عەبدولرەحمان گەوركی(مهاباتی)

ئەحمەد توەکلی، یەکێک لە بەرپرسانی پێشووی رژێم لەپارێزگاکانی باکووری ئێران، لەسەرەتای دەستبەکاربوونی (ئیبراهیم رەئیسی) گوتبووی کەژمارەی خەڵکانی هەژار لەئێران گەیشتۆتە 60 ملیۆن کەس و لە سەدا 72ی دانیشتوان پێکدەهێنن! میدیاکانی حکومەتیش بە بەردەوامی نووسیویانە کە (یەک لەسەر دوو) بۆ (دوو لەسەر سێ)ی خەڵکی ئێران لەژێر هێڵی هەژاریدان. بەوتەی ئابووریناسانی حکومەتیش، دۆخەکە لەساڵی 2022 خراپتر دەبێت و چارەنووسێکی زۆر خراپتریش چاوەڕێی گەلانی ئێران دەکات! جێگری سەرۆکی لێژنەی ئابووریناسان حکومەتیش گوتی: «ساڵی 2022 لەچاو ساڵی 2021 کێشەکان زیاتر دەبن» (تەسنیم 17دی 1400) ئێستا بە پەسەندکردنی پڕۆژە یاسای بودجەی حکومەت، مەجلیسی ئێران سەرقاڵی لابردنی ئەو 4200 تمەنەیە کە بۆ دۆڵار داینابوو. بەمکارەیش، دۆخەکە زیاتر بە ئازار بێت. (مەحبوب فەر)، پسپۆڕی سەر بەحکومەت دەڵێت « 60 ملیۆن ئێرانی لەخوار هێڵی هەژاریدان و 40 ملیۆنیش لە دۆخی هەژارییەکی رەهادان و پێویستییان بە نانی شەو هەیە» (ئیقتیسادی پویا، 18ی بەفرانبار). بارودۆخی رژێم لە کۆمەڵگای ئێستای ئێراندا!  بارودۆخی ئێستای کۆمەڵگای ئێران بەو شێوەیەیە کە لەشارەکانی ئێراندا بەردەوام خۆپیشاندانی جەماوەری، دەستەویەخەی رژێم بۆتەوە و رۆژانە بەرەو پەرەسەندن دەچێت و هاوکات بۆشایی نێوان باڵ و بۆندەکانی حکومەت بەرەو زیادبوون دەچێت.  لەنێو ئەم خۆپیشاندانانەدا ڕاپەڕینی گەورە هەن. وەک ناڕەزای دەربڕینی خەڵکی سیستان و بەلوچستان و خوزستان و جوتیارانی پارێزگای ئیسفەهان و چەندین خولی ناڕەزایی گشتیی مامۆستایان لەسەرانسەری پارێزگاکان و شارەکانی ئێران. لەم ناوچانەدا، چین و تووێژەکانی کۆمەڵگای ئێران بێگومان تەنیا نەبوون و چەندین جار لەلایەن خەڵکەوە پشتیوانیان لێکراوە.  شکستی ڕژێم لەسەر ئاستی ناوچەی رۆژهەڵاتی ناوەڕاست و نێودەوڵەتیدا!  رژێمی دەسەڵاتداری ئێران جگە لەو قەیرانگەلە کوشندانەی لەناوخۆی ئێران بەڕەوڕووی بۆتەوە و باس لەدواقۆناغی مانەوەی ئەم رژێمە دەکات، لەئاستی ناوچەکە و لە ئاستی نێودەوڵەتیشدا دەستەویەخەی قەیرانگەلێکی سەخت بۆتەوە کە هاوکات و هاوتەریبەت لەگەڵ قەیرانە ناوخۆییەکانی.  شکستی ئابڕووبەرانەی دانوستانەکانی ڕژێم لەگەڵ سعودیەو وڵاتانی ئەوروپا لەسەر کێشە هەرێمی و نێودەوڵەتییە جۆراوجۆرەکانی نێوانیانداو هەروەها گفتوگۆ لەگەڵ وڵاتانی رۆژئاوا لەسەر پرۆژەی ناوکی، ئابڕووچوون و شکستی رژێمی ئێران لە هەڵبژاردنەکانی ئەم دواییانەی عێراق و پێکهێنانی حکومەتی نوێ لەو وڵاتەداو دووبارەبوونەوەی شەرمەزارکردنی رژێمی ئێران لە ئاستی نێودەوڵەتی لەمەڕ پێشێلکاریی بەردەوامی مافەکانی مرۆڤ لە ئێران و دادگاییکردنی یەکێک لە تاوانبارانی رژێم لەساڵی 1988 لە دادگای سوید بەناوی (حەمید نووری)، بەهۆی رۆڵی ناوبراو لە قەتڵوعامکردنی زیاتر لە 30 هەزار زیندانی سیاسی لەزیندانەکانی رژێم لە ساڵی 1988 و هەروەها ئابڕووچوونی زیاتری رژێم لە بەردەوامبوونی دادگای بلژیکا و دەرچوونی سزای قورسی دیپلۆمات و تیرۆریستانی ئەم رژێمە، لە نموونەکانی ئەم قەیرانانەی رژێمی ئێرانن.  هەروەها دەبێ ئەوانەیشی لەسەر زیاد بکرێن، خۆ بەزل نواندنی ئێران، خۆی و لەناویشیاندا بە قارەمان نواندنی پاسدار (قاسم سولەیمانی)، کە دوو ساڵ لەمەوبەر سزا دراو هەروەها ئابڕووچوونی زیاتری رژێم لە دووەمین ساڵیادی خستنە خوارەوەی فڕۆکەی ئۆکرانیا و گردبوونەوە و ناڕەزایەتی دەربڕینی بنەماڵەی قوربانیان ئەم رووداوە و هەڵوێستی زۆر لەدەوڵەتان. دۆخی روو لە تەقینەوەی کۆمەڵگای ئێران!  ئێستا بڵاوبوونەوەی هەژاری لە ئێران گەیشتووەتە ئاستێک کە بە وتەی پسپۆڕێکی رژێم بە ناوی (مەحبوب فەر) ‹بڵاوبوونەوەی هەژاری لەئێران چووەتە قۆناغێکی نوێوە. ڕێژەی ئێستای هەژاری لە ئێران لە 100 ساڵی رابردوودا بێوێنە بووە و لەماوەی سێ ساڵی رابردوودا رێژەی ئاپۆرەی هێڵی نەداری دوو هێندە زیادی کردووە» (سایتی ئیقتیسادی پویا 18ی بەفرانباری 1400). (عەبدولڕەزا میسری)، وەزیری پێشووی کاری رژێمیش دانی بەوەدا نا کە «قەیرانێکی مەترسیدار بەڕێوەیە کە زۆر جدیترە لەوەی هەندێک کەس بە بیریاندا دێت» (تەلەفزیۆنی تۆڕی دیکۆمێنتاری 18ی بەفرانباری 1400). ئێستا لە هەموو کات زیاتر بارودۆخی کۆمەڵگای ئێران بەرەو تەقینەوە دەچێت. ناڕەزایەتی و خۆپیشاندان لە چوار قۆڵەوە لەناو سنوورەکانی ئێران پەرەی سەندووە و ئەمەش وای کردووە دەسەڵاتی ئێران تووشی شۆک بێت. پەرەسەندنی قەیرانەکانی رژێم هەڵقوڵاوی کێشە و بەرەنگاربوونەوەی خەڵکە بەرانبەر بەحکومەت و بە تایبەتی بەرانبەر بەعەلی خامنەئی کە رەوایەت و شەرعییەت و مانەوەی ئەم رژێمەی بەرەوڕووی کێشەگەلێکی زۆری کردۆتەوە.  رۆژی 18ی بەفرانباری 1400 لە دووەمین ساڵیادی بە ئەنقەست خستنە خوارەوەی فڕۆکەی ئۆکراینی، خانەوادەی 176 سەرنشینی بێتاوانی ئەم فڕۆکەیە گردبوونەوەیەکیان سازکرد بۆ دادخوازیی خوێنی قوربانیانی ئەو تراژیدیایە. یەکێک لەوان خرۆشا کە: جۆرێک دەنگ هەڵبڕین «دادخوازی» کە حکومەت بلەرزێت. دایکی یەکێک لە قوربانیانیش بە دەنگێکی بەرزەوە وتی: من تەنیا سکاڵام لەسەر عەلی خامنەیی و فەرماندەکانی پاسدارانە. دایکی قوربانییەکیش هاواری کرد: مەرگ بۆ خامنەیی!  بەمجۆرە ئەو تاوانەی عەلی خامنەیی دەیویست پەردەپۆشی بکات، بە ئاراستەیەکی جیاوازدا ملی ناو ئێستا خوێنی قوربانیانی بێتاوانی ئەم تاوانە گەورەیە، تێکەڵ بوو بەبزووتنەوە مەزنەکەی دادخوازیی خەڵکی ئێران لەمەڕ قەتڵوعامکردنی زیندانیانی سیاسی و بزاڤی دادخوازیی خوێنی 1500 کەس لە راپەڕینکارانی گەڵاڕێزانی 2019.  هەلومەرجی ئێستای ئێران!  هەموو بەڵگەکان باس لەو راستییە دەکەن کە ئێران لە سەروبەندی گۆڕانکارییەکی گەورەدایە. قەیرانەکان گەیشتوونەتە خاڵێکی بێ گەڕانەوەو «هەڵچوون و سەرهەڵدان» لە هەر ساتێکدا چاوەرێی دەکرێت. کەڵەکەبوونی ناڕەزایەتییەکان لەناوەوە و دەرەوەی ئێران (زەنگی خەتەر)ی نێوان دوو بەرەی تێهەڵچووی لێداوە.  لەلایەکەوە، دەسەڵاتدار، بە نکۆڵیکردن لە بوونی هەلومەرجی روو لە تەقینەوەو دێواندن دژ بە ئۆپۆزسیۆن و تاکە جێگرەوەی ئەم رژێمە واتا (ئەنجومەنی نیشتمانیی موقاوەمەتی ئێران) و گرتنەبەری رێوشوێنی سەرکوتکردن و دروستکردنی کەشی گرتن و لەسێدارەدانی لەناکاو و کردەوەی تیرۆریستیی لە دەرەوەی سنورەکان دژ بە ئۆپۆزیسیۆن لەگۆڕەپانەکەدا پەلەقاژەیەتی بۆ مانەوەی لەدەسەڵات. بە جۆرێک کە ئەم راستیە هەر دێت و زیاتر دەردەکەوێت کە هێنانە سەرکاری (ئیبراهیم رەئیسی)یش هەر بۆ ئەم مەبەستە بووە.  لەلایەکی ترەوە و هاوکات لەگەڵ هەڵکشانی قەیرانەکانی ئێران، موقاوەمەتی ئێران لەئامادەکاریدایە بۆ چوونە ناو دۆخێکی نوێوە. چونکە دۆخەکە پێش هەموو شتێک بەرهەمی خەباتی 40 ساڵەی گەل و موقاوەمەتی ئێرانە. ئەگەر بەرانبەر بەو رژێمە موقاوەمەتێک لە ئارادا نەبوایە، بێگومان ئەم دۆخە هەرگیز نەدەهاتە ئاراوە! واتا ئەو دۆخەی کە لەهەموو روویەکەوە، راپەڕین و شۆڕش بۆ گۆڕانکاریی لە هەناودایە!  پەیوەندی نێوان گەل و موقاوەمەتی ئێران ئێستا لەهەموو کات زیاتر، موقاوەمەتی ئێران ئەم راستییەی سەلماندووە کە تاکە ئەڵتەرناتیڤی دیموکراتە بەرانبەر بەم رژێمە. واتا ئەم موقاوەمەتە کە لەناوخۆی ئێراندا بێ هاوتایە و تێکەڵی ناڕەزایەتی دەربڕینی جەماوەرو خۆپیشاندانە جەماوەرییەوەکان بووە و لەناو خەڵکدا بەربڵاو هەبوونی خۆی دەرخستووە.  لەساڵیادی کوژرانی پاسدار (قاسم سلێمانی) لە 15ی بەفرانباری ئەمساڵ، بەرپرسانی حکومەت لە شاری (شەهریکورد) لە پارێزگای چوارمەحالی بەختیاری، پەیکەرێکی (قاسم سلێمانی)یان دروست کرد. ئاژانسی هەواڵی دانشجوی سەر بەحکومەت بڵاویکردەوە، کە پەیکەرەکە 6 مەتر بووە و پاش پەردەلادانی لەسەری بەفەرمی، ئاگری تێبەردراوە. رۆژنامەی تەلەگرافی لەندەن لەم پێوەندییەدا نوسیویەتی کە پەیکەرەکە لەلایەن «یەکینەکانی موقاوەمەت» ەوە ئاگری تێبەردراوە . ئێستا هەبوون و چالاکی یەکینەکان (کانونی شۆڕش)ی پێوەندیدار بە موقاوەمەتی ئێرانەوە لە ناوخۆی ئێران بووەتە راستییەکەی حاشاهەڵنەر لەم هەلومەرجەی ئێستادا، (یەکینەکانی شۆڕش) بوونەتە مەترسییەکی جدی بەلای بەرپرسانی رژێمەوە. چونکە ئەرکی سەرەکیی یەکینەکان، بریتییە لە گۆڕینی ئەم هەلومەرجە بەرەو (شۆڕش) و (راپەڕین) و رووخاندنی رژێمی ئێڕان. ئەوان سوورو پێداگرو بەتوانان لەم وارەدا کە رەوتی ناڕەازیەتیەکان و خۆپیشاندانەکان بەرە رەوتێکی بەردەوام بەرن.  دەوری یەکینەکانی شۆڕش لە ناو ئێران بەئامانج گرتنی هێماکانی سەرکوتکردن و ناوەندەکانی سەرکوتکردن لەئێران لە لایەن یەکینەکانی شۆڕشەوە، هەیمەنەی حکومەت خستووەتە ژێر پرسیارەوە و دیوی لاوازو نزمی حکومەتی خستووەتە روو!  کەواتە بەهەر ئۆپەراسیۆنێکی یەکینەکان، توێکڵی سەرکوتکردن و شەوەزەنگ لەناو ئێران لادەدرێت و رێخۆشکەرە بۆ خۆپیشاندانی کۆمەڵایەتی فراوانتر لەناو ئێراندا.  گەشەسەندنی خۆپیشاندانی جەماوەری و راپەڕینە جەماوەرییەکان و چالاکییە بەربڵاوەکانی یەکینەکانی موقاوەمەت، رێڕەوێکە کە شانەکانی شۆڕش لەڕێگەی چالاکییەکانیانەوە، توانیویانە بازنەیەک لەسەر مانەوەی رژێم توند بکەنەوە و خەڵکێکی زیاتر بهێننە پێشەوە بۆ داخوازییەکانیان. چونکە ئێستا خەڵک خاوەنی هێزێکی سەرکردایەتی و رێبەرایەتییە. خەڵکی وەزاڵەهاتووی ئێران و ئۆرگانی رێبەرایەتیکاری راپەڕینەکان دەتوانن لەپەیوەندییەکی نزیکدا چیان دەوێت بەدەستی بهێنن!  خەڵکی ئێران ڕقیان لەدەسەڵاتە و تووڕەن. ئەوان بەباشی بەوەیان زانیوە کە هۆکاری سەرەکیی هەموو کێشەکانی ناو کۆمەڵگای ئێران، ئەم دەسەڵاتەیە. یەکەکانی موقاوەمەت (شانەکانی شۆڕش) توانیویانە لە پرۆسەیەکی چڕی چەند ساڵاندا، پشتگیریی خەڵک بۆ لای خۆیان راکێشن. ئێستا ئەوان رەگیان لە نێو کۆمەڵگای ئێران داکوتاوەو پشتیوانییەکی بەهێزی جەماوەرییان بەدەستهێناوە. ترسی رژێم لەشانەکانی شۆڕش ئەوەیە کە بوونەتە مایەی ئومێدی خەڵکی ئێران، سوتاندنی پەیکەرەکەی قاسم سلێمانی خەڵکی ئێرانی دڵخۆش کردو ئۆمێدیدایە خەڵکی ئێران کە دەتوانن بەوەی دەیانەوێت بگەن.