ئەنوەر حسێن(بازگر)

پاش یەكساڵ كاری چڕوپڕی موخابەراتی و نهێنی، داعش بەئامادەسازی تەواو، پەلامارو هێرشی بۆ سەر زیندانی سەناعە لەغوێران بەڕێوەبرد، كە بەتەنها و تەنها هەرگیز داعش ناتوانێت پلان و سیناریۆی وەها دابڕێژێت، مەگەر میت و موخابەراتی سوریاو لایەنی تر بەشدار نەبووبن.

سیناریۆكە ئاوا داڕێژراوە

«نەخشەی كارەكە لەسەرێكانیەوە بە هاوكاری توركیا لەمانگی ئازارو نیسانی 2021 داڕێژراوە، شانە نووستوەكانی داعش لەغوێران وجودییان هەبوو، وردە وردە، تاك تاك و گروپ گروپ گەڕانەوە غوێران و رۆژانە كاریاندەكردو چاودێری زیندانەكە و جموجوڵی هەسەدەو هێزەكانی ئاسایشییان دەكرد، دواتر لەڕێگای جۆراوجۆرەوە بەنهێنی چەك، تەقەمەنی، ئۆتۆمبێل و پێداویستی جۆراوجۆرییان بۆ رەوانە كراوە»، واتا لەماوەی ئەو هەشت مانگەدا، (200) چەكداری داعش لەناوچەكانی سەرێكانێ و گرێ سپی و روومادییە، نێردراونە ناو گەڕەكی غوێران و دەروبەری زیندانەكە، چەك و تەقەمەنییان گواستۆتەوە بۆ ناو ئەو ماڵانە، هاوكات گیراوانی داعش لەناو زیندانەكەوە، پەیوەندییان لەگەڵ دەرەوە هەبووە، كە هەسەدە دەڵێت «زیاتر لە (5000) داعش لەو زیندانەدا، زیندانی كراون و چاوەڕوانی پەیامی دەرەوە بوون، تا دەستبدەنە یاخیبوون و شكاندنی دەرگای زیندانەكە و نانەوەی فەوزاو ئاژاوە»، پاش ئەمانە:

قۆناغی یەكەم: لەگەڵ ئامادەكاری تەواوی سیناریۆكە، فەرمانی هێرشدراو لەچوارڕیانی غوێران بە ئۆتۆمبێلێكی ئامادەكراوی بۆمبڕێژكراو، بە (50) كیلۆ (TNT) تەقێندرایەوە، كە سێ تانكەری سووتەمەنی لەو ناوچەیە هەبوون و هەموویان گڕیانگرت و بەردەم زیندانەكە بووە یەكپارچە ئاگرو گڕ.

قۆناغی دووهەم: رێگای سەرەكی زیندانەكە بەوشێوەیە دادەخرێت و لەدەست و كۆنتڕۆڵی هێزەكانی ئاسایشدا نامێنێت.

قۆناغی سێیەم: ئۆتۆمبێلی دووهەمی (TNT) رێژكراوی ئامادەكراو لەبەردەم دەرگای زیندانەكە دەتەقێندرێتەوە.

قۆناغی چوارەم: پاش تەقینەوەكان، شانە نووستوەكانی ناو ماڵ و هاوسێیەكانی زیندانەكە دێنە دەرەوەو دەستدەكەن بەتەقەكردن و شڵەژانی ناوچەكەو بەدیلگرتنی خەڵكی مەدەنی ناو گەڕەكەكان.

قۆناغی پێنجەم: دواتر ئۆتۆمبێلی ئامادەكراوی بەهێز خۆ دەكێشێت بەدیواری زیندانەكە و دەیڕوخێنێت و شانە نووستوەكانی دەچنە ناو زیندانەكەو چەك بەسەر زیندانییەكاندا دابەشدەكەن و چەندین ئاسایش و پاسەوان دیل دەكەن.

بەوشێوەیە كۆی پلانەكەی داعش، تا ئەو شوێنە وەك خۆی جێبەجێكراو تاڕادەیەكی زۆریش سەركەوتوو بوو، كە گومان دەكرێت دەزگای میت و موخابەراتی سوریا، رۆڵی گرنگیان هەبوو بێت، هاوكات لەگەڵ ئەم هێرشانە توركیا دەیویست پەلاماری چەند ناوچەیەك بدات، بەڵام بەهۆی ئۆپراسیۆنی هەسەدە لەحەسەكەو رەققا، دەستگیركردنی چەند شانەیەكی گەورەو گرنگی داعش پلانەكەیان دواكەوت، بەڵام هاوكات لەگەڵ پەلاماری زیندانەكەی غوێران، گروپەكانی سەر بەتوركیا پەلاماری زرگان، تل تەمر، عەین عیسایان داوە، وەكو تەواوكراوی سیناریۆكە، بەڵام سەركەوتوو نەبوون، بەتایبەت پاش ئەوەی لەدوایین دیداری ئەردۆغان و بایدن، واشنتۆن رازی نەبوو بە ئۆپراسیۆنی توركیا بۆ سەر رۆژئاوا، بەڵام سیناریۆكانی ئەوان شكستیان هێنا، لەبەرامبەردا هێزەكانی هەسەدە، جیا لەوەی بەرەنگاری ئۆپراسیۆنەكە بوونەوە، لەهەمانكاتدا پەیوەست بوون بەپەلاماری غوێران، هێزەكانی هەسەدە و ئاسایش گەڕەكەكانی غوێران و زهوریان گەمارۆدا و شەڕ كەوتە بواری پراكتیكییەوە، لە (20ی ژانیوییە)ی ئەمساڵدا، (150) چەكداری شانەی نوستوو، (200) داعشی تر كوژران.

سەرچاوەكانی زانیاریش باس لەوەدەكەن، كە پاش ئەوەی لە (30 كانونی یەكەم)دا، هەردوو دەزگای میت و هەواڵگری سوریا لەعەقەبەی ئۆردون كۆبوونەتەوە، ئاماژە بەو ئۆپراسیۆن و پەلامارە بۆ سەر غوێران كراوە، بەهەمانشێوە لەكۆبوونەوەی (21 كانونی یەكەمی 2021)یش لەدیداری ئاستانا لە نێوان توركیا، روسیا و ئێران، ئاماژە بەوە كراوە، كە ناوچەی باكور و رۆژهەڵاتی سوریا جێگەی مەترسین و باس لەوە دەكرێت، گەر هێرشەكانی داعش و سیناریۆكانی بۆ سەر غوێران سەركەوتوو بوایە، بەرنامە هەبوو، توركیا پەلاماری باكوری تل تەمرو سوریاش پەلاماری تەبقاو دێرەزوور بدەن.

ئەوەی جێگەی پرسیار و سەرنجە، یەك ساڵ كاری چڕوپڕ و نهێنی داعش، چۆن دەزگای هەواڵگری ئەمەریكا، بەو نەخشە و زانیارییانەی نەزانیوە، گەر زانیویەتی بۆ قسەیان نەكردووە؟

روونە، كە توركیا ویستوویەتی لەڕێگای ئەم پەلامارەوە دەست بەسەر حەسەكەو رێگای (M4)دا بگرێت، بەمشێوەیەش گەر هێز بكەوتایە دەست چەكدارانی داعش، ئەوا هەرێمی كوبانێ و جەزیرە پەیوەندییان پێكەوە نەدەماو بەوشێوەیەش پەیوەندی نێوان ئەم كانتۆنانە بەڕەققەوە دەبەستراو هەسەدە دەكەوتە ناو گەمارۆیەكی بەهێزی توركیاو داعش و چەكدارە بەكرێگیراوەكانی توركیا لەعەفرین و سەرێكانێ و گرێ سپی.

باس لەوە دەكرێت، لەكۆبوونەوەی عەقەبەی ئۆردون، سوریاش ئامادەگی دەربڕیوە لەپاڵ ئەو سیناریۆیەی توركیا، هێزەكانی رژێمی بەشار ئەسەد بەپشتیوانی روسیا، پەلاماری دێرەزوورو تەبقایان دەداو دەستیان بەسەر سەرچاوە نەوتییەكانی ئەو كێڵگانەدا دەگرت، كە تائێستا لەژێر دەستی هەسەدەدان و ئەمەریكاش چاودێرییان دەكات، داخستنی دەروازەكانی تەل كۆچەر و سێملكان ئاماژەیەكن بۆ ئەوەی پیلانێكی چنراوی جەمسەرە بەهێزەكانی ناوچەكە هەبووە بۆ كۆتاییهاتنی ئەزموونی رۆژئاوا و دەرپەڕاندنی ئەمەریكاو هاوپەیمانەكانی.

بەمشێوەیە توركیا، كە داڕێژەری سەرەكی پیلان و پلانەكەیە دەستی دەگرت، بەسەر عەین عیساو تل تەمرو لەملاشەوە فشاری زۆرتری دەخستەسەر یەكینەكانی پاراستنی شەنگاڵ (یەبەشە)، وەكو خۆی دەڵێ «سەر بە (PKK)ن، بۆ چۆڵكردنی شەنگاڵ»، واتا پاش داستانی كۆبانێ و داگیركاری عەفرین، هێشتا ئەو وڵاتانە دەیانەوێت كۆتایی بەئەزموونی خۆبەڕێوەبەری رۆژئاوا بێت، ئەگەرچی هەست بەو مەترسییەی پشتی پەردەش دەكەن، كەڕەنگە ئەو پشتیوانییەی ئەمەریكا، چەپی فەڕەنسی، حكومەتی سوید، پەرلەمانی برۆكسل و پشتیوانییەكانی ئەڵمانیاو ئیتاڵیا، لەهەر كاتێكی چاوەڕواننەكراودا، رۆژئاوا بكاتە وڵات، یان هەرێمێكی نێودەڵەتی دانپێدانراوی معترف و دیفاكتۆ.

هەسەدە، هەموو تواناو سەرمایەی ئینسانی و مرۆییەكانی بەكارهێناوە، بەرامبەر ئەو گەلەكۆمەكێیە دوژمنكارانەیە، بەڵام بەرپرسیارێتی گەورەش لەسەر ئەمەریكاو هاوپەیمانەكانی هەیە، كە داكۆكی لەم ئەزموونە بكەن، كە پڕیەتی لەعەدالەت، یەكسانی و ئازادی وەكو چەپە فەڕەنسییەكان دەڵێن «ئینتەرناسیۆنالی چوارەم، لەئێرەوە سەرهەڵدەدات»، ئەوانە هەمووی ئەوە نیشاندەدات كەكۆی ئەو پیلان و ئاژاوەگێرییانە، گەر بۆ لەناوبردنی ئەزموونی رۆژئاواش بێت، بەڵام ئامانجە سەرەكییەكە دژی پەكەكەیە.