۆستەکانی رژێمەکەی پێ پڕبکاتەوەو رژێمەکەی یەکپارچەو بێ کەلێن بێت. بەسەرۆک کردنی ئیبراهیم رەئیسی لە نموونە هەرە زەقەکانی ئەم راستیەیە. لەبەرئەوەی شێوازی کاری هەموو رژێمە دیکتاتۆرەکان بووە لەمێژوودا کە لەسەروبەندی روخاندندا ئەمکارە بکەن.

دەرهاویشتەکانی بەڕێوەچوونی شانۆی هەڵبژاردنی ئەمساڵ

رژێمی ئێران لەبێ دەرەتانیدایە بەتەواوی و عەلی خامنەئی بەسیاسەتی (گرژبوون)، حکومەتەکەی یەکپارچە کردووەو بەیەکدەستکردنی هەرسێ هێزی سەرەکی، بەر لەهەر شتێک لاوازی و ناسکبوونی رژێمەکەی دەرخستووە. دواقۆناغی ئەم رژێمەیش هەر بەو مانایەیە.

*بایکۆتکردنی شانۆی هەڵبژاردنی ئەمساڵ لەلایەن خەڵکی ئێرانەوە، نەبوون و نەمانی رەوایەتی ئەم رژێمەی بەتەواوی دەرخست کە پێویستە ئەم رژێمە لابدرێت.

*ئەم بارودۆخەی ئێستای ئێران، بووەتە هۆی لێک نزیکبوونەوەی هەموو ئەو هێزو لایەنانەی (رووخێنەر) و بەرهەڵستکارانی ئەم رژێمەن. چۆن ئەو هێزو لایەنانە، چ بیانەوەێت یا نەیانەوەێت دەکەونە بەرەیەک و لە ئایندەیەکی نزیکدا زیاتر لێک نزیک دەبنەوە. هەروەک چۆن لەیەکەم خولی هەڵبژاردنی سەرۆکایەتیی کۆمار لەساڵی 1980دا، هاوکات لەگەڵ خەڵکی سەراسەری ئێران، هەموو هێزو لایەنە سیاسیە سەراسەری و هەرێمییەکانی ناو ئێران، لەدەوری کاندیداتۆریی بەڕیز (مەسعود رەجەوی) کۆ بوونەوە. کە ئەوەیش بووە هۆی دڵەراوکێی خومەینی لەسەرکەوتن و هاتنەسەرکاری ئەم کاندیدە جەماوەری و شۆڕشگێرە. هەر بۆیە بەخێرایی هاتە سەر خەت و بەپاساوی ئەوەی موجاهیدین دەنگیان بەدەستور (یاسای بنەڕەتی) نەداوە، بڕیاری سڕینەوەی ناوی مەسعود رەجەوی لەلیستی پاڵێوراواندا دەرکرد!

لەبەرچی رەوتی رووخاندنی دەسەڵات پێویستی بە (دەزگای رێبەرایەتی) هەیە؟

موقاوەمەتی ئێران لەم ساڵانەی دواییدا توانیویەتی ببێتە خاوەن سوپایەکی رێکخراو لەناو ئێراندا. ئەم موقاوەمەتە بە نیازە ئومێد بگەڕێنێتەوە بۆ ناو دڵی خەڵکی ئێراندا.

گردبوونەوەی ساڵانەی موقاومەتی ئێران کە ئەمساڵ لەڕۆژانی 10 بۆ 12ی مانگی یولیۆ بەڕێوەچوو، دیمەنێکی خستەڕوو لە ئامادەیی بۆ گۆڕانکاری لەئێران. جیا لەپانتایی و بەربڵاوبوونی گردبوونەوەکە، کە بریتی بوو لە (50) هەزار شوێن لە(105) وڵاتی جیهان و بەستنەوەیان بەشێوەی ئۆنلاین بەشوێنی هەزاران ئەندامی ئەم دەزگایە، پەیامی وێنەیی زیاتر لە (1000) ئەندامی شانەکانی شۆڕش (کانونهای شوڕشی) لەسەراسەری ئێران لەم گردبوونەوەیە بڵاو کرایەوە کەتیایدا لاوانی شۆڕشگێڕ ئامادەیی خۆیان بۆ رووخاندنی رژێمی ئێڕان دووبارەکردەوە!

لەم گردبوونەوەیەدا (1029) کەسایەتیی سیاسی و لەوانە (250) پەرلەمانتاری وڵاتانی ئەوروپی و کەنەدایی و وڵاتانی ئیسلامی و عەرەبی و (30) سیناتۆری ئەمریکی بەشدارییان هەبوو. جیا لەوانەیش، (11) سەرۆک وەزیرو (70) وەزیری پێشووی ئەوروپی و ئەمریکای باکورو رۆژهەڵات و هەروەها (30) کەسایەتیی دیاری ئەمریکیش بەشداربوون کە خۆی دیمەنێک بوو لەچەتری سیاسی و دیپلۆماتی و نێودەوڵەتی بۆ راپەڕینی خەڵکی ئێران.

چەند خاڵێکی بەرجەستەی رۆژی سێیەمی ئەم گردبوونەوەیە کە تایبەت بوو بەبزوتنەوەی دادخوازیی زیندانیانی سیاسیی قەتڵوعامکراوی ساڵی 1988 بریتین لە:

*ئیبراهیم رەئیسی دەبێ بخرێتە بەردەم دادگایەکی نێوەدەوڵەتی.

*گفتوگۆکردن لەگەڵ ئەم رژێمە وەک (بانکەوانی تیرۆر لەجیهان) هەروەک رابردوو بێ دەرەنجام و بێ سوودە.

*هەبوونی ریفۆرمخوازو مۆدێرە لەناو ئەم رژێمەدا تراویلکەیەو بەس!

*خەڵکی ئێران بەکەمتر لە رووخاندنی ئەم رژێمە رازی نابن.

*کەوایە تاکە رێگای گۆڕانکاریی راستەقینە لەئێران، پشتیوانیکردنە لەمقاوەمەتی بەتوانای ئێران و راپەڕینی جەماوەریی.

سەرۆک وەزیرانی ئوسلۆنی، بەڕێز یانس یانشا، کەهاوکات سەرۆکی خولی مانگانەی (یەکێتی ئەوروپا) بوو، لەوتارەکەی خۆیدا لە رۆژی یەکەمی گردبوونەوەکە داوای کرد لێکۆڵینەوەکی نێودەوڵەتی بکرێت دەربارەی دەوری رەئیسی لەقەتڵوعامکردنەکەی ساڵی 1988و تەئکیدی کرد کە: «دەبێ لێپرسینەوە بکرێت لەڕژێمی ئێران لەمەڕ پێشێلکردنی مافەکانی مرۆڤ و کۆمەڵگای جیهانیش دەبێ لەم بوارەدا هەڵوێستی توندتر لەخۆی نیشانبدات.

لەم کۆبوونەوەیەدا، وەزیری پێشووی کاروباری دەرەوەی ئەمریکا، (مایک پۆمپیئۆ)یش وتارێکی هاوشێوەی پێشکەش بەگردبوونەوەکە کرد.

ریزبەستنی دوو لایەنی دژ بەیەک!

لەمڕووەوە لایەنانی ئەم ململانێ مێژووییە، بەرانبەر بەیەک ریزیان بەستووەو بەچوونە رێزی لاوانی بەوزەو بەورە بۆ ناو راپەڕین و ناڕەزایەتییەکانی دژ بەدەسەڵات، (زەنگی خەتەر) بۆ ئەم رژێمە لێدراوە!.

هەمووان دەزانن و کۆمەڵگای مرۆڤایەتی شایەتە کە رژێمی ئێران لەبنەڕەتدا دوژمن بەمافەکانی مرۆڤ و یاسا مرۆییەکانەو تاوانەکانی خۆی لەژێر ناوی «یاسا و سزای ئیسلامی» ئەنجام دەدات. لەکاتێکدا بەباوەڕی ئیسلامناسان و پسپۆڕانی پەیوەندیدار، رژێمی ئێران ئەوەی دەیکات دژ بە ئیسلام و موسوڵمانانەو هیچ پەیوەندییەکی بەئیسلام و قورئان و خوداوە نییە.

ئەوەی راستی بێت، هیچ پەیوەندییەکی هێمانە بوونی نیە لەنێوان رژیمی سەرکوتکەری ئێران و خەڵکی ئێران. پاش رژێمی ئێران، گەلانی جیهان لەم راستیە گەیشتوون.

ئێستا لەدواقۆناغی ئەم رژێمەدا، هەر داواکارییەکی غەیرە سیاسی و سینفی زۆر بەخێرایی دەچێتە قاڵبی سیاسییەوە. واتا دەبێتە داواکاری بۆ گۆڕینی دەسەڵات کە خۆی نیشانەیەکە بۆ ئەم هەلومەرجە رەخساوەی ئێران. چون خەڵکی ئێران وەڵامی برسێتی و تینویەتی و بێکاری و گرانی و سەرکوت و پێناسەی خۆی لەوەدا دەبینێتەوە کە رژێمی دیکتاتۆریی دەسەڵاتدار نەمێنێت. ئەوەیش هەر ئەو شتەیە کەمقاوەمەتی ئێران زیاتر لە (40) ساڵە، بێوچان، لەپێناویدا خەباتی بۆ کردووە. کەوایە کاتی شۆڕش و راپەڕین پێگەیشتووە و بەهەڵکەوت نیە کە خامنەئی و رژێمەکەی تۆقاون لەپەیوەندیی نێوان خەڵک و مقاوەمەتی ئێران.

رێوڕەسمی هاتنەسەرکاری رەئیسی!

ئیبراهیم رەئیسی لەم رێورەسمەدا وتی کەداکۆکیکاری ئاشتییە لەجیهان و هاوکات وتیشی ئێمە پشتیوانی هێزە نیابەتییەکانمانین. لەهەرکوێیەک کە هەن!. هەروەها وتی کە رژێمی ئێران «دروستکەرو دابینکەری ئاسایشە» کە هێرشەکەی ئەمدواییانەی رژێم بۆ سەر کەشتییە بازرگانیەکەی (مێر سەر ستریت) یا تیرۆری کاک موسا باباخانی لەهەولێر لەنموونە هەرە تازەکانیەتی.

لەم دواییانەشدا پاسدار عەلی شەمخانی، سکرتێری ئەنجوومەنی باڵای ئاسایشی نیشتمانیی ئێران لەکۆبوونەوەی لەگەڵ وەزیری کاروباری دەرەوەی عێراق، باسی لەبوونی گرووپە «چەکدارەکانی دژبەری ئێران» لەهەرێمی کوردستان کردووەو وتوویەتی کە «دەبێت عێراق ئەو گروپانە دەربکات بۆ ئەوەی ئێران ناچار نەبێت «بۆ رێگریکردن لەشەڕەنگێزی بەردەوامیی» ئەو گرووپە «چەکدارانە دەستپێشخەری بکات». کە خۆی باس لەسیاسەتی شووم و پێناسەی نەگۆڕی ئەم رژیمە ناسەردەمیانە دەکات.

دەرەنجام و ئاسۆی رووداوەکان!

لەکەس شاراوە نیە کە براوەی سەرەکیی شانۆی هەڵبژاردنەکانی ئەمدواییانەی رژێمی ئێران، (خەڵکی ئێران)ە و سەرچاوە و میدیاکانی رژێمیش دانیان بەوەدا ناوەو حاشای لێناکەن کەزۆرینەی خەڵکی ئێران بەشدارییان نەکردووە لەم شانۆیەدا!

دوای یەکپایە و یەکپارچەکردنی دەسەڵات، دواقۆناغی مانەوەی ئەم رژێمە دەستیپێکردووەو گەلانی جیهان بەچاوی خۆیان بینیویانەو هەست بەوە دەکەن کە لەم خولەی سەرۆکایەتیی کۆماری مەلاکان، خەڵکی ئێران بەسەر دیکتاتۆرییەتی دەسەڵاتداردا سەردەکەوەێت.

سەرکەوتنی خەڵکی ئێڕان بەسەر رژێمدا شتێکی بەهەڵکەوت نابێت و رەوتێکی رێکخراوو رێنوێنیکراوەو خاوەن رێبەرو دەزگای رێبەرایەتیی خۆیەتی و ئاڵتەرناتیڤێکی دیموکراتی و بەئەزموون و ئامادە، بوونی هەیە کەشۆڕشی گەل بەرەوپێشبەرێت و رێگر بێت بەرانبەر پشێوی و ئەگەری دەرهاویشتەکانی ئەم قۆناغە.

هەلومەرجی عەینی و راستەقینە بۆ ئەم گۆڕانکارییە ئامادە کراوە. چۆن بەر لەهەر شتێک، خەڵک خوازیاری کۆتاییهانن بەم رژێمەو خوێنی زۆری لەپێناودا پێشکەشکردووە.

مقاوەمەتی ئێران لەم ساڵانەی دواییەدا، لەسەراسەری خاکی داگیرکراودا، پوتانسیەل و توانای ماددی و گیانی پەیدا کردووە بۆ پێکهێنانی سوپایەکی جەماوەری، و هەر بۆ ئەم مەبەستە «دامەزرێنەرانی خولی پێنجەمی ئەرتەشی ئازادیبەخش»ی راگەیاندووە.

دواقۆناغی رژێمی ئێران، قۆناغی هەڵمەتبردنی خەڵک و مقاوەمەتی ئێرانە لەهەردوو دیوی سنورەکانی ئێراندا. لەم قۆناغەداو لەدەرەوەی سنورەکاندا، سەران و کاربەدەستانی ئەم رژێمە رادەستی دادگای نێودەوڵەتی دەکرێن و لەناوخۆی ئێرانیشدا، رق و تووڕەیی جەماوەر دژ بەڕژێمی ئێران دەگاتە لوتکە. ئەمانەش وەک تایبەتمەندیی ئەم قۆناغە!

*نووسەرو لێکۆڵەری سیاسی